لم ارد ان احبها (جزء اول)

الجزء الحادي عشر

#لم- ارد- ان- احبها
ساره   &  ننو
الجزء الحادي عشر
قراءه ممتعه 😘✌♥

امير:  بعد الي شفته ضجت كلش ورجعت للبيت واني عصبي بقيت ارگع واكسر بالغرفه اجتني امي وزينه وشافن اديه كلها دم بس اني ما حسيت بأي شي بلكوه هدئني
امي.. يمه امير شبك شصاير ليش هيج عصبي
زينه.. امير بيك شي احمد بي شي ليش هيج ضايج
صفنت عليهن ورجعت سئلت السؤال لنفسي ليش اني هيج ضايج ليش ما اريد ملاك واحمد يلتقون ليش هيج سويت ليش احس اني مطعون ليش احس بوجع بكلبي ليــــــش هيج ديصير وياي ليش هيج يا كلبي
وضربت على كلبي اريده يهدء اريده يسكت. ..
امي وزينه بقن يتوسلن بيه يردن يعرفن شبيه بس طردتهن اذا اني ما اعرف شبيه شلون انتن تردن تعرفن..
عقمت اديه وكعدت على الجربايه وخليت راسي بين اديه اضغط عليه اكرهج يا ملاك انتي السبب الي غير اخوي عني انتي السبب الي خلاه لاحمد يضوج من اهتمامي بي انتي الي غيرتي لاحمد اكرهج اكرهج يا حقيره اكرهج انتي السبب وره كلشي صار انتي تخدعين الكل برأتج وان انتي صدك ملاك بس هذا الشي غلط..
اكرهج اكرهج لام ما تطلعين من تفكيري اكرهج لان انتي دائما تمشين ويه احمد اكرهج لان دائما تضحكين ويه احمد مو وياي اكرهج لان تفضلين احمد عليه اكرهج يا ملاك

فتحت المبايل وحددت موقع احمد اريد اعرف وين راح هو وملاك..
بالجنوب شيسوون هناك كل هاي المسافه ليش شعدهم هناك لازم اروح واعرف شكو
بدلت ملابسي واخذت السويج وطلعت شافتني امي كمشتني ما خلتن اطلع حاولت بكل الطرق بس ما اكدر اعصي امي لان كالت اذا طلعت تغضب عليه ليوم الدين، وقررت باجر اطلع واروح اشوف شعدهم بالجنوب

كعدت شفت الساعه لكيتها 12 الظهر نزيت وكمت بسرعه شلون نمت كل هذا الوقت رحت طلعت اتوضيت وصليت وغيرت ملابسي واكلت واني امشي وطلعت بسرعه شغلت السياره وانطلقت ..

