عودة أمل 💛

الحلقة ٣٤

عودة أمل2
(وعودة إلى الماضي)
بوسي مصطفي
....................
الحلقة الرابعة والثلاثون
.................
أمل وهي بتعيط / انا آسفة يا هشام كان غصب عني صدقني انا تعبانه
هشام /'وانا هيريحك واعمل اللي انتي عايزاة انتي مش طالبة الطلاق يبقي خلاص اعتبري مفيش حاجة بينا من دلوقتي
أمل انتي
أمل صارخة / لا يا هشام مقتولهاش علشان خاطر ابنك
مش هعمل كده تاني علشان خاطري يا هشام
قفل هشام التليفون
........................
أمل بتعيط دخل عليها كمال ونجلاء
كمال / ايه يا بنتي مالك ايه اللي حصل
نجلاء / ردي علينا يا أمل انتي كنتي مبسوطة دلوقتي ايه اللي حصل
......... . ...........
كمال / طيب قومي من الأرض يا بنتي
سندها كمال مع نجلاء وقعدت علي السرير
قعد كمال جنبها /'في ايه قوليلي يا أمل
أمل وهي بتعيط / هشام هيطلقني
نجلاء/ يالهووي علي الجبروت يعني يضربك ويهينك وكمان عايز يطلقك
كمال / اسكتي يا نجلاء واطلعي وسبينا لوحدنا
خرجت نجلاء
كمال / شوفي يا بنتي انا مش فاهم ايه سبب الخناقة اللي حصلت ما بينكو ولا اصلا ليه اتكلموا عنك كده معرفش غير إني واثق فيكي بس انا كمان مش هقولك غير إنك غلطتي لو ليكي حق كنتي هتاخديه بس مش في الظروف دي
أمل / انا كمان مكنش في دماغي اتكلم معاه في حاجة غير أني اواسيه بس هو اللي اتكلم
كمال /'عايزة رأيي
هزت أمل راسها
كمال / لو لسه بتحبيه تاخدي ولادك دلوقتي وانا هوصلك لحد البيت
أمل /'ازاي انا مقدرش اجي علي كرامتي اكتر من كده انا اعتذرتله وهو حتي مفكرش يعتذر عن ضربه ليه
كمال / انتي مش صغيرة يا أمل انتي زوجة وأم دلوقتي لازم تتعلمي إن أي مشكلة بينك وبين جوزك متطلعش بره اوضتك اتكلموا اتعاتبوا صفو كل اللي بينكو لكن من غير وجود حد بينكو انتي جرحتيه قدامي وانا راجل وبقولك مفيش واحد يقبل علي نفسه الإهانة من مراته حتي لو كان بيبوس التراب اللي بتمشي عليه
أمل /'كانت ساعة غضب وانا كنت نايمة ومش في وعيي
كمال / عارفة يا بنتي انا ونجلاء بقالنا  تلاتين سنه متجوزين عمرها ما غلطت فيه ولا قالتلي كلمة زي دي
علي فكرة يا أمل انا اللي مبخلفش ولحد النهاردة بحاول أقنع نجلاء إن العيب مني وهي سليمة مش عايزة تقتنع عارفة ليه علشان عايزة تعيش معايا
أمل بتمسح دموعها
تابع كمال /'عارفة كانت تقولي انا هروح اتعالج علشان اجيبلك حتة عيل يشيل أسمك وانا أقولها يا بنت الناس انا اللي مبخلفش مش عايزة تقتنع علشان متجرحنيش
تقومي انتي تقولى لجوزك انت مش راجل.
أمل / انا مقولتش كده
كمال / امال قولتي ايه
أمل / قولتلوا لو كنت راجل كنت جيبتلي حقي
كمال / يا سلام وفرقت ايه الكلمة انا شايف اللي انتي قولتيه معناه أصعب من اللي انا قولته
أمل /'يعني اعمل ايه دلوقتي انا مصدقت لاقيت حد يحبني يعني أعيش اربي ولادي من غير أب الأول مات والتاني هيطلقني
كمال /'إن شاء الله
مفيش حاجة من دي هتحصل قومي اغسلي وشك وانا هنزل أشغل العربية واطلع اخد الولاد وتيجي معايا اوصلك لبيتك
أمل /'ازاي هدخل البيت وهو مش طايقني
كمال / شوفيه قاعد فين متسبهوش غير وانتوا متصالحين عارف انه هيعند في الأول بس في الاخر هيصفي انا عارف اللي من نوعية جوزك ده اللي بيزعل بسرعة بس لو جيتي تصالحية بينسي علي طول أهم حاجة ميتكررش اللي حصل ده تاني ماشي
أمل / حاضر يا خالي
كمال / يلا انا نازل تحت اطلع تكوني جهزتي انتي والولاد.
