الحلقة 2
كيف أحيا معك!
منقوله من صفحة رواياتنا
.
.
نضت تاني يوم الصبح الساعة 8 خشيت دوشت ولبست و أني طالعة من الدوش لقيت عماد نايض قعد يشوفلي وساكت
أريج : صباح الخير
عماد: صباح النور
أريج: شن اتحب تشرب ع الصبح؟
عماد: قهوة
خشيت المطبخ قعدت اندور ع سكر مالقيتاش نسمع في عماد قعمز ع الصالون وفتح التلفزيون
أريج : عماد
عماد: نعم!
أريج : بندير قهوة مالقيتش سكر
عماد: زيدي دوري أكيد في
أريج : لا متأكده مافيش دورت زين
.
.
نضت معاها وقعدت ندور طلع صح مافيش
عماد: فوتيها القهوة ديريلنا الفطور جيعااان
أريج : حاضر
.
.
طلع وخلاني وتيت حاجات خفيفه من التلاجه لأن مالقيتش حتى ولاعة وحطيته في سفرة ورفعته وقعمزنا نفطروا قعدنا ناكلو وإحني ساكتين
.
عماد: بعد نفطروا وتي روحك بنمشوا لحوش هلي
أريج: باهي
عماد: لو سألوك عن أي شي صار بيناتنا مافيش داعي اتقوليلهم أنك قاعدة بنت
أريج: . . .
.
.
ههههههه تحشمت وقعد وجهها أحمررر وناضت من عالسفرة وخشت جري للدار قعدت نستنى فيها عطلت قريب ساعة وماطلعتش استغربت قلت خل نشوفها مشيت انطقطق عالباب فتحلتلي حليت فمي فيها أول مرة نشوفها بالمكياج كانت ساحرة وطالقه شعرها طالعة حلوة
عماد: نحسابك مابدلتيش استغربت ليش عطلتي
أريج: قعدت انجهز في روحي ع خاطر بنمشو لأهلك
عماد: باهي خل بنغير عالسريع و بنطلعوا
.
.
رفعت سفرة الفطور و لبست عبايتي بعدها هو طلع لابس عربي طالع عليه مع ملامحه الجدية ايهبل شكلي طحت فيه هههههه
عماد : نمشوا؟
أريج : هيا
.
.
طول الطريق قعدنا ساكتين لين وصلنا لحوشهم و نزلنا و طبعا عماد عنده المفتاح فتح الباب وخشينا لاقتنا أمه وسلمت ع عماد واضبطاته
أم عماد: اهلا اهلا ياعريس مبروك عليك و ان شألله بطولت عمرك
عماد : الله يبارك فيك وين البنات مهناك حد ولا شن ؟
أم عماد: قاعدات راقدات تو انوضهم مانحسابك بتجي البارح قعدنا انراجو فيك وماجيتش
أريج :كيف حالك ياعمتي
أم عماد حطت يدها ع قلبها وسلمت
أم عماد: هييييي سامحيني يابنيتي والله وقت شفت عماد نسيتك قاعدة مش متعوده هههه مبارك عليكم وربي يهنيكم يارب
أريج: لا عادي . . يبارك فيك يارب
أم عماد: خشو خشو شن بتقعدوا عالباب هكي
عماد: يمى أني بنطلع توا عندي مشوار مهم وبنجي عالغدي
أم عماد: تو خواتك بيحرجن جيت وماسلمت عليهم
عماد: عادي أهو احداكم أريج هدرزوا ع راحتكم واني جاي بعدين
أم عماد: باهي بالسلامة ربي يفتحها في وجهك يارب
.
.
طلع عماد وخلاني أني معاه وانحس في روحي غريبه يابال مع هله بس عادي حياة جديده وعيله جديده لازم نكسبهم و نتعرف عليهم
أم عماد: وين سرحتي يابنتي خشي خشي الحوش حوشك راك قعدتي من العيله مانك برانية
أريج : ان شألله
أم عماد: تعالي جاي قوليلي شن تهنيتوا ولا لأ؟
أريج تحشمت وانصدمت من جرأة عزوزها: إي إي الحمدلله
أم عماد : روروروروروروي
.
.
واني بنركب في السيارة نسمع في زغاريط أمي عرفت ان أريج دارت زي ماقلتلها هههه
.
.
سلمى: يمى شن في؟ عمدة جي ولا شن؟
أم عماد: نوضي خواتك وتعالن العروس عندنا
سلمى : حي حقا جايين دقيقه بس
.
