متى تشعر بي
لايوجد أصعب من ان نتألم بصمت ونغلق باب قلبنا لكي لايفضح أمرنا ونهرب من كل شيء حولنا لكي نخبئ نظراتنا
كنت ومازلت اقف خلف الجدار واختلس النظر
الى من احببت منذ الصغر مازلت واقفه الى الان في مكاني
كنت اشاهده وهو يلاعبها وهي ترقص وتغني وتضحك
ومرت الايام وكبرنا واصبح يقبلها ويحتضنها وانا مازلت اختلس
النظر واقف خلف الجدار وابكي بصمت
وكلما نظر الى عيونها اموت الف مرة ومرة
اشعر بلااختناق انا كالعصفورة سجينه ولكن ليس بقفص
بل انا سجينه قلبي
ياقلبي متى تتحرر وياعيني متى تكتفي من اختلاس النظر وياقدمي متى تكتفين من الخطوات الى محطات الحزن
ياانا يكفي لقد ارهقتي نفسك طول هذا الوقت
بلانتظار
هو لايبالي بك هو لايهتم بك هو لايشعر بك
هو يتجاهلك
ياانا يكفي لاتستمري بالحزن
يكفي افتحي نوافذ قلبك ليدخلها نور الشمس
ولكن
كيف لي ان افتح نوافذ قلبي وانا اغلقها دائما خوف من ان يعرف الكل ماذا اخبئ بقلبي
اعلم بأني سوف استمر بحزني ولكني سوف استمر بالنظر
سوف استمر بلاانتظار بمحطات الحزن
واذا لم تأتي سوف ابقى انتظر الى اخر العمر
🌸 🌸 🌸 🌸 🌸
(((الفرق الي بيني وبين شاهين جبير هوايه هو دكتور
واني بنت خالته
خالته الي ازوجت رجال فقير معدم واصبحت شبه منبوذة من اهلها
مرت الايام واحنا مستوانا اقل من الكل مرت الايام
واحنا مجرد نخدمهم ونركض حتى نساعدهم
اكيد الي مثل شاهين ميباوع عليه لان هو من صغير يحب بت خالتي الصيدلانيه الي من نفس مستواة
ونفس وضعه الاجتماعيه
انما احنا العائله الي مكونه من خمس اشخاص
الي هي اني واختي واخويه الاصغر منا والدي
الي حاليا مقعد
وامي الي تحاول بكل جهدها توفرنا معيشتنا اكيد نختلف عن عالمه
امي خياطه وعايشين على كد يومنا بس بعدنا محتفظين بعزت نفسنا وكرامتنا محد يدك الباب وينطينا لان احنا مومحتاجين هاي كانت دائما كلمه امي
جنت دورات افز من نومتي والكه امي كاعدة على المكينه
وتفرك بعينها من التعب
كانت تجبر نفسها وتضغط على روحها لخاطرنا
ايام وايام مرت وكبرنا وماتغير شي اني خلصت سادس اعدادي واختي داوم معهد معلمات واخويه طالب
متوسطه
كمت اساعد امي واخيط وياها
حياتنا برغم صعوبتها بس ماشيه والحمدلله
عايشين يومنا وسادين جوعنه
اني اسمي هيلين
لمن سئلت عن معنى اسمي كلي والدي
معناته الضوء الجمال جنت بوقتها بعدني صغيرة
واعتقدت راح ينطيني اسمي فد مكانه
برغم انو كبرت وصرت حلوة بس مكان جمالي الى
دور بحياتي
عمري حاليا24سنه
هوايه تقدمولي بس مكنت اقبل
لان احس مشاعري وقلبي مو ملكي
طول عمري محبوسه بقفص كلبي
ومااكدر اتخلص من هالقفص احس مفتاح قفل القفص ضايع
