~~ نور ~~ بقلم >> أميرة أميرة أبي (2015)

الفصل الثالث عشر

نور / بقلم أميرة أبي

بعدما خداو ريم من مدرستها توجهو للدار طريق كلها وهي كتفكر ف ايلاف وكتلوم راسها علاش ماسولاتش فيها هاد المدة كاملة من بعد ماوصلو دخلات ريم مع نسرين وهي مشات للملحق تشوف راجل عمتها لي وصل اليوم من الدوار بعدما حيد الجبس وحتى ياسر دقات الباب فتحات ليها عمتها
عايشة: اهلا بالغالية زيدي دخلي
نور بابتسامتها المعهودة السلام عليكم
ياسر شافها ووقف عليكم السلام نووور نهار كبير هدا
نور: الله يكبر بك اخويا
عايشة: زيدي ابنتي جلسي
نور حيدات سباطها وزادت للصالون قربت من رضا عمي لاباس عليك كيف بقيتي
رضا كيتمسكن هاانتي كتشوفي ابنتي مازال موعت
نور: مايكون باس الله يشافيك
ياسر: كيدايرة انور ولفتي شوية
نور: الحمد لله وانت غبورات هادو واش امورك مزيانة
ياسر: هاد الساعة بخير مبروك عليك الزواج واخا جات معطلة
نور : الله يبارك فيك عقبالك
ياسر: ان شاء الله
رضا باستهزاء ههه بقى ليه غير الزواج حتى يخدم بعدا
نور: ان شاء الله الله يسير ليه الامور
رضا: هي ادا دويتي مع راجلك يشوف ليه شي خدمة ياك حنى عائلة
ياسر مارضاش الوالد اش هاد الكلام
رضا: مالي شنو قلت نور فحال بنتي وسي عدنان دابا ولا نسيبنا اش فيها ادا شاف ليك شي بوسط فالشركة ديالو
نور شافت فعمتها فين سارة ماكيناش
عايشة: صبحات مريضة ليوم ماقداتش تنوض من بلاصتها
نور: مالها ياك لباس
عايشة غمزاتها اوا ها انتي عارفة مرض البنات
نور بحرج الله يجيب الشيفا (وقفات) خاصني نمشي
عايشة: جلسي تغداي
نور: مرة اخرى ان شاء الله
رضا: مابقيناش قد المقام
نور: لا حاشا غير هو على قبل ريم ادا ماكنتش ماكتبغيش تاكل
عايشة: واخا ابنتي سيري الله يرضي عليك
نور: خليت ليكم الراحة (شافت ف رضا) بالشفاء العاجل ان شاء الله..
لبسات سباطها وزادت خرجات تبعها ياسر لبرا كيعيط ليها وهو كيلبس فسباطو
ياسر: نور دقيقة عفاك
وقفات ودارت لعندو
ياسر بحرج ختي عافاك ماتديش على كلام الوليد
نور: ما قال عيب
ياسر: سي عدنان خيرو سابق غير هو انا بغيت نعتمد على راسي
نور ابتسمت ليه ناس كبرو ولاو يعتمدو على رأسهم
ياسر: هههههه بديتي تاني من صغرك وانتي قهراني بكبيرة عليك وانتي يلاه عندك 25 عام بينتنا غير عاميين
ضحكات بصوت مسموع بقاو مدة كيتعاود وكيتذكرو طفولتهم غافلة على البركان لي كيغلي وهو مراقبها كانت مندمجة لدرجة انها مرداتش البال ليه فاش وصل.. فكل مرة كانت كتضحك كأنه الهوى كيتسحب من صدرو ماقدرش يتحمل وزاد جهتهم مقطب حجبانو وصل قدامهم وتنحنح لافت انتباههم... دارو بجوجهم شافو عندو
نور: عدنان امتى جيتي
عدنان: غير دابا ياكما قاطعتكم ؟
ياسر مد يديه مبتاسم مسيو عدنان cv ؟
عدنان بقى مدة كيشوف فيه عاد مد يدو على سلامتك
ياسر: الله يسلمك شكرا
عدنان شاف فيها مشينا
نور حركات راسها ب اه وشافت فياسر نخليك دابا ولكن مازال عندنا بزاف مايتعاود
ياسر: وقتي كله ليك امتى ماب..
بلع كلامه بعدما شاف عدنان جر نور خلاه غير كيشوف مافاهم والو
اما هي كانت كتحاول تزرب فخطواتا باش تتقاد معاه فالمشية وهي مستغربا كيفاش جرها عيات ما تقول ليه بشوية ولكن هو مكانش كيسمع ليها عصبها وقفات ونترات يديها منه بالجهد
نور بعصبية واش جر معزة من وراك غير بشوية وعتيني وزايدون مالك على هاد الحال حشومة كنت مازال كندوي مع ياسر
عدنان عرق لي فجبينه كينبض نافر شاف فيه وهو مقطب شنو ماسخيتيش اش بان ليك نقاد ليكم شي جليسة هنا باش نيت تاخد راحتكم ؟
نور حلات عينيها باستنكار جليسة !!! اش كتخربق؟
عدنان بحدة جمعي راسك راك مرت الراجل وقيلة
نور: عدنان واش عارف شنو كتقول
عدنان: اه عارف ومزيااان وآخر مرة يتكرر هدشي ولا بربي انور تصروفي ماغاديش يعجبك
زاد وخلاها غير كتشوف
نور: لا لا واش من نيتو هدا...
تبعاتو كان دخل للمكتب ودخلات من وراه لقاتو كيقلب فالمجر ديال البيرو شافت فيديه وهي تبان ليها باكية ديال الكارو بقات متبعة ليه العين حتى جبد كارو شعلو وبدا كيكمي قربات منه مدات يديها وخداتو رماتو فالأرض وزطمات عليه برجليها
عدنان: اش درتي شنو قال ليك داك العقل
نور: دابا غير فهمني مالك علاش مقلق وجاي لهاد السم لي شحال وانت قاطعو شنو طرأ لهدشي كله
عدنان بعصبية لا وااالو ماطرا والو غير انا داخل لداري  ونلقى مرتي كتكركر كتر من خمسة دقايق وانا واقف وانتي مكيناش كاااااع فهاد الدنيا ومكملاها كتقولي ليه مازال عندنا مايتقال شنو مونيكا اناااا هاااا معمرش ليك العين
نور: راه هداك ولد عمتي وفمقام خويا
عدنان بالغوات مااااشي خوك الالة ماااشي خوك رااااجل هداك  كتسمعي راااجل ماعندك لاش تجلسي بالسوايع تكركري معاه وصوتك كيتسمع منين ومنين مدايرة كاع حساب للحمار لمزوج بيك
نور: عدنان زدتي فيه وقفت معاه غير شوية وكنا كنهضرو على الصغر عليها ضحكنا مامستهلاش تقلق
عدنان: زدت فيه ياكي
هز تليفونو والكونطاكط  وزاد وهاد المرة خرج من الدار كلها ماجات فين تبعو حتى لقات غير العجاج لي خلا من وراه ضربت كف بكف ورجعات دخلات وهي مستغربة من هاد الغيرة ديالو الزايدة على حدها.....