أرييييييييد حقي
بقلم
طائر بلا تغريد
رؤى الجبوري
أوف يمه هاي شجاي يصير بلدنيه
شكو يمه
يمه شوف هاي الوادم شلون هدمو بيوتهه عليهم
عادي يمه تعودنه على الظيم
يلله اروح اني
ها يمه رايح البسطيتك
أي والله افتحهه والله كريم
ولو يوميه وهجولونه بس وياهه وياهه
من الله لا ينطيهم يمه شيردون منكم ناس تركظون على عيشتكم
لا تعيين عينوكم لا شغل لا عمل
حتى علبسطيات لاحگينكم من الله لا يرحمهم بجاه محمد وال محمد
أمين رب العالمين
يلله مع السلامه يمه
الله ومحمد وعلي وياك
آني محمد من سكنة بغداد خريج كلية نفط
طبعا ماكو تعيين
بعدني ممتزوج لان الحاله مو مال زواج
بعد ما أيست من التعيين اشتريت بسطيه وگعدت بيه ابيع ملاعيب مال أطفال
من هاي الحاجه بالف
يوميه اطلع من الصبح للعصر لو أحصل عشره لو ماكو
المهم الحمد لله
بس الي مظوجنه أهل البلديه كل يوم وشردونه من مكانه
نتوسل بيهم يمعودين وين نروح
يگولون أنتو متجاوزين على الشارع .
مره گتلهم احنه متجاوزين على الشارع وانتو متجاوزين على العراق
طبعا گلبو بسطيتي وطشرو غراظي
اليوم طلعت من الصبح على باب الله
فتحت البسطيه وصفطت ملاعيبي وگعدت اتنطر رزق الله
صارت الساعه عشره الضحى جان تجي سيارات البلديه وياهم شرطه
ماحسينه غير مطاوقينه وبدو يگلبون بلبسطيات
يمعودين غريضاتنه .دافعين بيهن فلوس خلونه نلمهن
ماكو كسروهن كلهن
تخبلنه آني وياي خمسه گاعدين
تكاونه ويه الشرطه
كلبشونه وصعدونه بلسياره
اخذونه للمركز
اسبوع احنه بلسجن
لا اكل لا شرب لحد ما طلعونه بكفاله
ابن عمي دفع كفالتي الي هيه مليونين هههه شفتو حتى اطلع من سجن قهري ادفع مليونين
وطبعا هاي المليونين صارت دين برگبتي لحد ما اسددهه
والله اعلم شوكت اگدر اسددهه بهذا الوضع الخربان
رجعت للبيت مو طايق روحي
تلگتني أمي بدموعه وفرحته الممزوجه بلتعب
بعد يومين طلعت ويه صديقي بلگهوه نكنك خلص اشتراكنه وماعدنه نجدد
فنطلع للگهوه
فتحت الفيس كله منشورات عن ثوره بيوم10/1
حسيت القدر راح ينصفني
تشجعت ويه صاحبي وتحظرنه لهذا اليوم
وفعلا بيومهه أخذت جنطتي وخليت بيهه خاولي وباكيت كلنس وكم قطعة غيار لأن قررت ما أرجع بعد للبيت لو استشهد لو نتصر
سلمت على أمي وطلبت منهه تدعيلنه وتوجهة ويه جماعتي الساحة التحرير
مضاهرتنه جانت سلميه
تنديداتنه وطلباتنه معروفه
أريد حقي
هناك شفت شباب الله وكيلكم اشكالهم غريبه
الشعر طويل وقصاته غريبه
لبسهم غريب اني جنت اظحك عليهم من يمرون من يمي من جنت بلبسطيه
نسميهم كيكيه جنه نگول لو وگفو بلشمس شويه يموعون
بس الضاهر المضاهر خداعه
لأن همه نفسهم اليوم وأگفين بلساحه ومتحملين الحر والعطش
ونوبه كملوهه علينه بلغاز المسيل
من يضربونه بوحده من القنابل جنه نخلي قميص كلنس أي شي على عيونه وخشمنه
حتى ما يأذينه بس مستحيل أكيد يدخل من مكان
والدي عيونه تحترك وتحومر من الغاز الي يسبب اله حرگه مو طبيعيهه
جان ويانه ولد اسمه طارق هذا هو وجماعته من الكيكيه
گعدنه وياهم الحقيقه گمت هواي احترمهم عكس غيرهم من الشخصيات المعروفه الي ضمت راسهه بلوحل
جان طارق يلعب بوبجي قبل لا يگطعون النت علينه اسمع حجيهم بللعب
گتله طارق شعجب تتحمل هذا الحر والخوف على شنو
متروح تگعد بيتكم وتلعبون شجابركم
باوعلي صفح وگلي
دخيل ربك تدري هاي اللعبه هيه الي قوت گلوبنه
تدري احنه لوما قهر العراق. ماجان صرنه بهلشكل
شلون بلله
شوف انه لو عندي شغله التهي بيهه لو عندي وضيفه لازم اگعد من الصبح علموده ماجان گضيت الليل كله على البوبجي
لكن ماعندي شي
اطلع للشارع انقهر من أشوف الشباب العطاله
وانقهر أكثر لو شفت شباب تشتغل
ارجع للبيت واطلع حرگتي بهاي اللعبه
والله عمي حقك وحجيك كله صحيح
اللعب عمي اللعب
تلعب وياي
هههه ليش لا خلينه نعتبره تمرين للقتال ههههههه
ههههه أي صح نتمرن ويه الزومبي
مرت كم يوم وانگطع النت
وصفينه لا أكل لا مي ممنوع علينه كلشي
تقدمنه على المنطقه الخضراء
وجان يطلعون علينه قوات مكافحة الشغب
مضاهرتنه سلميه ما خربنه ولا أذينه ولا كسرنه شي
بدت تصفيه من نوع أخر
واحنه واگفين قناص يلاحك واحد واحد
كأنما يعرفهم بلأسم
وأكف اني وطارق وباسم ومحمد وضياء وجبار وعلاء
متشابكين بلأيادي ونمشي ونهتف
أريد حقي
أريد اعيش
أريد احيا
أريد عيشه كريمه
ايد طارق بأيدي نرفعم سويه
ماحسيت غير طارق واگع وأيده مجلبه بأيدي
هزيته دنكت عليه ولك طارق شبيك
ماكو
شلت راسه واحس بحرارت ألدم نترست أيدي بدم طارق
جان حار كلش عكس شكل طارق البارد
خليته على گلبي وركظت بيه على الأسعاف
وأشوف الشباب هنا وهناك واگعين
والسيارت تنگل
ليش ماعرف
مجان عدنه سلاح
ولا جنه متهجمين على شخصيه
مجرد شعارات عاديه
نطالب بلحريه
نعيش مثل باقي الشباب ماعايشه
ننعم بثروات وطنه الي الله سبحانه وتعالى منعم علينه بيهه
بس الضاهر الفقير ميعيش ويه الناس المتخاف من الله
ولذالك قررنه ان منكون فقراء
قررنه منسكت عن الظلم ونصيح
أريييييييييييد حقي
أمشي وشايل طارق بين أديه واصيح
أررررررررييييييييددددددد حقي
