الـحب الأعـمـى

الـبـارت 25

{ الحب الأعمي }

الحلقه 25

احلام: باهي توا قوليلي شن صار فيك انتي ويوسف حسيت جوكم كويس هكي ان شاء الله مش غير تمثيل بس
انا: هههههه لالا مش تمثيل
احلام: يعني خلاص مش حتطلقو
انا: تعالي انقعمزو في جنينا الي من لورا وتو نهدرزلك

وعديت انا واحلام قعمزنا في جنان من لورا الي كان كلا نجيلا خضراء وديرين فيها درجحا وطاولا كبيره وكراسي وفي كرسيين رخام تحتهن ظلليا

قعمزت انا واحلام ع طاوله

احلام: وهذي تقعميزا ياستي الي جبتيني في مكان امداري شكلك بتحكيلي حاجات سريه ههههه وماتبيش حد يشوفنا لايسمعنا
انا: هههه شن نقولك
هو في قبرص عشت مع يوسف احلا ايام بس عشتهنش كزوجين انا و يوسف  كأصدقاء عشنهن
نطلعو ونهدرزو وندهورو والحق هو دهورني وحتي كنت خاطري في ملاهي شالني له وعمنا في بحر مع اني نخاف ومانحبش انعوم  بس يوسف خششني وعومني فيه
وبصراحه درنا جو حلو ومواقف حلوه صارت بينا
حتي مرضت هو اهتم بيا بس
احلام: ايوا نبي بس هذي شنو وراها
انا: في يوم بعد روحنا من بحر وانا طالعا من حمام سمعت يوسف يكلم في تيلفون
ووقتها سمعتا قال الي يحب مايسيبش الي يحبا يا أميره
أحلام: فنصت اعيونها
انا: اعيوني دمعن . بصراحه وجعتني واااجد وحسيت روحي مش مرغوب فيا من ناحية يوسف كنت نبي نتقرب منا واساسا كنت نجهل سبب الطلاق امتاعي شنو نحسابا لان هل يوسف زروه ان يجوز بس اليوم هذكي عرفت ان سبب طلاقي هو ان يوسف كان يحب
والي مش عرفتا اميره هذي من اتكون

احلام: يعني مازالتي ماعرفتيش اميره من
انا: مره يوسف لما جا يدير امعايا مقابله قالي انحب بنت عمي بس ماصارش بينا نصيب 
ولما جيت هنا لقيت بنات عما رحمه ورحاب وهنا الاثنين يعتبراً في يوسف خو لهنا
بس انا شكيت في اميره لكن قلت مزوجا ونبيش نحكي عليها بصراحه ناخذ ذنبها حتي اليوم رقبتها لقيت يوسف متجهلها ومش معدل عليها
قلت مش هيا معناها الي حكالي يوسف عليها
احلام: يعني يوسف حكالك وقالك ان يحب من قبل
انا: لالا هو ماحكاليش بس قالها ليا كيف ماتقولي مكر فيا لان يبيني نحكيالا عليش انا وخطيبي سيبنا بعضنا وانا وقتها استفزيتا فهو حب يردها ليا بس قالي بنت عمي وقتها
نحساب يقهر فيا بالعاني وبصراحه انا يا احلام وقتها كنت مش عارفا طبع يوسف شنو
بس تو بديت نفهم فيه لكن اوقات انحسا غامض بكل

احلام: يعني لعند تو عرفتيش اميره من اتكون
انا: لالا
احلام: تعرفي هذا وين عرفت انك طيبه بكل وانسانه في وقتنا توا نادره ومافيش منك
انا: عليش
احلام: لانك ماتشكيش وماتحبيش لاتظلمي ولا تأذي حد
شوفي ياحياه حنكون معاك صريحه لان والله بجد حبيتك ونعد فيك بنت ليا واخت
انا: تسلمي
احلام: انقولك الحقيقه
اميره هذي اتكون بنت اختي حليمه
انا: انصدمت وحسيت زي لميه ساخنه انكبت عليا وقتها
احلام: وكانت هيا ويوسف من قبل سنه يحبو بعضهم بس للاسف هيا ماحبتش يوسف لانها متعت مظاهر ومش متعت حب كان سبب في دورت علاقتها ليوسف هو ان تبي اطيحا لان يوسف كان ميعدلش ع بنات وهي انسانه اتحب تملك واجد 
ومن الاول انا عارفا وياما نصحت يوسف انا وخويا هيثم ان يتباعد عليها بس وقتها كان يوسف منعمي ويحبها حب أعمي لدرجه ماشافش عيوبها
لكن بعد خلاص انتهت من يوسف سيبتا بكل سهوله ونخطبت ويوسف كان وقتها عندا رحله ولما روح وسمع انها انخطبت انهار وياما دار نحسبوه يبي يقتل خطيبها
لدرجه حتي باتي وخويا ابراهيم سمعو بقصتهم وجت اختي حليمه وقالت لابراهيم يمسك يوسف ومايخربش ع اميره
وعالعموم كبرت القصه وصاراً عرم مشاكل. وكانت سببهن اميره الي عطت ظهرها ليوسف وماعدلتش عليه
ومن وقتها يوسف سافر وقعد اغلب الوقت يشتغل بيش يهرب من حبا لاميره ومايفكرش فيها
وبعدها بشهرين اميره طلعت عرسها وهناكي نحسابو يوسف يموت
لم ادبشا وكل شي وع اساس يبي يهاجر
بس ماقدرش لان سالمه مرضت وتعبت ويوسف نوعيتا حنون خاف عليها وقعد ع شانها بس من وقتها قعد اغلب الوقت يوسف يشتغل يقعد بالاسبوعين مانشفوهش ويجينا يوم ويرد اخره للعمل
قعد كره حتي الحوش وقعد بالحال هذا تقريبا لمدة سنه وهو مانسش اميره
لعند ماباتي قالا ازوج وضغط عليه وحلفلا بالطلاق بس لان يوسف طبعا امعاندي ومايحبش حد يمشي كلمتا عليه وافق وحلف ان كان خذا وحده يطلقها بعد شهر
مش لان يحب اميره عناد في باتي وخويا ابراهيم
وشرط ان يزوج بس بنت اتكون من اختيارا هو مش نحنا الي نختاروه
وفعلا دار كيف ماقال وجابك انتي