عشق في بلاد حروبها لا تنتهي ( الفتنه و الثأر)

البارت 11

_
_
#عشق_في_بلاد_حروبها_لا_تنتهي
الحلقة 11
(الياقوت)
في الحلقة السابقة
محمد اول ماشافها خشت بينهم بعد خطوتين طول التالي.
غالية:انت شن تبي منا سيبنا في حالنا ياسر دمرت حياتنا انت وخوك الله لا ترحمه
شد احمد غالية ودفها باش تخش الداخل وهوا يركز علي محمد لتعصب وهوا يقبض في يده بالقوه وعيونه لمحولهمش من غالية...
.
قراءة ممتعة 💛
#البارت_الحادي_عشر
.
قعدت غالية تعافر في احمد ليكشخ عليها بصوت واطي:خشي ياغالية
غالية قعدت تشبح لمحمد بعيون يقدحو في الشرار:لا مانيش خاشه هدو بياخدوك يااحمد اني مانبيش نقعد بروحي مره تانيه
احمد:غر خشي ياغالية باللهي عليك
هدت غالية وهيا تشبح لمحمد بغل وكره وتلفتت خشت وردت باب الجنان وقعدت وراه تسمع.
وخلت احمد يتلفت لمحمد لقرب الخطوتين لوخرهم وقعد يشبح لنهاية الباب المردود وهوا يشبح لرجلها الباينات من لوطه:عندك مهلا سبوع ياتقولي مكان خوك وين يا ترد لنفس الشيلا لكنت فيها
خدت غالية نفس كبير ودموعها نزلو.
احمد زمط ريقه:ماتقدرش تردني الصقر طاح خلاص ماعندك باش شاد توا واني ماعنديش سوابق
ضحك محمد بخفه وحط عيونه في احمد:ومن قلك ياراس نا ماسك بهضا ولا بهضا نا نمسك لنبيه ونتهم لنبيه ، ونا ليا الحق نقبض عليك ونشيلك للحبس وقتي انت عندك قضية تجارة حبوب عندك قضية مخذرات يافندي
ضيق محمد عيونه:كدب اني لا متع مخدرات لا شي حتي الدخان الساهل ماندخن
رفع محمد كتافه:عارف لكن هات من يصدق
وتنهد محمد وحط يديه في جيوبه وكمل:شيلك من هضا كله وخلينا في الاتفاق السمح شني قلت
وشبح لرجلين غالية لتحرك فيهم بتوثر وكمل:ولا نخليك تفكر وعندك سبوع
مسح احمد علي لحيته بتوثر وخوف وتلفت محمد بيمشي بس طلعت غالية بسرعه وصيحت:والله لو تراجي سنه مامقايليلك وين لو كان تقتلنا
رجع محمد تلفت وطلع لسنه وهوا ينتش فيه بغل من غالية ورفع يده يلاها:انقنك خاطرك في طريحه سمحه نمسح فيك دم قلبي ياطشه انتي
شهقت غالية وكيف بتزيد تصيح تلفتلها احمد لفنص فيها وهوا يسكرلها في فمها بيدها بالقوه وهوا يدف فيها باش تخش الداخل ويسكر في باب الجنان. وخلا محمد يركب سيارته ويتنهد وهوا يفتح في الروشن ويشبح لبابهم ويبتسم:جلاطة السانها اممم احيه وخلاص
وضحك وهوا يتحرك بسيارة ويمشي.
__
دفها احمد وهوا يكشخ عليها:شن اني طرطور تشوفي فيا جايتيه تجري خيرك هبلتي انتي هبلتي
ضربت غالية رجلها في الارض بالقوة وبعصبيه:اي هبلت هبلت اني مستحيل نخليه الكلب هدا يرفعك مره تانيه ماسمعتاش شن قال سبوع بس وكان ماقلتلاش علي مكان مجدي بيحبسك واكيد بيحبسك لانه مانعرفوشي وين
ونزلو دموع غاليه وهيا تمسح فيهم بعصبيه
احمد زاد علا صوته:يحبس يقتل غر لبدير يديره اني مليت فديد خلاص من العيشه هدي ره هم خوك وهمك انتي مش قادر نتحمل اكتر
هدت غالية وقعدت تشبحله كيف يمسح علي جبهته ويتنفس بسرعه بسبب عصبيته ، طبست راسها وقالت:هدا علاش تبي تزوجني للي يجي باش ترتاح من همي
رفع احمد عيونه في غالية وقال:من وين عرفتي بنزوجك
غالية:مبكري قعدت نسمع فيك انت وراجل تدوو تبي تزوجني باش ترتاح وتهج وتهرب زي مهرب مجدي وتخليني بروحي
تنهد احمد بالقوة وقرب من غالية لنزلو دموعها:اه ياغالية ياريتك تفهمي بس ياااريت
سكتت غالية وهيا تخش للحوش وتخلي فيه في جنان بروحه...
