عودة أمل 💛

الحلقة ١٧

#عودة امل3
#بوسي مصطفي
........
الحلقة السابعة عشر
........
في غرفة مراد
مراد/ نعم يا هانم انتي بستغفلينى وبتحطيني قدام الأمر الواقع دينا/ يعني أيه يا مراد
مراد/ يعني لو مصممه إن الموضوع ده يكمل للآخر ملكيش عيش معايا  
...............
يخرج هشام وأمل من الغرفة
وعد لهشام / هو في ايه يا هشام
هشام/ انا مش لسه خارج قدامك
وعد/ طب خبط نشوف في ايه ...يكون بابا ضربها
امل/ مالك فرحانه كده
وعد/ طب غطى نفسك بالبتاع اللي انتي لابساه ده
أمل بارتباك / شوف يا هشام في ايه
هشام/ انا داخل أنام تصبحو علي خير
وعد/ هشام لو مخبطتش هخبط انا
تقرب وعد تخبط علي الباب
مراد بانفعال/ في ايه
وعد بارتباك / أصل انا وهشام سمعنا زعيق قلقنا
مراد / مفيش حاجة اتفضلوا علي اوضكو
وقفل الباب مراد
هشام/ عاجبك كده
وعد/ الموضوع في إنه وانا مش هنام قبل معرف في ايه
هشام بضيق/أمل هتدخلي تنامي ولا هتشتغلي معاها المحقق كرومبو امل قربت من هشام/ لا يا حبيبي انا هنام
وعد/ آه يا جبانه خايفة منه
هشام/لا يا حبيبتي هي متقدرش تبعد عني
وعد / طيب يا اخويا خليهالك تصبحو علي خير
........ 
في الصباح
مني/ انتي مجنونه ازاي تفكري في كده
منال /اعمل ايه بس أنا مقهوره اوي وهموت من اللي بيحصل ده
مني/ وانتي مالك بيها سبيها في حالها هي معملتلكيش حاجة
منال/ مفروسه اوي منها
مني/ وهتكسبي ايه من كل ده اللي اسمها دينا دي عايزة تزيحها من طريقها علشان تستفرد بالراجل وانتي يا غبيه اللي هتضري في الموضوع فكرك بعد متعملي اللي في دماغك ده هو هيعبرك دا هيطردك من الشغل ومش بعيد اطرد انا كمان استفادنا احنا بقي ايه
منال/ يعني اعمل ايه
مني/ تعقلي كده وتركزي وتحافظي علي أكل عيشك دول أهل مع بعض سبيهم يصفو حسابهم مع بعض وخلينا نوقف نتفرج
منال /عندك حق هي حاطه أمل في دماغها ومش هتسكت اللي لما تخرب بيتها يبقي احنا نتفرج علي رأيك
مني/ وانتي تشيلي أمل من دماغك دي غلبانه وفي حالها
منال / بكرهها بردو
....................
في الشركة
معتز/ شغل ايه يا هشام اللي عايزني اشتغله
هشام/ عايزك معايا وبصراحة مش هلاقي حد زيك انت ومازن اامنه علي الشغل
مازن/ ريح دماغك يا هشام. ..معتز ليه شغله ومبيحبش الإلتزام ولا الصحيان بدري
معتز/ أهو جابلك الخلاصة وانا بقي فتحت صيدلية كده علي قدي كل اللي بعمله إني بروح ساعه في اليوم اشوف الايراد والشغل ماشي ازاي أدوية ناقصة يعني شغل كده علي خفيف أما اشتغل تمن ولا عشر ساعات في اليوم لا يا حبيبي مقدرش
هشام/ خلاص براحتك ولو احتاجت أي أدوية احنا في الخدمة
معتز/ يعجبني فيك انك مبتضيعش وقت
مازن/ ههههههه اومال يا ابني الشركة دي كبرت ازاي
هشام/ دا حسد بقي. ...علي العموم مش هتمشي احنا هنتغدا مع بعض
معتز/ غدا ايه انا أكلت حتة اكله بقالي كتير ماكلتهاش
مازن/ يبقي فول وفلافل
معتز/ فاهمني انت دايماً
مازن/ وأخبار الجو ايه
هشام/ الجو حر اوي
معتز/ هههههههه الجو حلو وزي الفل. ...متاخدش في بالك انت يا هشام انا ومازن فاهمين بعض
مازن/ طمنتني يبقي نتقابل بالليل أوك
معتز / أوك سلام
.......................
