خابرت سرى وسألتها عن احوالهم وكالتلي انه يسار مسوي كعدة عشاير وفاصليه ٥ ملايين وعلى اعتبار هم اقارب صح ابوهم غريب (زوج عمتهم ) بس يبقى منهم وبيهم ...ويسار كايللهم اي صوره تطلع لمرتي احسبوا ابنكم ميت ولحد يعاتبني ذاك الوكت ... وناصر راجع وسامع بيسار ضارب هند هاد عليه ومتكاتلين وعمي تخربط من وراهم بعدين ناصر هم طالب حصته من الكيعان وراح يطلع من بيت عمي
هاي الاخبار كلها جديده صح يسار اخذلي حقي وردلي كرامتي ورفع راسي بس ضربه الي واتهامي بالخيانه كانت صعبه ياعالم ووالله ما دا اكدر انساها
كان وحام الحمل يوم عن يوم يأذيني حتى دكتوره ما رحت ما ردت ادز رساله ليسار وحسباله اريده وسامحته كنت اكابر واتحمل الالم لهذا السبب .. كنت اكل شي قليل واي شي احتاجه اكتبه اله بورقه واحطها ع الكاونتر الصبح من اسويله الريوك قبل لا يكعد وصدك العصر الكه كل الغراض على الكاونتر وفوكاهن زياده حبشكلات وحلويات وعصاير ما كان مقصر وياي
مر اسبوع واني ما شايفته صدك اشتاقيتله اتمنى اشوفه بس كبريائي كان يمنعني من شوفته والقلب بعده ملجوم بس القلب خاين ويشتاق مو بأيدي امنعه اشتاقيت لعيونه ولرموشه وشعره وشفته تدمرت نفسيتي بسبب بعده عني
مريت بالليل من يم الاستقبال سمعت صوت اغنيه لحسام الرسام كمت احب حسام الرسام واعشق كل اغانيه بسبب يسار
اني سمعت الاغنيه واني كعدت بالكاع ودموعي كامت تصب كنت احس كل كلمه طالعه من قلبه صح اذاني وظلمني بس مو بيدي صدك البعد عنه دمار وموت كمت ابجي وزاد البجي اكثر ويه كلمات الاغنيه وصار صوت البجي مالتي مسموع فجأه انفتح باب الاستقبال وقرفص يسار كدامي ولزم وجهي وحجه بصوت خايف ويرجف
.. لجيني حبيبي شبيج ؟ جاوبيني اكو شي مأذيج؟
ما جاوبت بس دموعي كانت تجري واني اتباوع للحيته صايره طويله وعيونه ورموشه بيهن اثار دموع كان يبجي لهالدرجه مأذيته واني ما ادري تركت ايديه وذبيت راسي على صدره وكمت ابجي
.. يسااار ... اشتاقيتلك ما اكدر اتحمل بعدك بعد
هو حضنني وحسيت بدموعه على كصتي وحجه بصوت مقهور
.. لجيني روحي ودنيتي وشمعة بيتي اسف والله على كل اذيه سويتها بيج ان شاء الله تنشل ايدي لان مديتها عليج
والله اشتاقيتلج واشتاقيت لريحتج وحضنج ولج ما جنت ادري بعشكَج هيجي يسوي بيه شسويتي بيه وخليتيني هيج احبج وما اكدر على فراكج
مسح دموعه وتباوعلي
... سامحيني عليج الله وداعة ابننا اكص ايدي اذا مديتها عليج مره ثانيه بس لا تبعديني عنج هالشكل مره ثانيه
رجعت راسي لصدره هو بقه حاضني ويبوس بشعري كومني واني حاطه راسي على صدره ما بعدته عنه ....حطني بالفراش ونام يمي من الجهه الثانيه ورجع حضنني ونمنه واحد بحضن الثاني ما حجينه اي كلام او اي عتاب لأن كنت محتاجه بس لدفوا حضنه وهو هم كان محتاج ريحة حضني عرفت انه اي زعل وكره وحقد يروح بلحظه فدا الحب حتى الكرامه