__
بتسم فارس اول ماشبح سفيان مقعمز قدام لبحر وسارح فيه قرب منه وهوا يحط في يده علي كتفه تلفتله سفيان طول واول ماشافه ضحك ووقف حضنه طول وهوا يضبط فيه زين.
طبطب فارس علي ظهر سفيان لبعد شوي وقال:ستاحشتك
فارس رفع يده ومس لحية سفيان:مولي شيخ
ضحك سفيان:زعميتك وانت ضاعف
حك فارس راسه:من الهم
نزل سفيان عيونه:الله لا تسمح في من كان السبب
فارس:تدعي علي روحك
سفيان تنهد وتخطي نقاش ملحوق عليه وقال:شن حال امي
سكت فارس وقعمز علي الرمله وماباش يرد .
ضيق سفيان عيونه وقعمز جنب فارس وقال وهوا يشبح لوطه:ستاحشتها ايح قداش ماخاطري في ماكلتها وتهدريزها ياريت سمعت كلامها ره مش هدا حالي
نزلت دمعه من عين فارس وقعد ساكت وحتي سفيان سكت نصيب ، وبعد مده مش طويله من الصمت تلفت سفيان وقال:اتصلي بيها خاطري نسمع صوتها نبي نقولها تسامحني مش ضامن نشوفها الفتره هدي
خدي فارس نفس كبير وهوا يرفع في راسه ويشبح للبحر وقال:امي
ضيق سفيان عيونه وهوا يشبح لفارس لكمل وهوا يتلفتله ويقول بعيون مدمعات وحمر:عطاتك عمرها من شهر البقيه في حياتك
غمظ سفيان عيونه بعدم استوعاب وفتحهم:شني
__
ربطت نادين الوشاح في رجل زيد اللي يشبح لرجله ويشبح لرجل الطاوله لمربوطه فيها طرف الوشاح من الجيها التانيه وقال:وليت بعيه
ضحكت نادين وهيا توقف وتشح في الوشاح عدت مرات تتأكد كان ارتبط زين وقالت:توا هكي ندير غداي واني مرتاحه ، العب بألعابك وعيط علي راحتك و بكيفك المهم ماديرليش فالطه اكبر من راسك وراسي
شبحلها زيد شبحته البريئه وهوا يسبل في رموشه:حبك نا ماما
هجمت عليه نادين وهيا تبوس فيه وتتغمر فيه:واااه عليا محلاك وليدي محلاااااااه ياحليلي وخلاص لكن الله ماني فاكاتك
ورجعت وقفت ومشت ووقف زيد تبعها بس فجأة طاح وهوا يشبح لرجله المشدوده بالوشاح قلب شواربه وقعد ينقنق وينادي في نادين لخشت الكوجينه وهيا تتنهد:شن بندير توا ، حاجه بسرعه بسرعه لانه مش ح يبطل تنقنيق
طلعت الحم من لفريز وهيا تحس في روحها داخت فجأة وبترجع ، شدت فمها وهيا توخر وتبي تسند روحها بشي باش ماطيحش بس ماعاش شافت شي وطاحت من طولها وجي راسها علي حاشيه الرخامه بالقوة...
__
انا شبيه بلادي ضعيف جدا ،هش ،هزيل ،خارق القوي، وانزف بشده ،ومحطم ايضا ،ولكن صامد بشده ،لا يهزمني رصاص النفاق الذي خترق قلبي 💛
(الياقوت)
.
حط سفيان راسه علي الدومان وهوا يبكي يبكي بصوت عالي كانه عيل صغير يبكي بحرقة قلب كانه شايب وشاف من الدنيا الاهات يبكي بألم وكانه قلبه مدبوح بموس ، يبكي وفاشل مش قادر يضرب يكسر يقتل اي حد او خوه لقالها بكل صراحه امي ماتت وخلاه بروحه يواجه روحه يدكر كيف كان يعصي فيها يكشخ عليها ويمرض فيها بسهره ومشاكله خلاته بلوعت قلب وبوجع ضمير ماليشي دوا كان الموت.
