عودة أمل 💛

الحلقة ١٢

#عودة امل3
#بوسي مصطفى
.....  
الحلقة الثانية عشر
........
بعد كام يوم من الأحداث
في الصباح في فيلا مراد
هشام قاعد في الجنينه تقرب وعد منه
وعد/ ايه يا عم السرحان دا كله عماله أنادي عليك وانت ولا هنا خالص لدرجادي واخده عقلك
هشام/هي مين ؟
وعد / حبيبة القلب اللي مشقلبه حالك ومتوهاك ....أمل
هشام بحنين/أمل
وعد/ آه أمل. ....اشمعنه دي اللي سمعتها
هشام/ نور لسه نايمه
وعد/ايوه توه علي الموضوع
هشام/موضوع ايه يا وعد...اقولك ادخلي المطبخ اعمليلي فنجان قهوة
وعد/ طب متروح انت ل أمل صالحها وهاتها تعملك قهوة دي احسن واحده بتعمل قهوة في البيت كله
هشام/ خلاص يا وعد مش عايز منك حاجة
مازن ومعتز داخلين من باب الفيلا
وعد/ مين اللي مع مازن ده
يقبل مازن نحو هشام / صباح الخير يا اتش
معتز/ ايه يا ابني انت عيان ولا ايه محدش شافك من آخر مره كنا فيها مع بعض
هشام/ مازن انت مرحتش الشغل ولا ايه؟
مازن/ بصراحة الشركة دمها تقيل من غيرك ...اخدت اجازة وقولت أجي أطمن عليك مبتردش علي التليفون ليه
معتز ينظر ل وعد / مين دي يا هشام ...المدام؟
مازن/ ههههه لا دي وعد
معتز باندهاش/مش معقولة دا انا آخر مره شوفتها كانت صغيرة كده ولماضة الدنيا كلها فيها يا أخي
وعد بضيق/ الصغير بيكبر يا عمو
مازن/ ههههههه عمو
معتز/لا تقصدي ده دي صبغة
مازن/هههههه وحد يصبغ شعره ابيض بردو
معتز/أهو تغيير
هشام/ وعد قولي لمنال تجهز الفطار
مازن/ فطار ايه يا عم انا فطرت من زمان
معتز / متنسيش القهوة بتاعتي بن تقيل
وعد بضيق/حاضر
تدخل وعد جوه
معتز/ ايه يا عم اختك دي. ..مالها بتكلمنا كده ليه؟ !
هشام / معلش هي طريقتها كده
مازن /اخبارك ايه يا هشام
هشام/ الحمد لله
....................
في منزل والد دينا
مدحت/ لا بقي يا دينا شكل الموضوع مطول لا فيه شغل ولا هتطلعلنا مصلحة منه
دينا/ يعني عايزني اعملك ايه اشغلك بالعافية
مدحت/ ما هو البيه سيبك شغلك ودلوقتي قعد حد مكانك استفادنا احنا بقي ايه
دينا / اسمع يا مدحت انت اخدت ميراثك كله وضيعته علي الست مراتك محدش فينا اتكلم معاك في حاجة يبقي سيبني بقي أعيش حياتي
والدة دينا/ وانتي بقي كده عايشة؟ !