............................
في شقة ماجد
ماجد بيفتح الباب ....ريم قاعدة قدام التليفزيون بعصبيه توقع الريموت في الأرض
ماجد يدخل /'في ايه يا ريم
ريم / فيه اني زهقت
ماجد / ايه المقابلة بتاعتك دي بقي جاي من الشغل تعبان بدل ما تقوليلي كلمة حلوه تقومي تجهزيلي عشوه حلوه من ايدك الاقي البوز ده
ريم / وانا مش شغاله عندك علشان حضرتك طول اليوم بره البيت وعايز ترجع تلاقى بقي الخدامة مجهزه حمامك ومروقة البيت وعامله الاكل اللي بتحبه تاكل انت بقي وتنام
ماجد /'وانا مقولتش انك خدامة وبلاش مش عايز أكل ولا تعملي حاجة في الشقة بس أقل ما فيها ادخل من باب الشقة تقابليني ببتسامة مش مكشرة ومتعصبة معرفش ليه
ريم / انا قاعدة طول اليوم لوحدي لا بخرج ولا بشوف حد
ماجد /'يا حبيبتي دا اول يوم ليه في الشغل وانتي اللي صممتي كمان اشتغل علشان البيت محتاج مصاريف
ريم /'انا بقي عايزة شغالة
ماجد/ احنا اتكلمنا في الموضوع دا قبل كده واتفقنا أننا هنجيب شغالة بس مش دلوقتي لما اشتغل كام شهر كده
ريم / بس انا تعبانه ومش هقدر علي شغل البيت لوحدي
ماجد / يبقى في حاجة جاية في السكه
ريم / يعني ده
ماجد / آه نسيت إنك مبتفهميش كلامنا
أقصد يعني في بيبي صغير كده هيشرفنا كمان كام شهر صح
ريم ببتسامة / عرفت ازاي
ماجد / مش مهم عرفت ازاي المهم اني فرحان اوي
ريم / بجد يا ماجد
ماجد / اكيد طبعاً وبالمناسبة دي تقومي بقى تلبسي كده وتتشيكي وننزل نتعشي في أي مكان تختاريه
ريم قربت من ماجد واحتضنته / يا حبيبي يا ماجد ايوه كده أحبك وانت رومانسى
ماجد / ههههه ماشي بس بعد كده تمسكي انتي مصروف البيت لاني ممكن اصرفه في يوم
ريم / هههههههه طب ما انا شرحه الفلوس مبتقعدش معايا ساعة علي بعضيها بس اقولك احنا نقسم مصاريفنا من دلوقتي
نشوف بنشتري أكل بكام. ..دا غير الدليفري
وكمان جزء من الفلوس لمصاريفى انا بقي الشخصية
وجزء من الفلوس للعربية ومصاريفها
جزء بقي للشغالة
ماجد /ههههههه  لا دا انا كده عايز ضعف مرتبي علشان نكمل بقيت الشهر وكمان مطلعتيش جزء مصاريف ليه
ريم /"لأ بقي احنا لازم نمسك ايدنا شوية وانا كمان هحاول اقلل شوية من مصاريفي علشان تكفي ونجيب شغالة كويسة تريحني من شغل البيت
ماجد / خلاص اتفاقنا. ..كلام رجاله؟
ريم / نعم! !!شايفني راجل ولا ايه؟!
ماجد/ هههههههه راجل! !...الحلاوة والطعامه دي كلها وراجل طيب ازاي دا كفاية بس العيون الخضر دول ولا الشعر الدهبي اللي يهبل ده
ريم /'باااااس كفاية بقي كده مش هننزل انا هدخل البس
ماجد /'ايه رأيك منخرجش ونطلب دليفري
ريم / انا مش خارجة علشان أكل علي فكرة انا خارجة علشان اشم شوية هوا
ماجد / طيب يا جميل ادخلي البسي وانا هدخل الحمام اخد شور
علشان  اصحصح
ريم ببتسامة / اوك
.....................