في فيلا مراد
وعد لنورهان/ شوفتي المصيبة اللي احنا فيها
نورهان / لو كان الخبر صحيح تبقي مصيبه بجد
وعد/ حامل يا اختي تعرفي تزغرطي ولا ازغرط انا
نورهان/ لأ انا اعرف اصوت بس
أمل خارجة من المطبخ
امل/ اشربي العصير يا نور شكلك تعبان
نورهان / مجبتيش شربات ليه
امل/ شربات ايه بتتوحمي ؟!
نورهان/ لأ وانتي الصادقة دا بس من كتر الهم اللي احنا فيه
امل/ هم ايه بس ؟!
نورهان/ قوليلها يا وعد علي المصيبه اللي احنا فيها
وعد/ الست دينا حامل
امل/ بجد هههههه طب الف مبروك
وعد/ شوفتي اللي هتفرسني
نورهان/ أمل اطلعي نامي احسنلك
وعد/ المهم بقي دلوقتي انا عايزة اقول لبابا علي موضوع هاني اعمل ايه مش معقولة يتفاجأ كده بيه وهو جاي
نورهان /شوفتي يا أمل أهي قلبت الموضوع في ثانية علشان مصلحتها بس
وعد/ مصلحني؟!
أنا غلطانه اني اتكلمت معاكو
.........
في شقة هاني
هاني/ علشان خاطري يا ماما يعني يرضيكي اروح لوحدي الناس تقول عليه ايه
فريدة/ مش انت اللي بتاخد قراراتك لوحدك خلاص لازمتي انا ايه وبعدين انا قولتلك قبل كده مش موافقة علي الجوازة دي ممكن بقي تسيبني في حالي
هاني/ براحتك يا أمي بس الموضوع بردو مش هيتم إلا بموافقة حضرتك يا ست الكل
قبل يدها وخرج
............
في فيلا مراد
امل/ اهدي يا بنتي انتي بقالك ساعة رايحة جايه علي الشباك خيلتيني
وعد/ مش قادرة يا أمل قلقانه اوي من المقابلة دي
امل/ متخافيش هتعدي علي خير. ...إن شاء الله. ...ونفرح بيكي يا قمر
وعد/ يااااه مش مصدقة وقلبي هيوقف
... .....
تحت في الصالون
مراد/ هي قالت جاي الساعة كام
هشام/ تسعة يا بابا
مراد/ مش كان المفروض كلمنا الأول
هشام/ أهو جاي دلوقتي وهنشوف كلامه هيكون ازاي
مراد/ قلقان يا هشام وبعدين موضوع إنه لسه عازب دي مخوفاني
هشام/ ليه يا بابا
مراد/ خايف يكون طمعان فيها ولا بيتسلي بيها
هشام/ معتقدش وإلا مكانش طلب يتقدم و دخل البيت من بابه
دينا قاعدة بعيد مستنيه تتفرج علي الموقف
مراد بحده/ اطلعي اوضتك القاعدة دي مفيهاش حريم
دينا بغضب تطلع اوضتها
جرس الباب يرن
عم عبده/ في واحد طالب يقابل حضرتك يا بيه
مراد/ خليه يتفضل
يدخل هاني بحرج
هشام يقابله. ...هاني يصافح هشام
هشام/ أهلا يا كابتن نورت
هاني/ حضرتك فاكرني
هشام/ هشام ابني مبيبطلش كلام عنك
هاني /هشام دا حبيبي
مراد/ اتفضل يا ابني
هاني بحرج/ لا مؤاخذة يا عمي. ...اعذرني اول مره بقي
يقرب هاني يصافح مراد
يقعدوا كلهم
مراد/ تشرب ايه
هاني /انا بس هدخل في الموضوع لاني دوغري ومبحبش اللف والدوران ولو تم الموضوع اللي جاي فيه هشرب بنفس
مراد/ واضح انك مستعجل. ..اتفضل اتكلم
وعد وأمل واقفين علي السلم
هشام يلمحهم يقوم
هشام/ ايه اللي موقفكو كده
أمل بارتباك / أصل. ..أصل وعد كانت
هشام/ أظن ميصحش كده كل واحده تدخل اوضتها
وعد/ هشام متبقاش رخم سيبنا نسمع بابا هيقول ايه
هشام بحده /انا قولت ايه علي اوضكو وانا هبقي اقولك علي كل اللي اتقال
وعد بغضب/ حاضر يلا يا أمل
..........  .
