AN PARADAKOP SALAMPATI··3 MINUTES4 Reads Kaodtohi, kasiribot an mga residente sa kalye holi ta igwang sarong aking dai nakakababa sa ibabaw kan halangakaw na paril na nagbabanga kan dowang barangay. Pigparasonod pano ni Jon-Jon si mga salampating nag-aadal pa sana paglopad.Nagpoon siyang magsonod doman sa iababaw kan atop kan eskwelahan, hasta sa bobong kan kataid naharong. Si mga salampati, dai man naglolopad. Sige sana an rolokso sa mga atop hasta makaabot ini sa sonod naman na harong.Kan dai nang madomanan an mga salampati, nagtorolay ini nin lowayloway doman sa paril na kodal. Lowayloway man na nagsonod doman si Jon-Jon. Nahiling ni Jon-Jon, kon dai nakakalopad an mga salampati, mayo na sindang dodomanan huli ta an poro kan kodal na paril harong na may apat na eskalon. Sigorado siya na makakadakop nin salampati. Maski saro basta igwa.Alagad kan kabangang dopa na sana an rayo niya sa mga salampati asin tatakmaon na niya an saro, biglang nagrolopad ini.Tatao na palan magrolopad an mga salampati!Pagal-pagal siya kakasonod mayo man lang nangyari.Nagtokaw siya sa ibabaw kan paril. Doman niya sana narisa na halangkawon palan an kinamomogtakan niya.Bigla siyang nakamati nin takot. Dai na niya magibo an magbalik. Takot na siyang maholog.Sobago nagibo niyang magtolay doman holi ta an atensyon niya yaon sa mga salampati.Doman siya narisa kan si sarong gorang na babayi na nagkorahaw."Ay, hesosmaryosep! May aki sa kodal, tibaad maholog an aki!"Rolowasan si mga tawo sa kalye. Nagtaranaw.Nahiling ni Jon-Jon, lowayloway na nagdadakol an mga tawo orog na an mga aki. Nagngingirisi. Pigngingisihan an saiyang ginibo. Sinosogotan pa siya kan ibang mga lalaki na doman na sana daa siya. Irereport na sana sa barangay pag naholog siya.Sige an ngiririt kan saiyang mga kakawat."Iyan kaya, kakasonod sa salampati."" Nali, pano sa salampati.""Hona niya madadakop niya to.""Nagrolopad lang.""Wahahaha!"Araatyan may sarong tambay an may darang hagahag. Isinakat doman sa ibabaw kan raot na harong asin pinamogtak tanganing makababa siya.Pakababa niya doman pag-abot niya sa tinampo dinagoso tolos niya si Dondon."Dipota ka. Anong hanap mo ha? Mangisi-ngisi ka pa! Anong gosto mo ha. Gosto mong poniti?"Naghihibi na si Jon-Jon. Si Dondon man pigparatolod siya. Nagsontok si Jon-Jon. Lahos. Nagsontok man si Dondon. Lahos. Sabay an dowang nagbarabara. Mayong tinatamaan. An iba nagdadalan lang. Si mga tambay, nakangirisi lang. Nagtahaw si gorang babayi." Oy, pondo! Pondo!" Sinasaway si Jon-Jon."Taranongaran na aki ni... ano man ta siya an pigdidiskitahan mo , anas man nagngiririt inin mga rayaon digdi. Bako sana man siya."Naghihibina man si aki."Losi mong hayop ka. Masakat-sakat ka dai mo palan kaya. Tapos ako an kakastahan mo! Losi mong dipota ka.""Pano kaya, madidisgrasya na ngani ko ngiririt pa kamo!""Saka, tano ta ako lang inooragan mo?"Igwang tambay na nagtaram. "Pano iyo sana an kaya. sadit ka pano. Hehehe."Sabi kan si gorang; "Oy, oy, oy! Poroli na kamo. Kaorodto, kon ano-ano an saindongnagkakairisipan. Poroli!"Doman na potol an pagtanaw ni Jon-Jon kan mga nakaagi.Soltero na siya ngonyan. 24 anyos na. Nagtagilid siya sa katre. Isinoksok an sarong braso sa irarom kan yokyok kan kataid sa higdaan sagkod na makalosotan saiyang palad sa daghan kaini. Nag gios an kataid. Kinapotan an kamot niyang nasa daghan kaini asin lowayloway na iginiya doman sa marambong kaining tataghan.Lowayloway na tinakma ni Jon-Jon an salampati doman. Salampati ni Dondon, pagkalihis nin kinseng taon na kadadakop.
