ثاني يوم رادت تروح عمتي للبيت تجيب كم شغله الها وتجيني العصر دك تلفوني كان المتصل اسراء جاوبتها
.. الو
كانت تبجي
.. شبيج اسراء .. الو
.. لجين ابوي كلش متخربط ووضعه تعبان حبابه تعالي
اني تهسترت وكمت ابجي واصيح
.. شبيه ابوي ولج ؟
.. حبابه تعالي
.. ولج اسراء مو دا احجي وياج ... الووو ... اسراء
اسراء سدت التلفون بوجهي رجعت اتصلت بيها ما تجاوب دكيت على اخوتي محد يجاوب احس رجليه ما يشيلني بعد دكيت ع ماما ع سحر محد يجاوب صدك جذب وين انطي وجهي منو ياخذني دكيت ع سرى كلتلها اذا ابو امير موجود بلكت يكدر ياخذني لاهلي ابوي ما ادري شبيه كالت ماشي
رحت بدلت لبست شلون ما جان واخذت وياي كم قطعة ملابس وجنطتي وعباتي وطلعت ع السريع لكيت كرار منتظرني بالسياره وعمي وعمتي وسرى هم صاعدين
تعجبت شعدهم جايين كلت يجوز يقومون بالواجب وياهم ويطمنون ع الوالد
صعدت وسلمت عليهم ومشينه كان الطريق بيومها كلش طويل مرات اندار على سرى اشوفها تبجي اكولها شبيج تكولي ما بيه شي وتدير وجهه ما تجاوبني حرت بس شكيت اكو شي ومحد يقبل يكوللي
من وصلنه شفت السيارات بباب اهلي وناصبين جادر بالباب
اني احس رجلي بعد ما يشيلني من شفت العالم لابسه اسود وصياح من بابهم كمت ابجي وامشي واتعثر وسرى لازمتني وتكولي بصوت مقهور
..على كيفج ويه نفسج انتي حامل مو زين عليج
واني ما جاوبتها بس اريد اوصل واكول بلكت جذب واللي شافته عيني هذا حلم
وصلت وشفت ماما تدك وتلطم ونسوان يمها واسراء حاطه راسها بحضن خاله وتبجي واني فقدت كعدت بالكاع بنص الهول اصيح والطم على راسي
... يااااااا بوووووووييييييه .... لا تعووووووفني .... بووووووووويييييه .. ابووووووسسسس ايددددددك ارجععععععععع
سرى كامشتني وعمتي بس اني ما كنت واعيه ع اللي اسويه بس اتذكر حجاياته وياي بآخر مره اجيت الهم وادك والطم ع راسي وخدي اكثر
اخ يا بابا جذب اذا اكول يجي مثلك او ياخذ مكانك احد
تركتني وحدي بهالدنيا تركتني احتاج لغيرك بالدنيا انت جنت اساس هذا البيت من رحت انهدم كل شي... صدك حسيت الخيمه والسند اللي كان الي بالدنيا راح صح يسار موجود بس يبقى ابوي شمعه كانت تنور حياتي وانطفت وراح كل شي حلو وياها لأن ابوي هواي ضحى علمودنه كان تعبه وفلوسه كلها النه ما كان يشتري لنفسه قميص يكول ما اريدكم تحتاجون شي او ابخل عليكم بشي اريدكم احسن الناس
الله يرحمك وينور قبرك ويجعل مثواك الجنه يا الغالي ما شفت حته جثته لبابا لأن لكوه بفراشه ميت الصبح ع هالاساس ما رجعوه للبيت بس غسلوه واخذوه زوروه ودفنوه ... مرن يومين ع الفاتحه لا اكل ولا شرب بس من اسمع كلام المله اتذكره وابجي وعمتي وعمي وسرى وكرار رجعوا لان عمتي تخربطت فاضطروا يرجعون وسرى ما تكدر تعوف البيت وحده كل اعتمادهم عليها لذلك بقيت هامله نفسي رغم خالاتي واقاربنه كانن يلحن عليه بالاكل بس ما كنت اكل اي شي بس دمعتي بعيني
