#متاهات_القدر

خامس

#متاهات_القدر
بقلمي : فردوس عبد اللطيف
الخامس
دع الأيام تفعل ما تشاء ..... وطب نفسا إذا حكم الزمان
ولا تجزع لحادثة الليالي ..... فما لحوادث الدنيا بقاء
وكن رجلا على الأهوال جلدا ..... وشيمتك السماحة والوفاء
كرار : هجيت من اهلي ليله ظلمه حافي تايه ما اعرف وين رايح بس المهم اهرب من امي الظالمه تعبت من عذابها
الكلاب السائبه تركض وكلما اركض تركض تعبت بعد ما اكدر اركض رجلي ماتشيلني لازم اتشجع واوكف ياما يعضوني او اواجهم وبيش اواجهم
توقفت عن الركض سلمت امري لرب العالمين ....
خليت ايدي ع ركباتي وبقيت اتنفس سريع واجر الهوى جر النفس ماحسه يدخل برئتيني
باوعت عالكلاب سكتو من شافوني توقفت
جوي منهم اثنين واحد صعد ع صدري والثاني تمرغل بالارض بس شنو اني ميت بدمي
توقعتهم حاياكلوني تبسمرت ماتحركت من شافوني هيج واني اطلب من رب العالمين ينجيني منهم
من شافوني ساكت مانحركت عافوني ورجعو ويه جماعتهم
بقيت صافن وحدي بالشارع اظلم الساعه تقريبا بعد ال ١٢ ليلا الشوارع فارغه
وين اروح بهالليل وبشكلي هذا اني حافي
جريت نفسي بخطواتي البطيئة واني افكر
الى اين الهروب يا كرار اين المفر
شكول شحجي اكول امي تعذبني اخاف احجي اخاف اكول لبابا فيصل لا بعدين تأذيني
اذن اهرب الى المجهول
اهرب كرار اهرب وبعد ما ارجع للبيت ما ارجع للعذاب
بالطريق شفت محل دوشمجي مطلع المحل من بيتهم ومخلي الاغراض بالشارع سرير عرسان ودوشك ومغطي بشرشف
اي ولك كرار خوش مكان
وخرت الشرشف وتمددت عالدوشك وتغطيت بالشرشف
صح المكان مريح بس اني وين اكدر انام بقيت بقلق بس المهم ختلت
الدوشمجي بالليل يطلع يتفكد اغراضه اخاف تنباك
طلع ابو طالب من بيتهم جنت مغطى ماحسيت بي اجه كعد عالسرير الي اني نايم بي وصارت كعدته على ايدي
اريد اجرهه ماكدرت
حس بي عرف اكو شي تحت الشرشف
وخر الشرشف باوعتله رجل كبير بالعمر شعره ابيض
اخترع من شافني كوم بابا كوم
ابو طالب : وين اهلك ؟
كرار : اني اندلهم لان بيتنا مو بعيد بس ماريد ارجع لامي
عمو اني تايه ما اندل اهلي
ابو طالب : تعال بابا امشي وياي للبيت
ام طالب وينج
ام طالب : هاي اشبي الطفل يمه خطيه وين لكيته بهالليل
يمه وين اهلك ؟
كرار : ماكدر ارد مدنك مكسور
ابو طالب : الولد ضايع اخذي ودي للحمام انطي ملابس من
هدوم الولد وخلي يسبح وانطي شي يلبسه برجليه باعيله حافي ومبين عليه ابن خير
ام طالب : تعال يايمه شنو قصتك ؟ هذا الحمام ادخل اسبح وهذا خاولي وملابس
كرار : دمعت عيوني ام طالب احن علي من امي
سبحت ارتاحيت
ام طالب : حجي اخاف الولد وراه طلابه مشاكل
ابو طالب : اشلون اعوفه طفل بهالليل ؟ راح اتصل بالشرطه
كرار : طلعت من الحمام كعدت يمهم
ام طالب : يمه تعال اكل اكيد جوعان
كرار : كعدت عالاكل مثل الي مشايف طول عمره
شكد ناس طيبين حتى اكلهم طيب اكلت واكلت شبعت بطني
بيت ابوي ما اشبع هيج
سلام ابن ابو طالب : تعرف تلعب بلي ستيشن
كرار : اي اعرف (الحقيقه لا اعرف ولا شايفه بس كلت خلي العب وياه )
وكل ما نلعب كيم هو يفوز
شعرت بالدفو والحنان يمهم كلما اخسر نضحك اني وسلام
اندك الباب دوريه الشرطه فوك راسي