دينا/آه يا ماما عايشة وجوزي مش مخليني عايزة حاجة
والدة دينا/يا بنتي انتي عايشة معاه ومش ضامنه حاجة الفلوس اللي بيصرف بيها عليكي دي بكره هتروح لولاده
دينا/لآ يا ماما متقوليش كده متفوليش عليه انا مصدقت إني لاقيت راجل يحبني ويحترمني دا غير نادر خالص
مدحت/مقولناش حاجة بس انتي بردو لازم تمسكي جامد القرشين اللي معيشك منهم دول ولا حاجة بشطارتك بقي ممكن يبقوا كتير
دينا/يعني ايه
والدة دينا / يعني تخلفي منه
مدحت/بالظبط كده يا ست الكل
دينا/ يا لهوي دا كان يطلقني انتو عارفين إن دا كان شرطه قبل منتجوز إني مفكرش في الحمل نهائي
والدة دينا/ اسمعي مني انا بس كلامه ده ولا ليه قيمه لما يشوف ابنه قدام عينه الفرحة مش هتبقى سيعاه وهينسي كل اللي قاله قبل كده
مدحت/يا سلام عليكي يا ست زوزو وعلي افكارك هو دا اللي لازم يحصل
دينا/ وافرض رفض بقي
مدحت/ ما هو انتي تعمليها من غير ميعرف إنك بطلتي موانع الحمل
ولما يعرف بقي هيبقى أمر واقع
دينا/ بس تفتكروا ينفع احمل وانا في السن ده
والدة دينا/ ليه لأ كلنا عارفين إن نادر كان العيب منه وانتي بقي تيجي معايا لدكتورة شاطرة هي اللي هتقولك تعملي ايه
مدحت / تسلم دماغك يا ست الكل
....................
في شقة كمال
نجلاء تدخل لأمل الغرفة
نجلاء ببتسامة/صباح الخير يا جميل
امل/صباح الخير
نجلاء/نمتي كويس الليلة
امل/آه احسن من اليومين اللي فاتوا
نجلاء/ عايزة اقولك حاجة بس متكسفنيش ولا ناجلها بعد الفطار ولو أنه هيبقى غدا احنا بقينا الضهر
امل/لا يا طنط قولي دلوقتي
نجلاء/جوزك متصل فوق المية مره وعايز يكلمك وانتي رافضة ليه كده يا بنتي
تقوم أمل وتنفض الفراش بضيق /'طنط لو سمحتي بلاش السيره دي
نجلاء/طب ردي عليه اسمعي منه وخلاص بلاش تردي علي كلامه
أمل بضيق ممسكه التليفون / وادي التليفون قفلته خلاص
نجلاء باستسلام / خلاص براحتك انا هجهز السفره البسي وتعالي علشان تاكلي
خرجت نجلاء. ...أمل منهاره بالبكاء
علي السفره
كمال /'ايه أمل لسه مصحيتش
نجلاء بحزن/ لأ صحيت وجايه
كمال/مالك يا نجلاء
نجلاء/ أمل منشفه دماغها ومش عايزة ترد علي جوزها
كمال/هو لسه بيتصل
نجلاء /مبطلش اتصال لحد مقفلت التليفون خالص
كمال/دماغها ناشفة زي مقولتي هنعملها ايه بس
......... ......
في فيلا مختار
مختار/ الظاهر اتجننتي انا هفكر في مرات ابني
مريم/ ضاقت الدنيا بيك ملقتش غير بنت اختي انت ايه يا أخي
عايز تتجوز متتجوز علي الأقل تجيبلك ممرضة تاخد بالها منك وتديلك الدوا في ميعاده
مختار /بقي كده يا مريم هي دي اخرتها
مريم /انت اللي اخرتك هتبقى علي أيدي طول مفيك الطبع ده
ضيعت ولادي واحده ورحت جوزتها من ورانا والتاني فضلت وراه لحد مطلق مراته انا تعبت منك وعملت بأصلي معاك للاخر بس من دلوقتي انت في اوضه وانا في اوضه لاني مش هسيب بيتي
يخبط عمر ويدخل
عمر/في ايه يا جماعة صوتكو عالي ...في ايه يا ماما
مريم بانفعال/ايه اللي هببته مع مراتك ده
عمر/ دا موضوعى وانا هحله
مريم/ موضوع ايه اللي هتحله يا خايب فضل وراك  لحد مخرب بيتك
مختار/ لحد كده وتخرسي خالص
مريم/ أخرس ايه يا ابو عين زايغة طب الشغالة وقولت عادي يمكن الراجل نفسه يتجوز لكن مرات ابنك ايه لدرجادي معندكش دم
عمر/ ماما الموضوع مش كده
مريم/اومال الموضوع ازاي؟ !...ضحك عليك بموضوع الحقنه
طب والباب اللي اتكسر ده مين اللي كسره
مختار/المحروس اخوها
مريم/ كفاية كدب بقي نورهان قالتلي إنها كانت لابسه وجاهزة وخرجت مع هشام اول موصل
مختار/ كدابه
مريم/ البواب موجود وولاد اختي موجودين تحب تواجهم باللي بتقوله ده
مختار/ خلاص انا كداب وهما صادقين كده ارتحتي
مريم / ارتحت من ايه؟ !....هو اللي يعيش معاك يستريح
عمر في ذهول
مريم /علشان خاطري يا ابني تروح ترجع مراتك بس ياريت توافق احسن مراد وهشام مولعين بسبب الموضوع ده
عمر/ انا مستحيل أصدق اللي انتوا بتقولوه ده
مريم بانفعال/ خلاص انت حر سيب بيتك وشغلك وخلي باباك يشوفلك واحده من اللي يعرفهم دول ويفتحلك شركة بالفلوس اللي الهانم هترجهم بعد متنصب عليه في مبلغ أكبر
يتركهم عمر ويخرج
مختار /وانتي ممشتيش ليه ورا ابنك
مريم/ خارجة بس مش همشي من بيتي
مختار /طب غوري بقي من وشي مش طايق اشوفك
مريم / لأ وبجح كمان
..................
