Part 9
كانت عائلة البرجي تجلس سوياً في غرفة المعيشة دون ستيلا وكان السيد ناجي يشكي همومه لزوجته عن مشاكل عمله مع شركائه.
إلياس : أنا بئول نفكا لهالشراكة ونخلص بئا.
السيد ناجي : يا ريت الفعل سهل متل الحكي.
حلا : معئوووول!! ما بسدء
السيدة فيروز : شبك حلا؟
حلا : لك تعو شوفوا ستيلا شو منزلة عالانستغرام الدنيا داخلة ببعضا من ورا الخبر.
السيد ناجي بتوتر : لك ئولي شو في.
حلا بحماس : منزلة صورتا هي وآدم بالأبيض والأسود وبتئول حاولت أبقى قوية متل ما بتعرفوني بس فشلت، قسيت عحالي وخبيت دمعتي وهيدا أكبر غلط. اليوم عم افتحلكن قلبي لئلكن إني صرت منيحة متل ما بتتمنوني كون ومتل ما آدم عطول وصاني. أحياناً الله بيكتبلنا إشيا ما بنريدا دون ما نعرف شو المغزى منا. حدن مرة ئلي الله ما بئطع بلا ما يوصل. شكراً من ئلبي على دعمكن انطروني قريباً. ستيلا.
إلياس : معئول حدن هكر حسابا لستيلا؟ ما بيطلع منا هيك كلام وهي بهالحالة.
صعدت العائلة إلى غرفة ستيلا لتجدها منشغلة في منتصف فوضة أوراق.
السيد ناجي باستغراب : ستيلاا..
ستيلا : بابا نحن ضروري نحكي عن الشغل
حلا : بفهم إنتي ورا بوست الانستغرام؟
ستيلا : إيه أنا لكن مين بدو يكون؟ عالعموم حاكيت جاي حتى يغيرلي كل طاقم عمل سوزي المسؤول عن السوشال ميديا تبعي، و حبلش شغل مع ناس جديدة بأميركا. و هون فيكي تبلشي بتوزيف ناس من هلء.
حلا بصدمة وفرح : ما فهمت حترجعي تغني عن جديد؟ و هون؟ بلبنان ؟
إلياس : أنا شغلي هون خلص، طالع مع رفئاتي.
ستيلا : يس، بلبنان، أول ألبوم عربي لستيلا البرجي من إنتاج شركة البرجي الخاصة.
السيد ناجي باستهتار : الخاصة؟ نحن عنا شركاء.
ستيلا بشغف : نو مور، رح نوئف على رجلينا من الصفر رح نكّبر اسم العيلة أكتر ونكبر أكتر.
حضنت حلا أختها من شدة الفرح فأخيراً سيتحقق حلمهن بالعمل سوياً.
ستيلا : وإنتي ماما، اسمك رح يرجع يضوي عالم الموضة و رح ترجعي تصممي وأول عارضتين جاهزين.
ثم أشارت ستيلا على نفسها ثم حلا قائلة : بس موضوعك ماما بدو ينطر شوي حتى حلا تخس النص.
ضحكوا أربعتهم متمنيين تحقيق جميع هذه الخطط.
استيقظت ستيلا من نومها العميق ثم بادرت بمسك هاتفها لتصفح الإنستغرام فوجدت ألاف التعليقات الإيجابية والدعم الواسع من محبيها لتخطي ألم فراق آدم والعودة لتكملة بناء مسيرتها الفنية التي ما زالت بانتظارها حتى اللحظة.
