#متاهات_القدر

الثالث

#متاهات_القدر
بقلمي : فردوس عبد اللطيف
الثالث
. آآه من حنين . . وشوق وفراق آآه من دمع العين الهادر حين يراق بحار العالم زرقاء وبحاري يملأها الألم . . والحزن المستباح بفراق الأحبة الأعزاء بدت بحاري جافة أرضي قاحلة جدباء أكتست بلون الصحراء لا يسكنها غير التعساء.
السنه ٢٠٠٣
عادل : بوادر الحرب مبينه والوزاره على اهب الاستعداد
فيصل : تعتقد نكدر نوكف بوجه امريكا والحلفاء
مبينه خسارتنا بالمعركه على شنو عدكم انذار وخفارات
عادل : احنا اقسمنا ندافع عن الوطن نفديه بارواحنا
اني طالع وسيله ديري بالج على كروري
كرار : بابا خذني وياك اروح ما اكدر انام يم عمتي تشخر
وسيله : ولك كرار كولهه سنه واتزوج واعوفك يم زهراء
تالي تبجي علي
عادل : يجوز يومين ما اجي النقيب فالح هم وياي عدنا شغل هواي
فيصل : بيش تواجهون طائرات وصواريخ موجهه شعدكم غير بنادق خوي دير بالك ع نفسك من تشوفها تعلك انهزم وتعال للبيت احنا ما مستغنين عنك
عادل : افا عليك ابو عبيس اذا اني وغيري ننهزم منو يدافع عن ارض الوطن احنا من لبسنا العسكري معناها ارواحنا فداءا للوطن شنو قيمه الحياة بلا كرامه وذله
تدري اذا دخلوا الامريكان لوطنا شراح يسوون بينا والله يدخلون علينا لبيوتنا ومحد يكدر يعترض على اختراق حرمه بيوتنا ذولي جايين طمعانين بخيراتنا
وسيله حضرو اموركم كلكم تطلعون خارج بغداد كولكم وكرار امانه بركبتج ماتعوفي لحظه
اني راح ارتبلكم الامور وابلغكم بالموعد شوكت تطلعون
وسيله : تتوقع بقائنا خطر علينا ؟
ابو عادل : اني ما اطلع من بيتي
عادل : بابا وين حاتروح اشو لبيت ابنك زكي وهما خابروني ومحضريلكم غرفتين
اخاف عليكم لا بعدين تنغلق الطرق وماتكدرون تطلعون من بغداد لو تنقتلون بطلعتكم
كرار : بابا ابقى وياك احارب الامريكان
عادل : ابني اعرف بيك بطل وكدهه بس بعدك صغير من تكبر ... التحق بالجيش ودافع عن الوطن
كرار : بابا
حضني بابا عادل وطلع وهو يمسح بدموعه وبقيت ابجي لحد مانمت
******
عادل : فالح اكو اجتماع بالقياده خابروني
فالح : الله يستر من الجاي
عادل : بعد ما اجتمعنا بالقياده وتلقينا الاوامر والتوصيات
رجعنا لمقرنا
فالح : راح تنتقل حرب شوارع ويدخلون المدنيين بهالحرب
عادل : اني هم مامقتنع بنقل الصواريخ والاسلحه بالمدارس وبين البيوت ...
فالح : هذه اوامر القياده العليا ومنكدر نعترض
عادل : علينا التنفيذ بدون ما نناقشهم حتى ...شنو ذنب الي ميكدر يطلع من بيته حايروح ضحايا مدنيين هواي
فالح : زين هما شفكروا لما ينقل صاروخ طوله كم مترالى المدرسه ..قابل الامريكان مراح يشوفوه بالاقمار الصناعيه
عادل : والجواسيس الي بنصنا ينقلون الاخبار بالتفصيل
اني اتوقع نهايه الدوله بهذه الحرب
فالح : مبين انهيار للحكومه وربك يعلم شحايصير وراها
**********
يوم ١٨/٣/٢٠٠٣
كان موعد قصف العراق لكن تاجل الى اليوم الثاني
عادل : بابا مبين الشغله مابيها نقاش لحكوا طلعوا لا بعدين تنحصرون امريكا مصممه على احتلال العراق
وسيله : خويه امشي ويانا انت مستغني عن عمرك واذا رحت منو يبقى لكرار
عادل : اني مو جبان حتى انهزم واهرب ابقى ادافع عن ارض الوطن لحد اخر نفس واذا متت فالموت شهاده لان دفاع عن الوطن
ابو عادل : ابني مانريد نخسرك تعال ويانا
عادل : بابا ما اوصيك على كرار انت وسيله خلي كرار بعيونج اريدج تحافظين عليه
وسيله : ميحتاج توصي حريص ....كرار اني وياك ربينا
عادل : واذا متت رجعوا يم فيصل خلي يتربي بين اخوته
وسيله : عمرك طويل
عادل : السياره بره اخذتوا كل احتياجاتكم ؟
تعال باباتي لحضن بابا
كرار : بابا عادل يبجي واني ابجي
لحد ما اخذني جدوا وطلعنا لبيت عمي زكي
عفت بابا وعفت روحي وياه بدموع الحزن ودعته
هنا الدنيا اضلمت بعيني من فتحت عيني عالدنيا واني متعلق بعمي اشلون افاركه خصوصا لطفل بعمري
بوقتها مجنت اعرف منو اهلي منو امي منو ابوي كل الي اعرفه بابا عادل هو ابوي وهو اني وكل دنيتي