في فيلا مراد
وعد / رايح فين دلوقتي يا بابا
مراد / رايح ل أمل ارجعها ما هي لازم ترجع بيتها
نورهان /'بصراحة هشام زودها اوي يا بابا وكسر بخاطرها مع انها هي اللي كلمته كان مفروض يقدر كده
مراد / مش عايز حد يدخل بينهم هما يقدروا يحلو مشاكلهم لوحدهم
وعد / ماحضرتك يعني انا آسفة رايح تجيبها
مراد / انا رايح اجيبها علشان يتعتابوا براحتهم لكن طول ما هي مش موجودة في البيت اخوكي هيفضل منشف دماغه
..................
قدام الفيلا
كمال يوقف العربية وينزل يفتح الباب ل أمل
كمال / هاتي الولاد وانتي انزلي براحتك
أمل باضطراب / حاضر
اخد كمال الولاد ونزلت أمل. ..قفل العربية
أمل واقفة
كمال / يلا يا بنتي
أمل / ادخل انت يا خالي الأول وانا جايه وراك
كمال / ماشي
عم عبدة فتح البوابة
أمل ماشية ورا كمال وصل للباب رن الجرس
مراد بيفتح الباب. ..
بفرحه اخد هشام في حضنه ونورهان اخدت شادي
مراد / اتفضل يا استاذ كمال امال فين أمل
قربت أمل من الباب
مراد ببتسامة / اتفضلوا البيت بيتكو. ..قالها وهو بينظر ل أمل
وعد ونورهان قربوا واحتضنوها
مراد / اقعد يا استاذ كمال واقف ليه
كمال / معلش انا مضطر أخرج دلوقتى الوقت متأخر ألحق ارجع البيت مع السلامة يا أمل
وقرب همس في ودنها / متنسيش الكلام اللي قولتهولك
أمل / حاضر يا خالي
كمال / استأذن انا. .البقاء لله
عارف انها متأخرة وإني محضرتش الدفن ولا العزا انا آسف كنا يومها في البلد خال نجلاء كان تعبان ورحنا نزورة وبيتنا هنا وجينا الصبح
مراد / سعيكم مشكور. ..ومتتأسفش انت أبو الواجب كله
الف سلامة علي خال المدام
كمال / الله يسلمك
بعد اذنكو
خرج كمال
.........  
مراد ل سعاد / متشكر اوي فعلاً الأكل جه في وقته
يلا يا أمل قربي نتعشي مع بعض
اطلعي يا وعد نادي هشام من فوق
وهمس في ودنها / متقوليش إن أمل تحت ماشي
ابتسمت وعد /'حاضر
مراد / يلا يا نور يلا يا أمل انتي لسه قاعدة تعالي يا هشام اقعد جنبي علشان اكلك
نزل هشام ووعد
هشام نزل كام سلمه لمح أمل قاعدة وعلي رجلها شادى استدار علشان يطلع فوق تاني
مراد / تعالي يا هشام يلا باش شغل العيال ده
نزل هشام تحت قعد في مكانه علي السفرة
نورهان ووعد قعدوا جنب باباهم
مراد / تعالى يا أمل يلا علشان تاكلي
أمل / هدخل ارضع شادي الأول
مراد / امال فين خالتك يا نور
نورهان /اخدها عمر وروحوا البيت عندهم
معرفتش يا بابا إن عمو مختار اتجوز
هشام / وايه الجديد يعني مش حاجة غريبة 
وعد / فعلاً الواحد دلوقتي مبقاش يستغرب حاجة ناس بتتجوز وناس عايزة تطلق دنيا غريبة ومش مفهومة
مراد / انا بقول بقي تبطلوا كلام وتاكلوا
خرجت أمل وقربت من السفرة وفضلت واقفة
مراد /'اقعدي يا أمل جنب هشام
أمل لسه بتقعد هشام قام من علي السفرة
مراد / رايح فين يا هشام
هشام / الحمد لله. ...شبعت هطلع اقعد في اوضتي
مراد بعصبية /'مش كفاية نوم وقعدة في البيت بقي وتشوف شغلك
هشام / من بكره الصبح هروح الشركة بعد اذنكو
أمل نظرت ل هشام وهو ماشي لكن هو منظرش ليها وطلع فوق
قعدت أمل بحزن
وعد / هاتي شادي يا أمل علشان تعرفي تاكلي
أمل / لا خليه معايا علشان تاكلي انا اصلا شبعانه ومليش نفس للأكل
نورهان / بس انتي شكلك تعبانه وواضح إنك مأكلتيش حاجة النهاردة
أمل / لا انا كويسة
.................................