في الصالون
مراد / بس مكانش المفروض حد من أهلك يكون موجود دي مفيهاش زعل يا ابني
هاني/ حضرتك يا عمي انا والدي متوفى وكل أهلي في مكان بعيد عننا بس اوعد حضرتك لو تمت الموافقة كلهم هيكونوا هنا
مراد/ كلمني اكتر عن نفسك انا مش هسال انا هاخد بكلامك وليه وجهة نظر في الراجل اللي قدامي مبتخيبش
هاني / متشكر اوي يا عمي
يدخل هشام ويقعد معاهم
هاني/ انا هاني كرم تسعة وعشرين سنه خريج تربية رياضية شغال مدرب سباحه لان دي كانت هوايتي ولعبتي المفضله من وانا طفل واخدت بطولات كتير والدي متوفى وانا عمري سنه
كان مهندس مدني ووالدتي مسؤلة دار ايتام كبيره
مراد/ والدتك بتعمل عمل طيب
هاني/ والدتي كل البنات اللي في الدار بيحبوها جداً
مراد/ اسم والدتك ايه
هاني/ فريدة. .....
مراد/ مش معقولة
هشام/ حضرتك تعرفها يا بابا
مراد/ طبعاً أعرفها من زمان اوي سلملي عليها وقولها مراد الاسيوطي بعتلك السلام
هاني/ واضح إن حضرتك تعرف والدتي بجد
مراد/ انا لو وافقت هوافق علشان والدتك مع احترامي ليك طبعاً هاني /يكفيني فخر إن والدتي تكون سبب في قبول حضرتك لطلبي
مراد/ بس المره الجايه تكون الست الوالده معاك
هاني بفرحه/ أفهم من كده حضرتك موافق
مراد/ بس والدتك تيجي معاك
هاني/ حاضر انا مش عارف اقول لحضرتك أيه
وعد هتبقى في عنيه وقلبي
مراد/ إن شاء الله
هاني/ استاذن انا بقي
هشام/ انت مشربتش حاجة
هاني بفرحه/ هشرب كتير متقلقش بعد اذنكو
بعدخروج هاني
مراد/ الواد دا ماله متسربع كده ليه
هشام بمزح وهو بينظر لفوق/ الظاهر واقع لشوشته
تجري وعد ناحية اوضتها بفرحه
مراد/ يااااه شوفت المفاجأة يا هشام أهو دا يطلع ابن الأستاذة فريدة انت شوفتها قبل كده
هشام بقلق/ اه طبعاً يا بابا
مراد/ مالك يا هشام
هشام/ خايف علي إحساس أمل من مقابلة الست دي وانها يعني تفتكر
مراد/ تفتكر الملجأ اللي عاشت فيه مش دا اللي تقصده
يهز هشام راسه
مراد/ أمل عاقله وخلاص يا ابني دا عدي عليه زمن
......................
