Nyepi kuyu iya ditempik urang Lyana enchelak ka mata iya begadai utai peda iya ngerabur laban agi lampir ai mata. Jari iya beguai malit mata merening kiba merening kanan tang nadai ga utai dipeda iya mina mummy enggau Lusa aja ka bisi ba bilik iya. Nyadi mummy enggau Lusa besilih ga merening iya ka nemu nama utai digiga Lyana.
"Nama utai giga nuan Lya.. Bendar endar tinduk datai ka ngigau."pia ko Lysa nanya Lyana. Lyana enda memunyi agi ngendas ai mata iya ka ngemasah kuyu iya. Asaika nyada Apai seduai Indai iya datai berandau betunga mua. Dini enda iya nyau nyabak nadai semengat nemu Apai seduai Indai iya ka udah parai bebela asai ati iya ka berandau enggau apai seduai Indai iya.
"Lyana nuan ok ka? "Pia ko mummy nanya Lyana ati iya bisi irau meda Lyana agi empai nyaut iya.
"Ok ku nadai ngawa Mina mimpi aja "ko Lyana nyaut mummy. Lysa enda memunyi ba tisi mummy .
"Mandi begari nuan legi deka kitu Browen legi ngambi nuan. Alu packing magang gari nuan "ko Mummy ngasuh Lyana mandi. Mua Lysa lalu mali enda senang ninga mummy nyebut Browen ka ngambi Lyana. Mata iya tajam merening Lyana ka agi enda kekebut ari tadi.
"Jampat keh... Nganu iya legi "pia ko Mummy ngansak Lyana. Nyau lama baru Lyana angkat enggau belubah asai ka enggai ati iya mandi nengkira ka diri empu.
"Nama nuan enda madah ka aku Browen ka ngambi iya?? "pia ko Lysa nanya mummy pengudah Lyana tama ngagai bilik mandi. Lysa bediri ngerendut dada mua iya berupai jai dipeda
"Enti aku madah ka nuan Browen datai kitu nuan ka enggai iya. "Pia ko Mummy Merci iya jaku. Bisi begedi anak ati iya ninga Lysa bejaku.
"Ukai pia sekurang iya aku nemu iya datai. Nuan ukai enda nemu aku tu ka ke Browen "Ko Lysa nanah ka diri empu .
"Lysa Browen nya ka ke Lyana ba iya ngambi Lyana.. Ti iya ka ngambi nuan udah lama nuan diambi iya.. Ukai iya baru kitu meda nuan. "Ko saut mummy meri Lysa jaku.
"Huuuhh nya meh mummy nemu magi ai dalam ruas.Iya nya baru dikelala mummy Kati mummy tau ngumbai iya bungas entah entah indu baka nya baruh janda atas dara. "Pia ko Lysa agi meda puas ati enggau mummy . Ati iya berasai ringat nyengat ba ati iya.
"Alai meh nuan mansang ka diri ngagai Browen Enti iya ka ka nuan silap silap nuan nya nyadi pemakai baya iya. "Ko Mummy nimbal Lysa. Lysa lalu ngentak ka kaki ringat pansut ari bilik nya lalu mulai ka diri tama bilik iya empu.
"Siall !!! patut iya aku diambi Browen ngelamatu aku meh enggai iya ukai bisi urang bukai. "Ko Lysa mutap mucau ka diri dalam bilik iya. Untak iya nyau befikir baka urang ka enda betul.
"Aku deka ngerebut Browen ari Lyana! Aku deka ngasuh iya begedi ka Lyana udah tu ila. Awak iya ngiga aku baru. "Ko Lysa ngepun ka runding jai iya ti malut untak.
"Empai iya nemu sapa aku. Lysa tu! "Ko iya meransang diri sambil tuchum kediri dalam bilik.
YOU ARE READING
Gun N Roses
General FictionLyana Siku indu anak patu balu ti ditinggal ka apai seduai indai iya maya seduai parai ba penusah jalai alun maya umur Lyana 15 taun. Pengudah apai enggau indai iya parai Lyna diibun menyadi indai iya .Ibuk iya nya bisi anak dua iku nyadi iya ka lak...