استقبلونا بيت عمي محضريلنه غرفتين واطفالهم  بعمري
صح من اكعد الصبح التهي باللعب وياهم بس اكو شي ينقصني وابقى عيني عالباب انتظر بابا عادل شوكت يجي
وبالليل ابجي اريد انام بحضنه ويسكتوني يكلولي انت نام وتكعد الصبح تلكي يمك
ومن اكعد الصبح وما الكي اكول شكد جذابين
*****
فيصل : الناس كولهه طلعت الا احنا وين نروح احنا وهالجهال منو يتحملنه ويتحمل جهالنا ولا يوم ولا يومين
انعام : كلمن راح يم كرايبه والي عدهم فلوس راحو اجرو بغير محافظات
اويلي علينا حانموت ببيوتنا ومحد يدفنه
******
بالليل بدأ القصف الامريكي على بغداد لكن اول ليله كان القصف خفيف وباماكن تخص الدوله
يوم بعد يوم زاد القصف على بغداد لحد ما انهارت الحكومه وهرب من هرب
عادل : احنا باقين نقاوم لحد الموت
فالح  : اني وياك عادل نعيش سوى ونموت سوى
وبدت المقاومه العراقيه بمجموعه من الضباط والتحق معاهم بعض المدنيين
اثناء الاحتلال
قتل الآلاف من القوات المسلحة العراقية وعدد قليل من القوات الأمريكية، كما قُتل العديد من المقاتلين الذين وفدوا إلى العراق قُبيل عملية الغزو، وقتل العديد منهم، وتحديدًا في منطقة الأعظمية في بغداد، كما نقل عن شهود عيان أن هؤلاء المقاتلين حاربوا بشدة وبأسلحة خفيفة ومتوسطة ضد آليات ومشات الجيش الأمريكي.
******
بعد سقوط بغداد
ابو عادل : وسيله تحضرو حتى نرجع لبيوتنا قبل ما تنهب بدأ البوك ..صح حاليا ملتهين يبوكون باملاك الدوله والبنوك بس وره فتره يرحون عالبيوت
واخوج عادل صارله فتره ماكو منه خبر اريد ارجع لبغداد اشوفه وين صفه بي الدهر وهذا كرار يكطع كلبي من يبجي عليه يوميه يبجي عفيه طفل هلكد متعلق بعمه
*****
كرار : رجعنا لبغداد
كطفل ماكنت افهم الفوضى الي حلت بالبلد ناس تركض يمين وناس تركض شمال والكل ملتهي القصور والدوائر بيها ناس مثل الدود من تجتمع على قطعه حلوى اما الامريكان منتشرين بكل مكان ويحملون اسلحتهم وبداخل الدبابات
كل همي ارجع اشوف بابا ينتظرني بالبيت ويستقبلني بحضنه
دخلنا لبيتنا ...فارغ مابي احد
ابو عادل : البيت فارغ عادل وين
وسيله : ممعقوله رايح لمكان انوب لا تلفونات ولا نعرف وين صفى بي الدهر
ابو عادل : اليوم تعبان من السفر باجر اروح اسأل بيت فالح
وين صارو الولد
اليوم الثاني
كرار : جدي راح لبيت عمو فالح اهله هم باقين بقلق ومن يومها انطفت شمعه بيتنا واحنا ندور على بابا عادل جدي وابوي فيصل وعمو زكي واهل فالح يدورون مابقوا مكان ناس دكول التحقوا بالمقاومه واحتمال انقتلو او تأسرو واحتمال هربوا لسوريا او للاردن
الايام تمر وكل يوم نسمع خبر عن بابا وعمو فالح ونروح وماكو بقينا فتره لحد ما سمعنا انهم التحقوا مع المقاومه الي دافعت عن ارض الوطن بدمائهم لكن وين مصيرهم ؟
ابو عادل : بنتي اني تعبت من التدوير وحتى اعصاب مابقت عندي اليوم اخر يوم اروح على مكان كالو مأمنين بعض جثث مجموعه من الي قاوموا الامريكان واليوم يطلعون جثثهم وخايف لا الكي عادل وياهم
كرار : فعلا جدي راح وشاف ابنه عادل مامن بحديقة احدى المستشفيات وكانت ايده طالعه لبره بابا عادل وعمو فالح اثنينهم سويه هما اصدقاء من ايام الدراسه ومجانوا يفترقون عن بعض وحتى موتتهم سويه
هذا اليوم الي لكينا جثه بابا عادل كان يوم القيامه بالنسبه الي
شكد بجيت شكد نزلت دموع ابد ماتوقفت لان عرفت الموت معناه يروح بعد مايرجع مثل بيبيتي من ماتت راحت وما رجعت  بعد ،،،،
الكل بالفاتحه بجوا علي اكثر من بجيهم على فراك بابا عادل
تعجز الكلمات وصف حالتي الي شعرت بيها بهذه الايام
حتى جدي من يومها تمرض وانضرب جلطه وانشل نص جسمه
دخل الحزن كلبي من ذاك اليوم وبديت مرحله بحياتي مختلفه عن السابق اشلون اكمل العمر بلياك ابي الغالي

يتقطع  قلبي شوقاً للقياك. أبي أبكي بكاءً جنونياً لا يتصوره احد وأني لو كتبت عن مدى شوقي لك إلى نهاية الدهر لما أنتهيت، وأني لو كتبت لأنتهى الحبر، ولأمتلئت الصحف، ولم أنتهي، فأي كلمة تعبر عن شوقي لك.
