زوجوني ابن عمي

زوجوني ابن عمي 5

نظرة و نظرتين منك هبلتيني 😍😍😍
محمد : شاف أخته طالعة ، سعاد ما تطلعيش خليك هنا كم يوم .
سعاد : أحمد ... .
محمد : ما خلاش سعاد اتكمل ، أحمد يتكلم مع فتحي .
سعاد : حسيت بأنه في شيء ، و إنه خوتي مش على طبيعتهم .
أحمد : ما يصيرش منه الكلام هذا يا فتحي ، تعرف البيات بره الحوش ممنوع بس وافقت عشان خاطركم .
فتحي : يا أحمد أمس الليل سعاد تتكلم و هي راقدة و تبكي ، وقفزة خايفة ، و سألتها قالت حلم ، بس أنا متأكد في شيء .
أحمد : نسمع في فتحي و عقلي طار مني ، شن يللي درته في البنت ، معقولة أنا يوصل بيا كرهي للبنات إني اندمر سعاد !!!
آااااه يا ملاك شن درتي فيا .
فتحي : يا أحمد وين سارح ، إنت معايا ؟ بالله خليها تقعد عندنا حتى أنا نطمن ، لو روحت بها مش حنرتاح و هكي تتأكد شكوكي بوجود شيء بينكم .
أحمد : اه ، لا .. لا ، معاك .. معاك ، ... تقعد عندكم ؟ باهي لكن مش أكثر من يومين .
في طريق العمل أحمد كان سارح في كلام فتحي و حالة سعاد ، و خاف إنه سعاد تتكلم مع أهلها ع العيشة يللي معيشهلها .
أحمد : لو تتكلم سعاد مع أهلها شن بيقعد موقفي مع أولاد عمي و عمي ، لا .. لا ، سعاد ما اتقولش شيء ؛ ضربتها قبل و ما تكلمتش بتتكلم تو ؟
قعدت سعاد عند أهلها خطأ ، لا الخطأ هو يللي درته أنا ، سعاد صغيرة و ماليهاش ذنب في يللي صارلي مع ملاك ، استغفر الله العظيم ، هو أنا خايف سعاد تتكلم أو بديت نتعلق بها أو شنو ... أمس أول مرة ايطير النوم من عيني بعد عرسنا ...

بيب ..بييييييييييييييييب .. بييب 🚙 .

حسن : السلام عليكم .
محسن : و عليكم السلام .
حسن : يا محسن نتصل بكم ما حصلنا حد .
محسن : إن شاء الله خير ؟
حسن : الصبح أحمد دار حادث .
محسن : يا ساتر ، شن صار له و وين قاعد ؟
حسن : كسر في يده جت بسيطة ، الحمد لله .
محسن : الحمد لله على السلامة .
سعاد : الوالد جاه اتصال من عمي ، و عرفت في حد تعرض لحادث سيارة ، بعد كمل اتصاله عرفت إنه أحمد ، معاش شعرت بشيء إلا بأمي اترش في الماء على وجهي .
وعت سعاد تسأل على أحمد ، و دموع ، عرفت إنه ما فيه شيء و هنا أصرت ع المراوح .
فتحي و محمد عارضوا رجوعها للبيت يبوا يعرفوا إذا سعاد صاير معاها شيء .
سعاد : عييت من الانكار ، ونظرات فتحي و محمد المليانه بالشك في كلامي ، ما نقدرش نتكلم بنفتح عليهم و علي باب من المشاكل .
أحمد هذا نصيبي و مرات يتغير ، و أنا مشغولة عليه ، أكيد يتوجع تو .
أكيد مستغربين خوفي على أحمد ، 😅 أنا مش عارفه ليش .
محمد : وافقنا على مرواح سعاد ، و لو حسيت إنه صاير معاها شيء مش حتقعد عند أحمد .
محسن : الحمد لله على السلامة يا أحمد .
أحمد : الله ايسلمك يا عمي ، بارك الله فيك .
