Isang Malamig na gabi na tayo'y magkasama
Nagkaroon tayo ng isang mainit na pagtatalo
Mga masasayang sandali ay biglang sumama
Ni ang problema'y di alam ang puno't dulo
Ayaw mong kumapit sa aking mga kamay
Natatakot sa akin na para bang ako'y patay
Pag nagsasalita, ang boses mo'y nangangatal
Hindi ko maintindihan kung bakit ganito ang inaasal
Kaya bago pa lumala, pansamantala kang nagpaalam
Winikang "bukas na lang tayo mag-usap" at ako'y tinalikuran
Galit ka ba o hindi? yaon ay hindi ko alam
Kaya sa aking pagkalito, ikaw ay aking hinayaan
Lumipas ang ilang segundo mula sa pinagkakatayuan
Katawan ko ay biglang nanlamig at hindi maigalaw
Nagtatanong sa sarili kung ano ang dahilan
Sa tugtog ng iyong pag-ibig ay di ako makasayaw
At sa hindi kalayuan, narinig ko ang iyong sigaw
Ako'y biglang nagising at nanumbalik sa ulirat
Patungo sa iyo, ako'y nagtatakbo't naghihiyaw
Ngunit huli na ang lahat, ika'y tinamaan ng kidlat
Bumigat bigla ang aking nararamdaman
ang dibdib ko'y nanikip na tila binabaha
Mula sa kalangitan, bumuhos ang malakas na ulan
Kasabay nito ay ang pagbuhos ng aking luha
Ako ay lumuhod sa basang damuhan
At dahan-dahang binuhat ang iyong katawan
Ikaw ay dumaing pagkat ikaw ay sugatan
Ngunit pinilit mo pa ring ngumiti kahit ang mga mata mo'y luhaan
Mga mahihiwagang salita ang lumabas sa iyong mga bibig
"Patawarin mo ako", yaon sa akin ay hiniling
Ako'y nalito na para bang hindi kita narinig
Patuloy lang sa pagtitig sa mata mong kay ningning
At ilang sandali pa, ang iyong mga mata ay tuluyan ng pumikit
Ngunit ang iyong mga labi ay sadyang nakangiti pa rin
Sa aking hinagpis ako'y napayakap ng napakahigpit
Walang makakahalintulad sa nadarama kong sakit!
Halos patayin ang sarili sa aking pagsisisi
Dahil hindi na sana naganap ang ganitong pangyayari
Kung hindi kita hinayaang umalis sa aking tabi
Sana tayo ngayo'y masaya at magkasamang uuwi
Isinusumpa ko ang lahat ng nasa aking paligid
Napuno ang aking puso ng pagkamuhi't galit
Sa pag-ibig natin, bakit ang lahat ay bumabalakid?
Pinabayaan na ba ako ng amang nasa langit?
Mga pangarap kong sayo lang nakaalay
Pangarap nating tumira sa iisang bahay
Laging magkasama at hindi magwawalay
Ngunit paano na? wala ka nang buhay
Mag-isa kong dadalhin ang sakit na nadarama
Wala ng aakap sa akin at magpapatahan
Sa mga pagkakamali ko'y wala ng magtatama
Wala ng makikiramay kapag ako'y nasasaktan
Habag ang ulo mo'y nakahimlay sa aking bisig
Ako'y patuloy sa pagsigaw upang humingi ng tulong
Sabi mo'y itigil ko na at wala namang makaririnig
Dahil ang aking sigaw ay daig pa ang bulong
Ngumiti ka bigla at ako'y iyong niyakap
Sobrang higpit na para bang ikaw ay nakatali
At sabay bulong sa maitim na alapaap
Hindi na tayo magkakahiwalay pang muli
Ang isip ko'y puno na naman ng pagkalito
Pagkat ika'y wala na, ako ba'y iyong minumulto?
Dinadama ang iyong puso, ngunit ito'y matagal ng nakahinto
Ito ba'y isang panaginip o ito ba'y totoo?
Kaya't ang mga pangyayari ay aking binalikan
Mga sitwasyo'y pinagtagpi-tagpi sa aking isipan
At sa wakas naalala ko ang mga bagay na nakalimutan
Kaya aking isip, katawan at kaluluwa'y lumagay na sa katahimikan
Tayo ng umuwi at magsimulang muli
Ituloy ang mga pangarap na pansamantalang napawi
Di na maghihiwalay at magsasama ng palagi
Magmamahalan tayo mula umpisa hanggang sa huli
Sa ilog ng pagmamahal, tayo ng maglakad
Di alintana kung saan man tayo mapapadpad
At higit sa lahat, ikaw ay aking pinapatawad na
Sa paglihim mo sa akin, na ako'y namayapa na pala
Pangako sa iyo, di ka na muling luluha
Dahil sa pag-ibig ko sa iyo'y wala ng makakakuha
At kung dumating ang araw na ang pag-ibig ko'y di na sa iyo nakaalay
Yaon ang matamis na araw na ako'y mamamatay
July 2002
