انا وافقتا طوالي وقلت لي انا اصلا فكرتا كده وماف داعي لطفل ابوه ناكره وانا خجلانه وشايله هم نفسي و مسؤليتي عليكم وبقيت متقله عليكم كمان ابليكم بزول جديد
معتز كان رايه عكس حسن انه ده ولدك ونحن واثقين احمد ابوه وما تهتمي بالتفاصيل خلي الباقي علينا ده طفل حرام نحرمه من الحياه عشان ابوه مغفل ورغم انه ما بني ادم ولا يستحق يكون اب بس الدين بقول من حقه و لازم يعرف بالخبر ده
معتز شال تلفون حسن واتصل علي احمد في كندا كم مره في جرس وماف رد انتهي الكلام علي كده وطلعنا من غرفه حسن
مشيت سريري وبقلب في التلفون لاقاني رقمه وجعني عدم رده اتصلت عليه برضو تاني جرس وماف رد وبعد الاتصالات دي كلها ما رد علي ..
تاني يوم الصباح برضو استفرغتا ورجعتا رقدتا في الغرفه صادف حسن جاء ماري وشافني دخل وراي للاوضه عشان يطمن علي بعد لاحظ تعبي واستفراغي
التلفون ضرب طبعا حسن قام وقف على حيله قلت ليه اصبر ده احمد واسمع بنفسك انا حفتح الاسبيكر عشان تفهم ده لو فهمت لهجته العربيه مكسره ما واضحه..
قعد جمبي رديت وفتحت الاسبيكر بدا يتكلم معاي انجليزي مرحبا مين بتكلم معاي
قلت ليه : احمد
سكت ما رد
قلت ليه : احمد انا سيرين معاك .. الموضوع مهم شديد حياة او موت رد علي عليك الله
احمد : انا خلاص طلقتك ما يهمني حياتك او موتك
قلت ليه : ما حياتي وموتي انا .. دي حياة طفلك انا حامل ☹
احمد : انتي كذابه دي حركه منك بس عايزه توتريني وانا ما فاضي ليك
قلت ليه : اقسم بالله العظيم بالجد ورسلت ليك نتيجه التحليل بتلقاها في الواتس ..
احمد : ههههههه تحليل في السودان ممكن ايي وحده حامل تقول اسمي سيرين ماف ايي دليل دي انتي
قلت ليه : خلاص ما تصدق على كيفك لكن بسبب السمعه الطلعتها لي بالكذب حسن اخوي حيخليني اجهضه ..
سكت سااااي ما رد علي
قلت ليه : تكذب الكذبه وتصدقها يا خسارة دي المرة التانيه الحتخسر فيها طفلك الله يعوضك في المرة التالته ان شاء الله ..
وصوتي كله عبره وقفلت الخط 😭 وبكيت
الفاجأني حسن خت يديه في ضهري وربت علي وقال لي سيرين خلاص اهدي شويه انا اسف اني مجرد تفكير فكرت كده وكنت حاسي بالشي ده لكن الضغط الانا فيه ما هين .. شنو قصة المرة التانيه دي انتي كنتي حامل اول ما مشيتي واجهضتيه
قالت ليه لا احمد كان متزوج تقريبا من وحده و ماتت وهي حامل دي قصه طويله كمان ..
انا من يوم فارقتكم كل يوم احمد بظهر لي بقصه وبشكل وبشخصيه حقيقه الحياه معةه كانت ممتعه ههههههه .. قعدنا نضحك واقش في دموعي فعلا شر البليه ما يضحكُ
الطفل ده طفل احمد يا حسن .. بتكلم معاه كده رجع لي احمد باتصال ابيت ارد قفلتا
حسن قال لي ردي عليه .. قلت ليه انا منهارة وتعبانه ما قادرة اتكلم خليه هو يتعب شويه اتصل كم مره .. ما رديت اخر شي اتصل بحسن اخوي قلت ليه افتح الاسبيكر .. فتحه بعد السلام احمد قال ليه صحي سيرين حامل ؟ حسن قال ليه ايوه حامل وانا مصر انها تجهض الحمل ده بعد الكلام القلتو لينا و الفديوهات و الصور الانتشرت دي وانت مصر انك ما لمستها اكيد انه الجنين ده ما منك 🤨
احمد قال لحسن اسمعني باهتمام انا وسيرين الحنقرر نعمل شنو مش انت 😡 مفهوم وما تضغط عليها اكتر من كده انا حتصرف