في فيلا عاصم
مديحة ل سها / انتي عامله ايه مع عمتك يا بنتي
سها /"عادي يا ماما احنا تقريباً مبنقعدش مع بعض كتير
انا بنام متأخر علشان شهد بتسهرني طول الليل وبصحي مبتكونش في البيت
مديحة / ليه بتروح فين
سها/ معرفش بس يعني هتروح فين تلاقيها بتروح تقعد مع أصحابها لانها بتزهق من قعدت البيت
مديحة / وعلاء عامل معاكي ايه
سها /'طاير ب شهد مش مصدق إنه عنده بنوته
مديحة / حبيبتي شهد هي اصلا تتحب فيها كتير منك وانتي صغيرة
سها / انا كنت حلوه كده
مديحة /'طبعاً حلوه وزيدتي حلاوه كمان لما كبرتي
بس عايزة اقولك علي حاجة
سها / قولي يا ماما
مديحة / انتي دلوقتي. ..ماشاء الله ...عندك بنوته زي القمر
تحافظي بقي عليها وموضوع الحمل بعد كده دا تنسيه خالص المرادي عدت علي خير. ...الحمد لله
علشان تيجي شهد حبيبتي وتنور حياتنا متوجعيش قلبي عليكي بقي في حمل تاني كفاية السبع شهور اللي عشتهم في رعب من خوفي عليكي
سها / اطمني يا ماما علاء مشدد عليه في النقطة دي وقالي همشي معاكي يوم بيوم علشان منساش اخد الحبوب
مديحة / كويس انه خايف عليكي عارفه دكتور القلب اللي كنا رحنا عنده قبل كده وعمارته كانت في الخامس والاسانسير كان عطلان
سها / آه فاكره ويومها اعتذر لكل المرضي واتصلنا قالنا تعالوا على المستشفى
مديحة / هو ده اللي أقصدة قابلني من كام يوم في النادي وسألني عليكي وفرح اوي لما عرف إنك قومتي بالسلامة
سها /'هو فعلاً دكتور محترم اوي وشاطر كمان في شغله
مديحة /'قالي إن في دكتور من ألمانيا هيجي بعد كام يوم وعايزنا نروحله المستشفي علشان يشوفك
سها بحزن / ماما علشان خاطري بلاش موضوع الدكاترة ده انا باخد العلاج وخلاص علشان بس متعبش اكتر ومش عايزة اتعلق ب أمل وبعد كده ملقيش غير وجع علي حلم اتمنيته ومتحققش
مديحة /'مش هنخسر حاجة لما نروح ونشوف هيقول ايه يمكن حالتك ليها علاج في ألمانيا
سها /'انا هقول لعلاء اشوف رأيه ايه
مديحة / علي العموم هو جاي بعد بكره تكوني قولتي ل علاء وتردي عليه لو كده نروح يا بنتي
حاسه. ..إن شاء الله. .إنه هيطمنا عليكي ويقولنا إن في علاج ليكي
سها / ماشي يا ماما هرد عليكي بكره هخرج بقي لان علاء بيتصل وواقف بره
مديحة / ردي عليه وقوليلو يدخل
سها / معلش يا ماما اصلو بيجي تعبان اوي من الشغل وبيكون عايز يستريح
مديحة / ماشي يا بنتي خلي بالك بقي من نفسك ومن شهوده
ومتنسيش الموضوع اللي كلمتك فيه
سها / حاضر يا ماما. ..تصبحي علي خير
.................
