كرونيك جديدة بعنوان:🌹الحڨرة🌹

5⃣

#الحلقة_5:
لحقت زهرة عند الحانوت باش تبيع تليفونها...جبداتو تنهدت...حست بغصة في قلبها...الحياة صعابت عليها بزااف ورجعت عندها مسؤولية كبيرة انها تكون ام واب لخاوتها وهي مزالت صغيرة...
باعت زهرة تليفونها....شدت ملاك من يدها وخرجت...راحت شرات شوي قضيان والباقي تاع دراهم خباتهم...
راحت للدار حطت القضيان وتخمم واش طيب...من حظها لزهرة كانت تعرف طيب شوي كانت تعاون يماها فالعطلة وتعلمت عليها. .
وجدت الفطور..شوي هاك جاو خاوتها ..
زهرة : اقعدو تفطرو...
حطتلهظ فطرو وقعدت معاهم تسقسيهم على قرايتهم..وتحكي معاهم باش تنسى وتنسيهم..
اميرة: زهرة ..سقساتني وحدة فالطريق عليك !!!
زهرة مستغربة : شكونها ؟؟
اميرة: منعرفهاش...قا...قاتلي زهرة ماهيش جي تقرا..!!!
زهرة تنهدت عرفتها تكون تقرا معاها...حطت المغرف وناضت...
قعدت فالكوزينة تغسل فالماعن وقلبها محروق...دموعها ويدان ..تفكرت قرايتها لي حبستها مظطرة باش تخدم على خاوتها...وتعس عليهم وتقومهم..
صالح باباهم كان ساعة يخدم ساعة ميخدمش وفاميلهم ميتفاهمش معاهم كان خلاط وغير تاع مشاكل على هذيك عايلتو ميقربوش ليه ولولادو...
جات ملاك لقات زهرة تبكي رجعت تبكي بصوت عالي..
زهرة نخلعت جرات ليها..
زهرة: علاه راكي تبكي ؟؟ واش كاين!؟
ملاك تبكي: ختيتو.  .ختيتو ..تبكي....
وملاك تبكي ومحبتش تسكت....زهرة تسكت فيها فهمت بلي ملاك كي شوفها تبكي تبكي معاها بلا مراهي عارفة علاش.
زهرة تبسمت وتصطنع فالضحكة باش ملاك تسكت وتخلي حسرتها وحرقتها في قلبها...
زهرة: خلاص مانيش نبكي هاني نضحك..
ملاك: ثكون ثربك ؟؟
زهرة: مضربني حتى واحد...هاني ساكتة...
ملاك سكتت وجات اميرة وفيصل يشوفو فيهم...هبطو عينيهم..
زهرة مستغربة: شبيكم ؟؟
اميرة تلعب بصباعتيها وشوف في خوها ..
فيصل: وين راهي ماما ؟؟!؟
زهرة فشلت خلاص ..حطت ملاك وقعدت وقعدتهم قدامها ..يلزم تفهمهم بلي يماهم راحت ومترجعش .
زهرة: اقعدو هنا..
قعدو يشوفو فيها.
زهرة تنهدت : ماما راحت...درك انا هي ماماكم...
اميرة: بصح نتي زهرة ماشي ماما؟!!
زهرة دمعو عينيها حتى هي توحشت يماها مي ميلزمش تبكي خاوتها يبكو معاها يلزم تكون قوية وتعفس على قلبها..
زهرة: شوفو ماما راحت بعيدة للجنة ...ونتوما تكبرو تروحو عندها !!
اميرة: حابة نشوفها درك..
فيصل: ايه درك درك..
زهرة استغفرت: ماهيش هنا راحت للجنة وراهي شوف فينا فالسما بعيييدة..
اميرة:: وعلاه مجيش عندنا ؟؟
زهرة: متقدرش جي...هي قاتلي قوليلهم يقعدو عاقلين وتاخذولي الرااي..فهمتو!!!
لولاد سكتو وهبطو عينيهم...ملاك تلعب وماهيش فايقة بواش صااير...
زهرة: هيا روحو تقراو راح يفوتكم الحال...
لبستهم زهرة وبعثتهم يقراو...
راحت خملت كيما كلاو...وراحت رقدت ملاك..وحطتها في بلاصتها..وتخمم واش تخدم باش تعاون خاوتها..
شوي هاك جا صالح..
صالح: واش مكاش ماكلة ؟؟
زهرة من بكري متهدرش معاه وماشي مداسراتو..
زهرة: مكاش...معندناش دراهم .
صالح راح قلب لقا ماكلة حط وراح ياكل...
زهرة قلقت منو:  خليها للذراري لعشية واش ياكلو؟؟
صالح شاف فيها بنص عين: راني في داري وناكل واش نحب...وكيما دبرتي هذو دبري غيرهم.
زهرة: منين ندبر؟؟
صالح: اخدمي واش كانت تخدم يماك !
زهرة: ولولاد شكون يقعد معاهم..
صالح: ياك يقراو وملاك اديها معاك..انا معنديش الله غالب ..
زهرة شوف فيه بحقد كيفاه معلابالوش بولادو ..
صالح كلا وخرج..وزهرة قاعدة متحسرة تخمم وش دير وواش تخدم..هي متعرفش تعجن الخبز كيما يماها وزيد الحادثة تاع يماها خلاتها تكره هذيك الخدمة ..
زهرة غايسة وحاصلة تخمم واش دير حتى فيقها صوت تقربيع...
راحت فتحت الباب...لقاتو الجار...
الجار: هاكي...
زهرة: وشنو هذي؟؟
الجار: ورقة تاع تريسيتي...!!!
شدتها زهرة ودخلت للدار..
زهرة: يااااربي منين راح نخلصها دوك....ياااربي حصلة ..مستحيل يلزم نخدم...بصح وملاك وين نخليها...مزالت صغيرة...
ياااربي حصلت يااايما واش كنتي رافدة وواش كنتي حاملة....ربي يرحمك شحال حملتي وصبرتي العذاب باش كبرتيني...
سمحيلي اذا كاشما زعفتك..سمحيلي درك حسيت بيك وبقيمتك...سمحيلي يما ربي يرحمك ويغفر لي اذا زعفتك...
حطت زهرة راسها بين رجليها وتبكي مقنوطة...حتى فاقت على صوت ملاك تعيطلها..مسحت عينيها وناضت