انا اميرة حكايتي بدات كي كان في عمري 22 سنة انا كنت الطفلة الوحيدة عن والديا بخلاف خويا رياض اللي كثر مني ب 5 سنين .. كانت الحالة المادية تاع أهلي الحمد لله مرفهين
خويا كان حاب يكمل قرايتو برا البلاد و الحمد لله حقق حلمو و خرج قرا في لندن .. اما انا كنت حابة نخدم في مجال القضاء (كاين خلل في القضاء 😂😂) وكتبلي ربيو وليت نقرا في كلية الحقوق مي كانت الكلية في ولاية خلاف الولاية اللي نسكن فيها وانا كنت نخاف نبقى في الاقامة من الاقوال تاع السحر و الحكايات هذوك
كريت دار صغيرة في عمارة و كانت قريبة من وين نقرا و مع الايام كملت قرايتي و فتحت مكتب باه نبدا نخدم
كانو والديا يجو يزوروني كل شهر و يقعدو عندي مدة و يروحو على جال الخدمة تاع بابا
جازو ليام و انا مع القراية و الخدمة مكنتش نصاحب بنات بزاف .. قلت نتعرف على جيراني باش مانقعدش وحدي .. و كيما كان الحال تعرفت على جارتي اللي اونفاص ليا كانت مام هي صغيرة و مزوجة عن جديد كانت ناس ملاح و كي طيب كاش حاجة تبعثلي و حتى انا نبعثلها ولات هي صحبتي
وحد النهار جيت داخلة العمارة تلاقيت وحد العجوزة رافدة القضيان قلت خلي نساعدها ندي فيها اجر .. رحت ليها
أميرة: طاطا خليني نرفد معاك القضيان
👵🏻: كثر خيرك بنتي
وراكي تعرفوا دعوات العجايز ربي يخليهم
أميرة: وين تسكني
👵🏻: دوزيام ايطاج على لادروات
أميرة: ايه يعني فوق داري ايكزاكت
المهم وصلنا وحلفت ندخل و نشرب معاها قهوة .. دخلت قعدت كانت دارها شابة و مسقمة تدي العقل 🤩
حكينا شوي وقتلها بلي انا ساكنة وحدي .. و حكاتلي هي شوي على روحها و الله عجوزة تهبل
المهم هبطت لداري و وليت انا و العجوزة رفقة 😁 تجي تقعد عند و نروح عندها
جازو ليامات حتان وحد النهار قاعدة نجهز في العشاء حتى نشوف فار 🐀 وليت نعيط خفت خرجت نجري بلخف على سميحة (جارتي لي مقابلتني) تفكرت بلي خرجت تتعشا مع راجلها وليت نندب في سعدي تفكرت طاطا مليكة 👵🏻 جريت ندقدق فتح عليا وحد الجون طويل و اسمر وعينيه عسلي 😍 ومن وراه طاطا دزيتو و دخلت عند طاطا نبكي
أميرة تحكي مع روحها : " الله غالب صح زودتها شوي مي كانت عندي فوبيا من الفيران 🐀 مرة عضني قعدت شهر و انا ندير في الابرة 💉 "
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
