عودة أمل 💛

الحلقة ٢٦

عودة أمل2
(وعودة إلي الماضي)
  بوسي مصطفي
.....................
الحلقة السادسة والعشرون :-

ريم / انا هنزل بقى اقعد معاهم تحت أحاول اصالحهم علشان ميشكوش في حاجة
ماجد / أوك. ..سلام
............................
مراد تحت في المكتب
انا مش مصدق اللي عيني شايفاه
هشام /'لا صدق يا بابا علشان مبقاش في ضمير كل واحد بس همه يكسب فلوس وخلاص حتي ولو علي حساب صحة الناس
معرفش دول بياكلوا ويشربوا عادي زينا ويناموا وضميرهم مستريح ولا كأنهم بيعملوا حاجة
مراد /'في ناس الجشع ماله قلبهم مبقاش يشوفوا غير المكسب وبس
المهم نتصل الأول بالأستاذ حلمي يقولونا ايه هي الإجراءات القانونية اللي ممكن تتاخد ضدهم وكمان تكون يعيد عن الموضوع.
هشام / هو مش هيلحق يعمل حاجة لان الأوراق هتكون في ايد الشرطة
.....................
أمل بتتكلم في التليفون في الجنينه
حصلكم حاجة ؟
كمال /'الحمد لله
احنا كويسين
أمل /"طب هما قلبو البيت ليه كانوا بيدوروا عليه ايه
كمال / الورق اللي مع هشام
أمل بقلق / يعني ممكن يجو هنا كمان علشان يأخدوا الورق
كمال / كل شيء جايز
سكتت أمل. ..شعر كمال بخوفها
كمال / متخافيش يا أمل كلنا معاكي يا بنتي
أمل انتي روحتي فين
أمل /'هااا يا خالو كنت بتقول حاجة
كمال /'لا يا بنتي الوقت اتأخر اسيبك علشان تنامي
أمل /'سلملي علي طنط نجلاء كتير
وقولها اني بحبها اوووي
كمال / وهي بتحبك اوي يا أمل ومش عايزة تسمع منك كلمة طنط دي
أمل / طب أقولها ايه
كمال بعيون دامعه /'قوليلها يا ماما
نفسها تسمعها وتحس بمعناها يا أمل متحرمهاش من الإحساس ده
أمل وهي بتمسح دموعها / هي ماما فعلاً
دا اللي حسيتو وانا في حضنها
كمال ببتسامة / تصبحي علي خير يا بنتي
أمل /'وانت من أهل الخير يا بابا يا حبيبي
فرحه غمرت قلب كمال اختلطت فيها الدموع بالفرحه اللي في عينيه
اتجهت أمل ناحية مكتب مراد
كانت ريم نازله من فوق
ريم ل وعد ونورهان وأمل / ازيكو ولا مش عايزين تكلموني
نظرت وعد ونورهان ل ريم بضيق
أمل ببتسامة /'ازاي بس متكلمش القمر
ازيك يا ريم
ريم ببتسامة /الحمد لله....'متشكرة يا أمل
ونظرت ل وعد ونورهان ثم قالت / انتي الوحيدة هنا يا أمل اللي قلبك ابيض مش زي ناس قلبهم أسود
وعد بعصبية  / انا بقول أقوم انام واخزي الشيطان بدل ما أضرب حد هنا
نورهان وهي بتنظر ل ريم / خديني معاكي يا وعد
أمل /"طب خدي هشام نايميه يا نور معاكي
نورهان بمزح / انا كنت خلفته ونسيتو
وانتي بقي لما انيم ابنك هتعملي ايه
أمل / انا داخله المكتب ل بابا
نورهان وقربت منها بمكر/داخله ل بابا بردو
وغمزتلها / ولا هشام خدي ابنك معاكي جوه يا اختي وبلاش مياصه
ريم / سبيه معايا يا أمل
نورهان / من أمتي الحنيه دي يا ست ريم
ريم بمزح / من النهاردة الصبح واطلعي نامي بقي يا ست نور بدل ما اعملها معاكي
نورهان وقربت من ريم /"تعمليها مع مين يا بنت
انتي  قد كلامك ده
ريم بخوف / لو مبعدتيش عني هقول ل عمر
أمل /'خلاص يا نور بقي بطلوا خناق
نورهان / هسيبك بس علشان خاطر عمر
وطلعت غرفتها بعد ما سابقتها وعد
ريم / سيبي هشام بقي هنا انا هقعد شوية وبعدين اطلع انام
امل/ ماشي وانا مش هطول
ريم ومسكت خد هشام الصغير بمزح / وانت بقي تقعد ساكت سامع بخدوك المقلبظة دي
.............................
