وجع الماضي

الحلقة ١٣

#وجع الماضي

#ليوثي المياحي

ياووويلي..كام يرفع بيه ويعدل بنومتي ع السرير..هذا راح يلزك لزكة ابيت عمتي شيشلعني منة..ما باوع عليه من طلع من البيت..كال تبقين هنا..كتلة لا فترة وارجع لبيت امي ريمة..جان يندارلي وغمزلي بتك عين..ماشي حتى اجي اخذج اوديج ويومية امر اشوف شتحتاجين..خما بيهه زحمة..درت وجهي..ما جنت احب اشوف شكولة..اي بيهه زحمة..ما احب اشوفك..ولا احب اسمع اخبارك.. ولا اريدك توصلني ..باوعلي بنضرة..ما افتهمتهه..جانت ذابلة وحزينة ..كتلة ما اوعدك بس احاول..طلع من البيت..اني تنفست..نزعت شالي واتمددت..حبيت ارتاح..واريح ظهري..جتي امل وجايبة الريوك..عمتي يسلم راسهه..سوتلي شوربة مال دجاج عرب..وزلاطة ومن هلكد طيبة وكعت بيه دك..خفت اكل هواي ونوب بطني تكوم توجعني..امولة..كعدت بصفي..وكامت تحجي..كالت..ريما..شلون انضربتي ابطنج.؟؟؟باوعتلهه..ومسحت ايدي وحلكي بالخاولي..كتلهه..هاااااا ليش عمتي ما حجتلج؟؟كالت بلة كالتلي واحد ابن حرام..راد يبوك جنطتج..وانتي قاومتي كام ضربج بسجين ونهزم..اني تفاجئت بهل سيناريو..شلون تألف..ماحبيت اكول الامل..اللي صار..هزيتلهه راسي بمعنى اي..وسكتت..هية حاولت تستدرجني..بالحجي..بس ما جاوبتهه..خلت وطلعت من الغرفة..عمتي جتي كعدت بصفي..كالتلي الحمد لله على سلامتج بنيتي..كلتلهه يسلم راسج عمتي..كايلة الامل غير سالفة على ضربتي..لزمتلي ايدي وكالتلي..بنيتي ..اني مرة رجال..بس يسمع..الصار يكوم يعايرني بتربية اخوية..وعائلتي..وبعد ميخلي احد يجي يزورني..هنا ولا يخلي واحد يروح عليهم..بس يشك باي واحد..منهم..هذا الحجي راح تفتهميه من تزوجين وتفتهمين معنى النسب وبيت العائلة..اتفقنة اني وعمتج ام محمد..نكول هيج لمصلحتج ومصلحة العائلة كلهه..حطيت ايدي على ايدهه وكلتلهه..اللي كلتيه هوة الصح عمتي..ربي يبقي سترة على العباد...كالت اااااامين..بنيتي اسمعيني..اني ما اريد احرم ابن اخوية يجي او ما يجي..حتى رجلي ما يضوج منه..ولا يوكع من عينه..اريدج تفهميني..واذا اجة محمد ما اريدج تتناكرين وياه..اعرف هوة غلط وتعدة عليج..بس ابنيتي استرينة..يسترج ربي..كلتلهه لا تخافين عمة..اني احاول اتجنبة..وعفية عليج هيج كلتي..باستني..وكامت ..دائما المرة مكسورة..ومذلولة.. من رجل او اب او اخ او نسيب..دائما هية اللي مذمومة ..تتستر وتسوي كلشي..حتى تطلع باقل الاضرار..اني انضريت..وعمتي زادته..علية..شوكت يخلص هل ضلم..وشوكت الراس يرفع..من غير كسر..ولا وجع..اتاني..الزمن يمشي واكمل دراستي..واتعين..واكسر كل القيود وافرض ارادتي..من دون قهر او ظلم او خوف...مشت الايام..واني كاعدة بالبيت ما اطلع باب الحوش..هوة يجي بين فترة وفترة يطمن علية..نوبات يجي يتعشى يمنه ونوبات.. يجي ورة العشة وهوة متعشي برة..جنت مرتاحة منه لان ما اشوفة هواي..بس جنت احب استفزة..جنت مدمنة على هل شي..احس جسمي يكوم يهرش بيه..اذا ما ادابلة..اني هيج احب اتحرش بيه..بالرغم من انو اني ما طايقة شوفته..بيوم اخذت اوراقي ومستمسكاتي..للجامعة..اختاريت كلية الحقوق..بجامعة بغداد..اول اختيار..حضرت روحي حتى اروح..وامل اجت تروح وياي..حتى تساعدني نروح للكراج..