من يومها صرت ما اشعر بالمكان ولا بالوقت صارت الدنيا ظلمه شعور غريب لما تفقد السند
من كثر الحزن توفى جدي وبيتهم مابقى بي غير عماتي

******
وسيله : لج زهراء كرار ماكو وين اختفى دورت البيت كوله
زهراء : هذا اشلون بي اخاف مثل كل مره يروح عالمكانات الي جان عادل ياخذه الهن يبقى يبجي ويرجعلنه عيونه حمر
وسيله : خايفه عليه هالولد من كثر ماهو ذكي تحسي شايل هم الدنيا فوك راسه
دخل كرار عيونه حمر من كثر البجي
زهراء : هذا هو اجاج
وسيله : تعال يابعد عمتك خلي اغسل وجهك تعال حبيبي
فيصل : وسيله اني اعرف طلبي مو وكته وانت ربيتي كرار بس المدارس حاتبدي والولد لازم اخذه عدنا نتحمل مسؤليته انت هم تشوفين حياتج خو ماتبقين مخطوبه
وسيله : ياخويه يازواج اشو من عزا لعزا شتزوج
فيصل : هذا حال اغلب الشعب العراقي وخطيبج اجاني وطلب مني هالطلب جم دوب يبقى ينتظر تزوجو بدون حفله وهلاهل روحي كملي حياتج خو ماتبقين معلكه والرجال انتضرج هواي كافي وسيله اني اخوج واسمعي كلامي
وسيله : وزهراء وين تروح ؟
فيصل : ابن عمج خطبها وهم اذا توافق تتزوج هسه لو تاجل عرسها لبعد سنه بكيفها
وسيله : زين شوكت تريد تاخذ كرار ؟
فيصل : هسه اخذه اذا ماعندج مانع
وسيله : والله ياخوي بلكي يلتهي ويه اخوته لان وظعه معاجبني الولد على طول حزين وساكت ويعوفنا ويطلع يروح عالمكانات الي جان عادل ياخذه بيهم ويبقى يبجي ويرجع ينام حتى اكل مياكل
والمرحوم وصاني اجيبه يمكم اذا توفى كانه جان يعرف بموته سوده علي
فيصل : وفاة عادل تركت اثر علينا كولنا بس كرار اكثر واحد جان متعلق بي بلكي من يجي يمنا يلتهي ويه اخوته يلعب وياهم وبمرور الوقت راح يتأقلم ويانا بالبيت
وسيله : اروح احضر ملابسه واغراضه
*******
كرار : اخذني بابا فيصل لبيتهم مثل اليتيم الي جاي لبيت اقاربه هذا شعوري كان حتى اخوتي استقبلوني فرحوا بي
لكن اكو غصه بداخلي شعور بالضياع بالغربه
من دخلت شفت امي انعام بالمطبخ جتي من سمعت الجهال تجمعوا علي
انعام : ها اخيرا رجعت لاهلك ..ولك احنا اهلك اني امك الي حبلت بيك وهذا فيصل ابوك
بس انت تنكرت لوجودنا وجلبت بعمك
فيصل : انعام بصوت عالي خزرهه ابوي
ماكو داعي لهالحجي هذا بيت ابوه وانت امه وذولي اخوته
تعال باباتي ودي ملابسك بذيج الغرفه ويه اخوك علاوي
وحضر نفسك باجر انقلك بالمدرسه ويه اخوتك تداوم
كرار : بهذا وظعي ما اكدر اتكلم اي كلمه بس اأشر براسي نعم رحت للغرفه يم اخوتي وسمعت ابوي يصيح على امي
وهي هم صوتها عالي
ترقبوا البارت القادم
الى اي متاهه ستأخذك الاقدار ياكرار هل لحضن الام الحنون ام للمجهول ؟ انتظروني
****فردوس عبد اللطيف *****