لم ارد ان احبها (جزء اول)

الجزء التاسع

#لم- ارد- ان-احبها
ساره   &  ننو
الجزء التاسع
قراءه ممتعه 😍✌

رحت للكليه الصبح كالعاده ودخلنه محاضرات وبالاستراحه اجاني احمد سلم عليه وكال..ملاك صدك البارحه بقيتي بالزوراء.
كلت..اي 😒، وانت شمدريك استاذ شنو مكتوب على گصتي.
ضحك وكال..هاا لا بس..
قبل لا يكمل كلت..ها اكيد استاذ فلاح كال عليه.
احمد..هههه فلاح يابويه لو امير يدري بعد ما ساعدج تكولين عنه فلاح يمكن يكسرج.
كلت..غير كله من وراكم اني بقيت بالزوراء..الله لا يعوزني لمساعداتك يا فلاح.
ضحك وكال..وشلون نسيناج ، وانتي يمكن تاخرتي علينه والسيارات مشت
كلت..بس انتم ما تعرفون تتفقدون منو الموجود ومنو الماموجود.
احمد...يله المهم رجعتي لو لا.
بقينه نسولف وبعدين اجت بنيه هاي البنيه اكرهه كلش اعتقد اسمها امال لبسها متحرر كلش وتصادق ولد اشكال وانواع وسوالفها مو حلوه..باختصار مايعجبني بيها اي شي.
اجت وكفت يم احمد وخلت ايدها على متنه ضايقتني من كمشته هيج ضجت كلش وكالت..هلاااو شلونك حبيبي.
شفت احمد توتر ويباوعلي  بس ما فهمت نظراته صح..
وشفت امال تباوعلي من فوك ليجوه وكالت..عيني اني اريد احجي ويه احمد انتي واكفه هنا بعدج ليش، لو انتي ماعندج اي احترام.
احمد وخر ايدها وكال..امال احترمي نفسج اوك، ملاك اكثر وحده محترمه.
امال..شنو هاي احمد يمكن هاي السوده فرته لعقلك علينه.
احمد..اولا هي مو سوده اصلا ملامح وجهه كلش حلوه.
امال..وين الحلو بملامحها، يمكن ساحرتك اي اعرفهن ذني البنات المعيديات امهات السحوره.
ماحسيت غير احمد يجر ايدي وياخذني لمكان بعيد عن امال درت وجهي عليه مبين مقهوره كلش، حاولت اوخر ايدي من ايد احمد بس ما قبل لحد ما وكفنه بالحديقه الخلفيه بعيد عنهم كال..ملاك لاتهتمين لكلام امال  .
كلت..وانتي سحلتني كل هاي المسافه علمود هاي الكلمتين وهمين منو انطاك الحق ان تكمش ايدي وعليت صوتي وكلت مو شفتني حجيت وياك كلمتين وضحكت بوجهك معناها صرت حبيبتك لو اخليك تجاوز حدودك وياي اوك ابتعد عني.
احمد..ملاك لحظه هاي شبيج.
كلت..انت الي شبيك.
كال.. اسف اذا ازعجتج بس اني ردت اوخرج عنها لان هي تريد تزعجج بالكلام.
كلت..واني عندي رجلين امشي بيهن واوخر.
احمد..اسف بعد ما اعيدها، بس والله نيتي صافيه وما ردت تضوجين من كلام امال لان هي دائما هيج تحجي وتشوف بس نفسها حلوه والبقيه مو حلوين،وانتي حلو..
قاطعته وكلت..لاتجذب على نفسك وادكول حلوه، تره تعودت على هاي الكلمه عادي كول مو حلوه.
باوع بعيوني مباشره نظراته خلتني اتوتر وكال..بس اني اشوفج احلى من كل البنات، وبحياتي ما شفت مثل جمالج ملاك انتي من الداخل ماكو احلى منج.
بقيت متصلبه بمكاني انعقد لساني واحس كلبي يدگ بسرعه، تقدم باتجاهي وراد يكمش ايدي بس اني منعته ورحت شردت بسرعه واحس روحي فرحانه..
ايي فرحانه محد يصيحلي حلوه غير امي، امي دائما ادكول اهم شي جمال الروح وجمال الروح محد يشوفه بالعين، واحمد اول واحد شاف هذا الشي بس مو بعينه بگلبه واكفت وبقيت صافنه، معقوله احمد....لا لا مستحيل اني مجرد صديقه.
خلصنه المحاضرات ورجعنه للاقسام صليت وتغديت خابرت امي وسلمت عليهم كعدت قريت وحجيت ويه البنات بس بالي مو يمهن افكر بكلام احمد وصوته ونظرات عيونه.
ساره بصوت عالي..ملااااااااك.
ضربتها على راسها..ها شبيج تعيطين.
ساره...ولج شبيج سالنه ساعه نحجي وياج وانتي بغير عالم.
ريماس غمزت وكالت...بيمن تفكرين، يله احنه غير صديقاتج.
كلت..لا فاهمات الموضوع غلط، جنت افكر بامي واهلي مشتاقتلهم وقررت اطلب اجازه الاحد والاثنين علمود الخميس اول ما ارجع من الدوام اروح لاهلي وابقى يمهم الخميس والجمعه والسبت والاحد والاثنين ارجع.
ما ادري مين طلعت هاي الفكره براسي بهاي السهوله بس يله المهم طلعت وهسه بقى لازم انفذ هاي الخطه لان اذا ما سويت هل شي يمكن يشكن بيه البنات، المهم نرجع لحديثنه.
مروه..راح اشتاقلج هواي.
كلت..اي واني هم راح اشتاقلجن، بس اني مشتاقه لامي وابوي واخوتي هواي.
ساره.. اي فكره حلوه خوش تخطيط..تستحق صفنه طويله هههههه.
ضحكت وياها خطيه ماتدري بدون تفكير اني حجيت هيج.