ابتسمت أمل ثم استدارت وطرقت باب المكتب
مراد / ادخل
أمل فتحت الباب. ..هشام كانت عيونه ناحية الباب اول ما شاف أمل ابتسم
هشام / لسه منمتيش يا أمل
أمل وهي بتدخل / انام ازاي وانت لسه صاحي
مراد / اطلع انت يا ابني استريح وبكره نكمل كلامنا
أمل / لا كملوا كلامكو وانا قاعدة هنا مستنيه
هشام ببتسامة / خوافه اصلا
خايفه تطلع تنام لوحدها
أمل / لا ما هو هشام لسه صاحي
هشام ببتسامة / طب ولما هو لسه صاحي هنام دلوقتي ازاي
خلي نور تنيمه
أمل / شقة خالو كمال اتفتشت حته حته
مراد / ايه أمتي ده
أمل / الصبح وهو كان عندنا رجع الشقة لقيها مقلوبة وقال إنهم اكيد بيدوروا علي حاجة
هشام ونظر للورق اللي معاه / رجالة رفعت
أمل هزت رأسها بخوف وبدأت دموعها تنزل
انا خايفة اوي يدخلوا الفيلا هنا وانتوا مش موجودين
قرب منها هشام / متخافيش يا حبيبتي هما ميقدروش يدخلوا هنا
مراد بقلق / اطلع نام يا ابني دلوقتي والصبح نشوف هنعمل ايه هشام وهو ممسك بإيد أمل / تصبح علي خير يا بابا
يلا يا أمل
خرج هشام وأمل من المكتب ريم لسه قاعدة ومعاها الصغير اللي كان نايم
حمل هشام الصغير
ريم / تصبح علي خير يا هشام
نظر ليها هشام ومردش
أمل بحرج وماشية خلف هشام /'وانتي من أهل الخير
ابتسمت ريم وكملت أمل طريقها للغرفة اللي كان هشام سابقها
طرق هشام باب غرفة البنات
فتحت نورهان / ييييييه جايبه هنا ليه
هشام بهمس / وطي صوتك علشان ميصحاش ووسعي بقي علشان انيمه
نورهان / ومينامش جنبوكو ليه؟ !
هشام / ينام ازاي جنب أمل يا ناصحه
انتي عارفة انه بيفضل يتقلب كتير بالليل وممكن يخبطها
نورهان وهي عقده خدها علي ناحيه / ماشي وانا كمان منامش؟
هشام / معلش يا ريم استحملى اليومين دول انتي عارفة أنه كان بينام مع ماما
نورهان / ماشي يا هشام تصبح علي خير
نظر هشام ل سرير وعد لقها مغطيه نفسها بالبطانية ومفيش حاجة منها باينه
هشام بهمس / نامت
نورهان / آه
هشام / تصبحي علي خير
وخرج من الغرفة
نفضت وعد الغطاء
نورهان بدهشة / انتي منمتيش ؟!