ليه ساعتين علي الحال هدا ، رفع راسه وهوا يمسح في وجهه ودموعه بديه وخدي تليفونه واتصل بإيلاف متأمل مرات فتحت تليفونها متأمل انه حبيبته البنت اللي كان بيتغير علي خاطرها وعزم القرار خلاص بيتغير باش يكون لها الزوج والانسان المناسب؟ ونسي لمراة لتعبت تسع شهور باش تجيبه علي الدنيا لمراة لربتهم هوا وخوه بروحها من بعد موتت بوه ، المراة لقد مادار ودار تسامح فيه ، فكر للاحظه علاش ماتغيرتش علي خاطرها علاش مش هيا امي مش المفروض هيا الاولى بيا انه نتغير علي خاطرها ؟؟
اتكه بظهره علي الكرسي ووخر راسه التالي ودموعه مابطلوش نزول ، رفع تليفونه مقابل وجهه وتصل اول مره مقفل  ، تاني مره مقفل ، تالت مرة خارج التغطيه ، رابع مره شد بس من تاني تشرينه تسكر ، تنهد سفيان وقال بترجي:باللهي عليك ردي ردي اني بحاجتك بالله
وعاود يتصل بس سكرة ايلاف عليه وهيا متوثرة ودير فيه صامت.
تلفتتلها روان اللي تغسل في لماعين:هيا اتصلي بالبنت نبي نسمع شن بتقول هههه
ايلاف تحمحمت:باهي مافيش تغطيه
روان:اي اصلا من امس الشبكه ترعا من الضرب لصاير قالو باش ماحد يرسل معلومات ويفتن في النت
ايلاف رجعت قلبت تليفونها ولقاته يتصل ومن غير ماتحس فكت روان منها التليفون
وقفت ايلاف وهيا تبي تاخد التليفون بس روان بعدت يدها وقالت:هدا هوا وله
ايلاف:روان هاتي
روان فنصت فيها ودفتها وهيا تصيح بصوت عالي:قعمزي
نفخت ايلاف وقعمزت وروان جبدت الكرسي وقعمزت قدامها وهيا شاده التليفون:رديتي عليه وله
ايلاف سكتت وماردتش
روان صيحت:ايلاف ره هدا قاتل خوك فاهمه عليا حمزة خونا حمزة توأمك هدا ليتصل بيك هوا لقاتله
نزلو ايلاف دموعها وشبحت لروان:نعرف وفاهمه هدا علاش رديت نبي نعرف شن يبي مني وهوا قاتل خوي
روان نزلت راسها وهيا تشد فيه بين يدها:وشن عرفتي اه شن كسبتي بعد مارديتي عليه
ايلاف زادت من بكاها:قالي ، قالي مش اني لقتلته
رفعت روان راسها وشبحت لإيلاف:وانتي صدقتيه وكدبتي عيونك
ايلاف مسحت دموعها: مانعرفش اني ملخبطه بكل عارفه انه هوا لقتله عارفه والله حاسه روحي بلا قلب لما نحاول اركز علي الكلام لقاله ونحس فيه مقنع بس في نفس الوقت مش راكب مانعرفش اني ، اني ااااه ياريت نموت ونرتاح
تنهدت روان:ايلاف هدا يكدب عليك
ايلاف:باه علاش بيكدب وهوا شبه ميت
روان سكتت شوي وقالت:ايلاف
قصت ايلاف وهيا تقول لفكرة فيه ومتعبها:خسر كل شي امه خوه عيلته وحتي اني الموت اقربله مني علاش بيكدب سبب نبي سبب واحد بس
شبحت روان لتليفون ولقاته سفيان يتصل تاني شبحت لإيلاف وقالت:هدا بخسرك حياتك زي ماخسرها
ايلاف قعدت تشبح في تليفونها وكيف بتتكلم كملت روان:بخسرك روحك ياإيلاف وشوفي توا ردي عليه وستفزيه بكلمه بس قوليله انت مش راجل وجبان ومجرم واحد كلب وحقير كان مانقلبش عليك وفرغ الشكاره كلها مانكونش اني روان
ايلاف هزت راسها:لا مانقدرش وكان يديرنا حاجه ولا يجي للحوش
روان:انتي غبية وعلي نياتك مستحيل واحد جبان زيه يجي هني وعارف كان جي ح يكون اخر يوم في عمره لانه خوتي مستحيل يخلوه يطلع من شارعنا الا جثه
سكتت ايلاف ومدت يدها ، عطتها روان التلفون.