في الصباح
تخبط صفاء علي باب شقة سوسن
سوسن بتعب/ حاضر جايه
صفاء/ دا كله بتفتحي
سوسن/ ادخلي يا صفاء
صفاء باندهاش وهي بتنظر للشقة / أدخل فين يا بت
انتوا اتسرقتوا ولا ايه فين العفش
سوسن بحزن/ بعته
صفاء/ يالهوي بعتي العفش يا منيله ليه ايه اللي حصل
سوسن/ بعته يا اختي علشان أكل انا واللي في بطني
صفاء/ والمحروس نايم في الخط وسايبك انتي اللي  تتصرفي
سوسن / اششششش اسكتي يسمعك دا لسه نايم من شوية
صفاء/ ليه السهره كانت صباحى الليلة
سوسن/ علشان خاطري مش عايزة مشاكل
صفاء/ ايه يا بت اللي في وشك ده هو مد أيده عليكي
تقعد سوسن في الأرض وهي بتعيط
سوسن/ أهو كل يوم في مشاكل بالشكل ده
صفاء/ وايه اللي مصبرك علي كده يا اختي
سوسن /هروح فين يعني هقعد في بيت امي اللي اتحرق ولا أجي اقعد عندك مع الخمس عيال اللي بتاكلوهم بالعافية
صفاء/ ارجع وأقول دا ذنب البت الغلبانه اللي جوزك افتري عليها وقشط علي فلوسها
سوسن/ بقولك ايه انا مش ناقصة جايه تقولي كلمة حلوه قولي هتيجي تبكيتني وتسمي بدني بكلمتين يبقي توريني عرض اكتافك
صفاء/ هي كده كلمة الحق بتزعل علي العموم انا جايه اقولك إن الظابط بعت اخدني انا ووحيد جوزي امبارح
سوسن/ ليه في حاجة جديدة لقيوا الدهب
صفاء/ كل همك علي الدهب. ..لأ يااختي
الظابط بيقول إن أمك ممتتش من الحريق
سوسن/ اومال ماتت ازاي
صفاء/ بيقولك ماتت مخنوقة
سوسن/ ازاي يا بت عرفوا الكلام دا وهما بيقولوا اتحرقت
تعيط سوسن/ ياعيني عليكي يامه
صفاء/ الظابط قالي إنها كانت بتحاول تنقذ نفسها من النار وخرجت من الاوضة بس ملحقتش ماتت علي بابا الاوضة قبل النار متوصلها يعني ماتت مخنوقة وجسمها هو اللي اتحرق وشها برقبتها بس اللي زي ماهما
سوسن/ يعني امي اتقتلت قبل الحريق
صفاء/ لقيوا في رقبتها كسر وبيقولوا آثار للخنق
سوسن/ انا مبقتش فاهمه حاجة
صفاء/ اللي دخل الشقة مكانش قصده يقتل كان عايز يسرق وبس لانهم لقيوا بواقي شمع في ايدها
تبكي صفاء/ يا حبيبتي ياامه
........................
في الفيلا ....في المساء
دينا / يعني ده ولا مدحت اخويا
مراد/ دينا انا قولتلك رأيي في موضوع اخوكي ده بلاش بقي نعيده وبعدين هتجيبي شاب لسه صغير لاخوكي بردو
دينا/ بس انت بتقول إن الواد ده محلتوش غير شقة صغيره علي قده بنتك هترضي تعيش فيها
مراد/ انتي عايزة توصلي لايه يا دينا
دينا/ هتجيبلها شقة مش كده
مراد/ قولي كده بقي علي العموم ملكيش فيه أجيب لبنتي شقة اجيبلها قصر انا حر
دينا/ بقى كده يا مراد يعني انت عمال تبعتر فلوسك يمين وشمال علي ولادك واللي في بطني ده ملوش حق
مراد/ مش لما يبقي يجي
دينا/ انت عايز الحمل ميكملش مش كده
مراد/ بقولك ايه يا دينا انت فاضيه طول اليوم موراكيش حاجة وجايه تصدعي دماغي علي آخر الليل انا تعبان طول اليوم وعايز انام
دينا/ بقي كده اومال فين كلامك الحلو ليه وانتي يا دينا احلي حاجة في حياتي كل ده راح فين
مراد/ دينا علشان خاطري أي حاجة اجليها لبكره تصبحي علي خير
دينا بغضب /نام يا حبيبي وسبني انا أكل في نفسي من عمايلك انت وولادك
تسمع صوت خطوات خارج  الغرفة تفتح الباب
دينا/ منال بتعملي ايه هنا
منال/
ابدا يا مدام كنت بنضف اوضة الست وعد علشان الست نور هتبات هنا الليلة
دينا/ مين تحت
منال /كلهم تحت
دينا/ تعالي عايزة اتكلم معاكي
منال/ فين جوه
دينا/ لأ في الاوصة الفاضية دي
