رجعت بيتنا مصدعه شديييد ، قعدت في الغرفه باكل في ضفوري و غضبانه شديد من معمر ! خلاص فهمت انو قايلني مجنونه و بتهيأ و ما مصدقني ، زي الدكتورة برضو ! ما بفرق شيء من الناس .. بس بعد شوية اتذكرت غفران و غضبتا زيادة انا ما عارفه بالضبط المغضبني شنو ! كلامو معاي ولا لأنو طلع مرتبط ! قعدت شويه كده في السرير بجر في شعري و بقطع فيهو من النص و انا سرحااانه ، جاتني صورة غفران في وشي .. البت دي جميلهه كده كيف! بدون شعر بدون ميكب ! انا كنت متخيله اي وحده محجبه مبهدلة و بتتبهدل زيادة بالطرحه و اللفات الغبيه البشوفها ديك كرهتني الحجاب زيادة ؟ غفران دي جميله و نضيفه كده كيف ؟ قمتا على حيلي دخلت الحمام وقفتا قدام المرايه ، ساااعه بعاين لنفسي في المرايه ، مابشبه البنات كده مالي! ما بهتم بي نفسي مالي ؟ انا عايشه في عالم تاني ليييه ؟ انا حياتي كئيبه كده ليه ؟ قعدتا في الارض بتاعت الحمام و بكيت الكحل كان سايل و سال زيادة بعد البكا و الدموع الطلعتها 😭 قمتا تاني و وقفتا في المرايه سرحانه في روحي ، انا حلوة ، ملامحي حلوة و الله 😭 انا احلى منها بكتير .. طيب ليه بتشاف مضلمه كده ؟ و انا في الحمام اتذكرتا كلام ابوي الله يرحمو ، لقاني يوم قاعدة بصلي و انا صغيرة جا قعد جنبي في المصلايه و حضني عليهو مسااافهه كده و قال لي يا سندس عارفه انتي حلوة كده ليه؟ و ملامحك حلوة ؟ قلت ليهو ليه يا ابوي؟ قال لي اي زول في الدنيا في وشو في نور واااحد بخليهو يتشاف جميل الملامح ، النور ده بخلي الناس تنجذب ليهو وترتاح ليهو و تحبو ؛ النور ده بخلي عندو هيبه في اي مكان يمشيهو .. لو الزول حافظ عليهو بعيش جميل الخلقه والاخلاق و لو ما حافظ عليهو بكون مضلم و باهت و وشو كئيب و الناس ما برتاحوا ليهو ولا بحبوهو .. قلت ليهو نور شنو ده يا ابوي ؟ قال لي نور التقوى عارفه بجي من وين ؟ من الصلاه الصحيحه البخشوع و من قراية القرآن و من النيه الطااااهرة البيضا السليمه و من القلب الابيض المافيهو امراض القلوب الحسد والحقد و الغل .. النور ده انا شايفوا فيك يابتي و شايف عندك درب اخضر وااااسع لقدام و شايف انو انتي الوحيده الفي اولادي الحتكوني لي خلف صالح في الدنيا دي❣ ... النور ده ظاهر من ملامحك الجميييله ، اتذكرت كلام ابوي و انا سرحانه في المرايه في ملامحي البقت ما مريحه لا لي ولا لمخلوق غيري .. انا كيف كنت صلايه وبقرا قرآني و بسبح ! و كنت بقرا قصص الأنبياء و زوجات الرسول و ده كلو و انا صغيرة؟ كيف بقيت بنت بالطريقه دي لمن كبرت ؟ متين هجرت السنه دي كلها ! بالأصح هجرت الدين كلو ؟ ده السبب العكس علي حياتي؟ ولا السبب وصية ابوي دي قبل ما يموت " حافظي عل صلاتك " وكأنوا كان شايف قدامو ملك الموت و هو بناديهو . بعد وصيتو دي بي تلاته ايام فارق الدنيا و فارقني للآبد .. كان شايف دربي الآخضر كيف ؟ و انا بعد فراقو فارقت الطريق الصاح كلو ! .. طلعت من الحمام قعدت في السرير بعاين للمروحه في السقف بتلف ، المصلايه مركونه هناااك في الزاويه و انا بي هنا بعاين للمصحف مركون هنااااك .. قمت عليهو وقفت عاينت ليهو و للمصلايه اتذكرت كلام احمد و قراية يس بالمبين ، سألت نفسي ياربي احمد ده كلامو صاح؟ في سري كده قلت لو صاح كدي اجربها في معمر ؟ و انا بضحك مع روحي قلت ادعي بشنو طيب؟ قلت ادعي انو يكون ما مرتبط؟ طيب لو احمد كان بهظر معاي ! خلاص كدي اجربها و دخلت اتوضيت ولبست العبايه و جيت وقفتا كبرتا .. قريت لحدي المبين الاولى في الركعتين الاوائل و سلمتا و تاني ركعتين و فيها لحدي المبين التانيه و وقفتت وسلمتا .. لحدي ما صليت ال 14 ركعهه و خلصتها .. و قعدت دعيت اول بي إنو ربنا يهديني و بعدها يشفيني و بعدها لو معمر ما مرتبط ربنا يحببني ليهو .. و في لحظات رجعت زي الطفله البريئه البتتطلب من ربها طلب بسيط بطريقه بسيطه بدون تكلف ، يارب انا حاسه اني بحبو فا لو هو بحبني اجمعني بيهو .. رددت الدعاء ده كم مره كده وكأني بطمن في روحي انو ربنا حيستجيب ❣ تكون دي النية الصافيه القصدها ابوي؟ بعدها شلت المصحف وقريت الاربعه ورقات زي ما وعدتا احمد اني اقراهم ، بعد ما خلصت قمتا على حيلي و رقدتا في السرير شلت السبحه و بديت استغفر بس ، لحدي ما نمتا و انا ماسكاها احمد جا بالليل دخل لقاني نايمه كده في الغرفه براي و امي و خنساء في الحوش راقدين بتونسوا .. صحاني سندس قومي اتعشي جبت بوش ظااابط قومي ، قلت ليهو ماقادرة والله يا احمد جسمي واجعني قال لي معليش قومي اكلي برضو امي قالت لي ما اتغديتي ، قلت ليهو ماقادرة والله تعبانه شديييد و جسمي واجعني كلو😭 خلوني انوم .. قال لي حاضر طيب قومي ارح الحوش .. وقفني لاني كنت مدروووخه ونعسانه ، ساعدني اطلع العبايه بتاعت الصلاه و ساقني للحوش بره اترميت في السرير زي الجثة والهواء البااارد داك لمن ضربني نمت نومه ❣كانت نومه عميييقه ومريحه ، ما عارفه السبب كان شنو! البكا الريحني ؟ ولا القران القريتو ؟ صحيت الصباح و انا مرتاحه شديد ، كان نفسي اصلي الصبح ❣ صليتو قبل ما اطلع للجامعه .. لبست و طلعت بدري بعد ماشربت مع امي شاي اللبن بالصباح ، ركبت المواصلات و انا بعاين للناس بعين غريبه ! قلبي قبضني؟ اكون دايرة اموت ؟ انا ما طبيعيه ؟ امبارح نمتا بدون احلام؟ بدون اي شي! و الليله حاسه عيني ما عين دنيا ؟ نزلت من الحافله بقلبي القابضني ده والله و اتمشيت في الكبري .. ماشه بدون وعي و بدون هدف ..
