ويلكم*-*
وأنت قاعد مع اخوك الصغير وهو بيتفرج علي توم وجيري , تلاقي ان كل افعال جيري بالنسبة لتوم شريرة إلا إنه البطل في عين أخوك الصغير , فتضايق وتغير القناة وتلاقي بالصدفة كرتون بينكي وبراين شغال , وتتذكر محاولتهم في الاستيلاء علي الجنس البشري , يفيض بيك الأمر وتقول إنك مش هتسكت علي المهزلة وتبدأ تنزل بوست في science words بتهاجم فيه الفيران ...
بس والدك يفتكرك بتلعب ويزعقلك عشان تذاكر
تروح تفتح كتاب الأحياء وتكتشف ان معظم تجارب الأدوية بتتعمل علي الفار وأد اي هو مظلوم , ف تتحير ومتعرفش هو أصله اي !
في الأول تعالي نتعرف علي أستاذ فار و اي دنيته
يعتبر الفار من رتبة القوارض , حيوان نباتي بس عمليًا بياكل أي حاجة قدامه حتي لو بلاستيك أو الجثث
صغير طولًا ووزنًا , حيث طوله بتتراوح من ١٢ ل٢١ سم وكتلته بالكتير ٦٠جم
لونها بيميل للبني عامة وجسمها مغطى بالفرو الا الذيل
ممكن تعيش لحد ٣سنين , بس عشان هي في بيئة صعب العيش فيها بسبب مهاجمتها المستمرة من الحيوانات وحتي البشر , صعب توصل للعمر ده كله
تعتبر حيوان سهل الانتشار , بيعيش في بيئة البشر بيتكاثر بسرعة وفي سن قليل كمان
بحيث ممكن الانثي تخلف لحد ٦٠ فرد في العام وممكن يبدأ التزاوج بينهم عن عمر ٥٠ يوم
وفيها ميزة ( او العلماء شاينفها ميزة ) انها تعتبر متماثلة تقريبا مع البشر في التركيب الجيني
نخش بقي علي السؤال المهم
اشمعنا الفيران؟
معظم التجارب المعملية بتبقي قايمة علي الفئران وده لعدة أسباب واضحة , أهمها:
*الفئران كحيوانات, سهلة الحمل والنقل وسهل الحصول عليها كمان
* تعتبر بتتكاثر بسرعة منتجة افراد كبيرة وده يخلي من السهل عمل دراسات وابحاث علي افراد الاجيال القادمة
* متشابهة لدرجة٩٠% مع البشر في التركيب الجيني , ف بيستخدموها خصوصًا في الأبحاث اللي بتدرس التأثير البيولوجي والفسيولوجي للأدوية علي البشر
*سهولة التحكم في تركيبها الجيني وتعديله وراثيا , يعني ممكن يوقفوا چين معين او ينشطوه , وده عشان يدرسوا تأثير بعض الجينات علي الامراض سواء بالسلب او بالايجاب
عرفت ليه بقى إحنا متساهلين مع جيري وبنحبه؟
وبس
#بوحسنيات
https://ar.m.wikipedia.org/wiki/%D9%81%D8%A3%D8%B1
https://amp.livescience.com/32860-why-do-medical-researchers-use-mice.html
https://science.howstuffworks.com/innovation/scientific-experiments/experiment-on-mice.htm
