اخذ فلوسه وموبايله وطلع ما حجه وياي ولا كلمه
هو هذا اليسوي زين عود خايفه عليه بس اني صوجي لو مخليته يكحف مشي بالشوارع هسه نص الليل ما حجه هيج
كعدت اقلب بالفيسبوك يسار تأخر فوك الساعه فجأه دك عليه جاوبته
.. الووو
حجه بصوت زعلان
.. شتردين بعد غير النومي حامض
.. ما اريد شي سلامتك
... لجين احجي
.. والله ما اريد شي حبيبي
سد التلفون بوجهي اني ضليت مصدومه من تصرفه صدك يحجي لو يتشاقه
وره نص ساعه دخل للبيت ودخل السياره ودخل قفل البيبان واجه حط علاكتين كدامي وحده بيها نومي حامض ووحده جبيره بيها اشكال حبشكلات ابتسمت بس ما شافني كان ينزع بملابسه الظاهر بعده زعلان
عفت العلاليك وكمت شبكته من وره ودفنت راسي بظهره هو تشنج كتله بصوت متوسل
.. اسفه حبيبي والله ما هان عليه تكوم وانت تعبان لأن اشتهيت شغله بنص الليل
انداراي وتباوعلي بحنيه
.. لج لو اني بنص الحرب وانتي تشتهين شي كوليلي ....تقبلين ابننا تطلع بوجهه المزرعه السعيده ؟
ضحكت وهزيت راسي بلا .. ابتسملي ولزم وجهي بأيده
وباس شفتي بلهفه
.. مشتاقلج لجيني .. بس تعبان شلون هاي رهميها
دفعته من ظهره ع الجربايه وضحكت
.. دروح هسه نام والصبح اعوضك اريد اكل نومي هسه
ابتسم بتعب
.. صدك اذا كالو وكت البطون تعمى العيون
راح انطرح على ظهره واني رحت جبت سجينه وكعدت يمه اكشر نومي واكل هو يتباوعلي ويبتسم بضحك وره شويه تباوعتله لكيته غافي خطيه شكد تعبان لعد بس شكد احبه وهو نايم هاي الرموش سبحان ربي الخالقهن على عيونه شكد حلوات
بقيت اكل واتباوعله الى ان صدك شبعت كمت لميت العلاليك وغسلت وفرشت اسناني ونمت يمه
الصبح دك موبايله كعد جاوب سده وكعدني
.. لجيني حبيبي .. صباح الخير
شلت راسي
.. لازم اروح لبغداد خطيه هوار محتاج فلوس وملابسه
كعدت
.. صباح النور لحظه يسار حباب اخذني لاهلي وياك بابا مريض صاير عنده تضخم بالقلب
هو تفاجأ
.. من شوكت هذا الحجي
.. البارحه خابرتني ماما
.. ليش ما كلتي
.. كلت اليوم اكولك البارحه جنت تعبان
.. كومي بدلي بسرعه اوصلج واشوفهم واروح لهوار وبعدين امرلج
كمنا نظفت الغرفه ويسار سبح وصلى وراح لاهله يجيب غراض هوار سبحت وحضرت الريوك وبدلت لبست بدي ردان اسود وبنطرون اسود ويلك وردي فاتح وبيه جيوب سود وشال مطعم بأسود ووردي وحطت مكياج خفيف وطلعت للمطبخ لكيته جايب الغراض وجاي تريكنا ع السريع ولبست عباتي وجنطتي وطلعنا
طول الطريق يسار كان متضايق سألته
.. شبيك حبيبي متضايق ؟
.. دا افكر بهوار كلش مضايقني وضعه يعني ابوي من جهه غضبان عليه وما اله حق بيها ...ومن جهه هو زعلان ومخلينه بقلق ومخلي امي وضعها تعبان وبس تبجي عليه
وبهاجروهذا العار اللي ابوي مصمم ينطيه رغم كل اعتراضتنه
لزمت ايده وبستها
