: هو ذكر اهلي واني كمزت
.. صدك يسار ... يعني ما يضايقك نروح نشوف اهلي ؟
.. هو منو العرض عليج تروحين ....روحي قبل لا اغير رأيي
بسته بخده وركضت
بدلت لبست ثوب طويل اسود وشال واخذتلي كم قطعة ملابس الي واله والعصر انطلقنه لبغداد
وصلنه لاهلي ب٨ وخطيه ماما كلش فرحت بشوفتي
تعشينه سوالف عاديه بس الحزن كان سيد الموقف بذيج اللحظات بسبب وفاة بابا و احمد كال النه بخبر سفره وانه بعد اسبوع راح ينطلق لاوربا و ماما كلش تضايقت وكمنه نهدي بيها بس احمد كان مصمم يكول اريد اشوف حياتي ووعد ماما بس يستقر يدز عليهم يستقرون وياه هناك و يسار كدر بسوالفه ينسيهم سالفة سفر احمد
بتنه ببيت اهلي واكيد يسار ما يعبرها هالليله اذا ما يشاغب
كعدنه الصبح كال لاهلي كلهم بدلوا خل نطلع نتونس ونفتر ماما ما قبلت لان جانت لازمه عده على بابا وليث وسحر كان عدهم دوام ما كدروا يجون ويانه
طلعنه اني وياه واحمد واسراء اللي قررت تغيب عن دوامها لان كلش نفسيتها تعبت وره وفاة بابا تغدينه بره وافترينه بالمولات واحمد اشتره كم حاجه للسفر واني واسراء اشترينه غراض كومه ويسار دفعهن ...احمد ما قبل يسار يدفع غراض اسراء بس من شاف يسار زعل منه وافق
واشتره يسار هديه قماش اسود من هذا الزين لماما وكال اخذيه لامج هديه خطيه فرحيها واخذت هديه غراض مال اطفال حديثي الولاده كومه واكيد ما نسيت ابن سحر هم جبتله وياي
بعد ما سلمنه على اهلي رجعنه العصر ماما توسلت بيه يبقى بس تعذر منها لان ما ماخذ اجازه طويله بوست احمد وشبكته وبجيت لان خاف بعد ما اشوفه وكالي بس يوصل لهناك يخابرنه واي شي تحتاجيه بس خابريني بوسني وحضني وسلمت على البقيه ورجعنه للبيت
ثاني يوم يسار خابره ابوه وكاله اليوم مشية هند تعال احضر يسار ما راد يروح بس قنعته يروح لان خطيه حتى لو هاجر مو زينه وياي بس تبقى اخته وعينها عليهم
الساعه ب٣ ونص العصر بدل ولبس قاط لان الجو بده يبرد والشتا ع الابواب بداية شهر ال١١ وتعطر يمه فدوه رحتله شكد حلو طالع صدك كمت اغار عليه خاف نسرين هناك وتشوفه كتله
..لحظه يسار لا تتحرك
.. شكو ولج
ركضت لتلفوني جبته ووكفته عدل واخذتله صوره هو يتباوعلي ويضحك ويكولي
.. مخبله مو بايدج
بس ما كنت مهتمه طكيتله كومه صور وكان طالع بيهن يجنن
تباوعتله بكسره
.. يسار حباب لا تسولف ويه نسرين هناك
تباوعلي بنظره ماكره
..ليش بله غير راح نصير نسايب
.. يساااار .. ليش تضوجني
.. ههههههه الا تكوليلي ليش يله ؟
لزمت دكمة قميصه وكمت الغب بيها وادنيت ع حنكه وبسته خفيف
.. اغار عليك
اشو هذا انزع سترتك وكال
.. احتركت عشيرتج بنار ونفط شدا تسوين ولج
ابتعدت واني اضحك راد يلزمني بس ما لحك بده يلبس سترته وهو يصيح
.. اني اعلمج بس ارجع
