تأوهت بدلع خلتني احير المن اباوع والمن انتبه لصوتها الي غزى اسماعي لو عطرها الي توغل بانفاسي ..
لو لصوت قريب منها ...
_ مشاعر تأذيتي ؟ صارلج شي ؟
مشاعر مشاعر مشاعر ،،، اي هاي الي ادور عليها التفتت الها وركزت بيها ..
قبل يومين رجعت امي من حنة بت عمي ...
كعدت ع الكاع تعبانة وانه جنت مكابل الصوبة الجو بارد ..
كالت هاي شنو بت علوان الجبيرة شلون حلوة بس خشمها يابس وشايفة روحها ..
انتبهت عليها وتركت الي بيدي ..
كالت حتى اسمها مدري شونه ..
كتلها ليش هم اجو من بغداد ؟
كالت اي يمه اجو وسمعت عمك يطالب بالكاع مالته ...
هسه هاي شسمها بته والله اسم عجيب غريب ..
اجت اختي فاطمة كالت يمه اسمها مشاعر
اي اي مدري شونه من اسم ولج شفتي شعرها
لهنا وتأشر على فخذهه وعيونها وشعرها نفس اللون ..
اي يمه حتى لون بشرتها هم لايك ويه لون شعرهه
يابه غير تركص ركص خوش تهز ..
قابل مثلي ولا طكة ..
جاوبها اخوي حامد انجبي ولج تردين تركصين ؟
لا هيج جاي اشاقة شبيك
وجعي لاتكولين شبيك ،،، ولك علي احجيلك حجاية شوف اختك الحمارة شتحجي ؟
انه جنت سارح لبعيد وجاي اتخيل شكل مشاعر انرسم كبالي خو اسمها سمفونية ودخلت اذني واستمتعت بنغماتها ..
حسيت نفسي مخدر ومفصول عن العالم ..
يوم ثاني صادفت حنة ابن عمي كبلها حنة العروسة بت عمي سووها كبل العرس بيومين ووراها حنة العريس حتى الكل تحضر وتتونس انه جان شغلي الشاغل مشاعر بس ادور عليها اريد اشوفها واباوع بالوجوه واكول هسه تصير كبالي ... دخلت للمطبخ وبيدي كونية التمن وجان تصير وحدة كبالي وانضربت
ببطنها ورأسا صارت ع الحايط وصار صوت المها مسموع ولحكتها وحدة تكللها مشاعر خو ما تأذيتي ..
تصنمت بمكاني الكونية رغم ثكلها حسيتها ريشة وظليت اباوع ع اللوحة الفنية الي انرسمت كبالي بالحقيقة ..
كامت على حيلها ولازمة بطنها بألم وواجهتني
تصيح انت شبيك أعمى ماتشوف الي كدامك ؟
خزرتها خزرة قوية فتحت عيونها على وسعها
كمت وصفيت الكونية ع الحايط بعصبية ورجعت التفتت الها ..
عليمن هاي ولج ؟