تدخل منال الغرفة
منال/أعوذ بالله من الشيطان الرجيم
دينا/ مالك شوفتي عفريت
منال/ لأ بس انا بخاف أدخل الاوضة دي بالنهار أقوم ادخلها بالليل
دينا/ ليه يعني فيها ايه
منال/ اصلي عرفت إن شادي ابن مراد بيه كان بينام هنا
دينا/ يعني هو اتقتل فيها بطلي الهبل ده وقوليلي منفذتيش اللي اتفقنا عليه ليه
منال/ بصراحة يا هانم انا صرفت نظر عن الموضوع انا عايزة أحافظ علي أكل عيشي
دينا/ ومين قالك انك هتضري ولا هيحصلك حاجة احنا كل اللي عايزينه إن الشك يدخل لقلب اللي متتسماش ويبعدوا عن بعض وبكده تكوني اخدتي بتارك منها
منال/ بس يا مدام
دينا مقاطعه / لا بس ولا مبسش انتي تعملي اللي قولتلك عليه وانا هراضيكي بقرشين حلوين وأكل عيشك عمره مهيتمس طول ما انا موجودة هنا وكل اما تعمليلي مصلحه هبصتك اتفقنا
منال بتردد/ ماشي بس بلاش الجمعه دي انا مستعدتش
دينا/ هههههه هتستعدي تعملي ايه يعني علي العموم براحتك الوقت اللي يريحك بلاش الجمعه دي نخليها الجمعه اللي بعدها بس أهم حاجة المصلحه تتم قبل ماتوصل أمل بخمس دقايق
منال/ بس هشام بيه هو اللي بيخرج يجيبها
دينا/'ماهو دا بقي شطارتك انك تعطليه
منال/ انا خايفة
دينا/ انا معاكي وهحاول اعطله بأي طريقة وهدخل اول متصوتي وسيبي الباقي عليه
..............
تخرج دينا من الغرفة توقف علي السلم
هشام وأمل ووعد ونورهان قاعدين قدام التليفزيون
نورهان / هههههه قولي نكته كمان يا وعد
أمل بمكر/ وعد مزاجها رايق النهاردة
وعد/ اقعدي انتي انبري في الموضوع يا ست أمل
هشام / انا تعبت وطالع انام
نورهان/ لأ علشان خاطري اقعدوا اسمعوا في فيلم حلو اوي جاي دلوقتي
هشام/ افلام أي بس كفاية الشغل عليه
نورهان/ دا فيلم فيه اكشن ومطاردات وحاجات كده هيعجبك اوي
وعد/ هاتي القناة بقي لما نشوف لو حلو هكمل معاكي
هشام / أمل هتتفرجي معاهم
أمل / المهم ميكونش فيه قتل
نورهان/ دا تمثيل يا خوافه
يشتغل الفيلم
اول مشهد مطاردة بين البطله واحد المجرمين
نورهان/ اخلصي أجري منه
امل/ هيلحقها خلصي بقي هيمسكك
هشام/ هههههه حلو جو التحليل ده وانتي يا وعد مش عايزة تقولي حاجة
وعد/ استني بس شكله هيقتلها
نورهان / يقتلها ايه انتي مش شايفة بيبصلها ازاي
وعد/ طب اقلبي بقي عيب هشام قاعد ولا انتي عاجبك قلة الأدب دي
هشام/ ههههه لا مؤدبين اوي لو مش قاعد يعني هتتفرجوا عادي
نورهان/ بس بقي دا هيغتصبها
البطله بتصوت. ...تقوم أمل بفزع
نورهان/ في ايه يا أمل متقعدي
أمل بصوت مرتعش / لأ انا هطلع انام
نورهان/ ايه يا هشام هههههه هي مراتك اتكسفت ولا ايه
هشام بقلق/ انا كمان هطلع انام تصبحو علي خير
وعد/ اقلبي بقي شكله فيلم وحش
نورهان / حاضر
.......................
في غرفة هشام
أمل خارجة من الحمام
هشام / مالك يا أمل انتي تعبانه
أمل بتعب / بردانه
هشام يقرب منها يحتضنها / متخافيش يا حبيبتي انا جمبك
أمل تغمض عينها شوية وتسمع في عقلها
شادي/ علشان خاطري متفضحنيش أبعد عني انا زي اختك
شادي ارحمني أرجوك
صراخ
سعاد/ أمل في حاجة يا بنتي انتي تعبانه
أمل بدموع / انا كويسه يا داده. ...سبيني عايزة انام
أمل تصرخ
هشام/ أمل. ...أمل. ..فوقي يا حبيبتي
أمل ببكاء/ هشام انا خايفة
هشام بدموع بيمسحها/ انا اسف يا حبيبتي حقك عليه
امل/ هشام غطيني عايزة انام
هشام بحزن / حاضر
............................
