كذبتي الصادقة❤

لقاء اول

كبرت اني واخواني وانضاف فيما بعد ويانا اخت وحده اسمها دنيا اني اكبرهم تخرجت من كلية التربية الرياضيه واشتغلت بنفس مجال عمل العائلة بس شويه اختلفت عنهم ...وقاص بعدي كمل قانون وهم اخذ طريق الخياطة ووسام اصلا ما تعب نفسه وراح معهد فنون ولحكنا بشهادة قريبة لعملنا ...دنيا بعدها تدرس بالرابع اعدادي ماكانت الدراسة تستهوينا مثل ما عمل اجدادنا واهلنا اسر قلوبنا ..امي وابوي زرعوا حب المهنة بينا من كنا اطفال بأرسالنا للسوق ويه جدي ووالدي ...درنا اني واخواني محلنا اللي يتوسط السوق وكدامه الساحه الوسطيه الكبيرة اللي يشتغلها عشرات البسطيات والاكشاش البسيطة ...

محلنا بقدم هالسوق ناس تروح وتجي واحنا بمكاننا متوارث هالمكان وتوسعنا للمحلات المجاورة ...اني ووقاص ووسام اخذنا كل واحد محل واختص بشغلة بس شغلنا واحد هو الخياطة ...

اني اشتغلت بالعبي الاسلامية والعباءات الخليجية والحجابات والجبب .....ابدعت بيها شغلي مرات يكون احلى من الجاهز واكو نساء يجوني مخصوص لأن ما يلكون طلبهم ضمن الملابس الجاهزة ...بالاضافة اشتغل اي شي يجيني تنانير..ستر..واوصل ويه الزبونة لاقل تفاصيل وادقها مثل الكف والتصغير وحتى الدكم ..

الي خلك طويل وطويل كلش وخصوصا مع الجنس اللطيف هههه ..بصراحه وبينا الكلام اعشق تفاصيل جسد الانثى وتقاسيمها وكل موديل اتخيل الجسم اللي راهم اله ومن انصح الزبونة واسوي الها شي متأكد منها راح ترجع الي مره ثانية ..

طبعي كثير الكلام واحب ادخل بتفاصيل واعرف كل شي ..اخواني عكسي وكان مستحيل الهم يشتغلون شغلي والدي وجدي خلوني بهالمكان لان يشوفوني اناسبه ...

.وسام اخذ جانب البردات ومسارح البردات وديكورات المنازل ودرس فنون جميلة قسم تصميم طبعه هادي ومنعزل حيل وديخطط للزواج قريبا رغم هو الاصغر بيناتنا وعنده نزعة الاستقلال وحب الذات ..ما يحب الهوسة ...

اما وقاص كان اكثرنا جديه وحزم ....ايضا كتوم قليل الكلام جدا ومن يحجي تتمناه لو باقي ساكت مو لان كلامه مو مناسب لا لان مناسب اكثر من اللزوم ..ثكيل ورزن حيل اخذ المحل الاساسي المتمركز بالوسط واشتغل غير عنا ...اشتغل دشاديش رجاليه وملابس رجاليه بمختلفها ...لكن الاكثر يشتغل دشاديش وشغله كله من الافضل والاجمل وهذا الشي جذب اله ..شيوخ ووجهاء وناس كباريه حتى من غير مناطق ...اتأثر بيهم من طفولته هو ويه والدي بهذاك المجال ..تعلم من المحيط اللي كان حواليه ...اصدقائه وربعه كلهم من هالفئات..اخذ طابع عشائري وطبعه بي شي من القبلية ...اني الضد ما احب اتقيد لا بتصرف ولا بكلام منطلق عايش الحياة ...احب اهتم بمظهري كلش واتابع كل جديد يدخل للساحه ...

صداقات عندي معارف من راس السوق لراسه يعرفون وضاح ومن يريد احد يندل محلاتنا مجرد يسأل عن وضاح يجيبوه بالمنطقة وبالبيت طبعي فعال ..ودوم وضعي متصل ونشط الان هههه لا صدك احس نفسي عايش وحدي بالبيت واللي وياي اموات ...امي وابوي من بعد مشاكلهم كل واحد بديرة واخواني بس نرجع من الشغل كل واحد لغرفته ..امي علمتهم على هالشي ما يطلعون اما اني حبلي على گروني مثل ما يكولون ما مشيت ويه رغبتها  احس كعدة البيت للمعقدين والشياب واني لا هيج ولا هيج اني شاب واريد اعيش الشباب بأحلى صوره ..