طول عمري اباوع شاهين من بعيد وكلبي ينبض ويدك ويا كل خطوة
من اشوفه احس روح ضيع مني احبه من احنا صغار
بس هو ميشوفني ميهتملي بيوم الي يبتسملي
واني اعرف بي يجاملني احس روحي ملكت الدنيا كلها
بس ياحسرتي احنا وين وهو وين حتى الحب مستويات الدكتور شاهين ابن خالتي الي شايفه نفسها
الي ماتذكر امي الا لمن عدها شي
وتحتاج احد يساعدها
دز علينا
واليوم خابرتنا خالتي محتاجه للمساعدة مثل كل مرة ومثل كل مرة
اطلب من امي متروح بس ماتسمعني ودكلي
لازم اروح هاي اختي ومحتاجتني
ولان اختي ايمان متقبل تروح لبيت خالتي اضطر اني اروح اساعد امي
....هيلين
....نعم
...كملتي يله راح نتأخر
....لابعدني
.....شدسوين صارلج ساعه
....هسه ابدل ونروح
...يله استعجلي
مديت راسي من ورا باب الغرفه
...ماما ترة مابيها داعي نروح نخدم احنا مو خدامين ولانشتغل يم اختج
خلي جيب خدامه قابل ماعدهم فلوس
...شوفي لتحجين حجي زايد هاي اختي وشوكت متريدني اروحلها متريدين تجين لتجين
.....اختج دائما تستغلج وانتي تقبلين وسكتين
.....اختي هاي واكبر مني شنو يعني اذا ساعدتها
....لو تريد مساعدة جان بعيني رحت بس هي تريد ذلنا لان احنا ماعدنا
كامت اجتي عليه للغرفه وسدت الباب
....شوفي ولج اني كم مرة تريد تنطيني فلوس واني مااقبل وكدامج واكللها اني اساعدج بس مامحتاجه
وانتي تعرفين بس خاف دتتحسسين علمود شاهين فخلي بالج شاهين ميباوع على الي مثلنا
خلي نحجي طك بطك وتعرفين يحب بت خالتج
....اني مااتحسس من شاهين قابل شعندي وياة
..اني موغشيمه بس حبيت انبهج لتباعين ليفوك هوايه
لتنكسر ركبتج وعيشي عيشة اهلج
....اي هم صحيح
.....هسه تروحين
...اي هسه ابدل واروح وياج
طلعت امي وسدت الباب باوعت على نفسي بالمرايه
اني أحلى منها بهوايه احلى من دينا
ليش يحبها الها
ليش ميباوع عليه بس صدك كلام امي
اني من غير عالم
حسيت بغصه ودمعه محصور بعيني خفت دمعتي تنزل مسحت عيني برغم مابيها دموع
وبدلت وطلعت
وجانت امي واكفه متحضرة رحت على والدي
وبسته من راسه
....بابا محتاج شي
...لاحبيبتي مامحتاج شي
وطبط على ظهري ومسح على شعري
والدي انسان بمنتهى الطيبه ماشفت بحياتي هيج انسان طيب مثله بس للاسف ماعندةحظ بالدنيا
طلعنا من البيت ورحنا لبيت خالتي اول مادخلنا
شفنا شاهين بالكراج دينزل من السيارة
اول مالمحته
كلبي نفض بقوة
جان حلوووو فوك الطبيعي ولابس قاط رصاصي وشايل
الرداء الابيض مال اطباء
من شافنه ندار علينا وجان لابس مناظر
.....هلوووو خاله شلونج
،...هلو شاهين حبيبي شلونج
..الحمدلله بخير
..دومك حبيب خالتك
باوعت دينا واكفه باب المطبخ تباوع
كلت بكلبي هم موجودة