اخذوني رجعوني لبيتنا ومن وصلت سمعت صوت صياحهم
  امي وابوي صوتهم عالي وماعرف شنو السبب بس اني عقلي وفكري مشغول افكر بلصبح شراح تسوي بيه
تعاركت ويه ابوي واسمعهم
فيصل :ً حقيره جان الولد ضاع من ايدينا انت مبين عليج مآذيته عبالج مجاي اعرف دا اشوفه مكسور
انعام : الله يخلصني منك ياكرار
فيصل : لزمها من شعرها وركعه بالحايط
  ولج  كلشي ولا كرار 
انت دا تفرقين بمعاملتج بينهم ليش اخوه التوأم ملابسه مرتبه ونظيفه وكرار مبهذلته ليش ولج مو ذولي ربو بطنج
فرقتي بينهم ولج اثنينهم ولدج
واكولج من اليوم كولشي ولا كرار افتهمتي ؟
شبعها كتل اني من خوفي كعدت بمكان واحد انتضر يصبح الصبح ويروح ابوي واخذ عقابي لان اعرف مراح تعدي سلامات بس اخاف احجيله لابوي
  صبح الصبح ...اويلي علي
انعام : بيدهه جك ماي صبته علي واني نايم كوم ولك
اخذتني للحمام
اكو سطل بي ماي
لزمتني من شعري وتنزل راسي بالماي لحد ما اختنك
وتطلعه وتنزله  تخليني لاخر نفس وترجع تطلع راسي تخليني اجر نفس
تكررت  بهالتعذيب تقريبا خمس مرات
واني بلحضتها تمنيت الموت من صدك
جرتني من ياختي بعد الخنك  طلعتني بالحديقه
انعام : اوكف هنا بالشمس بالحديقة
إلى أن نشف المي
بعدها دخلتني للبيت
تكفخ تكفخ ع راسي وراجديات
انعام : هاك اكل
كرار : هاي صابونه
انعام : اعرف صابونه  أكلها كلها ماتبقي شي
كرار : من الخوف اكلت منها حتركت معدتي وحلكي نشل من الصابون مررر احس بطني راح تنفجر اكلتها غصبا علي وكلما اتوقف ما آكل تضربني وضرب بقساوه
يالله خلصتها بلموت طلعت روحي
وره نص ساعه عافتني واني بطني تغلي وحلكي مفركس وماحس بي وبطني احس معلوكه بيها صوبه وكلسع اريد اتقيئ وره فتره تقيئت بس اختنكت من التقئ حيل حتى وغف صابون طلع متت بلحضتها تخربطت ضليت اون بلكاع
انعام :  كوم منغول وكفخ ودفرات
ادخل اسبح ماريد يبين عليك ماكل صابون
ودنكت علي وهي مخزوه بعيونها وتجر باذاني وتفركها
اذا حجيت لابوك اذبحك الي شفته اليوم قليل بحقك جايتك ايام سوده ابقى انتقم منك لحد ماتموت ياعار
بعد مارجع ابوي خزرتني اوخر من يمه خفت وخرت ابتعدت عنه لاينتبه ابويه
*******
اول يوم العطله الصيفيه
الناس بالعطله تريد تنام صيف والجو حار ابوي من طلع ب ٦ الصبح ماحس الا دفره برجلهه ساعه ٦:٣٠
فزيت مخترع بالنسبه لجسمي تعود عالضرب اذا ارفع التيشيرت كوله خطوط ضرب الصوندات
انعام : كوم النوم مو الك
كرار : وين اروح  خالى
انعام : خلاله تخلخل ضلوعك ياعار كوم اكو عربانه حديد بالباب من اليوم تكعد بالسته ونص من يطلع ابوك للشغل تطلع بالعربانه
كرار : وين اروح ...اريد اكولهه يمه ماتطلع من لساني
انعام : شنو انت متفتهم لو غبي روح اشتغل بالسوك
كرار : شسوي ششتغل ؟
انعام : ولك تشتغل حمال النسوان الي تتسوك تفتر وياها بالعربانه وتحمل مسواكها للتكسي واسمع ماترجع للبيت الا تجيبلي ٢٥ الف واذا ما جبت هالمبلغ لاترجع تعرف اموتك كتل افتهمت لو لا
كرار : اي اي خلي اكل شي البارحه ماتعشيت
انعام : تاكل حو امشي ولك روح هناك اكل هما اهل المحلات ينطوك اكل وخر من وجهي بسرعه ماريد اشوفك
كرار : اعرف اذا ابقى دقيقة حانكتل خلي اطلع بسرعه
