خلايا الحب

4

قاطعتها ، قلت ليها نازك انا ما حنفعل فيكي زي م انتي عملتي و للاسف انا بتكلم معاكي و بناقشك علي اتجاه انتي ما قادرة تستوعبيهو و حالياً محمد برا نقاشنا وكل الانتي قلتيهو دا انا عارفاهو تماماً و البينا حاجه انتي ما حتتخيليها ، قالت لي فعلاً ما حتخيلا لاني ما شبهك ولا عشت احساس حب قبل كداا .. قلت ليها شفتي ردودك يا نازك انا بتكلم في اتجاه وانتي في اتجاه تاني خالص ،
و يمكن يجي يوم وتقدري تفهمي ان فعلا قلبي عليكي وانتي عارفه تماماً انك اقرب من اخواني لي و انا كان غلطت فيكي اعفي لي وحقك علي البينا اكبر من كدااا .. قالت لي حصل خير ، ركبنا البص و رجعنا البيت ..
( خلوني اكلمكم عن نازك ، نازك دي صحبتي من 6 ابتدائي ساكنه في الحي الورانا ، مرات بحس انها بتقارن نفسها بي طوالي ان انتي يا ريان احلا مني حتي مرات لمن نطلع تقول لي ما تختي مكياج ، ف الموقف الحصل دا حمدت ربنا اني ما كنت معاها واضحه والا الله اعلم كان فهمت شنو ، وبصراحه ما عندي استعداد اخسرا حتي لو مقابل محمد ) ..
وصلنا من جينا جمب دكان محمد لقيتا مشت بسرعة محمد عاين لي باستغراب اشرت ليهو اني حكلمو تلفون ، و مشيت بسرعه حصلتها ونهائي ما اتكلمت معاها لحد اخر لحظة قبل اخش بيتنا حضنتها و قلت ليها حقك علي ، و اتصافينا و دخلت و قلت ليها لمن تصلي اعملي لي مسكول طمنيني انك وصلتي ، قالت لي سمح ،، خشيت البيت لقيت خالد في الصالون و معاهو عاطف ولد خالي
سلمت و بقيت داخله قال لي كنتي وين متاخرة نص ساعه ؟ قلت ليهو في الجامعه ياخالد ونسه بنات وكدا ف الزمن سرقنا ، اعفي لي وآخر مرة اتاخر ان شاء الله ، رد لي عاطف قال لي عروستي اخدي راحتك زول بيسالك مافي .. طبعا كلمة عروستي دي خلتني عايزة اشيل سكينة و اغزو بيها ، ابتسمت ابتسامة سخيفه ودخلتا ، سلمت علي امي و ساعدتها في المطبخ ، قالت لي بكرة اهل خطيب عبير ديل جايننا من العصر عايزة البيت دا يبرق برق يدك مع اخواتك ، قلت ليها عيوني يا احلاااا ام ، عايزة انوم شويه ي غاليه ناقصك حاجه ؟ قالت لي لا لا مشيت الغرفه ، لقيت 16 مكالمة من محمد اتخلعتا عديل ، تربست الباب و رجعت ليهو ، قلت ليهو حبيبي ، قال لي كنتي وين انتي قبيل ؟ قلت ليهو اصلا كنت حكلمك بس عشان كانت معاي نازك ما قدرتا احكي ليك ، بس هايج وصوتو عالي لمن زحيت التلفون من اضاني ، قلت ليهو محمد بسم الله ، لا اله الا الله حبيبي في شنو ، قال لي محمد رسول الله ، الليله لازم الاقيكي شوفي تتصرفي ، قلت ليهو صعبه خالد في البيت يا محمد ما تاجنن الصباح وانا ماشه الجامعه بجيك في الدكان ، قال لي ريان الله كم ؟ قلت ليهو وواحد يا محمد ، قال لي تتصرفي الساعه 7 بنتظرك في المكان زاتو ، اتوكلت علي الله وقلت ليهو خير .. اتصلت علي نازك ما ردت علي ، رجعت لي ، قلت ليها وينك ؟
قالت لي بهناك مع امي ، قلت ليها طيب م عارفه محمد دا مالو اتصل بي وهايج زي العرف قبيل كنا مع ناس مالك ، اسي قال داير يلاقيني الساعه سبعه و ما عندي طريقه لطلعه و انتي عارفاهو احمق ،