في شقة كمال
كمال/كملي اكلك يا أمل
امل/شبعت
كمال/ وبعدين يا بنتي
امل/وبعدين ايه يا خالي
كمال/مش عايزة تصفي وترجعي بيتك ليه
امل/ زهقتوا مني
نجلاء /يا خبر انتي بتقولي ايه دا انتي مالي علينا البيت بس عايزينك تبقي جايه فرحانه مش جايه زعلانه مع جوزك
امل/ خلاص يا جماعة انا هاخد شنطتي واروح شقة بابا
كمال / عايزة تقعدي لوحدك؟!
أمل/ هو دا مكاني
كمال /مش عايزة تتكلمي وتقولي مالك
امل/ مالي..... اني شايلة حملي علي كتفي طول عمري ملقتش حد يشيلو معايا
كمال/ ارمي حمولك عليه يا بنتي
امل/ خلاص مبقاش ينفع ياريتني مت من زمان مع بابا وماما
كمال /ليه كده يا أمل
امل/ علشان مشوفش اللي شوفته في حياتي انا مش قادرة أكمل حياتي خايفة يجي اليوم اللي فيها اموت نفسي
تجري عليها نجلاء وتحتضنها / ليه كده يا أمل أخص عليكى حد يفكر في كده بردو
أمل بدموع / الدنيا خنقتني اوي مش قادرة اتحملها
كمال/ نسيتي ولادك دول ميقدروش يعيشوا من غيرك
امل/ أهم بقالهم كام يوم عايشين من غيري عادي
كمال/ مش يمكن في حاجة وجوزك بيتصل علشان كده
نجلاء /افتحي التليفون يا أمل علي الأقل تطمني علي ولادك
جرس الباب يرن
كمال/ ادخلوا انتوا دلوقتي جوه وانا هشوف مين
يقرب كمال يفتح الباب يتفاجأ
كمال/ سامي! !!
خير في حاجة
سامي/ طب قولي اتفضل الأول
كمال/ اتفضل
........
يدخل سامي ويقعد علي أحد الكراسي في الريسبشن
سامي/ اخبارك ايه يا كمال
كمال بحده/ أدخل في الموضوع علي طول
سامي/ انا عرفت ان أمل عندك هنا
كمال باضطراب/ أمل...وانت عايز منها ايه
سامي/'متقلقش اوي كده انا جاي في مصلحه ليه وليها
كمال/ بنت اختي ملهاش مصالح معاكو
سامي/ طب نادي عليها واسمع الكلمتين اللي هقولهملها مش يمكن توافق
كمال/'توافق علي ايه؟ ...عايزين تاخدوا فلوسها وتبتزوها ايه البلد سايبه
سامي / محدش هياخد فلوسها الموضوع كله اخد وعطا
كمال/ مش فاهم
سامي/اندهلها بس وانت تفهم
......................