.
سلمى: ريما ، أحلام . . نووضن نوضن
ريما: خير دعوتك ماتخليش واحد يرقد
سلمى: حشم حالكن العروس نايضه قبلكن وجاية وانتن قاعدات في فراشاتكن
أحلام: حي الساعة كم؟
سلمى: 10 و نص هيا خل بنشوفو الكنة
ريما: ان شألله طرف بس وطالعه ع عمدة كان طلعت شينة ننتحر ههههه
و ناضن البنات وطلعوا سلموا علي أريج وعجبهم شكلها لأنها حلوة
.
.
سلمى: شن رايك في خوي والله عمدة ينحب وايخش القلب
أحلام: شكارة العروس ههههه ماتصدقيش يا أريج
سلمى : اص أص عمده مافيش منه غير انتم ع راس بعض ديما زي القطوس والفار
أريج: هههههه أحلام انتي كم عمرك ؟
الغرض من سؤال أريج كان انها تعرف عمر عماد
أحلام: 26 سنة وأني الكبيرة ف العيلة وبعدي طول عماد
و هكي قعدوا يهدرزو و يتعرفوا ع بعض وبعد ساعة
أم عماد: ان شألله قاعدات لا توا اتهدرزن نوضن ركبن الغذي
سلمى: مادخليش اني اليوم علي ريما مش عليا
أم عماد: مافيها شي كان نضتن ساعدتنها ودرتن حاجة حاره مع الغذي
أحلام: تو انوض يمى مالقيتي من اتحيري كان سلمى البايرة ههههه
سلمى: بايرة في عينك ولا غير اتوري ف فلاحتك قدام العروس هههههه
أم عماد: تي وقت تحركن بلا دوة فاضية أني خل بنمشي لحوش عمك بيش نقولولهم بعد الغذي ايجو ايهدرزوا
سلمى: يمى راهو احني في القرن ال 21 يعني تو نتصل بيهم
أم عماد: لا نبي حتى سميرة)مرت عمهم( شوي بنهدرز عليها
.
.
وطلعت أمهم وخشن أحلام وريما يديروا في الغذي وسلمى مع أريج في الصالة ايهدرزن
أريج : هههههه والله ياسلمى انتي مش عادية
سلمى: عادي عادي ناخذو في خبره منك هههههههه وانتي يا متحشمة ياماتبيش تحكي :-P
بعدها وتو الغذي وتغذوا أريج انسجمت معاهم وبعد الغذي جو حوش عم عماد خشت سميرة وبناتها الأتنين صفاء ومروة وسلمن ع أريج وباركلها وبعد شوي عماد خش من المربوعة للحوش خطم من قدام الصالة لمحاته سميرة
سميرة: عماد تعال تعال خل نباركولك
عماد: اوووه انتم هنا مرحبتين شن اخباركم ؟
سميرة: الحمدلله الأخبار عندك ياعريس مبروك عليك وربي يهنيكم
عماد: الله يبارك فيك عقبال نشوفوا الأفراح عندكم
سميرة: ان شألله يسمع منك ربي هالأولاد الي عندي مايسمعو علي مازنيت فوق راسهم
عماد: غير ماتنقيش واجد النق ديما مش باهي صفصوف كيف حالك يابنت وشن جو قرايتك ؟
صفاء: بخير . . معاش اذكرني بيها والله طايرتلي منها
عماد:هههه من يومك ما اتحبيها
مروة: ياهوو نحن هنا . . مبروك ياعريس
عماد: يبارك فيك هههه ماشفتكش راهو صفصف امغطية وجودك :-P
.
.
شن هذا يغازل في بنت عمه قدامي ولا شن؟؟ ومش متحشم فيها اففف اني شن انفكر بنت عمه كان يبيها أهي قدامه
. .
. .
شفت في أريج لقيت ملامحها تغيرت وشكلها اضايقت أني صح مغصوب عليها وما نحبهاش لكن مانبيش نحرجها و نجرحها هي ماليهاش ذنب
.
.
عماد: لكن صفاء ماتصدقيش واجد هههه العروس مغطية وجودكم كلكم ;-)
أريج ابتسمت
مروة: إيه ماشألله عليها ربي يحفظها وخلاص
أحلام: يمى ولدك انساك من تو وعقله خذاته العروس
أم عماد " طرمت شويرباتها " : ربي يهنيهم
عماد+ البنات: ههههههههههه
يتبع . . .
