بقينه حوالي اسبوعين هناك بالهند لان يزن صغير وكان لازم يبقى بالمستشفى فد اسبوعين على ما يتحسن والحمد لله بدت ترجعله عافيته وهوار ما عافنه ولا لحظه خطيه حتى مرات يكولي نامي واني اساهر ابقى وياه
رجعنه من الهند ع بغداد كان كرار منتظرنه بالسياره هو وعمي سلمنه عليهم واخذوا يزن مننا يبوسون بيه وفرحانين بعافيته شافوا هوار فرحان كاله عمي
.. شلونهم العرسان ؟
هوار حجه بصوت مقهور
.. بويه من تشوفنه رايحين سياحه عود كول عرسان عدنه مريض وعمليه صدك تحجي عود ؟
.. شبيكم وجه الفكر محد يضحك وياكم
ما جاوبناه بس كننا متاكدين كلمة عرسان كان اله غايه بيها وهو تأكيد موضوع زواجنه وكان يريد يتأكد اذا تحقق فعليا او لا
وصلت لاهلي اول ما دخلت عفت اهلي وركضت على ايمن اشبك وابوس بيه وابجي سلمت على اهلي وهوار سلم عليهم
وتغدينه يمهم راح ليث جاب سمج وماما وسحر سون تاجينه ومركه صبينه للزلم واحنه بالمطبخ كعدنه سولفتلهم على سفرنه وعلى عملية يزن وعلى اتفاقنه اني وهوار ماما فرحت كلش لان كانت تحب يسار ومة رادتني اصير زوجه غير اله
خلصنه غده كال عمي
.. يله بويه كومي لمي غراضج وتعالي لبيت رجلج
اني اتفاجأت كنت متوقعه ينسى او يكولي ابقى كم يوم لان تعبانه بالسفر
كمت مهضومه لميت غراضي وغراض جهالي واني ابجي
صح اول وتالي كان لازم اروح يمهم بس يزن بعده تعبان وبعدهم صغار و يستغربون من الغريب ...متعودين بس على ماما واهلي
سلمت على اهلي وماما كام تبجي وره يزن وايمن لان تعودت عليهم هوار حط الغراض بالصندوق وركبنه السياره هوار اخذ يزن مني وخلاه بحضنه واني ايمن بحضني وطلعنه
وصلت للفرع مال عيالي اني شفت بيتنا اني ويسار واني الدموع كام تصب وتجري احس قلبي انقبض.... وره دقايق وصلنه لبيت اهله اريد انزل ما اكدر احس واحد خنقني احس واحد لزمني يكولي لا تدخلني بس دست ع نفسي ودخلت اول ما شفت عتبة الباب تخيلته واكف ومادلي ايديه غمضت عيوني والدموع تجري
طبيت ودموعي ما وكفن جريان كلهم تفاجأوا مني على شنو ابجي خافوا خاف يزن بيه شي بس اني عفتهم ورحت لغرفتنه اني ويسار فتحتها لكيتها فارغه وما بيها روح مثل قلبي
واني كعدت بالكاع وكمت اصرخ والطم والصدى يرجع عليه ويذكرني بكلشي صار وياي احس يسار كاعد بزاويه من زوايا الغرفه ويسمعني..... صرخت وفرغت كل حيلي بيها من صراخ وعياط ما حسيت غير على واحد سحلني من عباتي وذبني بره الغرفه تباوعت شفته عمي صاح بصوت يرعد
.. انتي شجاي تسوين ... فضحتينه انتي مره متزوجه هسه وبعصمه رجال شنو ما عندج حيا
جاوبته بقهر
.. هسه صارت المره من تذكر رجلها تطلع مو خوش وقليلة حيا ... مو كافي ظلم ...حرمتوني حتى من الدمعه .. حسبي الله ونعم الوكيل بيكم