في شقة حسن
سوسن/ جرا ايه يا حسن انت هتفضل قاعد كده البيت مفهوش فلوس
حسن وهو بيلف السيجاره/ اعملك ايه يعني شطبت ممعييش ايه اقطعلك نفسي
سوسن وهي بتاخد السيجاره من ايده / لأ تبطل الهباب اللي بتشربه ده وتفوق بقي
حسن/ ما هو انا بشرب علشان انسي
سوسن/ آه تنسى حبيبة القلب اللي زحلقتك من حياتها
حسن/ تصدقي بقي البنت كانت حلوه وبنت ناس كده انا فعلاً غلطت
سوسن/غلطت ليه يا حبيبي متروحلها
حسن/ ياريت ينفع
سوسن بضيق /'انا خارجة رايحه الشغل ومن هنا ورايح شغلي بقي هيكون لنفسي آه ما هو انا مش هشيل عنك مصاريفي وكمان اصرف عليك
حسن/ بقى كده يا سوسن نسيتي
نسيتي الشقة اللي كتبتها باسمك والدهب اللي مالي دراعاتك
سوسن / جبته بدماغي يا حبيبي وبنصبك علي الست هانم بتاعتك يعني متعبتش في حاجة خلي الست ماما ولا بابا يصرفوا عليك
حسن/ازاي بعد ما قطعوني علشان خاطرك
سوسن/ لا يا حبيبي دا كان علشان اللي عمتله في حبيبة القلب ياراجل حد يعمل كده في مراته
طب قبل كده وقولنا علشان تضغط عليها وتتجوزك لكن مراتك تعمل فيها كده
حسن/بقولك ايه هاتي السيجارة دي واتفضلي بقي شوفي وراكي ايه
سوسن/ السيجارة اهه بس هتكون آخر واحده علشان انا بقي يا حبيبي شطبت
حسن ممسك بيدها/اومال دول ايه
سوسن/ يا خرابي انت عايز تبيعني حتة الدهب اللي في أيدي دول يا حبيبي لابني ولا بنتي اللي لسه مشفوش الدنيا ولا عايز تقشطني اول بأول
نزعت يده وخرجت مسرعة وتركته ينفس في السيجارة بضيق
.................
في شقة كمال
سامي ل امل/ها قولتي ايه
كمال/ تقول ايه بقي عايز بنت اختي تدخل عش الدبابير برجليها سامي/ حقها محفوظ في أرباح الشركة وهكتبلها عقد بحصتها علي حسب المبلغ اللي هتدفعة بس العقد ده عادل مش هيطلع عليه إلا في الوقت المناسب
امل بتحدي/ انا موافقة
كمال/ موافقة علي ايه دي نصبايه وحتي لو صادق في كلامك اخوك لو عرف مش هيسيبها في حالها
سامي/ متقلقوش هو ميعرفش انا هاخد الفلوس واكتبلك عقد بيهم وهقوله إني اخدت منك الفلوس بأي وسيلة ضغط ويبقى ليكي نسبتك اللي هتنضم لحصتي بس دا قدام عادل بس ولو قلقانه ممكن اكتبلك شيك بالمبلغ ولو مفيش حساب تقدري تسجنيني
امل/ وانت هتستفاد ايه
سامي/ أولا هسدد ديوني وحصتي في الشركة تفضل زي ما هي
ثانياً هبعدك عن عادل اخويا لانه من وقت مرجعتلك الفلوس وهو ناوي ياخدهم بالعافية
امل/ هيعمل ايه يعني هيسرقهم من البنك
سامي/ لأ طبعاً بس ممكن يخطف حد من ولادك ويساومك عليه
أمل بفزع/ ايه
سامي/ دا أسلم حل ليه وليكي قولتي ايه
أمل بقلق/ موافقة بس أضمن حقي بكل الطرق والعقد يتم عند محامي
سامي/ موافق. ..ها يا كمال اطمنت
كمال بنظرة خوف لأمل / اللى تقوله أمل تنفذه
سامي/ كل طلباتها مجابه وبالشروط اللي هي عايزاها اوك
هزت أمل رأسها بالموافقة
................
