ثاني يوم العصر يسار راح لاهله ابوه داز عليه ...خابرت اهلي وسمعت ببابا مريض واني قلبي اذاني من سمعت هالخبر كالتلي عنده تضخم بعضلة القلب وكلش وضعه تعبان واني الدموع كامت تصب صب سديته منها وكعدت ابجي عليه وادعي ربي لا تحرمني منه والله الابو خيمه
اذا صار بيه شي لا سامح الله شيصير باهلي وماما واسراء والله يتبهذلون ربي شافيه وعافيه بحق اسماءك التامات
بقيت ادعيله كومه
مسحت دموعي وكلت بس يجي يسار اكوله ياخذني اشوفه
كمت سويت عشه ويه اذان المغرب دخل يسار ووجهه ما يتفسر سألته
.. شبيك يسار
ما جاوبني راح كعد بالاستقبال ع التلفزيون وباله مشغول مبين بغير مكان
ضل بالي اساله لو لا بس هو مبين عصبي وما يسولفلي اذا عصبي خلي اخابر سرى افتهم منها دكيت عليها ما جاوبته الظاهر مشغوله
رحت صبيت العشا اجيت لكيته دا يصلي( بالمناسبه هو يصلي بس انسى اذكرها بالروايه هواي 😂😂😂)
رحت صبيت عشا واجيت كعدت يمه بسته من خده وكتله
.. شبيه الحلو ضايج
تباوعلي وزفر زفرة قويه مال عدم ارتياح وفرك وجهه بتوتر
وحجه بعصبيه
.. اوووف لجين شأحجيلج
.. احجي حبيبي ضل بالي والله
... اوووف صدك اذا كالو المصائب لا تأتي فرادى
.. عليك النبي احجي شغلتلي بالي
.. ولج هوار مو يحبله وحده بالكليه وكالي يريد يخطبها من يخلص دراسه ؟
.. اي كالي عليها
.. هسه اكو ناس متقدميلها وابوها يكولها الولد خوش ولد وما عندج عذر ترفضين واذا ع الدراسه تكملين يمه وهوار متخبل واجاني العيون حمر يكلي رواء راح تروح مني رحنه اني وياه لابوي نحاجيه ع موضوعه ابوي قفل كاله ما ازوجك وحده بكيفك اني اريد اشوفلك وحده منا وانت ما تعرف تدابيرك كاله والله اعوفلك البيت واهج كاله شتريد تسوي سوي زواج من امهات المدارس والكليات ما اخذ
.. زين ليش ما يقبل عمي مو هسه اني كليه واخذتني شنو الفرق خطيه يحبها
سكت يسار ما حجه حسيت اكو سالفه اكبر مضوجته
.. وهسه شنو راح تسوي ؟!
.. والله ما اعرف المصيبه اني دكيت صدر لهوار بموضوع زواجه وكتله رواء ما تصير غير الك حته ما عندي فلوس حته ازوجه واوكف وياه ولا اكدر ارجع لاهلي وانطي حصتي من البيت يتزوج بيها ولا اكدر اعوفه هيج ...لا والطامه الثانيه ؟
.. شكو
.. علي ابن عمتي اخو هند هذا العار جاي خاطب هاجر وابوي يريد ينطيه كتله بويه شلون ترضاها انت سوه ويانه كل هاي العمايل وتنطيه يكولي الرجال اعتذر وجان طيش من مرة اخوك والولد اعرفه سبع وبعدين اني اريد ارجع العلاقه بأختي والاظفر ما يطلع من اللحم
هو يحجي وكانت شرايينه من الغضب والقهر طالعه كلش انكسر خاطري عليه مسحت ع خده وكتله
.. لا تضوج حبيبي اذا على هوار يقتنعون ان شاء الله واذا على هاجر احنه مالنه علاقه بيه يجوز صدك يطلع خوش ادمي ويه اختك و....
بعدني ما كملت ضرب دولكة المي بقبضة ايده وصاح
.. انتي ما تعرفين هذا العار اني اعرفه
وايده كامت تنزف اني خفت عليه
.. يسار ايدك !!!!!
عاف الاكل وكام فتح الباب الخارجي وطلع واني من الصدمه حاطه ايدي ع حلكي صدك خفت عليه بذيج اللحظه هو حقه يضوج بس مو لهالدرجه هسه ضل بالي يم ايده شلون اخابره ؟ كلت خلي ابتعد عنه لمن يبرد عود احجي وياه
كمت لميت الكزاز اللي تكسر ومسحت المي
