#بارت8
طلعنه ثاني يوم طبعا كان لازم البس عبايه فكلش تبهذلت لان ما اعرفلها رحنه لكربلاء زرنه ابا عبد الله وابا الفضل وطلبت منهم يطلعون حسين من قلبي لان اريد ابدي حياة جديده ونخيتهم يبردون قلبه هو هم وينساني لان اذيته بدون قصد ... وطلبت منهم يهدون قلبي على حب زوجي لان ما عندي غيره
من طلعنه بالطريق شافني متضايقه من العبايه لان ما اعرفلها كال
.. نزعيها بس حاولي تتعودين عليها بس من نوصل لديرتنه تلبسيها
.. ماشي
نزعتها ورحنه تغدينه بمطعم وكان اكلهم كلش طيب ومكان عوائل طول ما احنه كاعدين كان يسمعني كلام حلو واني بس ابتسم واخر شي ختمها
.. لك اروح فدوه للخاشوكه لان تدخل من بين شفايفك كمت اغار تره هسه اخذ شفايفج هنا كدام العالم وامردهم لا تسوين هيج بيه
اني حسيت جسمي صار نار وخدودي جمر عزه هذا ما عنده لحيه مسرحه بكل مكان يكعد يتغزل
.. يسار عفيه كافي والله استحي
ضحك ضحكه عاليه
.. اروح فدوه للخدود التفاح
خلصنه وطلعنه افترينه بشوارع كربلاء ودخلني ع محل جبير (مول) ملابس وجنط واحذيه اني فتحت حلكي لان عشقي هاي السوالف همسلي
.. شوفي حبيبي اني ما اشتريتلج هديه بزواجنه ولا بالخطوبه وكتعويض اعتذار الج من هالمحل تشيلين ب٣٠٠ الف اي شي يعجبج واذا تردين اكثر بس كوليلي
اني مثل الطفل من يجيبوله لعبه تصرفت تلقائيا وركضت حته ما انطيته مجال يكمل.. ما خليت حاجه تعتب عليه هو كلي ٣٠٠ اني خليت بالعلاليك غراض اشكال من جنط من ملابس احذيه اكسسوارات كل شي باختصار صارن ب٤٥٠ الف 😂😂😂😂😂
كام يحاسب ويشاورني
.. اذا صاحبك حلو لا تاكله كله ... ليش هيجي قطيتيني ؟
واني خربانه ضحك عليه تباوعلي وعض شفته
.. فدوه اروح لهالضحكه ادفع دم قلبي عليها
صدك خجلني بتصرفاته وحنيته وقررت من هاليوم ما امنعه عن حقه مثل ما يدور راحتي وفرحتي اني هم لازم ادورله ع راحته وسعادته
رجعنه وطول طريق الرجعه جان عالك اغاني حب وغزل لحسام الرسام ويسولف وياي عن حياته وعن شغله احس صدك ارتاحيت عبالك دا اسولف ويه احد من اهلي او شخص قريب عليه
وصلنه قريب المنطقه مالتهم لبست عباتي من وصلنه للبيت كان واكف صديقه ليسار فهو كال
.. غطي نفسج زين و نزلي غراضج ودخلي البيت
سويت مثل ما كالي هو بقه يم صديقه ودخلت نزعت عباتي لكيت هند وهاجر بالمطبخ اول ما دخلت كالت هند
.. صلوات شرفت الخانم شنو الظاهر تعلمتي ع الخدر واحنه خدام عندج
كلتلها بنفاذ صبر
.. شكو هند شبيج
.. احترمي نفسج هند شنو بكدج اني؟ جا هاي الفرخه العندي شنو ما تعرفين تكوليلي ام تقى لو بس سرى فوك راسها ريشه
وتكليلها ام امير
.. اسفه ام تقى .... هسه شنو محتاجه مني
كالت هاجر
.. سلامتج يا الاميره.. تجين تمدين ايدج ويانه حالج من حالنه مو خدامين عند ابوج
ذبيت الغراض واتوجهت عليها بعصبيه
.. لا تجيبين طاري ابوي على لسانج
وهي ما اعرف شنو شافت من شباج المطبخ وراي بسرعه وكعت بلكاع وحطت ايديها ع راسها وكامت تصيح هي وهاجر
اني صفنت هاي شبيهن وما اسمع غير صوت ناصر زوج هند
.... لجييييييييين
واجه دفعني وكوم مرة اخوه
.. شبيج هنوده
وهي تبجي وتصيح
.. ناصر ضربتني وهدت عليه جي كلتلها تعالي عاونينه حته اسال هاجر
وهاجر تكله
.. اي ضربتها ودفعتها وتكللهاا اني مرة يسار كلكم خدامين عندي
اني فتحت حلكي من الصدمه ما كدرت احجي هو خزرني خزره بعمري ما شايفتها وصاح بيه
.. واذا مرة نعال
كتله
.. والله ما سويت شي
وجان يصيح بيه
.. امشي ولي من كدامي لا اجرم بيج
كبل اخذت غراضي وعباتي وصعدت لغرفتي والدموع تجري كعدت ع الجربايه ودموعي تنزل يا ربي ما مقسوملي الراحه ابد ليش هيجي حظي و شنو هذوله العالم اللي محاوطيني والله كمت اخاف منهم
وره ربع ساعه وما اسمع غير الباب انفتح ودخل يسار هو شاف دموعي وهو رفع حاجبه بتسائل
.. شكو لجين شصاير؟
ركضت اله وحطيت راسي ع صدره وفتحت مجرى دموعي ع صدره احسه هو امني واماني سألني بقلق
.. شصاير احجيلي؟ شبيج تبجين
كعدت سولفلته كل الصار وما حسيت غير وخرني وكمز للباب واني ركضت لزمت ايده
.. يسار ابوس ايدك لا تحاجيهم والله مالي خلك المشاكل
صاح بوجهي.. ولج شلون يدفعج شنو اني طرطور هنا ما حاسب وراج زلمه شلون يتجاوزني ويسوي هيج .. وخري ايدج عني
