#بارت11
.. زوجتك حامل
كانت صدمته اكبر من صدمتي لأن ما كنا منتبهين لهاي القضيه او بالاحرى ناسيها اصلا ما كنا متوقعين بهالسرعه يصير لأن صارلنه شهر من تزوجنه واني ما انتبهت على الدوره وانقطاعها بسبب غياب يسار عني وحادثة كسر ايدي وبداية زواجنه والخلافات اللي صارت وراحت عن بالي
اجه يسار ووجهه من الصدمه والخوف والفرحه ممزوجات سوه فمشاعره ما كانت واضحه اجه وكال
.. مبروك لجيني
ما حاجيته ولا رديت عليه قلبي كان مليان غضب منه
سندت نفسي ع الكرسي ولفيت روحي عدل ومشيت حجه بصوت ناصي
..تكدرين تمشين لو اشيلج
هم ما جاوبته كان جرحي اكبر من انه اجاوبه مشيت فتحلي الباب صعدت وصعد هو بدا يسوق ما حجه ولا كلمه بس شفته يفرك وجهه بعصبيه وره شويه وكفنه بمكان فرعي ما بيه احد اندارلي وحجه بندم
.. لجين عليج الله لا تضوجين مني بالقران ما كنت اعرف اني جنت عصبي وحجيت هالشكل
هم ما جاوبته كان غضبي منه يفوق الوصف
.. عليج الله احجي اي شي لا تخليني اكل بروحي
انداريت عليه والغضب كام يطلع من عيوني
.. اني تتهمني بالخيانه يسار؟؟؟!! ... هاي جزاء محبتي الك ؟مو الا اكون حامل وتسببت الهرمونات بهذا الشي... انت ماحسبت انه ممكن اكون متأذيه من شي او شغله نسائيه مأذيتني او ممكن شي منك مضايقني منك بس ما اكدر احجيه رأسا تفكيرك راح للخيانه لهالدرجه اني ما عندي اخلاق بنظرك
.. اسف والله مو هيجي
غطى عيونه بايديه واستند على الستيرن (المقود) وكمت اسمعه كام ياخذ شهيق قوي ويطرح زفير اقوى منه
حسيت بيه ندمان كلش بس الكلام اللي كاله كان كلش كبير بحقي شغل السياره ومشينه ما حجه ولا كلمه
وقفنه يم مطعم نزل جابلي مقبلات وبيتزا وهمبركر
اجه حطهم بحضني وابتسم شلتهن ورجعتهن بحضنه
.. شكرا يسار ما محتاجه شفقتك عليه اني بنظرك مو خوش ليش تتعاطف وياي
صاح بصوت عالي
.. لجين شأسويلج تره جزعتيني ..كلنالج حجايه وحجيناها بساعة عصبيه اعتذار وكلنالج اسفين ادري كفرنا
اني نزلت دموعي ودرت وجهي عنه حط الاكل وره وشغل السياره ومشه ما حجه اي كلمه الطريق كله كان الصمت سيد الموقف
وصلنه نزلت دخلت لكيت اخته اساور الظاهر طالع اربعينها وجايه سلمت عليها كان مبين عليها مسالمه وما الها علاقه بأي احد وهي متزوجه بعيد بالبصره تجي هنا اسبوع
تلكتني عمتي سألتني بقلق
.. هاي يمه بشري شكالج الطبيب
.. طلعت حامل
صاحت سرى
.. يمه فدوه لجنتنا صلوات على محمد وال محمد
وكام يهلهلن ويبوسن بيه ويباركن ليسار اللي اول ما شاف اخته شبكها وباسها من راسها وكعد يلاعب بأبنها الصغير
واجو الجهال يصيحون
.. شكو
كاللهم يسار
.. راح يصير عندكم ابن عم عنوني مثل ابن عمتكم اساور بس يبقى بالبيت هنا يمكم
هم كام يكمزون بس ما افتهموا السالفه اني كنت متضايقه
كلتلهم تعبانه ترخصت منهم وصعدت هو بقه يلاعب بأبن اساور