التافيت على شاهين جان واكف يباوع عليه لان ماسلمت عليه
حسيت بالخنكه
كتله من ورا خشمي
...هلو دكتور شاهين
....هلو
هيلين شلونج
...من الله بخير اشكر اهتمامك
سكت حس بااسلوبي موطبيعي وياة
عد امي حاولت تكسر الموضوع وظلت تحجي وياة
واني عفتهم وتمشيت وتلكتني دينا من الباب
بنطرونها والكعب العالي مالتها عبالك
عروسه
....هلو هلين
...هلو دينا شلونج
....الحمدلله بخير
شنو خاله شدتحجي ويا شاهين
...دسلم عليه
...ها موتأخرو
....هسه يدخلون
ودخلت ليجوة ورحت بوست خالتي وسلمت عليها
ودقايق ودخلت امي وراها شاهين
بس شاهين ضحكته ملت وجه بس شاف دينا وظل واكف يحجي وياها وهي تتموع وتدلل بحركاتها
وهو يباوع عليها
ظلو واكفين فوك النص ساعه واني اشتغل واباوع عليهم
وبعدين اجى وكف
يمي شاهين لان جنت داسوي سلاطه
كال
.... كلش جوعان
وخله الروب مالته على الكرسي وغسل يدة
واجى وكف مرة لخ بصفي بحيث ريحه عطرة دوختني
وحسيت جسمي كام يرجف
وبدة يشيل من السلاطه وياكل
واني ساكته وكطعت النفس خفت اطلع صوت وجسمي كام يرجف اكثر
حس بيه
....بيج شي
هزيت براسي لا
رفع حاجبه ومشى من يمي
وبعدها ماحسيت الا واني دانطب بالكاع وفتحت عيني وشفت
نفسي على الجربايه مال خالتي وشاهين
كامش يدي وديقيس الضغط مالتي وكلهم واكفين يباوعون عليه وامي
تبجي
....ماكو شي بس ضغطها هابط
خلوها شوي ترتاح
خلة عينه بعيني وتقرب مني
وحجى بصوت ناصي
.....انتي زينه بيج شي يوجعج
....لا
...شاهين خاله فدوة شبيها كلي
....مابيها شي الضغط هابط بس ترة عدها فقر دم
ولان
وزنها همين كلش خفيف
من شلتها عود تعالولي للعيادة اسويلها تحاليل بالمختبر الي يمي
متت من الخجل من عرفت بي شايلني
...اي طبعا عدها فقر دم متاكل غير
جان هذا صوت دينا عود ددكول انتو فقرة متاكلون
رفع راسه باوعها ورجع عينه عليه
اني نزلت عيني من حجت دينا هيج
وامي وخالتي طلعو من الغرفه بقى هو كاعد كدامي
ودينا واكفه
كلي
...هلين لازم تهتمين بنفسج ومحتاجه فيتامينات
....ان شاءالله
...يله شاهين داريدك بموضوع
دار وجه وابتسم الها
وهي طلعت من الغرفه
واني كلش
ضجت بعد ماتحملت
كتله
....نشكرك دكتور تعبناك هوايه
وجنت داريد اكوم
وكلي
...وين دتروحين
...وانت شعليك
ملامحه تغيرت بسرعه وحواجبه صعدت
...دورات احسج مو طبيعيه
....اي اكيد الي بينا هوايه يا دكتور
ونزلت رجلي من الجربايه
وعدلت ملابسي
وطلعت للمطبخ وشافتني ماما كالتلي
....هاي ليش اجيتي
....مابيه شي صرت زينه
رجعت وكفت اشتغل وياهم على الميز
وشويه وبدو يوصلون اصدقاء زوج خالتي
وكمت الهي نفسي
ماكمت اباوع على شاهين ولا على دينا الي تفتر منا ومنا
بس جنت اسمع كلام ماما وخالتي