اخذت العربانه حديد طبعا المنطقه الي كاعدين بيها شوارعها محفره كوه تمشي العربانه واما اذا مطرت تغرك الشوارع نحتاج بلم حتى نعبر
السوك مسافه قريبه علينا
اول يوم انزل هيج مكان ماعرف شسوي شفت اطفال اشكال والوان الي شايل علاليك يبيع والي جايبله عربانه مثلي يحمل
اما الناس فهو سوك وبي ناس من كل اطياف المجتمع
صعب علي اركض وره النسوان واكولهه خالتي عربانه خالى احملج اغراضج لكن تذكرت كلامها اذا ماترجع ب ٢٥ لا ترجع كنت متردد وين انطي وجهي ليش اني وحدي طلعتني ليش مو اخوتي اسئله كثيره
زين اذا دكول هي امي ليش تعاملني هيج واخوي التؤام بغير معامله احترت واحتار زماني
حسن : اشبيك صافن الدنيا ماتسوى
كرار : لا ماتسوى بس اني اول يوم انزل للسوك وما اعرف شسوي وامي كالت ماترجع الا بيدك ٢٥ منين اجيبلهه
حسن : الرزق ع الله محد يكدر يحدده تعال وياي اكو تاجر يريد نحمله اغراض من المخزن للمحل وينطينا القاسمه الله
كرار : ركضت وياه عالسريع وحملنا الاغراض
الشغل كان شاق ومتعب لكن وراه اخذ فلوس اوديهه الهه
كنت جوعان اباوع عالمطعم روحي انسحنت اشتهيت اكل لفه
ابو محمد : صاحب المحل صاحلنا وانطونا لفات بيض سلق
اوووف جانت شكد طيبه لان كنت جوعان وحتى شغل مابي اشتغل بس من اكلتها ردت روحي وركضت كملت تحميل
من يومها تعلمت عالسوك من خلال حسن لكن شحجيلكم عالسوك والي بي والي شفته يراد نحجي جرايد
حسن يتيم الاب وهو معيش عائلته متحمل مسؤلية امه واختين
وهو عمره ١٤ سنه وحياتهم صعبه كاعدين بيت حواسم
ومعتمدين على حسن والمسكين تحمل مسؤليتهم بهذا عمره
بقيت ذاك اليوم للمغرب بالسوك المحلات عزلت واني كل الي حصلته ١٥ الف اخاف ارجع وتضربني
بس ماعندي حل اخر لازم ارجع بعدين تعلمت عالضرب
رجعت للبيت ابوي مموجود
انعام : ها ولك وين الفلوس ؟
كرار : هاج انطيتها وايدي ترجف لان اعرف حانكتل
انعام : شكتلك مو كتلك تجيب ٢٥ ؟ طلع جيوبك
كرار : فتشت بجيوبي مالكت شي
انعام : روح اخذ عباس فرفره بالمنطقه ضايج
اخوي عباس عنده انفصام بالشخصيه مرات يضرب الاولاد بالشارع  والجوارين اشتكو منه وابوي موصيها لازم مايطلع
بس تريدني اخذه افره حتى يتعب ويدوخ ويرجع للبيت ينام
لان مرات من تجيله الحاله يضرب حتى امي يضربها ويأذيها بس من يشوفها تضربني مايقبل تضربني
رحت سبحت وبدلت شكد جنت تعبان وجوعان لكن ما كدرت احجي  من طلعت من الحمام هي جانت بغرفتها ركضت عالمطبخ مالكيت غير باقي شويه مرك وخبزه يابسه اكلت عالسريع قبل ماتجي واخذت عباس وطلعت
افترينا بالمنطقه لعبنا وضحكنا عباس يضرب الكل الا اني مايضربني ومرات من يكعد يسولف كل مره يحجي كلام مختلف عن السابق
رجعنا ب ٩ بالليل كعدنا متونسين
عباس : بابا امي اليوم ضربت كرار موتته
فيصل : ولج اني ابتليت بيج ولج ميفيد وياج الحجي
جرهه من شعرها وضربها جلاليق موتها ضرب ويكولهه الا كرار
انعام : الله ياخذه كرار بليتنا بي بلوه هذا العار وبعدين انت تصدك حجي عبيس المخبل ؟ جذاب
وهي تحجي وهو يضرب من خوفي اخذت عباس وصعدت فوك بغرفتنا من التعب خليت راسي عالمخده ونمت توني غافي وما احس الا تكرمون تفله بوجهي باوعت عباس جته الحاله ...سكتت عفته شسويله