.. لا تخاف ان شاء الله كل شي ينحل بس يرادلها صبر لا تضوج فدوه اروحلك
.. اووووف ان شاء الله
وره شويه كتله
.. اعلكلنه اغنيه والله ضايجه
ابتسم ولبس نظاراته الشمسيه اللي كلما يلبسها ياخذ روحي بشوفته بيها
كانت وحده من الاغنيات صدك عبرت عن حالتي وياه وانه هو فعلا اول حب بحياتي كنت اسمع كلمات الاغنيه واتباوعله مبتسمه
ربي كل يوم اطلب منك هالطلب تحفظه الي وتحميه وصلنه لاهلي سلمت ع ماما واسراء اللي كانت كلش ضعفانه خطيه من الدراسه وعلى سحر مرة ليث اللي هم حسيت عليها متغيره وضعفانه وعلى بابا اللي كان كلش وضعه تعبان وحاطيله فراش بالاستقبال ونايم
احمد وليث ما كانو موجودين
يسار كعد بالاستقبال وسلم على الكل وانطه العلاليك لماما لأن هو نزل بالطريق واشترى كومه علاليك فاكهه وعصاير وحلويات وكعد يسولف وياهم وره ساعه ترخص منهم وكال
لازم اروح ماما كالت ابقه ع الغده كاللها والله عندي شغل اجي العصر واخذ لجين ان شاء الله
راح يسار وبقيت يم ماما اساعدها بالغدا سألت سحر
.. شبيج سحوره اشو ضعفانه
..ولج غايبتلي الدوره ٢٠ يوم واخاف احلل
.. ليش تخافين
.. اخاف خاف حامل وليث بس ليلة الدخله ادنالي وراها كام يجيبلي مانع يكولي ما اريد اطفال اريد اتونس ونرتاح كم سنه اني وياج واكون نفسي ونطلع يله وخاف اذا حامل يزعل
.. هذا صدك يحجي ليث شنو حبلانه بيه من غريب غير منه
..شمدريني ما تعرفين اخوج
اجت ماما
.. ها شكو ؟ شعدجن ؟
.. لا ماما ماكو شي
شاورتها
..شويه وادزلج على تحليل حمل
اجه ليث من الدوام سلم عليه وتفاجأ بوجودي واحمد اجه وراه شبكني وكام يغني
.. هلا بيك هلا وبجيتك هلا وهلا بيج من جيتي وكلوبات شعليتي
ضحكت ودفعته كتله
..تعال عندي شغله وياك
.. شنو بس لا تردين تشوفيلي مره
.. يا ريت اكو وحده ترضه بيك ونزوجك ونخلص
.. اكو وحده تتمنى التراب الامشي عليه
صفنت بوجهه
..منو ولك هاي
.. شعليج انتي
..احمد لا تكولي فرح
ابتسم وهز راسه بنعم اني حطيت ايدي على حلكي وضربته بمتنه
.. عزه بعينك احمد ولك شلون هيج تسوي ويه صديقتي
.. ادري شمسوي مغتصبها ...غير احبها واريد اتزوجها
.. واني اعلمها ذيج الخاينه اذا ما اموتها ما اتسمى لجين
المهم روح جيبلي اختبار حمل من الصيدليه
فتح عيونه
.. بس لا حامل فوك هذا ابنج شجاج يا خويه جنج بزون فوكه فوكه
ضربته على ظهره ودفعته
. .امشي لا اموتك صاير تحجي مثل عمتي ام يسار شعليك انت حاط روحك بكلشي
.. ماشي رايح صدك هسه شعليه اني مره ورجلها تحبل تجيب تخلف شحامي حمامي
ضحكنا راح جاب واجه تغدينه وكملنه بابا خطيه انتبهتله اكله كلش قليل كمت يمه كمت اوكل بيه تباوعلي بحنيه بعمري ما شايفتها وباسني من راسي وكال
.. بابا خو ما زعلانه مني لأن ما اخذت رأيج بالزواج والله خطيتج برقبتي تاكل وتشرب وياي وما جاي انام مرتاح لأن جبرتج بيوم على يسار
