الهام {باللهجة الجزائرية}.(قيد التعديل)

فرد جديد

♤الهام♤

بعد شهرين ملي مرضت بالحمى كنا نورمال كنت صح زعفانة عليه ومانهدرش معاه بزاف مي ندير واجبي بما اني مرتو .. هذي الليلة ماعلاباليش علاش طول راهي الثلاثة تاع الصباح ومزال ماجاش راني ناكل في روحي ندور رايحة جاية .. قلت خلاص نروح نرقد وخلاص راه طول بزاف وغدوة يسترها ربي ..

•°الساعة العاشرة صباحا °•

نضت صباح ربي واول عفسة درتها هو نضت نجري للبيت تاعو وتما وين بدا الخوف لي يبانيكي يركبني بيسك مكاشو والبيت مفروزة كي كانت لبارح بديت نخمم ياربي واش ندير واش ندير .. لقيت زوج حلول اللول نلبس ونخرج نحوس عليه يا فالشاريكة ولا في دارهم ولا ماعلابالي .. ولا نعيط لدارهم... عيطت رفدتلي الخدامة سقسيتها اذا جا ليهم قاتلي بلي لبارح كان عندهم وليوم الصباح  راح للمطار عندو خدمة في ايطاليا .. 3 ايام ويرجع .. و وقاتلي قبل ما نشكرخا ونغلق "ويستحسن جي تقعدي معانا هاذوا ليام مابيدما يجي " ...
.
.
.
انا آاااخر من يعلم ماعليش سي امين صحيت ..صحيت بزاف .. لا زدت هدرت معاك انا لي مايسمونيش الهام .. وآخر شي خممت نديروا خو نروح لدارهم .. وقررت نقعد وحدي حتى يولي ..
.
.
.
جازوا 3 ايام عليا رهجج مرضت فيهم .. ماوليتش ناكل مليح وغير نشم ريحة تاع الماكلة نتقيا هاذي ماشي مليوم عندها وحد زوج سمانات ولا و لبارح كنت قاعدة نورمال حتى نحس في راسي يوجع وماحسيت بوالو غير كي فطنت ولقيت روحي طايحة فاللرض تغاشيت.. باينة بلي هذا كاامل من نقصان الماكلة .. وليوم يجي امين درت لفطور وستنيتو وكي العادة هو خراااااااااااااا وماجاش لحقت الخمسة تاع لعشية فاوقت لغدا  رميت كلش وقعدت فالبيت نندب حالتي من نهار تزوجني مانقولش تزوجنا بيسك سيف عليا ... وانا هكاك حتى نسمع صوت الطونوبيل تاعو و الغاراج .. مسحت دموعي بالزربة وجيت رح نهبط ... وصلت عند الباب بدلت رايي والله ماراني هابطة يروح يزمر ...
سمعت طبطيب فبيتي مي ماحبيتش نرد يروح يزمر بعيد عليا مارانيش في حالة تسمحلي نشوف وجهو...

♤امين♤

ضطريت نروح لدارنا باش ندي وحد لورق كنت خليتهم قبل مانتزوج وكي رحت سيفوا عليا نبات صباح ربي عيطولي علا اجتماع اضطراري لمشكل فالفرع تاع ايطاليا فالمصنع تاع العطور .. فرحت من دارنا ديراكت هذا كامل وكنت نخمم في ردة فعلها كي نولي للدار هذا واش كان يدور في بالي هاذو 3 ايام كي وليت لدزاير حبطت ورحت للدار كنت نستنا فيها توقف عند الباب تستنا فيا نلحق مي تشوكيت كي رحت ومالقيتهاش عند الباب وتما عرفت بلي درت غلطة ... وغلطة كبيرة رح تردني عشرة خطرات للور .. طلت لبيتها طبطبت خطرة زوج تلاتة واالو الوغ فتحت الباب لقيتها راقدة ومكورة فالكوات ..

تقدمت و حطيت يدي عليها ..
امين:الهام...الهام راني وليت نوضي عمري ...

زيرت لغطا وزحفت كي الدودة باش مايقدرش يتوشيها ...