صارت الدنيا عصر وصلت لهناك بس ما اندل بقيت امشي بالسياره وامشي لحد ما حسيت اني تيهت بالبساتين لان كله شجر ومنا اكو ساگيه
قريب على الغروب وكفت السياره اريد اسئل احد لان ما راح ابقى بس افتر اني هنا.. بس ما لكيت احد يمكن رجعوا لبيوتهم راح راح يصير وقت صلاه شفت احد يمشي ودخل لبستان صحت عليه بس ماسمعني وماكو غيره بالشارع مشيت وراه بقى يمشي واني وراه بس اكو مسافه بعيده عنه وما يسمعني لان صوت المي عالي
شفته كمشله بنيه وسحبها وراه اني هنا بعد  ما اكدر امشي رحت ركض عليه شمر البنيه بالكاع وهجم عليها اني غيرتي ماتسمحلي اشوف بنيه هيج يصير وياها وابقى واكف رحت بسرعه عليه وضربته وخرته عنها نزعت سترتي علمود اغطيها باوعت عليها شفت اخر انسانه ممكن اتخيلها بهذا الموقف شفت ملاك بس غايبه عن الوعي حسيت الدم يغلي بعروقي باوعت عليه والشرر يطلع من عيني هجمت عليه وبقيت اضرب بي شلون يلمسها ملاك شلون يحاول يعتدي عليها ملاك الي اخوي اذا وكف يمها اكتله شلون انت تجي وتريد تتقرب عليها شلوووووون.. يا ناس ملاك الي اني وحدي مو لاي شخص ثاني ومستحيل اخلي بشر يتقرب منها بقيت اضرب بي ووقفني صوت الاذان
الله اكبر الله اكبر
وخرت عنه وجان سابح بدمه كمشت نبضه بعده عايش انت ماتستاهل تعيش انت تستاهل الموت بس ما اريد الوث ايدي بدمك القذر
رحت لملاك نزلت للكاع وكعدت يم راسها جان شعرها طالع ولونه اسود مثل الفحم وملمسه ناعم
بقيت امسح على راسها همزين لحگت عليج وما خليته يلمسج..
ااااخ لو متاخر شويه جان حسيت بتأنيب الضمير طول عمري الحمد الله والشكر كدرت انقذج منه دورت على حجابها ولبستها الحجاب وشلتها باوعت عليها وهي بين اديه ومخليه راسها على كلبي
ابتسمت من شفتها شلون نايمه شكلها حلو ومخليه راسها على كلبي اي هو هذا مكانج بوسط كلبي مكانج الي محد راح يطلعج منه
هاي اني شبيه شكاعد احجي استغفر الله
درت وجهي عنها وباوعت لطريقي بقيت امشي بالبستان ومن طلعت شفت بيت قريب،  خليني اروح اطلب منهم المساعده
دكيت الباب برجلي وطلعلي ولد شاب يطلع عمره بالعشرينات اسمر من شاف ملاك صاح.. ملاك هاي شبيها ولك شسويت بيها يا حقير
عرفت هذا بيت اهلها وخرته عن طريقي وما اهتميت لكلامه ودخلت ملاك للبيت كلت وين غرفتها امها من شافتها اخترعت وذوله الولد بس يغلطون عليه عطت بيهم غرفتها وين الام اشرتلي على غرفه خليت ملاك بيها واول ما طلعت كمشوني الولد وهجموا عليه وضربوني
بقينه نتعارك وخرتهم عني بالكوه وفهمتهم السالفه وسحلت واحد اعتقد اسمه علي من قميصه واخذته وراي للبستان وراويته هذا الي حاول يعتدي على ملاك هو من شافه انصدم وكال سيف معقوله.
اجه اخوه الثاني كال شكو ليش جبتنه لهنا
كاله علي..ولك هذا سيف الحقير ابن عمي باسم معقوله واحد هيج يسوي بعرضه معقوله هيج يكدر يسوي لان راد يزوج ملاك واحنه رفضناه
من سمعت ان هذا يريد يزوج ملاك ردت اكمل ضربي اله واخلي صدك يموت شلون يكدر يفكر بملاك 
كتلهم..خلينه ناخذه للمستشفى ما اريده يموت بهاي السهوله هذا يستحق اكثر من موته سهله.
باوعولي واتبهوا لنظراتي الحارقه الي موجهه لهذا سيف الي مشمور بالكاع اعتذروا مني وشكروني لان انقذت اختهم وسئلوني اني منو لان لهجتي ولبسي مو نفسهم وحتى شكلي اول مره يشوفوني
كتلهم..اني من بغداد واعرف ملاك شايفها بالكليه
علي..وليش اجيت هنا
كلت..عندي شغله ويه ابن عمي وتيهت الطريق وشفت هذا شلون دخل للبستان وحاول يعتدي على ملاك واني كتلته.
علي..اتمنى الي صار يبقى بينه ما اريد الناس يحجون عن اختي
خليت ايدي على متنه اطمنه...مثل ما انت تخاف عليها اني هم اخاف على سمعتها وهي عرضي همين
اخذوا سيف للمستشفى لان اني مكسره تكسير..