....ماما سئلت خالتي
.....لعد شوكت ازوجين شاهين
....والله مايعجبه العجب وهسه طالعلي فكرت السفر
...شعجب يريد يسافر
...تعرفين عد هو شخصية قويه وشورى من راسه
وشو كال اريد اسافر
....لعد اني عبالي راح تخطبيله دينا
....اي والله اني اتمنى تعرفين هما من صغار واحد قريب من الثاني
وبس وياها هيج مختلف
....اي شكوبيها دينا حلوة وبت خالته وحبابه
....والله اتمنى اني كلتله كال افكر بعد ماادري
ديله اني راح اروح اغسل واغير ملابسي
واروح اكعد يم العالم عيب وانتي وهلين خلصو
...اي بعيني
راحت خالتي شمرت الماعون من يدي
...يعني شنو هيج تحجي وياج شنو خدامات
مالتهم شنو هلااسلوب هي تروح تكعد واحنا نكعد نخدم
...نصي صوتج ليسمعوج
اني اعرف وين دماراتج سكتي احسلج لسوينه مشكله خلي يخلص هذا اليوم على خير
....ماااريد اشتغل اني
....روحي لتشتغلين اذليني يعني
....احنا اصلا مذلولين ياالله ليش هيج احنا شنو فرقنا
....حمدي الله وشكري غيرج ملاكي الكمه
بس اني صوجي بعد ولااجيبج ويايه
....وانتي هم بعد متجين تشتغلين عند احد
تريد اجيب خدامه الله مفضل عليها
....سكتي معليج كافي عد شلون راح اسوينه مصيبه
غسلت يدي وطلعت كعدت بالمرجوحه
غمضت عيني ورجعت راسي ليورة وظليت اروح واجي بالمرجوحه
حسيت المرجوحه وكفت
...هي ياحلووووً
فتحت عيني شفت ولد شاب واكف يباوع بوجهي ومرسومه ابتسامه على وجه
نفضت نفسي وكمت
....انت منو
....على كيفج شبيج فزيتي
.... انت منو طبعا افز
....اللهم صلي على محمد واله محمد
سبحان الخالق
....عزة بعينك
طكها بضحكه وكف
....كلي اني حبيت اتمازح وياج بس صراحه منظرج جذبني
اني الدكتور كاميران
صديق شاهين وابن صديق والده واعرف شاهين ماعندة
اخت انتي منو
...اهلا وسهلا اني بت خالته
....اها حلوو تشرفنه بمعرفتج
...الي الشرف اكيد
....اسفه بس جنت تعبانه واجيت شويه استراح
....لابالعكس جان المفروض مااكعدجً
اظل اباوع ههههه
....ههههه يله من رخصتك
....غاليه
ولمن نداريت شفت شاهين واكف يباوع علينا
سمعته يصيح
من ورايه
....انتي شنو اسمج
....اسمي هلين
وصلت لباب المطبخ وفتحتها ودخلت شاهين ماحجه شي
راح ليجوة وبعد ماشفته لحد ماخلصت العزيمه وطلعو الخطار
وبعد ماطلعو احنا تحضرنا حتى نروح للبيت اجى ابن خالتي اوس اخو دينا
سلم وباوع عليه
...انتي ليش كلما اشوفج اصيرين احلى شنو السر
...هههه يمه من لسانك
...ماما كالت تخربطت اليوم وجهها اصفر
فتح عينه واجى عليه
.....انتي بيج شي اوديج لدكتور نروح للمستشفى
....ههههه على كيفك مابيه شي
....دمشي خلي نروح حتى نطمن
....مابيه شي فحصني شاهين الضغط نازل شويه
....اكيد
....اي اكيد
