#بارت10
مرت اصعب ٣ ايام بحياتي وماكو اي خبر عنه صدك حسيت الدنيا ظلمه كنت بالليل اكعد بغرفتي ابجي وبالنهار التهي بالشغل حسيت بقلبي بدا يموت وعرفت اني حياتي بدونه عدم وانه اني وقعت بحبه دون سابق انذار
كنت اتصل بأهلي دوم واسولف وياهم احس شويه بأرتياح من اسمع اخبارهم وخابرت فرح اللي كام تعاتب بيه وزعلانه
بس سولفتلها وضعي وذكرتلي انه حسين خطب بس اني ما اهتز شي بيه بس حسيت بتأنيب الضمير عليه وبس وكلتلها الله يسعده
محد عرف بالبيت انه يسار راح لمنطقه خطره لحد هاي اللحظه....و هوار كان دائما يجي يسألني عن حالي لأن صار يحس بتأنيب الضمير لأن خبرني عن مكان يسار ....فكان دوم يكعد يحشش وياي لو مرات يجيب حبشكلات ويكول صيحي البنات وتعالي خلي نسهر على فلم
ودائما يختار افلام ضحك وتحشيش يكول ادري بيج اذا اختاريت رعب تكوم تخافين ما تنامين وحدج واذا رومانسي شيخلصني تكعدين تنوحين على يسار
كانت هاي الشغلات كفيله بتخفيف التفكير والقلق على يسار لساعات
باليوم الرابع خلصت تنظيف جوه وصعدت اريد اسبح فتحت باب غرفتي كان جهازي يدك ركضت لكيت المتصل يسار
اني ايدي كامت ترجف وفتحت خط بأصبع يرجف
سمعت صوته من بعيد
.. الووو لجيني
اني كعدت كمت ابجي بصوت عالي وهو يصيح
.. الووو... تسمعيني... لجيني .... ولج شكو ليش تبجين؟
واني صحت بصوت عالي من بين دموعي بحرقه
..ولي عني ما اريدك تتصل عليه ولا تحجي وياي
.. افه عليج .. هاي ليش هيجي لجيني اهون عليج ؟
واني كمت ابجي واناشغ واحجي وياه
.. لعد اني اهون عليك ٥ ايام ماكو خبر منك ولا اتصال والصبح تعوفني وتروح بلا سلام
.. والله ما هنتي عليه لج انتي روحي بس مجبور والله ما احصل تدرين واكف فوك التله هسه واخابر بيج على ساعه وقنصوني
اني قلبي انقبض وخفت عليه من صدك صحت بيه
.. انزل حباب .. لخاطري
.. لا تخافين رجلج اسد بس منعول سلف سلفاه هنا... يا ول تخافين عليه ؟
.. ما احاجيك....
.. ما تكدرين ... الا اذا ترديني اموت
.. بعيد الشر عنك حبيبي لا تحجي هيج بعدوينك ان شاء الله
.. شنو شنو كلتي ؟
.. بعدوينك ان شاء الله
.. لا القبلها ؟
..بعيد الشر عنك
..لا الوراها
.. لا تحجي هيج
.. ولج تلعبين عليه بسيطه ارجع لو لا!.. لا لا فدوه والله من ترجع اعوضك
.. خلي نشوف.. شلون صارت ايدج ؟
.. احسن بدت تطيب شويه
.. دا تاخذين دواج وتشربين حليب ؟
.. اي
.. ولك اخ ع طاري الحليب مشتاقلج يا ول
اني شهكت
.. عزه بعينك صدك ما تستحي انت
سمعته ضحك ضحكه عاليه يمه شكد مشتاقه لضحكته هاي هيج حبيته واني ما ادري سمعت الصوت بدا يضعف
.. يله حبيبي اني بلكت ١٠ ايام واجي ادعيلي لجيني
.. الله يحفظك ان شاء الله وترجعلي بالسلامه
..محتاجه شي اجيبه الج وياي
..رايده سلامتك... بس لحظه يسار
.. هااا حبيبي؟
.. مرات اضوج واحب اطلع عادي اخلي هوار يطلعني ؟
.. اخذي راحتج حبيبتي بس البسي عباتج وتلفين نفسج عدل ما اريد احد يشوف عيونج الصكَرني
ضحكت
.. صار
.. يله حبيبي مع السلامه
.. مع السلامه
سديت التلفون وبقيت حاضنه التلفون هاي صدك هيجي صوته رجعلي الحياة والضحكه يعني من صدك حبيته لهالرجال ؟العصر رحت لهوار طلبت منه يطلعني لان ما طالعه وكنت محتاجه تغيير جو
كال هوار
..بدلي بيج خير وادللي
هاجر كامت كالتله
.. مو بس حضرة جنابها تطلعها اني وميسم هم ضايجين
.. بدلي وخلصيني لا تلغين
طلعنه بالسياره ولبست عباتي اخذنا للسوق ما اشتريت شي لان كل شي عندي ورحنه للمطعم تعشينه
البنات كالن احنه راح نشتري اكسسوارات من ذاك البوتيك ونجي راحن تباوعت لهوار كان يكنك ويضحك ويه الجهاز
حاجيته بمكر
.. علكيفك ويه حلكَك عمي ... الماخذ بالك يتهنى
تباوعلي وضحك
..شبيكم انتي ورجلج ما تخلون واحد يعيش حياته
..عمي شعدنه غيرك ان شاء الله ربي يسعدك بس الفضول كتلني؟
(غمزلته بضحك ) منو هي ؟
.. ترديني اعيش بسعاده ؟ شلون وانتي حاطه خشمج بتلفوني .. تعالي خلي اراويج صورتها
ضحكت راواني صورة بنيه جمال وصغيره تطلع بكد اسراء اختي
.. شوفي هاي حب حياتي
شفت بنيه تخبل بالمحادثه على الواتس اب دا اقره بالكلام بسرعه بعده وكَال
.. هوبج .. كتلج شوفي ما كتلج احفظي
..شبيك عمي قحط شسوينه .. بس صدك منين تعرفها هاي ؟
.. ولج هاي حب ثلاث سنين بالكليه ان شاء الله بس اخلص السنه الجايه اخطبها ونتزوج حاجيت بس يسار عليها وكَال بيك خير وادلل
.. هلو عيني ثاري هوارو غركَان لشوشتوه واحنه ما ندري
ضحكنه
..شسمها؟
.. اسمها رواء
.. ربي يجعلها من نصيبك ان شاء الله تستاهل كل خير هوارو
.. اشكرج مرة اخي الغاليه
وتذكرت
.. صدك هوار ... يسار خابرني اليوم
.. الله عليج اي مبروك ان شاء الله شايفين كل الخير
.. هو شنو وشايفين كل الخير كتلك خابرني ما كتلك خطبني
.. بالنسبه الج عبالك اليوم تزوجتي ... اللي يشوف وجهج قبل اسبوع يكول هاي وحده مطلقه خطيه
صدك ضحكت
.. يا حقير بسيطه
بهالاثناء اجن البنات كال هوار
.. يله خلي نرجع البيت