ملاك:  كعدت من النوم مخروعه وبقيت اصرخ واصرخ بصوت هز البيت هز كأن الصراخ الي ردت اصرخه لمن حاول يعتدي عليه هسه يله كدرت اطلعه بقيت اصرخ وابچي اجه علي يحجي وياي ويهدء بيه علي مو بس اخوي لا هو صديقي هو دائما وياي وما عافني من شفته ذبيت نفسي بحظنه وبقيت ابجي وهو يهدء بيه.. ملوكه حبيبتي لاتبجين انتهى كلشي وسيف هسه بالمستشفى واني راح انتقم منه علمودج لاتبجين حبيبتي اهدي.
سيف،  سيف شعليه شنو الي صار ما دافهم شي.
كلت.. سيف!!  وسيف شيسوي بالمستشفى؟؟
علي.. امير ضربه لسيف لهذا هو هسه بالمستشفى.
ابتعدت عن علي وكلت بصدمه.. امير؟؟؟!!!!!!!
علي.. لو ما الله ثم امير ما جان انتي هسه بغرفتج،  امير هو الي انقذج وضربه لسيف الحقير
امير شلون شلون،  معقوله سمع ندائي واجاني بس شلون يسمع اذا اني هنا وهو بغداد امير شيسوي اجه للجنوب شنو شديصير ما دافهم شي.
كلت.. وامير هو غير بيته بغداد شيسوي هنا.
علي.. عنده شغله هنا وتيه الطريق وشافج وانقذج،  حقا رجال ماكو منه،  الله يحفظه ويستر عليه..
كلت بدون ما احس على نفسي.. الله دزه اليه هو امير دائما ينقذني دائماااا هو منقذي بطلي .
علي.. ينقذج؟!  وشلون... ملاك شصاير وياج بغداد.
كلت.. هاا لا ماكو شي

علي.. ملاك لاتجذبين عليه احجي شكو.
كلت.. كل شخص يصير وياه مشاكل ومشاكلي امير هو الوحيد الي يخلصني منهن.
علي.. شنو المشاكل الي صارن وياج.
كلت.. مره تاخرت على القسم ومنعونه ندخل وامير هو الي حجه ويه الحارس علمود ندخل... ومره رحنه للزوراء واني تاخرت بالطلعه ومشت السيارت ونسوني هناك وامير تاخر بالجيه لسبب ما اعرفه فمن وصل لكاهم رايحين وبس اني باقيه وهو وصلني.. ومره اجت عليه صرصره وهو الي كتلها وهدئني واني..
علي.. وانتي شنو.
كلت.. واني اني ما شكرته على الي سواه.(يعني شكلك يخوي ذبيت نفسي بحظنه والله فشله ومدري شلون سويت هيج) 
حسيت علي انتبه لشرودي وكال.. وشنو اصل علاقتج وياه.
كلت واني ابتسم.. اني اشوفه لامير بس من تصير وياي مشكله يعني ماكو مره شفته اذا ما جان اكو مصيبه.. وهو سوبر مان مالتي،  وابتسمت كلش.
ابتسم وكال... الله يحفظه خوش انسان ومبين عليه ابن عائله.
كلت.. اي هو ابن الشيخ.
بقينه نحجي اني وعلي عن امير لحد ما راح كمت من الجربايه شفت اكو على الميز ستره نيلي اخذتها هاي مو مال علي او محمد مالت منو.
اخذتها شميته بيها ريحته هذا عطره لامير اعرفه.
بقيت اتلمس بالستره واحجي وياها واكول.. شكرا الك يا منقذي لو لاك جان ضاع كلشي وما اعرف شلون اردلك الجميل.
رجعتها لمكانه ان شاء الله من ارجع لبغداد ارجعها الك.
رحت نمت فزيت بالليل على كابوس يخوف نفس الشي الي صار بقيت ابجي وحدي كمت اخاف كلش حاولت ارجع انام ماكدرت طلعت ورحت لغرفه امي ونمت يمها حست عليه كالت..هاا ملوكه حبيبتي شبيج.
كتلها..ماما خايفه خليني يمج.
شبكتني وخلتني انام بحظنها اليوم.
بس هل راح ارتاح وهاي الكوابيس الي بدت تجيني هل راح تعوفني انام بحالي،وهل راح يبقى امير دووم هو منقذي...
لو القدر عنده لعبه ثانيه.

.....................يتبع....................
الى هنا ينتهي البارت الحادي عشر
اتمنى ان يكون نال اعجابكم
لاتنسون التصويت 🌟⭐
وذكر رأيكم بالبارت

انتظرونا بالجزء القادم
صديقاتكم

روايات ننو

صيدلانيه المستقبل
Princees092