خدت ايلاف نفس كبير وهيا تزمط في ريقها وفتحت الخط ودارت مكبر الصوت..:الو
جاها صوته:ايلاف
حست ايلاف بصوته مش تمام بس لما شبحت لروان لشاورتها بيدها بمعني تكلمي تكلمت وقالت:خيرك شن تبي مني
سفيان نزلو دموعه ورجع حط راسه علي الدومان وقال:اني...
قصت ايلاف عليه وهيا اطلع في كل الغل اللي في قلبها تجاهه تشجعة وقعدت تتكلم ودموعها ينزلو:انت شن اه انت واحد كلب مجرم قاتل ، انت مش راجل مستحيل تنحسب من الرجاله لانك جبان هربت من العقاب لكن مستحيل تهرب من عقاب ربي لانه ماينسي حد ، تعرف كرهتك وكرهت صوتك وكل شي فيك كرهتك كره العمي انت لقتلت خوي كيف عندك حتي وجه تقابلني بيه كيف وانت قاتل خوي
وماعاش قدرت تدوي وهيا تبكي لين روان نزلو دموعها وهيا تشد في يدها وهيا تراجي في رد سفيان لبأكد كلامها.
بس نصدمت وهيا تزمط في ريقها وتهمس:ايلاف
حطت ايلاف يدها علي فمها وهيا قعده تبكي ومصدومه من صوت سفيان لقعد يبكي وبصوت عالي زادت قعدت تبكي معاه.
خدي سفيان نفس وقال:صح اني مش راجل صح عندك حق
وسكت وهوا يحاول يتمالك روحه وماعاش يبكي:اني مجرم وقاتل ، صح مقتلتش خوك لكن قتلت امي
وقعد يبكي ويكمل:قتلتلها امي ماتت وهيا تحسابني واحد مجرم ماتت قبل مانشوفها قبل ما نطلب رضها ونقولها سامحيني ونقولها اني مقتلتش حد يمه ره اني برئ ظلموني واني ظلمتها اه ياإيلاف اه ياريتني نموت ياريت نلحقها ونرتاح
__
خش فارس للحوش وهوا يسمع في عياط زيد اللي قالب بيه الحوش ، ضيق عيونه وصيح:دودة
وخش لدار المعيشه وين ماكان زيد مربوط واول ماشافه عيط:ناااادين
قرب من زيد اللي اول ماشاف بوه قعد ينادي فيه قرب منه فارس وفكه وهوا متعصب من نادين لنادي فيها:نااااادين وينك نكلم فيك
وخدي زيد في حضنه ومشي للمظبخ وهوا يكشخ:قداش مره نقولك ماعاش تربطي الول...
واول ماوصل للمظبخ سكت وقعد واقف مسموط وهوا يشوف فيها طايحه والزليز كله دم من راسها ، حس انه معاش فيه اكسوجين بكل وهوا يحط في زيد لوطه لخاف وقعد يبكي وفارس قرب طول منها وهوا ييقيم في راسها في حضنه ويحاول يفيقها:نادين فيقي نادين
دخل يده في شعرها وطلعها وهوا يشوف في الدم اللي قعد ينزل ، قامها في حضنه طول وهوا يرعش مع بعضه من الخوف عليها ، وطلعها من المظبخ واول مافتح باب الحوش شاف خالته ونهي خاشين من باب الجنان وخاش معاهم معاذ اللي قرب من فارس طول:شن صاير
خالته ناجيه:بسم الله خيرها لمراة
فارس طلع يجري وهوا يشبح لمعاذ:بالله خلينا نرفعوها للمستشفي ياخالي باللهي بسرعه دم هلبا
طلع معاذ سبق فارس وفتح سيارته وهوا يساعد في فارس يركب في نادين التالي وركب معاها وهوا يسند في راسها علي صدره اللي تلبز بدمها ، وطلعو للمستشفي
وطول الطريق وفارس يستعجل في خاله ويحاول يفيق نادين اللي ماتندري بشي
__
قعدت حنان تخبط علي رجلاها وهيا تشوف في ارضية المظبخ ملبزا بدم نادين:حي عليا حي حي عليا حي بنتي ياربي بنتي
درقت فرح راس زيد في حضنها لقعد يبكي وهوا ينادي:ماما نبي ماما
فاطمه:بري بيه لحوشنا يلعب مع عمر
فرح:قلبي بيقعد هني
فاطمه:غر بري لين يهداء بعدين جيبيه هوا وعمر
هزت فرح راسها ومشت وخلت ناجية تصبر في حنان:ستهدي بالله يامراة بأذن الله مافيها شي
فاطمه:بابا توا كيف لحق عليهم نتصل مايبيش يرد
حنان:زيدي عاوديله
ناجيه:خلي شوي تانيه بالك قعد موصلش فيهم
خشت فاطمه للمظبخ ولقت نهي كيف بتبداء تسيق فيه خشت وقعدت تغسل فيه هيا وياها
__
طلعت الممرضه من الغرفه واول ماشافها فارس جاها بسرعه:شن حالها
اللمرضه:كويسه ماتخافوش
فارس:تي كيف كويسه ونزحت من دمها
حط الحاج فتحي يده علي كتف فارس باش يهديه
الممرضه:هيا عندها سيوله هدا علاش نزفت هلبا وجرحها عميق شوي بس الحمد الله قدرنا نوقفو النزيف وخدينا منها دم نديرولها في تحليل باش نتأكدو ونظمنو عليها وكان تبي تقدر تخشلها تشوفها
ومشت الممرضه وخلت فارس والحاج فتحي يخشو لنادين ومعاذ قعد يستني برا.
