FOR-GUY
"Suwi akong ipinangaki."
1
Lunad sa sarong dyip. Nagsisinarom na asin an sakuyang pagmati, dawa maghapon na akong lakaw garo habo ko pang makaabot sa harong. Habo ko pang pumuli.
Mayo nang ogma an pagbyahe kun madiklom na an mga inaagihan. Dai na kumpleto an mga detalye kan mga gusto mong mahiling o dai mo tulos maagaw an saimong paghiling sa mga bagay o mga eksena na habo mong mahiling.
Igwa akong kaulay sa laog kan dyip alagad mayo man sa mga tinataram niya an sakuyang pagdangog o an sakuyang pagkayaon huli ta siring sa kan dati an sakuyang pagmati yaon sa mga bagay na pighahalian kan mga tataramon na ibinubugtak ko sa papel na kataid ko sa higdaan kun oras na nin pahingalo.
Mantang kinakaolay niya ako mas yaon sa atensyon ko an burat na nasa puro kan tukawan kan dyip. Hiling ko, garo mas may tula an saiyang pakahurantay sa pagkakatukaw asin matuninong an pagkakapirong kan saiyang mga mata siring sa byaherong nakakasabot na harayo pa an saiyang pupulian kaya an pagturog bakung ulang sa galimadmad na tibaad makalampas.
Nagpaaram na an sakuyang kaolay huli ta nasa tongod na palan kami kan Kapitolyo asin kaipuhan na niyang magbaba ta hinahalat daa siya nin siisay man.
May nagsakat man sa dyip nin tolong tawo, duwang foreigner--babae saka lalaki, asin sarong dai karakarigos na hoben pang lalaki.
Sa boot ko, normal na man na sa Camarines Sur kadakul nin mga foreigner huli kan mga gustong mag aprubitsar kan watersport facility kan probinsya.
Sa mga inot kong nababasa asin nadadangog kun tano ta dinadayo an CWC digdi sa Camarines Sur huli ta iyo ini an pinakadakula asin an solo sana gayod sa kinaban na watersport facility na may 6 poles. Inda sana kun totoo.
Alagad bago pa nagpadagos an sakuyang tuninong na pagkomentaryo naagaw an atensyon ko kan magtaram na nin slang idtong dai karakarigos na barobata na kaibahan kan duwang kano.
Kun an mga kasarakay mi sa dyip an atensyon yaon duman sa duwang kano, ako yaon duman sa tinedyer nin huli ta kun masasabat mo ini sa ordinaryong aldaw maloba kang saro sana man inin tambay na mayong padalaganan an buhay ta mala nganing dugniton man na maggubing asin an nasusulot na kupya garo kun pirang semana nang dai nalalabhan.
Alagad makaagaw nin atensyon an saiyang accent asin an saiyang kusog nin boot na gamiton an lengwahe kan mga kano. Nahingireb ko sa mga nag-uurolay na mapasiring an tolo sa Magsaysay kun saen an sentro kan mga ubang-ubang kun banggi digdi sa Naga. Dagos kong minaanan an sakuyang nasusulot kun pwede man ako makapa-Magsaysay asin nakumbinsi ko an sadiri kong presentable pa man an sakuyang itsura minsan maghapon na ako sa sakuyang mga lakaw.
Susunudon ko an tolong ini.
2
Mayo akong interes sa mga Amerikano. May interes ako sa tinedyer na ini na sa uroatyan sana maaraman ko na na an pangaran niya Joselito Balasta.
May concert sa Avenue Square kun sain sinda nagduruman.
Nahiling kong naglaog nguna sinda sa sarong kakanan sa ibaba kaya nagkaigwa akong pagkakataon na magsakat sa itaas asin maglaog sa Lolo's Music Bar tanganing makumusta ko man si Ningning saka si Andy. Inalok ninda akong duman na magpamanggi kaya bako man na maraot na nagsakat ako duman.
Napasiram si iriistorya kaya kan pagbaba ko, dai ko na nasusumpongan si mga sinusunod ko.
Nagsuspetsa akong naglipat sinda nin lugar. Hinanap ko sinda sa mga laog kan mga kakanan, dai ko na nanuparan. Madali sana man sindang hanapon nin huli ta an mga kairibahan niya mga Amerikano, ipaagi na sana sa langkaw madali sindang mahihiling sa kadakulan kan tawo. May nagkapirang mga kano man an yaon duman sa lugar, nagdadalan kan sarong acoustic performance alagad mayo duman si tolo.