حتى نصعد البغداد..لان جان جرحي بعدة يوجعني ومطايب كلة..حضرنا ارواحتنه وتريكنة..وكمنة نريد نطلع..منحس الا سيارة طبكت بالباب..رجل عمتي تنحنح يم الباب..وكال..هاذ محمد اجة خل يوصلكم ..حتى اامن عليكم وانتي ريما بعدج تعبانة مو مال تكسي ومواصلات..يلة اطلعو كدامي..واني هم اريد اروح نزلوني يم السوك عندي شغلات اكضيهن..صعدنة كدامة مثل النعاج..صعدنة وما حجينة ولا كلمة..الحلك ساكت والكلب يعلم بيه ربي..وعمتي جفنهه يرف وتتغمز حتى ما نبين شي يفضحنة كدام رجل عمتي..صاح بيهه رجل عمتي..ولج شبيج عيونج تتغامز وتتلامز..كالتلهه..لا وكعت بيهه كشاية وتدتأذيني..روحو انتو ربي يوصلكم بالسلامة..صعدنة بالسيارة عمي صعد بالصدر واني وامل صعدنة ليورة..مشت السيارة بطريق السوك عمي نزل..المقعد الامامي صار فارغ..التفت..محمد علينة وكال خل تجي وحدة منجن بالصدر..كتلة لا لا مرتاحين هيج..سوق يلة...كال شنو اني سايق جوة اديجن..يلة خل وحدة تجي تكعد بالصدر...كتلة اني بصفك ما اكعد..تريد امل تكعد خل تكعد..امل ما صدكت ومن الفرحة نطت نط للصدر..هوة كام يباوعلي..بغضب..حرك ومشى الطريق كلة امل تسأل بيه وهوة يجاوبهه بكلمة لو يهز براسة..وروحة واصلة لخشمة..واني مسوية روحي مو يمهم..وصلنة ونزلنة للجامعة..اني امشي وامل وراي كالي اوكفو خل اجي وياكم..كتلة لا لتعب روحك..صاح علي..بعد ما نزل وقفل سيارته..التفتتلة جرني من شالي..وكع وطلع شعري..كتلة انته شتريد مو وصلتنه..روح هايهية لو تريد نطيك اجرة التوصيلة..كالي صدك تحجين لو جاي تقشمرين اني اريد اكلج انو اني راح اتانيكم حتى ارجعكم..وياي..كتلة لا لا لتعب روحك روح خاف عندك شغل..احنة نطول يالة نكمل.لعن الشيطان..وهوة كاز على سنونة..شوية وينكسرن..لا اني راح اتانيجن..كتلة اوي بكيفك ابقة مشتول لما نكمل شغلنة..خليتة ومشيت..اكمل اوراقي..شفت صاحبتي سهى..دتقدم اوراقهه.. سلمت عليهه كلتلهه شكد مشتاقتلج..كلبة..عفتيني وذميتيني..واحتقرتيني..لزمتهه من ايدهه..وكفتهه..كتلهه شبيج نسيتي عشرتنة وصداقتنه..كلة لان رفضت اخوج..كالت لا..لا..اني مزعلانة منج علمود اخوية..اني زعلانة منج لان اخذتي الحب مالي..درتي راسة وقشمرتيه..واخذتية مني واني اللي امنت بيج....ليش هاي الرجاجيل كلهه ما نصبتي الا على حبيبي..انوب عافج..وخلاج حجاية بحلوك الناس..والله طلع حوبتي بيج..كتلهه وج هذا يا حبيب اللي تحجين عليه كالتلي اي غشمي روحج حبيبي حسام متعرفيه ؟؟.لزمتهه من ركبتهه بايدي وكمت اهز بيهه..وهية ضعيفة مسلوعة تنفخ عليهه اتطير..وارفعلك ايدي..واصفطهه..براشدي..على خدهه.. درت وجهه..كتلهه لعنة الله عليج..والله لا يوفقج كتلهه ..انتي عود اسميج صاحبتي..وبيناتنة زاد وملح..تفو عليج يا جلبة..حسام جلب مثلج .. اني الي اعرفة حبيبج جان اسمه نهاد شوكت حبيتي حسام ما اعرف ..جان اسحلهه سحل..بالجامعه..كتلهه ما عاش ولا كان اللي يذلني ويهين كرامتي..سويتهه فرجة. جدام الناس..بردت كلبي بيهه ومشيت...هية فزت وكامت تنفض بملابسهه..واني وامل درنة وجهنة ومشينة..امل تمشي وتضحك..وتمتم..عزة بعينج هاي شسويتي بيهه..قضيتي على مستقبلهه..كتلهه تستاهل..باوعت.على محمد..مرتجي على السيارة..لابس نظارة..