وعد وهي بتمسح دموعها /'مش عارفة انام
قربت نورهان ليها / ليه يا وعد
وعد ببكاء/ شادي وحشني اوي يا نور
نورهان بتأثر /'في ايه يا وعد ما انتي كنتي كويسه دلوقتي
وعد وهي منهارة من البكاء / وحشني ونفسى اشوفه
نورهان بدموع / نامي يا وعد دلوقتي
بتقلبي المواجع ليه آخر الليل
وعد / عايزة اروحله
نورهان بلهفه وجريت ناحيتها / بعد الشر عليكي عايزة تسبيبي
مش كفاية اللي راح
وعد / عمري ما هسامح نفسي أبداً
نورهان وهي بتمسح دموعها /'ايه اللي فكرك دلوقتي بس
وعد / البنت ريم وعمايلها عايزة تتجوز اللي قتل اخويا
نورهان / مين قالك إنها هتتجوزوا مفيش حد هيسمحلها بكده ولو عملت دا من ورانا مفيش حد مننا هيتعامل معاها
وهي إستحالة تعمل كده هي بس حبيته واعذريها هي مكنتش تعرف واكيد دلوقتي مبقتش تحبه زي الأول الموضوع هياخد فترة وتنسي
وعد / فاكره هزار شادي معانا
نورهان / كأنه امبارح
وضغطت نورهان علي بوقها وعيونها بتدمع
وعد / فاكرة شادي يوم ما جه علشان يقولنا إنه نجح في ثانوي واحنا مكناش مصدقين علشان مكنش بيذاكر
نورهان / يومها شالني ولف بيه الاوضة كلها وهو بيضحك
وعد بعيون دامعه / كان بيحب يضحك ويهزر كان عايز ياخد حقه من الدنيا قبل ما يسابها
نورهان / كفاية يا وعد انا مش قادرة أمسك نفسي
وجريت نور ناحية البلكونة تعيط
وعد / علي الأقل يا نور انتي عايشة مش حاسه بالذنب ولا انتي كنتي المسؤلة في موته بالطريقة دي
صرخت نورهان / كفاية قلبي وجعني اسكتي
وانهارت بالبكاء
غطت وعد نفسها بالبطانية ووضعت رأسها علي الوسادة هاربه من واقعها الأليم
.............................................
بعد أسبوع من الأحداث
في الصباح علي السفرة
مراد وهشام ونورهان وعمر
هشام بغمز ل نور / بس امبارح كان حتة يوم مش كده يا عمر
نورهان ببتسامة خجل/ انت مش اتجوزت عايز مننا ايه
عمر / انا عارف خليك في نفسك يا عم هشام متنقش فيها
مراد ببتسامة / مبروك يا ولاد
نورهان وعمر نظروا لبعض ببتسامة
خجلت نورهان /متشكرة يا بابا
مراد / شد حيلك بقي يا عمر وخلص الشقة علشان تتجوزوا
وانا هحجزلكو بقي كام يوم في شرم تقضوا شهر العسل
نورهان / كام يوم دول يبقوا شهر ازاي يا بابا
وبعدين احنا ناوين نقضي شهر العسل بره مصر
هشام / يا عيني عليك يا هشام إلا ما اخدت يوم واحد أجازة
ابتسم مراد / هعوضهالك بس لما أمل تقوم بالسلامة
هشام / لما تقوم بالسلامة نبقي نسهر انا وهي ب البيبي
ضحكت نورهان
هشام / عجبتك اوي
نورهان / وانا مالي مش انتوا اللي عايزين عيال
اشرب بقي واستحمل
هشام /"طب اسكتي بقي أمل جايه تسمعك
نورهان / وانا اللي كنت فاكراك مسيطر طلعت أي كلام
مراد /'لا دا حب هشام بيخاف علي زعلها بس
نورهان / ماشي هنعديها المرادي
أمل جايه ناحيتهم ببتسامة / صباح الخير
رددوا / صباح الخير
نظر هشام ل أمل اللي كان واضح عليها التعب
أمل وهي ممسكه بإيد الصغير واخدت الساندوتشات تحطها في شنطة المدرسة
بس بقي يا هشام. ..بعد الصغير أيده عنها وجرى ناحية غرفة مها اللي في الطابق الأول قصاد السفرة
جريت أمل ناحيته / يا ابني تعالي بقي تعبتني
الصغير / انا عايز اشوف تيته
هشام / تعالي يا أمل افطري
وقرب من الصغير وهو بيقوله / مينفعش ندخل ل تيته دلوقتي علشان نايمه لما ترجع من المدرسة ابقي أدخلها ماشي
الصغير /'ماشي بس هاتلي بقى شوكولاته
هشام / قولنا بلاش شوكولاته واحنا لابسين هدوم المدرسة علشان تفضل نضيفه
الصغير بإصرار  /'لا انا عايز شوكولاته