في فيلا مراد
أمل ماسكه بطنها وبتتألم
مراد جري بلهفه ناحيتها / في ايه يا أمل مالك
أمل وهي بتعيط/ بطني بتتقطع
نورهان / نوديكي للدكتور
أمل / لأ انا في دوا باخده بيريحني
وعد / هو فين وانا أجيبهولك
أمل / فوق في اوضتي
نورهان / خليكي يا وعد وانا هطلع اجيبه
طرقت نورهان الباب
هشام كان بيغير هدومه علشان ينام
هشام / في حاجة يا نور
نورهان / أمل تعبانه وكانت عايزة دوا علشان بطنها بتوجعها
هشام / عندك جوه في الحمام
نورهان / طب ادخل هاتوا انا مش هعرف
دخل هشام الحمام اخد الدوا وطلع
هشام / اتفضلي
نورهان / طب بالراحة متزقش كده وإنا يعني كنت هعرف اسم الدوا ازاي
هشام / انتي مش بتقولي إنها تعبانه أنزلي بقي علشان تاخد الدوا
نورهان / طيب لما انت قلقان عليها اوي كده متنزل تشوفها يمكن تحتاج دكتور
هشام / أنزلي يا نور انا عندي شغل الصبح وعايز انام
نورهان / طيب
نزلت نورهان تحت. ..اخدت أمل الدوا
مراد / تعالي يا أمل اسندك تطلعي اوضتك
أمل / حاضر بس شوية لاني مش قادرة أقف دلوقتي
مراد قعد / انتي اللي غلطانة علشان خرجتي وانتي لسه تعبانه
لازم تستريحي
أمل / وهتيجي منين الراحة انت مش شايف هشام عمل ايه لما شافني
مراد / من ورا قلبه انا عارف هو بس كرامته وجعاه شوية
امل / وانا كرامتي فين جيتلو لحد البيت مع أنه ضربني وهاني وهددني بالطلاق كمان
بكت أمل
نورهان / متزعليش يا أمل هشام بيحبك صدقيني هو قاعد فوق تعبان وقلقان علشانك
مراد / يلا يا بنتي تعالي علشان اطلعك اوضتك
مراد بيخبط
هشام / يوووووه عايزة ايه يا نور
مراد / انا يا هشام
هشام / اتفضل يا بابا
مراد بيدخل وماسك أيد أمل / تعالي يا أمل ادخلي يا بنتي علشان تستريحي
هشام وقف في نص الاوضة
مراد / أسند مراتك علشان تنام
هشام مسك ايدها وقعدها علي السرير
مراد / انا خارج يا أمل عايزة حاجة
هزت أمل راسها
مراد / تصبحو علي خير وعد هتجيبلك شادى
خرج مراد
هشام قرب من أمل / لسه تعبانه
أمل بتعيط
هشام خارج من الاوضة. ..أمل جريت وقفت قدامه حضنته
وهي بتعيط / هونت عليك تضربني يا هشام وكمان عايز تطلقني
هشام وهو بيبعدها عنه / ما أنتي مش شايفاني راجل
وفتح الباب. ..أمل مسكت أيده وقفلت الباب
أمل / من أمتي بتعمل كرامه عليه يا هشام ما انا عيشت مستحمله إهانة مامتك ونظرات اخواتك ليه وكنت ساكته
هشام بغضب / تاني هتفتحي نفس الموضوع
أمل لو جايه وناويه تعيشي هنا انا ليه شروط
نظرت ليه أمل بدهشة
هشام / أولا موضوع ماما وشادي متفتحوش تاني
ثانياً بقي مش مطلوب مني اتكلم مع أخواتي ووضحلهم حاجة مفروض تبقي عارفة إن كفاية اني ابقي واثق فيكي
أمل / بيع واشترى فيه براحتك ما هو انا اللي معملتش كرامه لنفسي من الأول تضربني وتهيني واتصل اعتذرلك تهددني بالطلاق وخالي يجيبني لحد هنا علشان ساعدتك تتشرط عليه
ما هو لو ليه اب وأم كانوا وقفولك
هشام / بطلي هبل وعبط بقي انتي عارفة كل حاجة بابا اكتر من أب ليكي عمره مزعلك في يوم زي مبعمل مع اخواتي فبلاش نغمة الأب والأم دي
وحقك خدتيه يا أمل وزيادة
خدتيه يوم ما اتوسطت ليكي واتجوزتي شادي وكسرتوا قلبي
خدتيه وانتي شايفة كسرت امي ودموعها علي شادي
خدتيه يوم ما اتجوزنا
خدتيه يوم اتكسرت قدامك من اللي حصل لوعد
خدتيه يوم ما اتحديت امي وخرجت انا وانتي من الفيلا
خدتيه لما عرضت نفسي والبيت كله للخطر علشان اجيبلك حقك من عم والدتك
خدتيه يوم ما امي وقعت منطقتش من الصدمة لما عرفت اللي حصل وماتت فيها
لسه شايفة إن ليكي حق يا أمل ولا كده كفاية
أمل وهي بتعيط / حقك عليه انا
هشام / لسه في وجع تاني يا أمل ولا كده كفاية
أمل / أنا آسفة يا هشام انت عملت علشاني كتير علشان كده جيتلك ومش زعلانه إنك ضربتني
هشام وهو بيحضنها / وانا تتقطع أيدي لو اتمدت عليكي تاني
...........................................
عودة أمل2
(وعودة إلى الماضي)
📖✏بقلمي
بوسي مصطفي