....تعالو اوصلكم
...وماما كالت ياريت
وفعلا وصلنا اوس ورجعنا لبيتنا ومر كم يوم وظليت ملتهيه ويا والدي والخياطه
واليوم العصر كاعدة اخيط وسمعت امي
....دكول الف مبروك اي اكيد باجر نجي
اني والبنات
ولمن سدت التلفون اني رحت عليها
.....ها ماما شكو
...شاهين خطب دينا وباجر قرايت الفاتحه وكالو راح نسوي كعدة. بينه
فلازم نروح اني وياج واختج
...ماااروح اني ومااخدم احد بعد
....استغفرالله منخدم احد هما بيت خالتج ام اوس مسوين كعدة نبدل ونروح
.....مااروح اني انتي روحي
..ليش متروحين
....مااريد اروح ميعجبني اني لااحب شاهين ولااحب دينا
....اوف ماااريد احجي هلين بس سمعي مني زين
لظلين تحلمين هسه المفروض تعرفين حلمج لهنا خلص
كافي التفتي يابنتي لحياتج
لظلين تحلمين
اني اعرفج سباعيه وقويه وميهزج شي بالعكس يابنتي روحي وتأنقي وكعدي وضحكي ولتنقهرين
لخاطري لاتخليني اظل بقهري عليج ترة اني مناقصه قهر
.... ميخالف اروح
واخذت حزني بجرة ودخلت لغرفتي وشعوري شعور
الطير المكسورة جناحه
بيه حزن جبير بيه كسرت طفل تايه يدور على امه
بس كمت اكول ليش احس بقهر وهو ميشوفني بعينه
وعينه متباوع على غيرها
واقنع نفسي واكول كلشي قسمه ونصيب
حتى قهرنا هم قسمتنه
وهذا نصيبي
جنت كلما انقهر واريد ابجي اركض اروح للغرفه
وافتح الشباك واظل واكفه بدون حركه
حتى النفس يصير بطيئ
واخذ حسرة وتتبعها حسرة
مر هذا اليوم وخلص مثل اي يوم بحياتي مابي شي حلووو
بس اليوم كانت جرعة الحزن بي مركزة وقويه
جان يوم عبارة عن ألم
عبارة عن خيالات وصور وافكار
ودمع وانتهى يومي وجنت على امل انو باانتهاء يومي ينتهي
حزني بس مااعتقد الحزن راح يفارقني
لمن فتحت عيني حتى استقبل نهار جديد
حسيت بوجع يهز كل جسمي حسيت بمغص
يشل حركتي
بس حاولت ادوس على نفسي وأكابر مثل كل مرة
....هلين
....ها ماما
....يله بنتي كومي اليوم ورانا روحة
...اي كمت
لمن طلعت للمطبخ سمعت ايمان وامي يتناقشون
ومختصر الكلام ايمان متريد تروح
مكنت بمزاج يخليني احجي وادخل بشي
او اتناقش
رحت واخذت كوب جاي
وكعدت على صفحه كانت امي تباوع عليه
ابتسمت الها
بس جانت ابتسامتي حزينه وباردة وبيها الف معنى
..بيج شي بنتي
...لا مابيه شي
....حبيبتي اذا متريدين تروحين لتروحين
....لااروح
جتي كدامي وكفت وخلت يدها على شعري
.... ياماما لتنقهرين كلشي قسمه وانتي بعدج صغيرة وحلوة
وموبس حلوة انتي تشبهين الكمر اني متاكدة
هسه يجي واحد يزوجج ويسعدج ويتمنالج الرضى ترضين
بس كولي ياالله خلي الله يفتحها بوجهج
.....ياالله
......كومي حبيبتي اكلي وخلصي شغلج وبدلي واريدج تصيرين انيقه واحلى من كل الموجودين