قالت لي حيعرف من وين قلبك الخفيف دا هو الحيوديكي في دهيه ، قلت ليها انا اصلا حوريهو انا ما بدس حاجه عن محمد ما بقدر ، قالت لي انتي عويرة ولا شنو والله توريهو حتخسري مافي راجل بتقبل كدااا ، قلت ليها استغفر الله يا نازك ، المهم تعالي طلعيني خالد في البيت ومستحيل اقدر اطلع ، قالت لي طيب علي كم ؟ قلت ليها الساعه 7 ، قالت لي تمام ، قفلت منها و بقيت داخله مارقه
داخله مارقه ، لمن جات 7 ختيت توب امي جمبي و بقيت منتظرة نازك تجي ، مشيت علي الصالون لقيت عاطف بس تاوقتا ورجعت لفيت البيت لقيت خالد طلع ، قلت مصيبه دي لو طلع مشوار في الحلة ، بس اتذاكيت و لبست التوب و مشيت علي باب الصالون ، بقيت واقفه و بنادي يا خالد عليك الله ناولني شاحنك ، رد لي عاطف خالد دا مرق يا ريان ، قلت ليهو اووف ما وقتو طيب طلع قريب ولا بعيد ؟
قال لي والله ما عارف لكن شايفو لبس و قشر ، قلت غريبه مالو ما ساق عاطف معاهو ..
المهم ثواني مافي جات نازك ، عاطف فتح ليها ، قالت ليهو انا صحبة ريان ، قاليها موجودة ادخلي ليها ، جاتني و كلمت امي انها محتاجاني معاها قالت لامي والله خالتو قبل شويه رجعنا من الدكتور كنته مع حبوبه وصرفو ليها علاجات كمية بس محتاجه لربان معاي نترجم الروشتات حقت العلاجات انا ما بقدر اديها العلاجات من غير ما اعرف الاعراض الجانبيه شنو ، وزي م عارفه ريان "اشطر مني" .. انا بسمع فيها لمن صدقتا وجات 7:15 ، امي قالت لي امشي معاها يا ريان و ما تتاخري ، قالت ليها بنوصلا لحد البيت يا خالتو ، قالت ليها تسلمي يلا اتحركو .. مشينا و نتلفت زي الحراميه اتصل علي محمد انتي وين ؟
قلت ليهو خليك واقف شايفاك ، انحنا بنتلاقا في الدكان حقو في المخزن ، وصلنا و نازك رجعت واتفقنا بعد اخلص بعمل ليها مسكول بتجيني ،، سبقني و انا دخلت وراهو ، عشان يحسسني بالامان بيخلي دكانو فاتح واي زول بجي داير يشتري بطلع ليهو من المخزن عادي وانا بكون جواا ، المهم قعدت لي في شوال سكر ، قال لي انتي كنتي مع منو الليله يا ريان و يمين بالله تكذبي تعدميني فاهمه ، اصلا طول الفترة الفاتت دي حاسك متغيرة معاي ، ولا عشان قربتي تبقي دكتورة و تمرقي من الحلة دي وتمشي علي المدن افتريتي من اسي ، طيب علي الاقل انتظري تستلمي شهادتك ، طبعا انا قاعده و مستغربه في اسلوبو اول مرة يتكلم معاي كداا ،
قال لي كان عايزة دكتور يكون قدر مستواكي
ابقي صريحه معاي ، بس قمت ليهو قلت ليهو انت مالك في شنو من ما جيت وانت بتتكلم و ترد علي نفسك يا محمد حتي ما مديني فرصه اتكلم معاك و لا ارد ولا اشرح
و لعلمك من يوم ارتبطنا لحد اللحظه دي انا ما كذبت عليك ولا في حاجه تخليني اتغير عليك انا ريااااااان يا محمد ، قبل ما تقول كلام زي دا اتزكر انا منو والبينا شنو والبتقولو دا مجرد تفاهات م بتفرف معاي وبالجد زعلت منك ..... الشي الما كان في الحسبان ولا المتوقع ان اتفاجأ بخالد اخوي داخل علينا
....... و من هنا ابتدت قصتي ( بقلم/سحر سمير) ..

استككانة🏃💙~

يتبع ........ توقعاتكم من اول اربعه اجزاء 👇