{الحب الاعمى} الجزء الاول منقولة

{ الحب الأعمي } الحلقه 22

يوسف: كيف مازالتي اتحبيني وانتي ازوجتي في يوم وليله الي يحب حد مايسيبش يا أميره ولا شن رايك انتي 
انا: انصدمت وحسيت كرعيا ثقلن والوطا معش شلتني
عرفتش شن اندير
وخرت من باب الفراندا وخشيت للحمام وسكرتا عليا
معش عرفت كلام الي سمعتا توا صاح وحقيقه ولا انا انتخيل فيه
واميره الي قال اسمها هيا نفسها بنت عمتا ولا تشابه اسماء
ويوسف يعامل فيا هكي لان يحب غيري ومش قادر ينسا
يعني انا وجودي في حياتا مالش اي معنا يعني انا عباره علي شنو انا ليش مجوزني ليش قعدا امعاه
مره وحده نزلن لدموع ونزلن سخنات ع خدي وكأن يعبراً ع نار الي في قلبي
رديت نبكي من جديد ورديت للدموع من جديد للدموع الالم والحزن الي كنت نسيتهن ليا كم يوم الي هجرني لهنا كم يوم بس ماحليش رايفت عليهن بيش يرداً عليا بيش نرقد الليل وانا الدمعا ع خدي  نرقد وانا متألما ومجروحا وخاطري وجعني من دنيا انوض ع نفس الالم وكسرا في قلب
وكأن الدموع مالهش مكان غير اعيوني
ليش الدمعا هيا الحاجه الوحيده الي تعشق اعيوني
ليش مش الفرح والامل والحلم مايحبنش اعيوني ليش الدموع بس وكأن مكانهن الوحيد هو عيني

بعد ماقلت خلاص حنحاول نحارب ع يوسف ونخليه يحبني ونكون جنبا ونعيش الحياه امعاه الحياه الي عجبتني الي حبيتها الي تريحت جنبا وبديت انتعلق بيه وبعائلتا بديت انحب كل شي فيه حتي غروره وكبريائه حتي كلاما الجارح ليا بديت انحبا
ليش لما قلبي بدأ بيحب وينفتح من جديد ولما الجروح والكسور الي فيا بدأن يبرن ونتريح منهن رداً من جديد ورداً اقوي من قبل أضعاف أضعاف
انحبا وحبيتا من اول ما خبطت فيه عجبني فيه شي جذبني له من تاني مره ثالث مره زاد اعجابي بيه
لما ازوجني فتت مرحلة الاعجاب وبديت انتعلق بيه من رغم قسوتا عليا وتو قعدت انحبا آها انحبا حبيتا وحبيت قسوتا ع حنيتا ع ضحكتا ونظراتا الي مرات انحسا يحبني فيهن
ليش ليش لما بديت انحب وبنعيش حياه سعيده قررت الدنيا انها تكسرني من جديد وكأن مش مكتوبلي نفرح
وكأن الحزن داير عقد امعايا مدا الحياه ولو فرحت اشويه ايذكرني ان هو رفيق الوحيد الي ليا وان الفرح مالش مكان في قلبي

اسمي حياه صاح واسمي معناه كبير ويجمع جميع صفات السمح في دنيا منها الفرح والامل وتفائل والحب والحنين  وكل شي حلو
لكن للاسف اسمي مرتبط بحزن في قلب ودموع في العين هذي هيا حياه هذي انا
حياه البنت الي الحظ مايحبهش

بكيت لعند عرفتا ابكا صبيت وانا الدنيا انحس فيها ثقيله عليا وشايلا حمل كبير وكل الكلام الي قلتا كان بيني وبين نفسي كان في قلبي وحبيت نحكيه بيش نفضفض ع روحي لان ماعنديش لمن نحكي
رايفت واحتجت لحظن ماما تمنيت لو اتكون عيشا نمشي انكلمها ونفضفض عندها
بس هيا وين وانا وين
هيا في دار الحق وانا في دار الباطل

صبيت غسلت وجهي 
وطلعت ع اساس كيف طالعا من حمام
وكان شعري مبلول ولبسا سروال امريكي  وكت لونا ابيض وعلية تيشرت ربع كم حمرا كتفها طايح وكتف لا