محسن : سعاد روحت بها ، خشت داخل .
أحمد : بعد قال عمي سعاد روحت ، حسيت إني بنطير من مكاني ، و سيبت الرجالة و خشيت للحوش و ركبت للشقة طول ، بس مالقيتهاش ، نزلت دورتها لقيتها في المطبخ اتجهز في القهوة ، و فوزية و فاطمة واقفات و يتغامزن .
سالمة : عرفتي الطريق 😒 المطبخ ايراجي فيك راجلك داير حادث و الناس طالعة خاشة ، و إنت عند أهلك مش هامك شيء ، إنت لا تجي كنة و لا ينعبى عليك .
سعاد : بعد وصلت تلقتني عزوزي بكلام يقهر ، حتى جلبابي ما حولته طول ع المطبخ ، فاطمة و فوزية فوق رأسي زي الشيطان الرجيم .
فاطمة : آنستي ، أنا عييت من الجري استلمي الراجل راجلك .
فوزية : مادام جيتي طيبي الغذاء ، ليك يومين متريحة ، يللي كيفك من أمس مروحه ، أحمد في المستشفى و إنت و لا على بالك .
حميدة : سمعت أمي و كلامها لسعاد 😢 ، و مشيت سلمت عليها و ساعدتها في المطبخ ، بس فوزية الله يهديها 😞 خبرت أمي ، و نسمعها اتنادي بصوت عالي و كأن في مصيبة صارت ... نعم
سالمة : حميدااااا حميداااا ، شن اديري في المطبخ مش عندك امتحان ، نلقاك في المطبخ أو اتساعدي في بنت ليلى اتشوفي مصيرك .
حميدة : شن هالقسوة هذه ، ليش هذا كله بشنو خير منها فاطمة ، تجري سعاد هنا و هنا ، من غير شقتها و راجلها ، يا أمي البنت حملتوها المسؤولية و هي صغيرة مش متعودة على الضغط يللي هي فيه .
سالمة : ما حد جبر بوها يعطيها ، كلام زايد ما نبيش ، و امشي لدارك ما نبيش انشوف وجهك 😡 .
أحمد : شديت سعاد من يدها مشيت بها للشقة ... .
.................
فوزية : ما صدقتي ركبتي معاش عرفتي الطريق ، على من عابية بيطيب الغذاء .
سعاد : مش مني من خوك ، و شن صارلك كان طيبتي الغذاء 😠 .
سالمة : سمعت بنت ليلى جيتها شديتها من شعرها ، من أمتى اتردي بنت ليلى و لا القعده عند أهلك قواتك .
أحمد :خديت شور و طلعت لقيت سعاد نازله و خلت ورقة مكتوب فيها الحمد لله ع السلامة .
😍 😍الورقة هذه احتفظت بها 😅 .
سعاد : عزوزي شدت شعري و اتصدع علي و أنا نبكي من الوجع فاطمة و فوزية يضحكن .
أحمد : نزلت نسمع في عياط ، جريت للمطبخ و ما تحملتش يللي شفته .
سعاد : خلصني أحمد من أمه و خداني في حضنه ، و أول مره نسمع أحمد ايدافع علي ، و يرفع صوته على أمه .
أحمد : خيرك معاها ؟ ضرب و عياط .
سالمة : شن عندها راكبه في جرتك و المفروض اطيب الغذاء ، و معاها اطول في لسانها على أختك و هي غلطانه .
أحمد : هذا كله عشان الغذاء ، سعاد أنا ركبتها للشقة ، و من اليوم و غادي ماليهاش علاقة بشيء غيري أنا و شقتنا .
أحمد مشي مع سعاد لشقتهم ، و سعاد مش عارفه كيف تستوعب يللي صار .
أحمد : ما قدرتش انشوف سعاد و هي مهانه و مكسورة بين ايدين أمي و مؤامرات فاطمة و فوزية ، تشجعت و أعتذرت من سعاد و بست جبينها ، و طلعت .