في الصباح
على السفره
نورهان/ صباح الخير يا بابا
مراد ببتسامة/ صباح الخير
ايه صاحيه بدري يعني
نورهان/ صحيت علي تليفون من عمر ومن وقتها معرفتش انام قولت انتهز الفرصة وانزل أفطر مع حضرتك
مراد/ تفطري ولا تتكلمي معايا
نورهان بحرج/ حضرتك بتفهمنا من غير منتكلم
مراد بيقلب الشاي/ عايزة كام
نورهان/ مش حضرتك تعرف الموضوع الأول
مراد/ قولي يا سيادة المحامية
نورهان/ هههههه تصدق يا بابا انا نسيت الموضوع ده
المهم ندخل في موضوعنا بقي يا بابا يا حبيبي عمر بيفكر في مشروع كده ومحتاج راس مال كبير انا طبعاً عرضت عليه وهو رفض وكمان رافض أي مساعدة من أي حد بقول يعني حضرتك تساعدنا بمبلغ واقوله انه من نصيبي في ميراثي من ماما لان اللي معايا ميغطيش ومتخافش أي ضمانات حضرتك تطلبها انا تحت أمرك
مراد/ عايزة كام يا نور وبلاش حكاية  الضمانات دي انتي بنتي وأي حاجة فيها مصلحه ليكو انا انفذها علي طول
نورهان بفرحه / بجد انت احلي بابا في الدنيا
تنزل دينا
مراد/ خلاص يا نور نكمل كلامنا بعدين
تغمز نورهان لمراد / حاضر
دينا بضيق / صباح الخير
..........................
نورهان / هطلع اشوف بدر
مراد/ اقعدي يا دينا افطري
دينا/ كنت بتتودود انت وبنتك بتقولوا ايه
مراد / متريحي نفسك من التفكير وطلعي ولادي من دماغك
ينزل هشام
هشام/صباح الخير
مراد بقلق/ أيه يا هشام انت تعبان
هشام / مش نايم كويس
مراد/ انا مش قايلك بالليل قبل مااطلع اوضتي إن السهر مش هيخليك تصحي فايق
هشام/ انا كويس
مراد/ أمل صاحيه
هشام/ لأ نايمه
مراد/ كنت عايز اتكلم معاها بالليل بقي
هشام بقلق / ليه يا بابا هو في حاجة
دينا تتنصت للحديث
مراد/ لما ارجع بقي اتكلم معاها وانت كمان تكون موجود
خلص فطارك وحصلني انا مستنى في العربية مش هقدر أسوق
هشام/ انا جاي مع حضرتك
........................
في شقة ماجد
ريم بانفعال/ يعني ايه مش هتخرج للشغل؟
ماجد/ بقولك. تعبان ومصدع مش قادر أقوم
ريم/ ماهو من سهر كل ليلة
ماجد/ يوووووه انتي عايزة أيه يوم وغبته من الشغل فيها ايه
ريم / طب هات فلوس نازله اشتري شوية حاجات
ماجد/ الفلوس عندك في جيب البنطلون
ريم / أوك
ماجد/ متخدهاش كلها احنا لسه في نص الشهر
ريم تقرب تاخد الفلوس
ريم/ ايه دا يا ماجد
ماجد/ ايه في ايه
ريم/ دي كل الفلوس اللي معاك
ماجد/ في غيرها عندك
ريم /لأ
ماجد/ خلاص يبقي هي دي كل الفلوس اللي معايا
ريم/ الف جنيه هيكفونا لآخر الشهر؟!