نمت ذيج الليله مرعوب
اليوم الثاني الصبح الساعه ٦:٣٠
كرار : جتني دفره بخاصرتي
كوم ولك كوم ...بيدهه جك بي نفط ربع الجك وصونده باليد الثانيه
تشوف ابوك يضربني بسببك وانت ساكت
وضرب بالصونده تضربني عالمكانات الي تحت الملابس بحيث ميبين الاثر الا من انزع ملابسي
انطتني الجك جنت مامتريك
انعام : اخذه اشرب ولك اشرب تخنزر علي وتضرب بالصونده ضرب مؤلم وقاسي
اخوتي يباعون بس مابيدهم شي ميكدرون يتصرفون كلهم يخافون  منها  بسبب التعذيب الي تستخدمه وأكثر شي القساوه وياي بعنف ماعرف منين جايبه هالاساليب الي تستخدمها
انعام : ابوك البارحه يضربني بسببك وانته اتباوع وماتحجي كلمه ماترد ابوك وانت مكيف
افتح حلكك واشربه
يالله وضرب ع راسي ورجلي وين المكان الي يلسع صفاحي ضهري وجانت من تضربني ماتبقي أثر
بس تحت الملابس بحيث اذا ارفع التشيرت جسمي مزورك شايفين السبحه مطبوعه على عدد الخرز لو شخوط صوندات لو تكرص وتفر ايدها بصفحتي مزورك جسمي كله واني اتحمل بلقدره شون مادري
اضطريت اشرب من النفط ختنكت ضليت اكح اني واكح تصيح بذاني كمله كله للأخير واني ابجي واشرب وابجي وتضرب بيه اصيح اخوتي يبجون وياي وينهزمون إلى أن خلصته بطلعان الرؤح جنت احسها تريد تموتني موت بطيئ وجنت مفكر اني اموت ع ايدها ....
ركضت عالحمام وتقيئت النفط وهي تصيح موت ياعار موت الله يخلصني منك طلع النفط من خشمي وحلكي
غسلت وطلعت بالحديقة ابجي
عاطت علي
انعام : روح ولي للسوك اطلع للشغل شعندك كاعد
كرار : واني مختنك واكح بس ماهتمت
طلعت للشغل وتعلمت من الولد اركض وره النسوان (خالتي تحتاجين عربانه ؟)ً احاول اجمعلها ال ٢٥ بكل طريقه لازم اجيبلهه هالمبلغ بس لان عطله والعرباين كثرت كوه نحصل كروه ....
حسن : تعال كرار ابو محمد عنده كروه امشي بسرعه
كرار : ركضت عالتاجر واشتغل واشتغل لحد ما ينهد حيلي
احاول اتأخر بالشغل حتى ما ارجع للبيت وجحيم امي
وشي ثاني لازم اكمل المبلغ الا يصير ٢٥ /اما اليده مال العربانه حاره نار بسبب حراره الجو ايدي تحترك من الزمها
بقيت لحد صلاة العشاه دبرت ال ٢٥  طبعا هذا المبلغ اكثر من راتب ابوي ورجعت فرحان بلكي اليوم ماتضربني
انعام : جيت وجه البومه جيب الفلوس
كرار : انطيتها الفلوس جنت فرحان وتعبان تمنيت اسمع منها كلمه حلوه لكن اخذت الفلوس  وعقجت وجهه وراحت
كرار : يمه نعالي انكطع اريد اشتري نعال
انعام : اكل خرى تريدني اصرف عليك روح اخذ ابره وخيط وخيطه
كرار : مايتخيط من يم الاصابع وكعت  قطعه منه ورجلي تصير بالارض واصابعي تمزقت
انعام : ماكو غيره تلبسه وتنجب افتهمت روح ولي من وجهي
كرار : خوفي منها يمنعني اطالب باي حق من حقوقي
بقيت بنعالي المكطع بعد ماخيطته واصابيعي تورمت لكن هي ماتشوف غير اجيبلهه ال ٢٥
******
ترقبو البارت القادم
متابعيني هوايه استفسارات عن احداث القصة وهل حقيقيه ام خيال
اعزائي القصة حقيقيه ومن لسان بطلها كرار صح غريبه وخالفت قانون الحياة لكن لكل قاعده شواذ
واتمنى اشوف طبيب نفسي يشرحلي حاله ام كرار وسبب تصرفها مع ابنها وتعذيبه بهذه الطريقه البشعه
ومن تكمل القصه احب اسمع آرائكم بالاحداث
******بقلمي فردوس عبد اللطيف*****