Lawyer saber بقلم الكاتبه
احب اذكركم القصه قصه اجتماعيه جريئة جدا
بس لازم نذكر تفاصيل الاحداث حتى نكدر نفتهم القصه
القصه حقيقية يتم السرد على لسان صاحبتها
اتعمدت ما اذكر هوايه معلومات مثلا ....الاسامي الحقيقية التواريخ ..وسكن الاب والام حفاظا على السريه .
والقصه هاي هي قضيه انحسمت من قبل المحاكم والها ملف موجود يم محاكم الجنايات حبيت اسلط الضوء على هاي الجريمه لبشاعتها
حتى هم تكون عبرة لكل شخص يرتكب اي جريمه
*****
اسمي ناز ....واني جنت اعيش ويا عائلتي ...ابويه عربي من احدى المحافظات الوسطى وامي كرديه ....من احدى المحافظات الشماليه
التقوا ...مرة ببيت احد اصدقاء ابويه وحبوا بعض
اهل ابويه عارضوا زواجهم واهل امي هم عارضوا الزواج
بس هم اتزوجوا رغما عن الكل
ابويه اهله تخلوا عنه وامي اهلها اتبروا منها .
عشنا سنين واحنا عائلة متماسكه ...رغم سوء الاوضاع الماديه لوالدي ...جان يشتغل كل فترة بشغله ويبطل ويرجع يشتغل غير شغله وامي هم جانت تخيط للناس ...عندي اخ واخت
اخويه احمد الكبير ...واني الوسطانيه واختي روز ..الصغرى
امي كلش حلوة بيضه وطويله
وشعرها اسود طويل ....واني واختي كلش نشبهها بالشكل
واحمد يشبه ابويه اسمراني .
امي تصالحت ويا اهلها بعد وفاة ابوها يعني جدي
بس جنا كل ست اشهر او كل سنه مرة نزورهم لان ابويه مايقبل
جنا مدبرين العيشه وجنت اساعد امي مرات بالشغل ...لمان اكمل دروسي
عمري عشر سنين واختي عمرها تسع سنين
اني بالصف الرابع ...الابتدائي
وجنت كلش شاطرة بدروسي
ابويه عصبي ...شويه ..ومن يتعصب ...مايشوف كدامه
******
امي قررت انه نزور بيبيتي ..
واتحضرنا ابويه وافق انه نروح نبقى هناك يومين
بيبيتي ووحدة من خالاتي يسكنون السليمانيه ...
اتحضرنا الصبح ....وطلعنا ...
سافرنا ..
الطريق جان طويل ...و
وصلنا كركوك ...الطريق جان كلش ازدحام
السيارة تمشي بشكل بطيئ
وصلنا قريب المركز اختي جانت تشتكي من التعب والجوع
ماسمعنا الا صوت انفجار قوي
ووراها انفجار ثاني..حسيت بشغلات تطير بالهوا وسمعي انطرش
وصوت صياح وبجي اخويه واختي وبعدها ماحسيت باي شي .
******
فتحت عيوني واني مااعرف وين يمكن مستشفى كمت ابجي من الوجع ...بايدي ورجلي
من بعيد شفت ابويه ...اقترب مني
لزم ايدي
_ اشلون صرتي بنتي
_ بابا جسمي يوجعني اريد ماما وينها ماما ...واحمد ..وروز وينهم
_ هسه اصيح الممرضه ...دقايق .
بقيت مااعرف اشكد بالمستشفى ...ولاشفت امي ولا
احمد ولا روز ..بداخلي احساس مايطمني ...اكيد صارلهم شي وكلما اسال بابا مايجاوبني
واخيرا عرفت من الممرضه ماباقي من عائلتي احد غيري
كلهم ماتوا امي واختي واخويه
روحي فرفحت وتمنيت لو متت وياهم ...ياربي ليش بقيتني وحدي .
الوجع بكلبي جبير بس مااكدر ابجي ....دخلت بصدمه ....
ماحجي بس اجاوبهم بالاشارة مو لاني فقدت النطق لا ...
مااحب احجي ...بس اكتم بكلبي
بقيت تقريبا اسابيع بالمستشفى اظطر ابويه ياجر بيت غرفه وصاله ...وخلا بيها جم فراش حتى يكون قريب مني لان مايكدر يوميه يجي ويروح لبغداد
ابويه عمره بالاربيعين ...واهله مقاطعينه كلهم
بس ورا الانفجار
واحد من اخوانه واسمه صلاح وهو اصغر من ابويه عمره تقريبا بالثلاثينات ....كام يتردد علينا واحنا بالمستشفى ...ووقف بجانب ابويه
بابا لكاله شغل بكركوك ...الصبح يكون بالشغل والعصر يجي يمي
تقريبا بقيت شهر بالمستشفى
صرت شويه زينه
ورجعني بابا للبيت ...
بابا كال هاي هيه راح نستقر بكركوك
البيت اللي جان ماجره كلش صغير غرفه وصاله ومطبخ وحمام وتواليت
وحدة من الجوارين واسمها ام فاطمه عرفت بقصتي كامت تدزلي اكل ...لان اني مااعرف اطبخ او بابا جان يجيب ويا لفات
شويه شويه ...بابا اشترى طباخ وثلاجه
ونص طخم قنفات مستعمل
وتلفزيون ...وجم غرض
ماجان اكو سرير
جان عدنا جم فراش ابويه جان يفرشها بالغرفه وننام
ومن بقيت وحدي بالبيت ...وبابا جان يقفل عليه الباب الصبح لان يخاف عليه
اتاكدت اني مو بحلم ...
اني فقدت عائلتي حقيقة ...بديت يوميه ابجي وافرفح بالبجي ..مرات واني نايمه ابجي ابويه يكوم من النوم على بجيي ياخذني بحظنه ويطبطب على راسي لحد ماارجع انام
طفله عمرها ١١سنه تفقد كل اهلها بلمح البصر ....
ومن ابقى وحدي بالبيت الصبح كلش اخاف وحدي
لاني بكل بساطه طفلة جنت عايشه سعيدة وتحولت حياتي بلحظات الى جحيم .
وبيوم جان العصريه ....ابويه جان راجع من الشغل تعبان ونايم
دخلت التواليت حسيت بملابسي الداخليه صايرة كلها دم ...كلش خفت ...عبالي اتمرضت ...وخلص راح اموت
ماعرفت شاسوي ....ركضت على ابويه ...كومته من النوم ...وبكل براءة كلتله
_ بابا بابا ....اني راح. اموت ...اتمرضت
_ انتي شتكولين بنتي
_ والله كلشي مامسويه ...شفت ملابسي كلها دم ...
بابا باوعلي باستغراب ...
_ شكو ..شصاير بيج وين الدم
استحيت منه وكلت
_ اكو دم بملابسي الداخليه
اني كلشي ماجنت افتهم طفلة صغيرة ...وماحد مفهمني شي
_ انتظري بنتي هسه اجي
طلع بابا برة ....وورا شويه ام فاطمه دخلت ...عليه وجانت جايبه وياها فوط ...وفهمتني وكالتلي هاي دورة جايتج وكل شهر تجيج وماكو داعي تخافين هاي معناته انو انتي كبرتي ...وهاي كل البنات اللي بعمرج يصيرلهن هالشي واني بعد منا وغاد لازم احافظ على نفسي مافتهمت شنو قصدها
هي علمتني اشلون استخدم الحفاظات ..
وراحت وتركتني
*******
هاي مقدمه لقصة ناز اللي راح تشوفون بيها هوايه تشويق
بالبارتات الجايه واتمنى القصه تعجبكم وتنال رضاكم .