في المساء في فيلا مراد
منال تحضر العصير ل هشام
ببتسامة وتوقف قدام المرايا تظبط نفسها
مني/ دا كله علشان كوباية عصير
منال بحب/ متعرفيش قالهالي ازاي
مني بسخرية / قالها ازاي
منال بحب/ قالي هاتيلي كوباية عصير يا منال
مني/ هههههه وفيها ايه يعني
منال/ دي اول مره يطلب مني حاجة لنفسه
مني/ بت انتي بطلي حركاتك دي يا حبيبتي متجوز. ..متجوز أقولها تاني
منال/ ومتخانق مع مراته وشكلها كده قفلت معاها دي سابتله العيال ولا همها حاجة
مني/ بكره يرجعوا لبعض وبعدين حتي لو مرجعوش هيبصلك انتي يا شيخة انتيلي بقي
منال/ بكره تشوفي
في غرفة البنات
نورهان/سيب التليفون دا بقي يا هشام وقولي تفتكر عمر هيجي
وعد لهشام/ ايه مبتردش بردو
نورهان/ انا بكلمك مبتردش ليه
هشام/ ها كنتي بتقولي حاجة
وعد/ كله في همه سارح. ..هيجي يااختي متخافيش بس انتي متتدلقيش عليه علي طول لازم يعرف إنه غلط في حقك والاعتذار مش كفاية
تخبط منال وتدخل ببتسامة
منال لنفسها/ قلبي بيدق كده ليه. ..يالهوي العصير هيدلق مني
اعقلي يا منال
وعد / سيبي الصنيه هنا يا منال
منال بحب / العصير اللي طلبته يا دكتور هشام
نورهان ووعد ينظروا لبعض
هشام/ متشكر يا منال
تخرج منال وهي في منتهي السعادة تقابلها مني يخبطوا في بعض
مني/ ايه يا بنتى مش تحاسبي
منال بحب/ قالي متشكر يا منال
مني بسخرية / يا سلام. ...ألف مبروك
منال بحب/ احلي منال سمعتها في الدنيا. ...
وعد ل نورهان / مش ملاحظة حاجة يا نور
نورهان/ ايه
وعد/ البت منال دي بقت مسهوكه اوي ومهتميه بنفسها علي الآخر دي ولا ولاد البشوات
نورهان/ يا بنتي ارحمي بقي دي بت غلبانه ايه يعني متفرح بفستانين اديتهوملها
وعد/ مش قصدي بس كلامها كده بقي غريب تحسي صوتها بقي ناعم سمعتيها وهي بتكلم هشام
نورهان/ بطلي بقي احنا في ايه ولا في ايه
هشام/ انا خارج محتاجين حاجة
الباب يخبط
هشام/ أدخل
عمر/ مساء الخير
نورهان تستدير الجهة الأخرى بغضب
هشام بضيق/ اتفضل البيت بيتك
عمر/ انا عارف انكو مضايقين مني. ..انا ممكن أخرج عادي
هشام/ لا ميصحش اتفضل اقعد
عمر يقعد علي أحد الكراسي في الغرفة
نظرات متبادلة بين الجميع
هشام/ تعالى يا وعد معايا عايزك
تخرج وعد وهشام
عمر يقرب من السرير. ..تنتفض نورهان نحو البلكونة
عمر/ انا عارف اني زودتها وعارف كمان إن قلبك كبير وهتسامحي
...................