.....ان شاءالله
كمت خلصت كم شغله وغسلت وبدلت وجان عندي
نفنوف اسود طويل هو مكان مال مناسبه بس كان حلو وجذاب وصدك حبيت اكون احلى الكل اليوم وخليت مكياج لااول مرة لان قبل كنت اخلي بس مااطلع بي
بس قررت منا وجاي اخلي لان شفت شكلي شلون تغير وحسيته خله عندي ثقه بنفسي اكثر
وردت اليوم اثبت لنفسي انو شنو يعني الدنيا راح توكف عادي ماكوحياة توكف
وبعد ماكملت
لبست جاكيت طويل وطلعت على ماما
....ماما اني كملت يله نروح
....ماشاءالله
شنو هالجمال طالعه اليوم
سمعت بابا يكول
....موكتلج انتي اسمج ينطبق عليج الله يحلي حظج
مثل مامجمل شكلج
....ان شاءالله بابا
...يله بنتي
طلعنا واخذنا تكسي ورحنا لبيت خالتي فوزيه
جان هوايه اكو عالم اني اصورت كعدة عائليه بس
خالتي فوزيه وبتها دينا يحبون المظاهر
وممصدكين شاهين خاطب دينا
دخلت امي واني كنت امشي خلفها
دخلنا جوة جانو خوالي وخالاتي واشخاص مااعرفهم واغلبهن نسوان
...هلين
....هاا
...روحي بنتي نزعي الجاكيت وتعاي
...اي يله
دخلت للغرفه الجوة وكفت على المرايه ونزعت الجاكيت وعدلت شعري
وبقيت اباوع على انعكاس صورتي ودورت شي يهدي الصوت الي بكلبي
بس مالكيت غمضت عيني وجريت نفس طويل
وطلعت من الغرفه وسمعت صوت هلاهل
تمشيت ورحت وكفت يم باب الصاله شفت
شاهين وخالتي واصلين وديدخلون
ظليت واكفه ورا الحايط واباوع ومادخلت
وحسيت الكون وكف وبقت بس عواطفي
ودكات كلبي المتسارعه
باوعت على شاهين جان حلو وجذاب ومغرور مثل كل مرة
باوعت خطواته واقترابه منها وبعدين كعد بصفها
الكل جانو يضحكون ويبتسمون
بس اني واكفه نفس الوكفه الي جنت اوكفها قبل من اني صغيرة بعدني اباوع عليه من بعيد
بعدني هذيج الطفله الي تحب برغم هي متعرف شنو يعني الحب
بعدني اختلس النظر من بعيد
قبل جان ميلعب ويايه ويعيط عليه ويروح يركض عليها
ويلعبها وجنت اوكف بحزن طفله واباوعهم من بعيد
شلون يضحكون ويركضون
وجنت اكتفي بالسكوت
وهسه كبرت وبعدني واكفه اباوع من بعيد
اباوع الانسان الوحيد الي حبيته وهو ميشعر بيه
وهو ميحس بيه و هو ميهتم لوجودي
صعب الشعور لمن يكون الحب من طرف واحد
شعور قاتل فعلا شعور مميت
صعب لمن تتعذب وتسهر وماكو احد يحس بيك
وتبجي وماكو احد يمسح دمعتك
موشرط نحب الانسان الي يبادلنا المشاعر المشكله
اغلب اختيارات قلوبنا بالحب خاطئة
بس حكم القلب
رجعت خصلات شعري ليورة ومسحت عيني واستجمعت كل قوتي ودخلت وبديت اسلم على الموجودين
والكل ظهر اعجابه الشديد بيه
للحظات كنت اظن انو هاي الحفله اني صاحبتها
بسسب انو اني سرقت الاضواء من العروسه
وبعدها رحت وسلمت عليهم
...مساء الخير
...مبروك عليكم.