اخذت ايده وبستها
.. صدك تحجي بابا هو اكو مثل يسار والله لو ادري بيه هيج ابن عالم ويخاف الله بيه من زمان تزوجته واعتقد الله يحبني لأن اختارلي هيج قسمه الحلوه .. لا تشيل هم ونام مرتاح لأن اني كلش مرتاحه وياه
لمعت عيونه من الفرحه
.. صدك بابا مرتاحه
.. والله وكلش هم يسار ورده و دره مال الله
.. الف الحمد لله كملنه غدا وصحت لسحر انطيتها شريط الاختبار راحت سوته حسب التعليمات واجت وجهها اصفر
.. ها بشري
.. ولج خطين
.. اي الف مبروك حبيبتي يعني حامل ولج
.. على شنو مبروك ولج والله ليث اذا دره يهجم بيتي ما يريد اطفال
.. ولج بابا شنو ما يريد شبيج شنو خاينته انتيي ؟غير الطفل منه وهو المسؤؤل عن الصار
كعدت كامت تبجي كمت اهدي بيها بس ما يفيد كلتلها اني احجي ويه ليث واقنعه هم ما قبلت عافتني وراحت للغرفه صدك ضجت عليها هذا بشنو مخوفها ليث وهيجي خايفه خطيه
للعصر كلش اجه يسار بابا ما قبل يسار يروح كاله
.. تتعشه يمنه وباجر تروح
.. والله عندي شغل كومه عمي
..بطل ذني سوالفك انت بأجازه خلي نشبع منكم
.. عمي والله حتى ملابس ما جايبين ويانه ما حاسبين حسابنه نبقى
كال احمد
.. عمي اني انطيك من ليث ملابس بس لا تجدي وبات يمنا اليوم وباجر الصبح اني بنفسي اطردكم بره البيت
ضحكنا ووافق يسار
تعشينه وضحك وسوالف ع العشا عدا سحر اللي كان شكلها كلش مهموم حتى ليث انتبه عليها سألها شبيج كالتله ما بيه شي تعبانه وسكتت
لليل فرشت الي وليسار بالاستقبال وبابا راح بغرفة ماما
قفلت الباب ضحك وهو ينزع ملابسه
.. تتذكرين ولج هاي النومه بعرس ليث
ابتسمت واني ارتب الاغطيه
.. شلون ما اتذكر كانت احلى ليله
نام ومدلي ايده طفيت الضوه وعلكت ضوه الثريا كان ضعيف
واجيت نمت بحضنه صار فوكاي وكام يتباوعلي بحب
.. خلي نعيد احلى ليله لعد
كام يتلمس بشفتي بأصابيعه
.. لجين تدرين شكد احبج
ابتسمت وهزيت راسي بلا
.. هالكد احبج
وباسني بوسه من شفتي صدك حسسني بحبه وعشكه بيها بحيث طفه جسمي فوك غيوم الحب والاحلام ونسيت اني وين بس حسيت اني بعالم ثاني بس اني وياه بيها
كعدنه الصبح سبحنه وتريكنه وطلعنه وصلنه لهناك كال
.. راح امر على امي لأن خطيه رادتني اطمنها على هوار
راح واني بقيت بالبيت انظف وارتب رجع سألته
.. شلونها عمتي ؟
.. بس تبجي على هوار ..هسه والله خايفين عليها وهذا حالف ما يرجع الا يوافق ابوي .. وابوي حالف ما ياخذله البنيه وبس الله يحلها
راد ينزع ملابسه كال
.. صدك مرة ناصر جايبه
.. صدك شجايبه ؟
.. بنيه مسميها هدى
.. فدوه صلوات على محمد وال محمد ...زين اكولك يحتاج اروحلها
كال
.. بكيفج .. بس اذا تردين نصيحتي لا تروحين الها لبيتها من تلكيها فد مكان باركليها وانطيها واجب لبنتها
.. هو هم هيج
