طلع من جيبه الموبايل وفتح الصور وشمره عليه كمشت الموبايل بأيد ترجف وشفت صور لمحادثات دازيهن اله... بيها صوري واني لابسه ملابس البيت ومصوره نفسي وعلى اساس دازتهن لواحد ووياهن كلام غزل لرقم وكاتبه (احبك ...والطلعه تخبل وياك ... دزلي صورتك اشتاقيتلك .....والحمد لله زوجي يتأخر يله يرجع للبيت كان ما كدرت اشوفك .......الخ من كلام الغزل )
تباوعتله واني الصدمه خلت لساني ينعقد وكتله بخوف مصدوم
.. يسار والقران ما اعرف شنو السالفه ؟ وشنو هذا الكلام ؟
ما حسيت غير على راشدي خله شفتي تجري دم والدموع كامت تجري
.. لج لا تنكرين والقران ابتلي بيكم لعد صورج شوداهن اله
انداريتله والدم يجري من حلكي وعيوني تصب
..وداعة امي وعافيتها مو اني يسار
.. لا والحقير خاتمها الج دازلج شوفتج ع الشط تسوه الدنيا
.. والقران ما مواعدهاحد واسال هوار مو دائما هو لو عمتي يمي؟
.. هو لو نعال هوار موجود انتظرج اسالج؟ بس سالت هاجر وكالت اي كان اكو ولد كان يركض وراج وهوار كاتله احجيلي شنو علاقتج بيه (كام يصيح اكثر) لج احجي !شوكت انطيتيه رقمج ؟ جاووووبي!!!
.. والله والقران ما اعرفه اصلا ولا منطيته شي ....يسار تشك بيه
.. واشك بأبوي هم لج السالفه بيها صور ... اذا ما دازتهن لاحد صورج منين طلعن اكو احد يلعب بموبايلج
هزيت راسي بلا واني ابجي ما اتذكر احد لزم موبايلي وهو اصلا بيه رمز محد يعرفه
لزم شعري واني لازمه ايده وابجي حاجاني وعيونه الشرار كام يجدح منهن
.. اسمعي لج راح اطلع صاحب الرقم اللي دزلي الصور من الشركه بالقران اذا نفس الولد اللي تحارش بيج الا ادفنكم سوه عدلين سمعتي
ودفعني ليوره وطلع اني بقت بس الدموع تجري وما وكفت رحت لجهازي كمت اقلب بالصور واتباوع بيهن عبالك دا احاجيهن اريدهن يثبتلي اني ما دازتهن ماكو يا ربي ساعدني بس انت تعرف بيه ما عندي شي
بقيت لوحدي للمغرب بس ابجي وخايفه اخاف احد داز عليه هذا الولد وصدك يطلعون دازيله صوري بس والله ما عندي شي وياه ولا اعرفه ولا شايفته شلون بيه؟ بقت حسبه تجيبني وحسبه توديني والدموع تجري
ويه الاذان دخل يسار للغرفه اخذ فراش ومخده وطلع وسد الباب وراه بقوه وكعت اليده مال باب الغرفه من وره قوتها
وسمعته دخل للاستقبال وقفل الباب وراه بقيت خايفه اروحله بقيت بمكاني بس افكر وادعي ربي الى ان غفيت ونمت وحدي
كعدت الصبح ع طكطكه يمي فتحت عيوني لكيته دا يلبس ملابسه كعدت ولميت رجليه جنت كلش اخاف منه من يعصب
لا وانوب يعتبرني خاينه !!
بدل ع السريع واخذ مستمسكاته وموبايلي وطلع ما حجيت ولا كلمه طلعت لكيته قافل باب البيت وماخذ المفتاح
رحت كعدت بالطارمه وبجيت كومه
لهالدرجه وصل بيك الشك يسار تقفل عليه الباب ؟! ابد ما حسبت يجي يوم وهيج تسوي بيه .... بقيت ابجي وادعي ربي يوكفلي اني انظلمت وتعبت حيل من الناس... اللي يحبون اذيتي هواي ربي لا تعوفني صدك لاول مره احس نفسي وحدي حتى الرجال اللي كنت احسه سند صار عدو الي وشك بيه من اول لحظه
