بارت12
بلحظه حسيت الم قوي بظهري لان انركع بالقنينه والم برجليه وشي نزل من جوه دشداشتي كمت اشوف كلشي مغوش كدامي وسرى تصيح
.. عزززه العزاني هذا دم
شفت من بعيد الزلم يركضون و يسار كدامهم يركض ويصيح
.. لجيييييييين
وصارت الدنيا ظلام مؤلم
فتحت عيوني لكيت نفسي بغرفه بيضه كنت احس بالم قوي برجليه وحرقه قويه ..واحس اكو فراغ بجسمي ما اعرف ليش؟
تباوعت لجهتي اليمنى كان يسار واكف و مستند ع الحايط ورافع راسه وكانت عيونه حمر هاي دموع لو اني ما اشوف عدل
اي هاي دموع يسار اني فتحت عيوني ع وسعهن
اول مره اشوف دموع يسار يعني معناها صاير شي جبير بيه
مخليه يبجي تذكرت وفتحت عيوني اكثر وصحت
.. ابنيييييي .... يزززززن
اجاني يركض ويمسح بدموعه
.. حبيبي فدوه اروحلج اهدئي
واني تباوعتله بنظرات توسل رغم احس بألم برجليه وحرقه قويه بس ما كان بكد الم قلبي
.. يسار عليك الله جاوبني ابني عايش لو لا ؟
غمض عيونه ونزلت دمعته وحضنني واني تهسترتوكمت اصرخ اكثر وهو حاضنني ويكولي
.. لجيني رحتلج فدوه كله يتعوض والله اهم شي سلامتج
واني اصرخ وكمت ادعي على نسرين بحرقه
.. الله لا يوفقج نسرين من وراج ضاع ابني الله لا يوفقج
تباوعلي وهو يحجي بخوف
.. نسرين شعليها (ما جاوبته كنت بس ابجي) احجي لجييييين؟!
.. نسرين هي دفعتني ع جدر التشريب بسه من وكعت راح ابني
عافني وفتح الباب وركض بقيت بس اصيح بألم وقهر
وره ١٠ دقايق دخلت سرى وعمتي ووراهم ماما واسراء وبابا واحمد واني شفتهم واني كمت ابجي بقوه اجت ماما حضنتني وكامت تبجي وياي سمعت عمتي تكولي
.. يا المهجومه ليش كلتي ليسار هسه يخليها دمايه
صحت بيها
.. كافي عمه كافي لخاطر الله هواي طمطمتي لهند واختها بسببها انكسرت ايدي واحتركت رجليه وخسرت ابني اعز شي عندي لمن تموتني يله ترتاحين
عمتي ما حجت بس قلبت وجهها وضاجت ما اهتميت
سرى كالت
.. ياااا عزه بعينها يعني نسرين وره وكعاتج كلهن ...والله عمي حقج ويرادلها ذبح هاي الحقيره هم نزل وهم يدبج .. الله لا يوفقها
اجه احمد وبابا واسراء شبكوني وبوسوني واني بحضن ماما
كال احمد
.. تحجين صدك لجين ليش ساكته طول هالمده ؟
كمت ابجي واتباوع لرجليه الملفلفات والالم يصل بيهن كال بابا
.. لا تخافين سألت الدكتور على حرك رجليج كال هذا حرق من الدرجه الثانيه وما واصل للاعصاب الحمد لله يعني بالدهون وتبديل الضماد والمداراة ان شاء الله يطيب
كمت ابجي وحضنت ماما
.. اني حرك قلبي اكبر من رجليه .... بابا .. احمد ابوس ايدكم اخذوني وياكم
كالت سرى
.. يا شجاج لجونه كولي يا الله يسار ما يقبل
.. مالي علاقه بيسار اريد ارتاح تعبت اريدكم تاخذوني وياكم تعبانه.. اني مو بنتكم ؟!
كال بابا
.. بيج خير وادللي بس خلي يجي يسار وناخذ رأيه ما يصير نطلعج وهو ما موجود هو ولي امرج هسه
كالت ماما
.. حبيبتي بنيتي لا تضوجين كلشي يتعوض بس لا تقهرين نفسج
بهاللحظه دك جهاز سرى جاوبت وره شويه سمعناها كمزت
وصاحت
.. يمه صخام الصخمني .. هوار بروح الحسن لا تعوفه وحده بالعباس يكتلوه ليسار
