جا المساء و بعد صلاة العشاء طوالي جاتني رساله من معمر سألني فيها ،كلمتي احمد ولا لسه؟ رديت ليهو لسه عايزة اكلموا هسي ، رسل لي تاني يابت راجيه شنو ؟ قلت ليهو بعد اكلموا برجع ليك تمام ! .. مشيت لي احمد لقيتو راقد في الحوش بسبح قعد جنبو في السرير بطقطق في اصابعيني قال لي مالك ؟ قلت ليهو عايزة افتح معاك موضوع لكن خلي امي تجي ولا اوريك لا لا خلاص خليهو للصباح .. قام صنقر وقعد لي في السرير قال لي يابت في شنو ؟ انادي امي؟ قلت ليهو ما بحتاج امي هينه لكن انت المرعب .. قام ضحك و قال لي بابتسامه سندس في شنو يابت؟ قلت ليهو اساسا هو الموضوع حلال يعني انا خايفه من شنو و بقيت بطنطن بتحت يعني انا خايفه منك ليه ما عارفه .. ضحك بصوت عااالي لمن سمعني بطنطن و قال لي سندس جاكي عريس؟؟ قمت نططتا عيوني مخلوعه من انو احمد قال لي كده عادي يعني ما في خجل ولا حاجه؟ كررها لي تاني جاك عريس ولا شنو ؟ هو شنو الحلال يابت ؟ قمت قلت ليهو اي جاني عريس .. بالله لمن نطقتها العرق لمن يتصبب مني عشرة عشرة 💔😂 قال لي و خايفه كده مالك ؟ قلت ليهو والله ماخايفه لكن ماعارفه في شنو قام ضحك تاني .. قال لي منو العريس؟ قلت ليهو دكتور اسمو معمر قال لي لاقاك وين ؟ رفعتا عيوني للسماء فووووق اها لاقاك وين دي احلها كيييف 😂😂 قلت ليهو والله لاقاني في الجامعه على كم مرة كده مع صحباتي و قال لي دينا صحبتي انا داير سندس على سنة الله ورسوله لمن جات كلمتني قلت ليها انا ما بتاعت ونسات و طلوعات و لا عندنا كلامات زي دي لو دايرني داااك بيتنا يمشي عدييل بس✋ هداااك ابوي و اخوي احمد يطلبوا مني ، طبها انا ما اتخيلتا انو جادي لكن طلع ولد ناس محترم و مابتاع لعب فقال ليها ما عندي مشكله انو امشي اطلبها من اهلها ، قمت قلت ليها خلاص بكلم ناس البيت بعد يجي يطلبني منهم بتكلم معاهو بالتلفون و خلاص .. لمن سكت كنت شايله نفسي من الكذبه الكبيرة 💔😂 عاين لي احمد مساااافه كده و قال لي سندس ده الحصل كلو ؟؟ يعني انتي ما حصل اتكلمتي معاهو ابدا ؟ قلت ليهو ابدا .. قال لي خلاص ما ممكن يتقدم ليك كده طوالي ادي نفسك فرصه تتكلمي معاهو شويه و يجي البيت ما مشكله ، قلت ليهو كيف يعني؟ قال لي انتي صغيرة يعني و دي اول تجربه اعرفيهو شوية انا ما عندي مانع اني اعرفو برضو .. لو انتي اتكلمتي و حسيتي بشوية تفاهم نخليهو يجي البيت مافي مشكله و بعداك نبدا نسأل عنو الناس تمام ؟ عاينت ليهو واحترتا اقول شنو ؟ انا لازم اعترف قبل ما الخطوبة تفركش💔😭 قلت ليهو احمد قال لي نعم ؟ قلت ليهو والله يعني انا اتكلمت معاهو شويه بس لكن ما كتير .. ابتسم لي ابتسامه حنييينه كده و قال لي سندس انا عايز اقول ليك حاجه ، شال يدي ختاها في يدو 💟 و قال لي سندس انا اخوك و حاولت اكون صحبك بكل ما عندي .. رغم اني بحس بيك مرات كتيييرة بتنفري و بتخافي مني ، انتي اختي و صحبتي و حبيبتي زاتو .. كم مره كنت بحاول اوصل ليك انو الخوف الانت خاتاهو جوة قلبك اتجاهي ما عندو لازم ابدا ابدا .. انا ما حصل يوم ضربتك او اهنتك قدام زول بسبب حاجه ، اي نعم انا عصبي و مرات كتيرة بتشوفي لي مواقف مع خنساء بس ده ما بعني اني ما بحبكم ... بحب خنساء دي شديييييد انتي عارفه كده؟ عارفه ليه هي ما بتزعل مني رغم الشكل الطوالي ده ؟ لانها عارفه اني بريدها و بخاف عليها و حتى العصبيه البتطلع فيها دي من خوفي عليها ، انا بحبك انتي اكتر كمان و كلنا بنحبك لأنو انتي نور بيتنا🎀 انتي اخر العنقود و فراولتنا ، قايلاني ح ازعل لو قلتي لي انك بتعرفي زول و بتحبيهو؟ ما ح اتضايق ولا ح اجوط فيك ولا اكسر رقبتك .. بالعكس ح اقيف معاك و اتم ليك فرحتك لو اتقطع حته حته ، الحب اولا ما حاجة غلط او عيب ، الغلط لمن الناس تدس الحب ده من اهلها ، لانو الحاجه الفي الضلام لو ما غلط غلط برضو ... لكن لمن الناس توري اهلها بالحب ده و يكون علنا مافي مشكله بتواجهك ، تانيا انا ماعدوك عشان تخافي من فرحتك و تدسيها مني ، رغم انو الفرحه بيهو ظاهرة من ملامح وشك و نبرة صوتك . انا هسي اخوك ده مش حبيت وحده؟ و كلمتكم بيها ؟ لأني دايرها و لأني بعرف الراجل لمن يكون داير بت بعمل شنو ، و هسي انا انبسطتا للاخر من زولك ده 💟 لانو جاك بالعديل ولانو دق الباب ، لمن كنت براقب خنساء و علاقتها لانها ماشه في سكه غلط كان ممكن تنجرف لاكعب من كده بس الحمد لله .. كان لازم اكون حازم معاها لانها امانه في رقبتي من ابوي و انتي زاتك امانه في رقبتي ، ما بخليكم تضيعوا ساي ولا تختاروا السكك الغلط .. ح اكون واقف كده فيكم قدر ما الله يديني روح ، ما عايزك تخافي ولا تشيلي هم لمن تكوني عايزة تقولي لي حاجه 💟 قبل ما تقولي دايما اعرفي اني معاك وجنبك في الصاح و لو وقفت ضدك لانك غلط .. الخوفه دي ما داير اشوفها في عيونك ابدا طول ما انا عايش في الدنيا دي ، و انتي عارفه انا بحبك قدر شنو ؟ و ح أحترم زولك ده شديييد عارفه ليه؟ قلت ليهو ليه؟ قال لي لانو عندو نسبة 90% من التغييير الحصل ليك في حياتك .. هو الغيرك كده ؛ انا مبسوط منو جدا لانو راجل و بستاهلك لانو عارف كيف يصونك و يحافظ عليك .. عارف انو الحجاب ده هو عندو يد فيهو لو من بعيد او من قريب ، قلت ليهو صح 💟 قال لي و راجل يخاف على البت الدايرها قبل العرس ، بعد العرس تفتكري حيشيلها وين ؟ قلت ليهو جوه عيونو ، قال لي و فوق راسو .. لمن خلص من كلامو حسيت براحه كبيييييرة و كأنوا جبل و اتشال من صدري ، كان حمل كبير خوفي من احمد غيرو لي احمد في دقايق .. ما للمره الاولى ، بس الامان الأداني ليهو احمد في الحقيقه هو سبب راحة قلبي ، البت دايرة شنو غير اهل يسندوها و يكونوا ليها اصحاب ، البت دايرة شنو من اخوها غير انو يفهمها و يوعيها و يصاحبها و يقربها ليهو .. ياريت لو كل الاخوان الفي البيوت يفهموا انو البت محتاجه لي انها تتكلم و تحكي وتفضفض مع راجل من البيت اذا ابوها او اخوها ، محتاجه لي انها تجي تحكي ليهم البحصل معاها بدون خوف و لمن زول يدخل حياتها تعرفهم عليهو بدون قلق .. تقريبا لو الحاجه دي كانت بتحصل معاي ما كنت ح احتاج اشوف فراس في النوم ، ما كنت ح احتاج اهرب من عالم الكبت و الحرمان و الضغط النفسي لعالم بعيييد .. لو كل الاخوان حاولوا يقربوا من اخواتهم و يدوهم الامان متأكده انو مافي بت ح تفتش الامان بره عند راجل تاني ، متأكده امو البت البتطلع من بيت مشبع ريدة و حنيه و امان وتفاهم بتعيش حياتها سليمه معافيه من الامراض النفسيه .. متأكده انو البت البتلقى اهتمام و ثقه من الحوليها بتنجح في حياتها و بتستمر لقدام .. حلقه صغيرة من حياتي كانت مفقودة ، احمد هو القفل الحلقه دي و قدر يخليني اتجاوز كتيييير ، لو كان معمر بس الفي حياتي ؟ كنت ح اتعافى كده ؟ بتهيأ لي الجواب لا ، التغييير الحصل لي ده بسبب الامان الحسسني ليهو احمد الفترة الفاتت💟 بسبب الثقه الأداني ليها ، و لو كل الآخوان احمد ! ...