وما مبين منه شي..لحظة وشافنة جان يصيح علينة..ريمااا..ريمااا..ديري بالج..سهى..كامت وتركض وراي تريد تضربني بحجارة..وخرت من صاحلي محمد..وهوة جاي يركض علية..جان توكع الحجارة اللي رمتهه..برجل محمد..وكام يتوجع منهه..هههههههه ضربت عصفورين بحجارة وحدة..سهى كامت تصيح..اني كلبة مالت رياجيل..اني لو انتي..انتي ماضيج يشهد عليج..وكل الناس تعرفج زين..كل هذا واني ما رديت عليهه..وبالرغم من ان محمد يتوجع..بس وكف بوجهه..وخلة اصبعة..بنص عينهه..وكاللهه..اني ابن عمهه..مو اي رجال..وبنت عمي..اشرف من الشرف..هسة ترة اخذج للمركز مال الشرطة واشهد عليج..هذولة الناس اللي واكفة تتفرج..بتهمة..التشهير والتبلي على اعراض الناس..واخليهم يوقفوج ويسجنوج..لو هسة تعتذريلهه..جدام الناس..لو اشتكي عليج..شتكولين..استحت ودنجت راسهه.. والطلاب ملمومين..دنجت راسهه وكالت..سامحيني ريماااا..ومشت وهية مقهورة كدام الكل..التفتلي محمد وهز راسة..كال عركة مالت نسوان..وفوكاهه الناس كاعدة تتفرج..شبيج..انتي ما استحيتي تلاغيتي وي هاي..شوفي امل..شكد حبابة ومحترمة روحهه..شبيج تتصرفين جنج رجال..اني استوعبت روحي وكويت نفسي..حتى اردة..كتلة لا لا..اني المستحة انساهه..وية اللي يتطاول علي وانت اكثر واحد يعرف هذا الشي..ابلع..انطيتة ضربة..وحدة خليتة لا يقرة ولا يكتب..يريد يرد بس ميعرف شيكول...ونوب كدام امل..طلعنة بسكوت..ورجعنة وكل واحد على ةعصابة..نزلنة..يم عمتي..ولا سلام ولا كلام..حتى عمتي جلبت بيه..حتى يكعد يتغدة..ما قبل..جان كلش ضايج..جان يتامل اغير نضرتي عليه..ههه والله لا اخلي اي فرصة..الا ما اضوجه بيهه..اذا ما كدرت بالفعل..على الاقل لساني..ياخذ حقي..لعد رب العالمين ليش نطانة لسان..امل حجت العمتي كل اللي صار بل كلية..ولامتني كالت مو عيب تضربيهه كدام الناس..كتلهه غير تعرفين مبرراتي ليش ضربتهه..ما كو احد يفتهم..شنو معناتهه تخلي ملح على الجرح..ومن يحس بيك..وبالجمرة..اللي تجوي بكلبة..بقيت ايام واني اتاني..نتيجة التقديم..لحد ما اجة فد يوم..امل كالتلي.. ريما ضايجين خل نطلع نتمشى بالمزرعة..كافي حابسين رواحتنة بالبيت..يلة بدلي خل نطلع..اني ما يخلوني اطلع وحدي..بس من اني وياج..محد يحجي..كتلهه..فدوة لعينج امل مالي خلك ما اريد اشوف الناس..او اي واحد..حتى الدنية كرهتهه..كالت بس انتي كومي..خل اشوفج الزرع.. هسة المحاصيل كلهه صايرة..وما راح نشوف احد كلهه ملتهية باشغالهه..جرجرتني بالكوة..طلعنة ...وصدك ريحة الزرووع..تخبل..ملت خشمي..ريحة الخيار العطروزي..والبطيخ..والشمام..كلشي زارعين بالمزرعة..نفسيتي ارتاحت والبسمة انرسمت على وجهي بدون ما احس..امل تحجي واني ولا منتبهتلهه..منظر الخضرة اخذ عقلي والريحة ترد الروح..غمضت عيني وسرحت بالهوة..اذكرت امي ريمة وسراحتنه بالنعجات..اشتاقيت لذاك الوكت..فتحت عيوني جان اشوف واحد جاي علينة..من ورة البيوت..ركزت زين لك هذااااا حسام...الله لا يوفقك..شجابة علينة.. ردت امشي..وهوة صيح علية..ريما..ريما..اترجاج لا ترحين عندي حجاية وياج..اريد اكلجياهه..اني باوعت عليه وما احس الا محمد جاااا يتمشة علينة وعيونة مليانة نار...جانت عايزة والتمت..#ليوثي