.....الله يبارك بيج هلين
....كلي هلين ماعرفتج
....ابتسمت
بوست دينا ورحت كعدت بالكرسي الي كدام
شاهين جان يباوعلي ويدير وجه
مااعرف ليش حسيت بي موسعيد جان كاعد ومبين عليه عدم الاهتمام
وللحظه حسيته متشتت
نداريت احجي ويا ابن خالتي اوس ولمن رجعت التافيت جان صافن ويباوع عليه
مهتم من شفته
ضحكتلي دينا واني ضحكت الها
وخلت يدها على يد شاهين وهو ابتسم
حسيت اني دخت باابتسامه موهي
وبعدها حاولت الهي نفسي واحجي
ويااي شخص اشوفه حتى لايبين عليه شي لان عيوني جانت بيها الف نظرة
كمت اكول ياروحي سكتي ضمي وجعج شفته طلع جكارة
وكام يدخن وبعدها كام ماادري وين راح
ورجع كعد
وعبالك مخنوك طلع تلفونه وباوع عليه ورجعه
شفت دينا تأشرلي
ودكلي تعاي
...استغفرالله هاي شتريد مني
رحتلها
...ها دينا محتاجه شي
....لا بس تعاي كعدي هنا
...اوكي
كعدت وهو صار كدامي
جان ساكت وكل شويه يباوع منا ومنا ويرجع يلعب بالتلفون عبالك منتظر شي او منتظر اتصال
مهم
....سمعت خالتي اصيح دينا
...دينا تعاي ماما
...يله جيت
كامت دينا وبقيت كاعدة بمكاني
رفع عينه وباوعلي
...شلونج هلين شلون صرتي
كلبي كام يدك عالسريع وصوتي كام يرجف
....الحمدلله
.....ليش مااجيتيني للعيادة جان وديتج لصديقي
الدكتور كاميران
اكيد شفتي
...لا
....صدك بيوم الي جنتي بالمرجوحه مو جان ديحجي وياج
....ها اي اذكرت
....اي زين
...اي هسه اروحله
....اي شكوبيها
دك تلفونه وباوع عليه وسوا صامت ومجاوب
كتله
....عالعموم عالخير ومتهنين. ان شاءالله
خله يدة على لحيته وجانت نظراته تخطف الانفاس
وحركته تحرك كلشي ساكن بيه
....اشكرج
هلين
....نعم
...اني استغرب انتي مازوجتي لحد الان مامعقوله هيج الرياجيل ميشوفون
...ابتسمت
لايشوفوني بس اني الي مااشوفهم
صفن بوجهي وسكت
وجتي دينا وسكتنا وشويه كعدت وبعدها كمت بحجت
داسوي شي
رحت للمطبخ وكعدت على الستول وكمت افتر منا ومنا مثل البنات الصغار لان جنت متوترة
وبفرتي صار بوجهي شاهين
.....ههه شدسوين
....دافتر
....بعدج تنهزمين من ضوجين ودكعدين وحدج
....شتقصد
....اني اعرف من انتي صغيرة تنهزمين من اكو شي يضوجج
تكتفين بالنظر من بعيد
...لاماكو شي مضوجني
....كوليلي شنو الي مضوجج،،،،،،
،،،،،،،،،،،،،،،،،،،،،،،
،،،،،،،ماذا اقول ان كنت انت علتي هل افضح سري
وتعلم بأنك نقطه ضعفي او ابقى ويبقى سري
هو مرضي ماذا اقول لك بأنك عشق طفولتي
بأنك حلم ضائع بين السطور وأنك الطير المحلق في
بستان عتمتي
ماذا اقول ياعشقي ويادمعتي الواقفه على
باب حزني،،،،،،،
,,,,,,,,,,,,,
بلعت وجعي وغصت كلبي
....مابيه شي
....اوكي زين لعد
ودار وجه وراح
ليش عود اني احبه وهو مويمه السالفه
شلون ويا كلبي هذا
شلون اشلعه والله لو اكدر اطلعه وادوس عليه
جان سويت بس حتى بالعشك حظوظ
واني حظي بالدنيا قليل
.....هلين
....وين رحتي
.....ها أوس
....ليش كاعدة وحدج
....دخت
...دختي لوضجتي
...من شنو اضوج
....ياريت لو اعرف شنو الي يضوجج
....ماكوشي صدك
....اعرفج اكثر من نفسج
.....ابتسمت اله
لا بس شويه تعبانه
...كوليلي بنت خالتي شنو الي بيج والله لااكلب الدنيا لخاطرج
.....ههههه تسلملي
.....اني موبس ابن خالتج
...اي اعرف انت اخويه
سكت
يتبع ...
يتبع تصويت وتعليق حبايب وتفاعل اريد