ريم/ أنتي وشطارتك بقي حاولي تتصرفي
ريم بغضب/ أتصرف في ايه تعمل أيه الفلوس دي
تشتري حاجات البيت ولا اعمل بيها شعري ولا اشتري حاجات كريم
ماجد/ بقولك ايه ياريم هما دول اللي معايا
ريم/وانت مبتمسكش علي ايدك ليه وتخف سهر كل ليلة ده
ماجد/ تاني احنا مش اتفقنا متساليش رايح فين وبتاخر ليه طالما بشوف شغلي
ريم/ فين شغلك ما هو بسبب سهرك ده مش قادر تنزل الشغل
ماجد/ يوووووه انتي بقيتي زنانه ووجعتيلي دماغى علي الصبح
ريم ببكاء/ اعمل فيك ايه بس
ماجد بسخرية / اشتكيني لباباكي
ريم/ لا يا ماجد مش هشتكيك لحد بس انا بقي عارفة هعمل ايه   ....................
في المساء
مراد بانفعال / وانتي بقي بتتصرفي كده من دماغك
امل/ خالي كان حاضر الموضوع وانا اخدت كل الضمانات اللي بيها أضمن حقي
هشام بغضب/ ازاي يعني واللي اسمه عادل ده هيسكت وبعدين ملتقىش غير دول تدخلي معاهم في شراكه
امل/ خوفت يعملوا حاجة في ولادي
مراد/ خلاص بقي مبقاش لينا أي لازمة عندك علشان تتصرفي كده من غير متاخدي رأينا
امل/ ابدا يا بابا انا مقصدتش كده كل اللي فكرت فيه ازاي أحافظ علي ولادي
هشام/ وكده بقي حافظتي عليهم
أمل بقلق/ يعني ايه
هشام/ يعني انتي دخلتي نفسك وولادي في نار مش هتسيبنا إلا لما تحرقنا
هشام بغضب/انا طالع انام تصبحو علي خير
تبتعد دينا عن الباب وتخرج للجنينه
دينا تتحدث لنفسها / مين عادل ده وايه الشراكة اللي بيتكلموا عليها دي
انا لازم اعرف كل حاجة عن الموضوع
قالوا اسمه ايه؟
آه افتكرت عادل ابن رفعت حامد وصاحب شركة أدوية
بس انا عرفت هعمل ايه
هو انا كل يوم أكتشف حاجات غريبة في البيت ده
بس كله في مصلحتي
مراد جاي من بعيد
مراد/ ايه يا دينا اللي مقعدك هنا لحد دلوقتي مش هتنامي
دينا/ حاضر جايه
...............
في شقة هاني
فريدة/ بس دا يا ابني هيغير ايه من موقفي
هاني/ ماما انتي شهدتي دلوقتى قدامى إن الراجل دا محترم وقلبه كبير وكمان إنسان بمعني الكلمة
فريدة/ ايوه انا قولت كده بس انا مليش علاقة بوالد البنت انا في البنت نفسها
هاني/ لما يكون الأصل كويس يبقي اكيد البنت كويسه ومتربيه كويس يعني موضوع الطلاق دا مش هي السبب فيه اكيد اختارت الشخص الغلط انا شوفته بنفسي بيتكلم معاها ازاي مفيش احترام ولا أخلاق
فريدة/ بس يا هاني
هاني/ ماما علشان خاطري حضرتك متعرفيش بموافقتك دي هتفرحيني قد ايه
فريدة/ يا حبيبي انت ابني الوحيد وكان نفسي تتجوز واحده يعنى
هاني/ انا بحبها ومقتنع بيها وواثق إنها بنت كويسه وممكن أكون أنا الإنسان اللي يقدر يعوضها عن الألم والظلم اللي اتعرضتله مع طليقها
فريدة/ خلاص حدد معاهم ميعاد نزورهم فيه بس دي مش موافقة نهائية لازم اقعد معاها واعرفها كويس
هاني بفرحه/ هتوافقي انا واثق انك لو قعدتي معاها هتحبيها وتقتنعي بيها
فريدة/ اشوفها الأول وبعد كده هقولك رأيي
.................