في شقة كمال
كمال/ قلقان يا نجلاء علي أمل معرفش متغيره كده كانها أمل تانية منعرفهاش
نجلاء /انا مش شايفة إن فيها حاجة يعني لما تدخل بفلوسها في الشركة دي وبعدين هو مش قالك هيكتب عقد يضمن بيه حقها
كمال/ المشكلة مش في كده
أمل شكلها ناويه علي حاجة انا معرفهاش
جرس الباب يرن
نجلاء /طب شوف مين اللي جاي لينا السعادي
يقرب كمال يفتح الباب
كمال/ هشام
هشام بحرج/ انا اسف إني جاي في وقت غير مناسب
كمال/ دا بيتك يا ابني تيجي في أي وقت. ..اتفضل
يدخل هشام
كمال / اعملي فنجانين قهوة يا نجلاء ولا تشرب حاجة ساقعه
هشام/ لأ هشرب قهوة بس ياريت تتأخر شوية لانى عايز أتكلم مع أمل شوية هي فين
كمال / أمل نايمه. ..بس نصحيها عادي
هشام/ لا انا هدخلها دا بعد اذنك يا عمى
كمال/ اتفضل يا ابني
يدخل هشام الغرفة. ...أمل نايمه البطانيه واقعه في الأرض
يحمل هشام الباطنية يده تلامس جسد أمل
تفزع أمل بصرخة
هشام باضطراب / انا هشام يا أمل متخافيش انا كنت بغطيكي
يخبط كمال علي الباب
كمال / في حاجة يا أمل
امل/ لا يا خالو مفيش حاجة
يبعد كمال عن الباب
امل/ وايه اللي جايبك دلوقتي
هشام وهو بيقرب منها بحب / وحشتيني
يضمها ليه بقوة
تبتعد أمل عنه  / الولاد عاملين ايه
هشام بضيق/ كويسين. ..مش عايزة تشوفيهم
امل/ انت اللي بعدتهم عني
هشام/ انا؟ !...علي العموم الولاد في بيتهم لكن انتي بقي بتعملي ايه في بيت خالك
أمل بضيق/ بكره هرجع شقة بابا
هشام/ وبيتنا يا أمل
امل/ مبقاش ينفع يا هشام
هشام/ ليه مبقاش ينفع ؟!
امل/ هشام انت تحملت كتير وانا مش عايزة احملك اكتر من كده هشام/ ايه اللي انتي بتقوليه ده
امل/ هشام انا عارفه إني ظلمتك وإنك حاولت علي قد متقدر تسعدني لكن كل اللي بيدور في دماغك ده غصب عنك عارفة
هشام/ وايه بقي اللي بيدور في دماغي
امل/ كفاية اني احسه هشام انت لسه صغير وتقدر تعيش حياتك وتختار الانسانة اللي تستحقك بنت نضيفة متلوثتش
بكت أمل
هشام بيحتضنها/ انتي اكيد اتجننتي مين قالك إنك اتلوثتي انتي هتفضلي في نظري البنت البريئة الجميلة اللي قلبها طيب وبتسامح مش كده يا أمل
امل/ وانا مسمحاك بس مش هقدر أكمل حياتي معاك علشان خاطري افهمني
هشام وهو بيبعد عنها بضيق/ أفهم ايه كلامك دا استحالة يكون كلام ناس عاقلين
أمل / هشام افهمني
هشام بانفعال وهو ممسك بها/ انتي مراتي فاهمة مراتي  وهتفضلي مراتي لحد ما اموت
أمل بدموع/ أخرج يا هشام. ...أخرج وسيبني في حالي
هشام/ حاضر همشي يا أمل بس اللي انتي بتفكري فيه دع لآ يمكن يحصل أبداً
أمل جريت واحتضنته/ هتوحشني يا هشام
هشام بدموع/ أمل انا بحبك مقدرش أعيش من غيرك ولو ضايقتك أو جرحتك فى يوم سامحينى وتعالي نرجع بيتنا انا مش قادر انام في الاوضة وانتي مش فيها علشان خاطري يا أمل
امل/ هاتلي الولاد عايزة أشوفهم
هشام وهو بيفتح الباب / الولاد في البيت لو عايزة تشوفيهم انتي عارفة العنوان
تركها وخرج
.......................
بعد مرور ثلاثة شهور من الأحداث
الأوضاع مستقرة بين عمر ونورهان بعد مرجعت شقتها واعتذار عمر ليها وعايشين في هدوء بعد مااخد موقف من والده
#اما هشام وأمل فالوضع زي ماهو وهى عايشة في شقة باباها لوحدها وتممت الصفقة مع سامى بعد ما حفظ ليها حقها
#هشام رجع الشركة وبيتابع شغله من تانى
..............