هشام / لو سمعنا الكلام وجيت هدوم المدرسة نضيفة هجبلك شوكولاته ولعب كتيييير اوي ماشي
أمل ببتسامة / علي أساس أنه بيسمع الكلام اوى
هشام / لا هشام شاطر وبيسمع كلام بابا صح يا أتش
الصغير / صح يا أتش
هشام /هات كفك بقي
أمسك كفه بكف الصغير واحتضنه
هشام / منتعبش ماما بقي علشان تجيبلنا النونو نلعب معاه
الصغير /'لا انا اللي هعلب معاه بس
أمل / آه يا خوفي منك لما يجي تعمل فيه حاجة 
ابتسم هشام / ماشي يلا بقي علشان متتأخرش
أمل / روح يا هشام كمل فطار وانا هوصله ل الباص
هشام / لا هاتيه وانتي افطري انا أكلت خلاص
أمل / لا انا هوصله تعالي معايا يا حبيبي
واخدت الصغير وخرجت
رجع هشام وقعد علي كرسي السفرة
مراد / مالك يا هشام
هشام / أمل شكلها تعبان اوي يا بابا
نورهان / من شقاوة ابنها مبيطلش لعب وجرى وهي طول النهار تجري وراه خايفة يعور نفسه
مراد / وانتي مبتساعدهاش ليه
نورهان / انا عندي جامعة ومذاكرة اقعد يعني علشان أجري ورا هشام
عمر / يعني يا نور المذاكرة مقطعها بعضيها اوي
دا انا مبشوفكيش ماسكه كتاب
نورهان / لا وانا هذاكر قدامكو في الدوشة دي
بذاكر في اوضتي حتي أسأل وعد
كانت وعد جايه ناحيتهم ببتسامة / مبروك للعرسان
كتب الكتاب عقبال الفرح
نورهان ببتسامة / انا وانتي في يوم واحد متقلقيش
تغير وجه وعد وقعدت تفطر
جات أمل وهي بتنهج قعدت جنب هشام بتعب
مراد / علي مهلك يا بنتي وانتي ماشية الدنيا مش هطير
أمل بصوت متقطع / لا أصلي تعبانه ومصدقت وصلت لكرسي اقعد عليه
هشام / خلاص هانت كلها شهر
أمل / ياااه أمتي يخلص
نورهان / متخافيش هيخلص واحنا اللي هيطلع عينه مع ابنك طبعاً مش هتكوني فاضية ليه
وعد / لأ وظابطه اوي علي الامتحانات
مراد / سبحان الله
هى الحاجات دي فيها مواعيد. ..دي حاجة بتاعت ربنا
هشام / هتيجي معايا يا عمر ولا قاعد
عمر ببتسامة ل نورهان /'لا جاي
نورهان / انا اصلا عندي جامعه النهاردة
ضحكوا جميعاً
هشام / لا ميقعدلك هنا احسن وبلاش شغل ولا جواز بقي
يبقى يشوف مين هيشطبلوا الشقة
نورهان / بابا حبيبي ملكش دعوة انت
هشام / ماشي. ..يلا يا عمر جبتلنا الكلام
أمل / مع السلامة يا حبيبي
نورهان / يا سلام علي المياصه اللي انتي فيها
هشام / يا بنتي اهدي بقي هي هتلاقيها منك ولا من هشام
ونظر ل أمل بحب يغيظ نورهان
مع السلامة يا حبيبتي مش هتأخر عليكي خدي بالك من نفسك
نورهان / آه يا مرارتي اللي اتفقعت
هشام / احسن من نيتك بس والسواد اللي جواكي
نورهان /'ماشي سبنالك القلب الطيب يا حنين
هشام / يلا يا عمر مش هنخلص
مراد / خد المفاتيح يا هشام شغلي العربية
هشام / حاضر يا بابا مع السلامة
أمل وهي بتشاور ل هشام من بعيد / مع السلامة يا حبيبي
نورهان /'يا حنينه يا اختي
ابتسمت أمل / انتي قارشة ملحتي ليه النهاردة
قام مراد / انا خارج يا بنات سلام
وخرج مراد
نورهان / مش عارفة قارشة ملحتك ليه؟!
أمل /'لا معرفش
نورهان / علشان جوزك امبارح بعد كتب الكتاب
فضل قاعد وسطنا انا وعمر اغمزله علشان يقوم
مرضيش يقوم وغاظني اووووي
أمل و وعد / ههههه
نورهان/  بتضحكوا ماشي بس انا بقي لما تولدي هسيبك مع عيالك وأبقى شوفي مين اللي هيشلهم معاكي
علشان اطفش هشام من الاوضة وتنامي انتي بقي مع عيالك لوحدك
وعد / يالهوي دا انتي قلبك اسود اوي
نورهان ناظرة في الساعة / يا نهار اتأخرت بقي نص ساعة علي المحاضرة سلام
وعد / استني جاية معاكي
أمل / مع السلامة
...........................