يوم الجمعه
وعد / هشام انت طالع اوضتك
هشام/هريح شوية في اوضتي
مراد/ اتغدا الأول يا ابني
هشام/ هنام وهبقي اصحى أكل انا مش جعان
وعد/ لو نمت انا عارفة مش هتصحي دلوقتي
هشام / لا هصحي بعد شوية علشان أجيب أمل من عند خالها
مراد/ طيب يا ابني اطلع استريح 
يطلع هشام
دينا/ متاكل يا مراد ولا مش جعان انت كمان
وعد/ منال هاتي الملح الأكل مفيهوش ملح
دينا/ ميرو بيحبو كده
مراد بهمس/بلاش ميرو دي هو انا صغير وبعدين مش قدام الولاد
دينا /وفيها ايه يا حبيبى اني ادلعك انت مش جوزي وحبيبي
وعد لنفسها / حبتك عقربه تكون جعانه تاكل لسانك ده وتريحنا منك
دينا/ دوقي الصنف دا يا وعد وقوليلي رأيك
وعد/ لا انا مباكلش غير الأكل اللي متعودة عليه ميرسي مباكلش اختراعات انا
دينا / علي فكرة يا وعد انتي لازم تتعلمي تطبخي الراجل مش هيجبلك خدامه هو حالته علي قده هما الالفين جنيه اللي بياخدهم دول يكفوا اصلا لآخر الشهر
وعد/ هنعيش علي قدنا ومتشكرة اوي علي نصايحك دي يا طنط تقوم وعد من علي السفرة
مراد/ كملي اكللك يا بنتي
وعد/ شبعت
مراد/ عاجبك كده انا مرضتش احرجك والبنت قاعده بس لايميها يا دينا دا احسن ليه وليكي
دينا/ بتهددني يا مراد وبعدين انت مش شايف الاستفزاز بتاعها بقولها تاكل من الأكل اللي تعبه نفسي فيه تقول مباكلش أكل متعودتش عليه
مراد/ مين بيستفز مين وبعدين كل واحد حر ياكل اللي يعجبه ايه اللي مزعلك
دينا/ لا ابدا مش زعلانه ولا حاجة ما انت كده دايما تنصرها عليه مراد/ بكره تريحك وتتجوز اتمنيلها بقي الخير
دينا/ لأ انا هتمني تفضل قاعدة كده علشان هي ضميرها وحش وطالعه فيها مش عارفه علي ايه
مراد يقوم بغضب/ انتي بقيتي لا تطاقي ونفسى اتسدت من كلامك
......................
في شقة كمال
نجلاء /قربي بقي يا أمل نتعشا مع بعض
أمل / مش عارفة يا طنط ليه قلقانه وقلبي مقبوض
نجلاء /بطلي بقي ميكونش قلبك خفيف كده
كمال/ انتي وهشام كويسين مع بعض يا بنتي
امل/ اوي اوي يا خالي ودا اللي مخوفني
نجلاء /هههههه أمرك عجيب يا أمل يعني لو متخانقين بتكوني مستريحة
امل/ لا طبعاً بس خايفة علي هشام
نجلاء /متبقيش موسوسه انتي غاويه تشيلي نفسك الهم  يلا يا هشام يلا يا شادي
كمال /هاتي الولاد وتعالى يا بنتي علشان تاكلوا
أمل / هتصل بهشام الأول  اشوفه اتأخر ليه
تلاقيه نايم لحد دلوقتي ماهو يوم الاجازة كله بيقضيه نوم
.............
في غرفة هشام
تدخل منال. ...نبضات قلب سريعه. ...رعشه في ايدها
هشام نايم. ...تقرب منه
منال بدموع / بحبك. ...بحبك وانت مش حاسس بيه
ياما نفسي أكون مكانها هنا جمبك وفي قلبك مش هي
هشام بيتقلب
منال بخوف / ياريت تحس بيه بقي انا تعبانه بسببك
تقرب منال من السرير تلمسه وتتخيل نفسها مكان أمل
هشام بيتحرك علي السرير
منال تلمس أيده
هشام نائم ببتسامة / وحشتيني يا أمل
التليفون يرن
منال مرتبكه مش عارفة تعمل ايه تكمل واللي يحصل يحصل ولا تهرب من الغرفة وتحافظ علي كرامتها وأكل عيشها
واقفة في حيره
التليفون يرن من تاني
.......................
ياترى ايه اللي هيحصل؟
هنعرف الحلقة الجايه
#عودة امل3
بقلمي 📝
#بوسي مصطفي
........ .............