في الصباح في النادي
وعد قاعدة مع صديقتها هنا
هنا/ محدش شافك في النادى من زمان يعني
وعد / الفترة اللي فاتت كانت صعبه عليه اوي وخصوصاً ليلي تعبتني اوي
هنا ممسكة ب ليلي/ يا خلاثي علي القمر ياناس
تعرفي يا وعد فيها شبه كبير من نور اختك
هي عامله ايه
وعد/ كل اللي يشوفها يقول كده
نور كويسه بس الحمل المرادي مطلع عينها
هنا/ هي اللي غلطانه حد يعمل في نفسه كده بردو ابنها لسه صغير
وعد/ الشغاله اللي عندها شايله عنها كتير
هنا/ طب وانتي تعبانه كمان من ايه مش عندك اتنين
وعد/ اتنين بس اللي عندي مشغوله مع ولاد هشام وحتي لو شالت ليلي بتفضل تعيط أمل بس اللي كانت بتسكت معاها علشان كانت حنينه اوي عليها
هنا/ هي مرات اخوكي لسه مرجعتش البيت بردو
وعد/ لأ لسه. ...بقولك ايه يا هنا كنت عايزة منك خدمة
هنا/ يا سلام من عنيه
وعد/ هي عملية لو تمت هيبقى ليكي الحلاوة
هنا/ هنقتل مين
وعد/ قتل ايه يا مجنونه حد جاب سيرة القتل
هنا / اومال موطيه صوتك ليه
وعد/ اسمعيني بس وبلاش لماضة
هنا / شكلها فيها خطف اعترفي يا وعد
وعد/ يوووه مش هتكلم معاكي بعد كده انتي واخده الموضوع هزار ومش عايزة تسكتي
هنا/ خلاص هسكت بس اتكلمي عادي وبلاش تتلفتي حواليكي كده زي الحرامية
وعد/ تصدقي انا اللي غلطانه اني اتكلمت معاكي
تقوم وعد بسرعة
هنا/ استني بس انا آسفة هخرس أهو بس قوليلي عملية ايه دي
وعد/ وطي صوتك هتودينا في داهية
..............
في فيلا مراد
في غرفة هشام
منال بتوتر / يوووه اقفل بقي ....الدولاب دا مش عايز يقفل ليه
تدخل نورهان الغرفة
تصرخ منال
نورهان بحده/ انتي بتعملي ايه هنا
منال باضطراب/ ابدا يا هانم انا كنت بنضف الاوضة
نورهان/ ومين قالك تدخلي هنا. ...انتي عارفة إنه مبيحبش حد يدخل أوضتة ولا ينضفها غير مراته
منال/ ماهو الست أمل مش موجودة وبعدين الاوضة كلها تراب قولت انضفها واغير ملاية السرير
نورهان / الاوضة نضيفة وزي الفل قدامي وآخر مرة تدخلي هنا فاهمه
منال/فاهمه
نورهان / اتفضلي بقي من هنا وروحي شوفي شغلك
.................
تخرج نورهان من الغرفة تقابل وعد يدخلوا غرفتهم يتكلموا مع بعض
منال تتجه للمطبخ تصطدم بمني
مني/ يخرب عقلك خضتيني
منال/ انتي اللي اتخضيتي بردو؟!