خرجت مريم من الغرفة
صباح الخير يا أمل
أمل /'صباح الخير يا طنط
الفطار جاهز مش هتفطري
مريم / لا هستني مها تصحي وافطر معاها علشان متفطرش لوحدها و نفسها تتفتح
أمل / بعد اذنك يا طنط هخرج للجنينه شوية
مريم / استني أخرج معاكي
ونادت علي سعاد / اعملي واحد قهوة مظبوط وهاتيه الجنينه تشربي قهوة يا أمل
أمل / لا يا طنط مش مزاج عندي شرب القهوة 
مريم / يا بختك دي بقت عندي زي الإدمان
أمل / هي ريم فين
قعدت مريم علي الكرسي في الجنينه
ريم نايمه
أمل / معندهاش جامعه النهاردة
مريم / بتقول ملهاش نفس
انا الود ودي متخرجش خالص علشان متقابلش الواد ده
بس هعمل ايه لازم تروح الجامعه
...........................................
بعد حوالي 8 ساعات
تنظر أمل إلي الساعة ثم تبكي
وعد جات من الجامعة من  نص ساعة
وعد ل أمل / متقلقيش يا أمل زمانه جاي
تلاقي الباص بس اتعطل في الطريق
أمل بتوتر / اتعطل ايه بس ساعة ونص عطلة مش معقولة انا قلبي حاسس إن في حاجة
مريم جايه من اوضة مها / متقلقيش انتي عارفة الوقت دا الدنيا بتبقى زحمة
أمل / ما هي زحمة كل يوم اشمعنه النهاردة بالذات
لا انا مش مستريحة ابني جراله حاجة
وبدأت أمل تعيط
مسكت التليفون بتتصل ب هشام
هشام / عامله ايه يا حبيبتي
أمل ببكاء /بتصل بيك من زمان مبتردش ليه يا هشام
هشام / كنت في الاجتماع ولسه خارج دلوقتي
في ايه يا أمل بتعيطي ليه
أمل / هشام لسه مرجعش من المدرسة
هشام بدهشة ونظر للساعة / ازاي مرجعش الساعة أربعة
أمل / ما انا قاعدة هنا هتجنن مفروض كان رجع من ساعتين
هشام / طب اهدي بس وانا هتصل بالمدرسة اشوف فيه ايه
أمل / تتصل وتكلمني علي طول انا قاعدة علي نار
هشام / حاضر بس اهدي انتي
إن شاء الله خير
قفل هشام ولسه بيتصل بالمدرسة
دخل مراد بسرعة من غير ما يخبط وكان واقف وراه مازن
هشام /'في حاجة يا بابا
مراد بتوتر/ سيب اللي في ايدك وتعالى معايا
مديرة المدرسة عند هشام اتصلت وقالت باص المدرسة عمل حادثة
هشام بصدمة /'ايه
وجرى هشام كان سابقة مراد
مازن / خير إن شاء الله
يا هشام
................................ 
أمل بتعيط / شوفتي اخوكي عماله اتصل بيه مبيردش عليه
وعد / نستني شوية يا أمل
أمل بصراخ / فات نص ساعة ومتصلش انا خايفة يكون ابني حصله حاجة ومش عايز يقولي
وقعدت أمل بتخبط بايدها علي رجلها
جات نورهان بدهشة / في ايه حد حصله حاجة
وعد / اسكتي انتي كمان هي ناقصاكي
مريم / هشام ابن اخوكي لسه مرجعش من المدرسة
نورهان بعصبيه /'وانتو قاعدين كده محدش فيكو عارف يعمل حاجة
أمل ببكاء / نور اتصلي ب هشام هو مش عايز يتصل خايف يحصلي حاجة لو عرفت اتصلي وطمنيني
مريم / يا بنتي. ..إن شاء الله. ..مفيش حاجة
نورهان بتتصل
كلهم مراقبنها
أمل حابسه أنفاسها
نورهان بصوت متقطع / ايه يا هشام انت فين
رد هشام بحزن / انا في المستشفي
نورهان / ايه مستشفي ليه
صرخت أمل
هشام بعصبيه/'انتي في البيت
نورهان وهي بتعيط / آه بتعمل ايه هناك
هشام حصله حاجة
خطفت أمل التليفون من نور وهي منهارة من البكاء
هشام ابني جراله ايه رد عليه
....................  .....