قمت منو بعد ما اديتو بوسه كبيرة في راسو و قلت ليهو ربنا يطول عمرك لينا يا اخوي ، دخلت الغرفه مبسوووطه لقيت امي و خنساء مدروخين كده و بتونسو .. وقفت نص الغرفه و كوركتا ليهم امي خنساء جاااني عريييييس😭😭😭😭 بالله عيونهم فتحت قدر القمر ، قالوا لي قلتي شنو ؟ قلت ليهم في عريس رهيييب جاني عايز يجي البيت يوم الجمعه ، كنت بكلم احمظ بيهو بره 😭💔 قالت لي خنساء كذااابة بس احلللفي، قلت ليها والله عريس قرررض قرررض .. قالت لي اسمو منو ؟ و ساكن وين و جنسو شنو ؟ امي قالت لي يابت كدي اقعدي في السرير و اهدي و اتكلمي براحه عشان افهمك ، قلت ليها امي جاني عرييس 😭💔 ح اعرس واخليكم .. خنساء قالت لي اصبري يابايرة💔😂 كدي اول قولي لينا منو ؟ قلت ليها دكتور اسمو معمر لاقاني في الجامعه و اتعرفت عليهو و اتكلمنا امبارح قال لي عايز اجي البيت كلمي اهلك .. امي قالت لي و انتي ده كلووو و ساكته ؟ 💔☺ قلت ليها كنت دااسه الموضوع مش بقولوا داري على شمعتك تقيد ، امي قالت لي يابت لكن ما بتدسي حتى من امك😒 قلت ليها المهم يوم الجمعه البعد بكره ده جاي هو و امو .. ابوهو متوفي ..قالت لي ما عندو اخوان ؟ قلت ليها لالا ما عندو .. قالت لي كدي لمن يجي و نشوفو .. قلت ليها اوريكم صورتو؟ خنساء قالت لي والله ما طلعتي هينه يا القليصه بتعرفي تجيبي العرسان كيف كمان اختك الكبيره ما بتعرف سبحان الله💔😂 قلت ليها انا كمان بتاعت لف و دوران زيييك .. قالت لي و هي بتدي فيني لبعه في ضهري كدي النشوفو ، فتحت الوتساب وريتهم الصورة في البروفايل ... قعدت تكورك وااااي يا امي 💔😭 رهييييب رهيييب و جيييه ياسندس حلاااتو .. قلت ليها لكن الحلوين بجوا للحلوين اساسا .. قالت لي و هي بتحضني الله يتم ليك على خير عجبني لمن بهناك قرررض بس💔😭 .. امي قالت لي يعني ورانا تجهيزات بكره باذن الله ؟ قلت ليها اي لكن ما شيء كتير كلهم نفرين بس .. نمنا على انو ورانا شغل صحينا الصباح يوم الخميس الدنيا مغبرة و تراب جا بالليل ، النضافه كترت علينا .. احمد قال لي امشوا السوق قضوا حاجاتكم و انا بجيب شغاله بحرسها تنضف ليكم لمن تجوا انا بطلع ، خنساء قالت ليهو احمد خد بالك ده انا بدأت اغيييير 💔😂 قمنا ركبنا الركشه و مشينا السوق ، اشترينا جردل خبيز صغير و حلاوة و فنكوش .. اشتريت فستان ٣/٤ و طلعنا غشوني الكوفير ، ظبطتا وشي تاني و شعري و رجعت البيت المساء لقيت تلفون من معمر اتكلمت معاهو كان بسأل فيني من الترتيبات ماشه كيف😂💑 قال لي عارف انو بيوت البنات بتكون عامله كيف لمن يكون جاي عريس ، قال لي امي عايز تتكلم معاك قالت و تسلم عليك قبل ما نجيكم بكره ، قلت ليهو اديني ليها قال لي عند ناس خالتي بتكلم في خالتي و بناتها الاتنين قلت ليهو لشنو؟ قال لي حلفت الا تسوقهم لانو مابتمشي براها قالت لي يعني تمشي لعروستك و انا اقعد براي😂 قلت ليهو خالتك☺💔 و انحنا جهزنا تجهيز نفرين قلت ليهو معمر دقايق طيب اواصل شغلي و برجع ليك بعد اخلص قال لي حاضر يا سكر ، خلي بالك من روحك .. جريييت جري على امي قلت ليها امي بكره جاييينا اربعه لا خمسه قالت لي هو شنو هو؟ قلت ليها جليينا تاني تلاته زيادة قالت لي و انتي خايفه من شنو يابت😂💔 امشي نومي قلت ليها الحاجات بتكفي ؟ خنساء قعدت تضحك قالت لي يعني قايله الجردل ده بياكلوها معمر وامو بس😂💔
#تابعوووني
اخر جزء بنزلوا ليك بعد شويات💟