..................
سعاد : أحمد اليوم متغير 😄 ، بس ياريت ما رفعش صوته على أمه 😔 .
التهت العيلة في استقبال الضيوف ، و أحمد تغيرت اشوي معاملته مع سعاد ، وسيبت نومة الصالة و الكتابة على الورق ، ونبهها أحمد إنها ما تنزلش مهما ايصير .
أحمد : بعد حوالي أسبوع كانت عندي مراجعة و الحمد لله الأمور تمام أسبوع تقريباً ونفك الجبس ، و أنا امروح خطر على بالي نشري لسعاد حاجة ، زواجنا ليه شهر تقريباً وأسبوعين و لا مرة شريت ليها حاجة .
شريت 👗👠👝🌹🌺🌼🌸🌷🌸 قفطان وشنطه و كندره و باقة ورد لودرة حياتي .
سعاد : من أمس حاسه بوجع و اليوم بنتقطع .
أحمد : خشيت للشقة لقيت سعاد مريضة ، ورفضت تمشي للدكتور فأجبرتها .
الدكتور : مافيش شيء ايخوف إن شاء الله بس ادير التحاليل هذه ونطمنوا بعدها .
طلعت نتيجة التحليل و سعاد حامل 👶، و الدكتور طلب راحة تامة ، و خاصة إن بنيتها ضعيفة .
أحمد : 😂 ما عرفتش انعبر عن فرحتي بس ضحكت ، و سعاد ما شفتش علامات الفرح عليها بس ابتسامة .
سعاد : تغلب الخوف ع الفرح ، للحظة حسيت إني مسؤولة على روح ، وانتهت طفولتي بكل جوانبها ، فابتسمت لفرح أحمد ، و خوفي كان من إنه يتغير و من عيالي ، كيف بنربي طفل بينهم و هم كارهيني بيتقبلوا طفلي 😞 .
أحمد اتصل بأهلي خبرهم و خبر أهله ، و جاب كيكة و عصير و شكلاطة ، 😊 انحب انشوف أحمد فرحان ، و الأصح حبيت أحمد الجديد على الرغم من خوفي منه .
فاطمة : سعاد شهر و نص ليها حامل ، 😭 و أنا ليش محرومة ، يااااااربي 😭
فوزية : هذا ما مازال شن بيطلعها هذه تو ، كيف ما خطبوا لفتحي بنت خالته و سيبوني ما انخللي بنتهم تتهنى .
أحمد : بعد التحاليل و الأخبار السمحة يللي سمعتها قدمت هديتي لسعاد مصدر سعادتي 😍 .
سعاد إنت مطلوب منك راحة تامة يعني معاش اديري شيء ، و تو نتكلم مع حميدة اتجي ادير يللي تبيه ، وخديجة أختك أكيد مش حتسيبك .
سعاد : أنا كيف بيمشي اليوم من غير ما اندير شيء بنمل هكي .
أحمد : أنا نبهتك و ما نبيش انعاود كلامي 😊 .
سعاد : هدية أحمد ما كانتش بس مجرد هدية بالنسبة ليا ، لكن عبرت عن حاجات واجد غيرت حياتي مع أحمد نبض القلب 💗
حميدة : قسمت أنا وخديجة الأيام لزيارة سعاد و تلبية حاجاتها ، هي خشت للشهر الثاني ، و كنت راكبه لشقة أحمد بس فوزية وقفتني ، و طلبت تمشي مكاني ، فتحت فمي و استغربت ، و أنا رفضت بس هي أصرت .
فاطمة : ركبت مع الدروج و درت روحي طحت 😈 و قعدت انعيط ، طلعت سعاد و وراها فوزية .
فوزية : سعاد صوت عياط في دروجك .
سعاد : فوزية متغيرة معاملتها اليوم ، و سمعنا العياط طلعنا ، بس صار يللي مش في الحسبان .