كل ليلة بكون سهران في أوضتي قدام اللاب توب بتاعي ..بشوف فيلم رعب جديد
معظم الأفلام بقت مملة ومتكررة ومبتخوفنيش
بس أعمل ايه نفسي أخرج أغير جو
واشوف الدنيا.. لكن مبقتش طايق حد ولا عايز اكلم حد
عندي حالة حزن كبيرة من وقت وفاة حبيبتي
كنا أقرب لأتنين في جسد واحد
كنت بحبها بجنون وبموت فيها ..بس هي كانت رفضاني
ومش متقبلة فكرة وجودي في حياتها
حاولت أقرب منها واخليها تحبني زي منا بحبها
بس دايما كانت عصبية وبتصرخ بشكل هستيري
رغم اني كنت مستعد أخليها أسعد واحده في الدنيا
من وقت وفاتها وانا بقيت بتنقل من شقة لشقه
ومن شارع لشارع ..ومن مدينة لمدينه
بدور عليها في كل الوشوش ..يمكن الاقيها
عارف انكم فاكريني مجنون
هي اه ماتت ..بس مش قادر انساها
ومش متخيل انها ممكن تكون ماتت وسابتني
واللي واجعني أكتر انها ماتت بسببي
فضلت فترة طويلة حزين وكاره الحياة
لدرجة اني فكرة أنتحر ..بس الانتحار مش هو الحل
لغاية ما في يوم قابلة أمل ..بنت رقيقة وجميلة
خطفتني من اول نظرة ..حسيت أن هي دي
اللي ممكن تعوضني..وتخليني احب الحياه من تاني
بقيت يراقبها كل يوم واهتم بيها من بعيد لبعيد
بحاول اعرف تفاصيل أكتر عنها
وكل ما كنت اعرفها أكتر ..كنت بحبها أكتر وأكتر
أد أيه كانت طيبة وروحها حلوه وبتحب تساعد الناس
ودايما وشها بشوش وبتضحك
بس خايف أقرب منها ترفضني ..وتجرحني
انا فيا عيوب كتير ..بس انا لو لقيت وحده تحبني
بجد ..حياتي كلها هتبقى ملكها
سكنت في شقة قصاد شقة أمل
وبقيت ليل نهار براقبها من ورا شيش الشباك
المقابل لأوضة نومها
عرفت كل مواعيدها..وعرفت صحباتها..عرفت عادتها
وهواياتها وقت الفراغ..حتى الأكس بتاعها عرفته
بعدتهم ظروف سفره
بأختصار بقيت بعرف كل حاجة عن أمل
كنت متردد اخد الخطوة واقرب لها
لكن لما ظهر شريف في حياتها ..قررت أبعدها عنه
بأي شكل ..لدرجة أني فكرت أقتله لو هي حبته
بس حظه حلو ..بعد كام يوم عرفت انه شخص
تافه وسطحي ..فبعدت عنه
الليلة بفكر أعترف لها بحبي ليها
هي دلوقت في الحمام وخرجت منه
وواقفه بتسرح شعرها قدام المرايا
انا قريب منها جدا..على بعد خطوات ..انا جوه دولابها
هي مش شايفاني طبعا ولا حاسه بوجودي
معرفش ليه دلوقت ..افتكرت حبيبتي اللي ماتت بسببي
لما حاولوا يخرجوني منها وانا كنت رافض
أسيبها .كنت بتعذب لما بسمع صوت القرءان
والشيخ بيضربني وبيطلب مني أخرج منها
قررت أني اموت ولا أخرج منها
حياتها اتدمرت بسببي ..وانتحرت بسببي
وهي التي سابتني وحيد ..بس خلاص
لقيت الأنسانه اللي أحبها واتمنى تتقبلني
بحضر في الكلام اللي هقوله ليها
لما أخرج لها بعد لحظات
الكلام كله راح مني
ايوه ايوه هقول
أمل عايز أعترفلك بحاجه ..انا بحبك جدا
وبموت فيكي ..ارجوكي متخافيش مني
مش عايز أأذيكي ..بس #خليني_أخد فرصتي
لسه هفتح الدولاب وأخرج
باب أوضتها أتفتح ..
ومامتها دخلت وبتقولها ...
أمل ..مش هتصدقي مين بره
مين يا ماما ؟
يوسف ابن عمك عز رجع من دبي من كام يوم
وقابل والدك واخد منه معاد
عيونها لمعت وقالت
يوسف ..رجع..طب وجاي ليه
جاي يطلب إيدك من بابا
شوفت الفرحه في عنيها ...
ومامتها بتقولها يلا بسرعه
غيري هدومك ومتتأخريش
تراجعت عن الخروج من الدولاب
وتراجعت عن الظهور ليها
وقررت معترفش ليها بحاجه .واسيبها
تشوف حياتها ..مش عاوز أذيها خصوصا
بعد الفرحة اللي شوفتها في عنيها ..أنا حبيتها بجد
#أعتراف
#حماده_هيكل