خش فارس واول ماشافها راقده علي السرير وراسها لافين عليه الشاش لين حط يده علي قلبه اللي نخزه بالقوه بوجع عليها ، قرب منها وهوا يسمع في صوت الحاج فتحي: الحمدالله ربي ستر جت علي هكي
هز فارس راسه وقعد يشبحلها:روح انت ياعمي اني تو نقعد معاها منخلاها اليوم هني باش نتأكد مافيها شي
الحاج فتحي:اي احسن علي الاقل مابين طلعو التحليل لكن بتقعد هكي
شبح فارس لروحه:عادي
الحاج فتحي:علي راحتك
روح الحاج فتحي ومعاذ روح معاه وخلا سيارته لفارس اللي ماتحركش من جنب نادين بكل برغم كانت المرافقه ممنوعه بس من هني وهني قنعهم وقعد
فتحت نادين عيونها وهيا تقيم في يدها تمس في راسها بوجع وتحاول تقيم روحها وتشبح وين هيا واول ماولت الرؤي واضحه قدامها شبحت فارس اللي راقد علي الكرسي وقايم رجليه علي حاشية السرير ، شهقت وقالت:فارس
فتح فارس عيونه علي صوتها بخلعه:نعم
ووقف وهوا يمسح علي عيونه ويقرب منها:خيرك شن تبي تحسي في حاجه
رفعت يدها لتشرته:دم
شد فارس يدها:اهدي مش دمي هدا مافيا شي
شدت نادين راسها بالقوه:اه عطشانة نبي اميه
خدي فارس الشيشه وساعدها تشرب
نادين:خلاص
مسلها راسها وهوا يحوللها في شعرها التالي:شن تحسي في روحك توا
نادين:راسي بيتفجر حاساته شن صارلي والدم من لعليك
جبد فارس الكرسي وقعمز وهوا قعد شاد يدها:ارتاحي توا بعدين نهدرزو
قعدت نادين تشبحله وهيا ساكته شوي وبعدين قالت:كيف جبتني هني
فارس:باش يعني بكرطون
ضحكت نادين وهيا تتوجع من راسها:مش قادره نضحك والله
بتسم فارس:قمتك في غمري وقعدت نجري بيك لين وصلت هني لين قلبي وقف مرزنك الزح حتي بيقموك مني ماقدروكش
ضرباته نادين علي كتفه:هههه وااه مريضه ره قريب متت وترزيت فيا وانت تتسهوك
ضيق فارس عيونه وضغط علي يدها:بعيد السو فيا ان شاءالله شن موت ماموت
بتسمت نادين وهيا تشبح فوق:حمار هكي ح ترتاح مني وتجيب بنت خالتك برواق مافيش من يضايقك لا شي
وتلفتتله وبدت في حالتها النفسيه وقالت:فارس الله لا تسامحك تخليها تربي ولدنا ويناديها ماما وينساني خليه عند ماما تو هيا تربيه باهي
فارس:نادين بطلي
تنهدت وكملت:ومش تنساه وتلها بصغارك منها تعالا وطلعه وحكيله عليا حتي مشاكلنا عادي حكيهم.