مني/ كنت رايحة الحقك واقولك إن الست نور جت لتقفشك فوق منال / ماهي قفشتني
مني / يا لهوي وعملتي ايه
منال/ متخافيش جبت المصلحة بردو
مني/ هي فين
منال/ اهه
مني باندهاش/ مخبياها جوه هدومك
منال/ شمي بس ريحة التيشرت دي تجنن كل حاجة فيه تجنن يا خرابي عليه وعلى جماله
مني / بس انا مش مقتنعه باللي بتعمليه ده عمل ايه اللي هتعملهوله هيخليه يحبك
منال/ اصبري بس شهر والعمل يجيب نتيجة دي الست عديله قالتلي مش هيعدي شهر إلا وهو بايت في حضنك
مني / نهارك مش معدي ازاي دا بقي
منال/ تقصد يعني هنتجوز قبل شهر البت فريال بتقول الست دي ياما جوزت بنات ورجعت ستات لجوازهم ومبتخدش غير حق الطلبات اللي بنشتريها بس
مني/ خليكي ورا فريال وعديله دي لحد متروحي في داهية
منال/ ما هو هيبقي من نصيبي اكيد ولو محصلش انا هوديهم في داهية دي واخده ألفين جنيه لحد دلوقتي
مني/ ابقي بقي اتصرفي مع أمي علشان كانت بتسالني امبارح انتي بتودي مرتبك فين
منال/'وبعدين أقولها ايه
مني /اتصرفي مليش دعوه مش عايزة تتجوزي وتتهني يبقي استحملى
تنزل دينا
دينا / بتعملي ايه انتي وهي عندك
مني باضطراب/ ابدا يا هانم دا انا كنت طالعه لست نور اشوفها تشرب ايه
دينا/ هي نور هنا
مني/ لسه جايه من شوية
دينا / طب كل واحده تروح تشوف شغلها يلا
منال بهمس/ ياباي عليها وعلي صوتها
مني/ امشي وانتي ساكته متودناش في داهية
.................
في المساء
تدخل دينا مكتب مراد
دينا  / بتعمل ايه يا مراد ايه كل الأوراق اللي قدامك دي
مراد/ بدور علي ورقة مهمه ضايعه مني
دينا تقرب من المكتب/ طب قولي ايه هي وانا ادور عليها معاك
مراد/ دا شيك بتاريخ  اتنين حداشر
دينا / طب وسع انت وانا هشوفه
مراد باستسلام / دوري انا تعبت
دينا/ ايه دا يا مراد الشيك أهو كان قدامك واضح انك مش مركز خالص
مراد/ طب هاتيه ورجعي الأوراق الخزنه تاني معلش هتعبك
دينا ببتسامة / تعبك راحه يا حبيبي
تدور في الأوراق ممسكه بمجموعة صور قديمة
دينا/ يا خلاثي علي الطعامه يا ناس نور دي صح
يقرب مراد/ آه نور شوفتي كانت حلوه ازاي
دينا/ طول عمرها قمر. ..استني القمر دا هشام صح
مراد ببتسامة / اه هشام كان وقتها في ثانوي
دينا/ اللي جمبهم دي أمل صح باين اوي من نظرة هشام ليها واضح إن الحب مابينهم كان قديم ههههه
مراد بحزن/ هو فين الحب ده ماهو خلاص كل واحد فيهم بقي عايش في مكان
دينا / بكره يرجعوا لبعض. ..ايه دا يا مراد
مراد/ ايه في ايه
دينا / دي قسيمة جواز. ..استني اشوف بتاعت مين
تتدقق دينا في الصور والأسماء
دينا / دي قسيمة شادي وأمل بتاريخ خمسه حداشر
استني شوف دي شهادة ميلاد. ...دي لهشام الصغير
بتاريخ تلاته خمسه
مراد/ هاتي الأوراق دي علشان متضعش
دينا باندهاش/ ازاي واحده تتجوز وتخلف بعد ست شهور
يخطف مراد الورق منها
مراد بانفعال/مش قولتلك هاتي الأوراق دي علشان متضعش
دينا بمكر/وانت متضايق اوي ليه
مراد بارتباك/ وانا هتضايق ليه
دينا / خلاص رتبهم براحتك تصبح علي خير
..........
في غرفة مراد
دينا لنفسها/ معقولة يا أمل وليه لأ
ماهو كل حاجة واضحة اهه واحده تتجوز وتخلف بعد ست شهور اكيد يعني
استغفر الله العظيم
تضع راسها علي الوساده/واللي يشوفها يقول عليها بنت مفيش زيها ادب ايه ورقه ايه ولا يبان عليها ماهو صحيح تربية ملاجيء هيطلع منها ايه بس مش مهم كل ده المهم دلوقتى ازاي استفاد من الموضوع ده
ماشي يا هشام هنشوف مين هيكسب في الآخر
انا ولا انت وولادك والهانم مراتك الشريفة
..............
#عودة امل3
بقلمي📝
#بوسي مصطفي