قص عليها فارس وهوا يقرب منها وباسها علي خدها وبعد عليها وهوا يخلي وجهه قبال وجها:وانتي الله لا يسامحك كان تتزوجي من بعدي حي علي امك حي لما نخلي روحي تطلعلك وتهبلك
ضحكت نادين وهيا ترفع في يدها تمس في وجهه:شن حلال عليك وحرام عليا
قعد فارس يحرك في خشمه علي خشمها:ومن قالك حلال عليا
نادين ادنت وهيا فرحانه:تعالا ارقد جنبي
رفع فارس حاجبه:تحسابي روحك في تركيا امالا هني روحك ياعيل
تنهد نادين بغيظ:اطلع برا براا
ضحك فارس ودناها ورقد جنبها وحضنها ليه:اس ورقدي
ضحكت نادين ودخلت راسها في رقبته وهيا تشم في ريحته وتغمظ في عيونها.
__
شبح عبدالحكيم لروان لمقعمزة جنبه وتاكل من غير نيه:وين اختك
روان:مريضه
نجيه:شن مرضها كيف كان حالها باهي ولا نتكست مره تانيه
روان:احم هوا مش عارفه شن دراني اني قعدت ترجع شكلها محصله برده عطيتها مسكن رقدت عليه
خالد:خليتيلها تو تنوض جعانه
روان:اي خلتلها نمشي نشوفها
عبد الحكيم:كولي بعدين بريلها
قعمزت روان وهيا تاكل من غير نيه لين كملو ونهضت الصفره وغسلت لماعين بسرعه ومشتلها
فتحت الباب بشويه وقربت منها وهيا تسمع في صوت انين بكاها ، قعمزت روان علي حاشية السرير وشبحت قدامها:علي شن تبكي توا هي
نحت ايلاف اليرغان من علي وجها وقعمزت وهيا ترشف في دموعها لي مابطلوش نزول بكل وشبحت لروان:ماسمعتيشي كيف يبكي ماسمعتيش رده
زمطت روان ريقها ودكرت كلامه لخلاها ترجع تركز في يوم الحادت بس مش قادره تشبح شي غير السلاح لي في يد سفيان وقالت:اني نصدق عيوني بس ونعرف حاجه وحده انه خوي مات وتوا تحت التراب وبسببه هوا
ايلاف:اني ماعاش فاهمه شي خاطري نطلع ونسئل بابا حق حكالكم انه مش هوا لقتل خاطري نعرف نبي نتأكد
روان:انتي هبلتي وكان يقولك من قالك
ايلاف:عادي نقوله ، نقوله انه سمعت من الجيران عادي
روان:ايلاف قعمزي وركحي تو اني نحاول مع خالد ولا سراج ناخد منهم الزبده
وسكتت شوي وبعدين تلفتت لإيلاف:وبعدين حتي لو كلمتهم شن بنستفيدو
ايلاف:نبي نعرف انه حكالهم لما شدوه زي ماقالي ولا لا نبي نعرف بس كان قاللهم مرات حق مش هوا لقاتله
روان عيطت عليها:خيرك سادجه هكي خيرك لهدرجه حبه عمالك عيونك ونساك يالي من لحمك ودمك لهدرجه عندك عادي تكلمي الانسان اللي قتل خوك توأمك
هزة ايلاف راسها وتبي تتكلم وهيا توقف بركابها علي السرير بس روان وقفت ووقفتها بيدها:بجديات من ليبيا ياأتي الجديد من ليبيا ماتت لقلوب وولا الدم اميه خسارة فيك الاخوة
وطلعت روان وقربعت عليها الباب وخلتها تبكي وهيا مش قادره توقف من الهستيرية لجتها ومن الدوشه لي في عقلها انه تصدق عيونها ولا قلبها
__
ضحكت الممرضه وهيا تتكلم بتوشويش:محلاهم
ردت عليها الممرضه التانيه وهيا تشبحلهم:ياربي يرزقني بواحد زيه
رفعت الممرضه الاولي يداها:امين
فتح فارس عيونه من اصواتهم واول مافتحهم زين شبهم قدامه يضحكو تحشم وهوا يقيم في روحه بشويه ويشبح لنادين ، سخفاته انه بيخلعها قعد ينحي في ايده بشويه ويبي ينوض بس نادين زادت كبشت فيه لين ضحكو الممرضات اللي يمسحو في الارضيه قالت وحده منهم:خليكم خليكم حني طالعين اصلا
ولا وجه فارس يجيب في الوان الوان هههه وهوا ينفخ ويمسح في جبهته رد شبح لنادين لراقده بكل سلام ولا علي بالها حاجه بتسم ورجع اتكه جنبها وقرب بوجهه من وجها...
.
.
.
#يتبع_للبارت_لبعده
____________________________________
بداء كتابة الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25