واقفة في المطبخ، وبتغسل الأطباق، وبتفرغ فيها الأصناف المعلبة..
بتبص وراها، لقت الفار بياكل الجبنة اللي في الطبق اللي على الكوانتر..
بدأت تصرخ وتنادي على جوزها.. وهي بتجري عليها تضربه
_ يا سامح .. فار .. فار .. الفار يا سامح..
مسكت الفار من ديله، بتسحبه بعيد من الطبق، ولف عليها الفار وبكل قوة عض إيدها، وجري منها..
بدأت تصرخ .. آآآآآآآآآآآآآآآآآآآآآآآآآآآآآآآآآآآآآآآآآآآآآآء
سامح جالها بيجري، لابس النضارة الكبيرة، ووقف لها من بعيد يبص عليها، وماسك منفضة السجاد.. وشكله كان خايف، رجله واقفة برة، وجسمه داخل جوة بيحاول يسلمها المنفضة..
_ خدي اضربيه .. خدي اضربيه..
مش قاردة تتكلم من الألم، بتصرخ ..
بتبص في إيدها اللي كانت بتنزف دم جامد..
_ دم يا سامح دم .. دم..
_ خدي اضربي الفار بالمنفضة .. خليه يجري..
_ الفار عضني يا سامح .. عضني يا سااااااامح..
سامح بيظبط نضارته وبيضغط عينه وبيحاول يشوف ايدها من مكانه، خايف يتقدم خطوة..
_ عضك ازاي؟ اطلعي من عندك طيب .. تعالي هنا..
_ مش قادرة اتحرك .. مش قادرة اتحرك..
ايه الخوف ده؟ هو سامح مش بيتحرك من مكانه ليه؟ للدرجة دي خايف من الفار؟ للدرجة دي مش قادر يدخل يسند مراته ويطلعها برة المطبخ..
_ تعالي يا غادة قبل ما يظهر لك تاني..
غادة لفت بجسمها، وفتحت الحنفية، وبدأت تغسل ايدها من الدم، بس النزيف مش راضي يوقف، بتبص حواليها مش لاقية حاجة توقف بيها النزيف ده..
شافت إزازة كلوركس مطهر الأرضيات، فتحتها وبدأت تضمد بيها إيديها..
سامح واقف من بعيد يبص عليها..
_ ايه اللي بتعمليه ده يا غادة؟
_ بحاول أكويها بأي حاجة، علشان الجرح ده يقفل..
_ هجيب لك فوطة تنشفي بيها، علشان الدم مينزلش على الأكل..
_ أكل ايه؟
_ الأكل اللي هنتعشى بيها يا غادة..
غادة هتنفجر من الغيظ، بتضغط على أسنانها، مستغربة من اللوح اللي عايشة معاها ده، مش شايل هم حاجة غير العشا، مش خايف على إيديها اللي اتعورت، وخايف من العشا ليبوظ..
_ أنا مش هحضر عشا يا سامح، وتنزل دلوقتي الصيدلية تحكي للدكتور اللي حصل، يمكن تكون العضة محتاجة مضاد حيوي.
_ مضاد حيوي ايه بس يا غادة؟ دي عضة فار مش كلب، الفار الناس بتطبخه وتعمل عليه ملوخية برة.
_ يااااااااااربي .. ياربي .. هتموتني ناقصة عمر .
غادة خرجت من المطبخ بتندب حظها، وبتصرخ في وش سامح..
_ البخل ده هيموتني .. هيموتني .. مش كفاية قلت لك اتصل بشركة المكافحة تيجي ترش الشقة، قلت لي الشقة مفيهاش حشرات، وانك هترشها بنفسك.. روح هات لي حاجة من الصيدلية، مش مستحملة الألم..
_ هتدفعي انتي حساب المضاد..
وش غادة اتغير، وشكلها باين عليها الغيظ، وعينها بدأت تدمع..
_ وانا هجيب منين يا سامح؟ هجيب منين؟ حرام عليك يا بني آدم، حرام عليك..
_ طيب هاتي نتعشى الأول..
_ أوووووووووووووووف .. انت ايه؟ ايه؟ حرام عليك؟ حس بيا شوية، ولا أروح أخبط على مدام رغدة جارتنا أستلف منها فلوس واخليها تجيب لي علاج.
سامح عقد حواجبه، وخرج من الشقة يرطن بكلام مش مفهوم..
********** #سيد_داود_المطعني ************
في الصيدلية، سامح بيعد الفلوس اللي في جيبه، وبيحكي للدكتور اللي حصل، والدكتور قال له العضة دي عايزة حقن مضاد لمدة تلات أيام..
_ تلات أيام ايه يا دكتور، دي عضة صغيرة مفيهاش حاجة، هات لي حقنة واحدة وسرنجة وخلاص.
_ حقنة واحدة ايه؟ عضة الفار مش ساهلة خالص.
_ معلش يا دكتور هات لي حقنة واحدة.
الدكتور طلع حقنة، وسرنجة وقدمهم له.
_ سعرها كام دي يا دكتور.
_ خمسة وخمسين جنيه.
_ خمسة وخمسين جنيه ليه؟ دي حقنة مش روشتة عمليات، شوف لنا حاجة مضاد رخيصة.
_ يعني ايه رخيصة؟
_ عندك ايموكس؟
_ اه عندي ايموكس.
_ هات حقنة ايموكس هي بتخف عليه..
_ هو ايه اللي بتخف عليه..
_ يووووووووه .. انت هترغي معايا يا دكتور
مشى سامح من الصيدلية، وراح صيدلية غيرها، بس المرة دي محكاش عن الفار، وطلب حقنة ايموكس وسرنجة..
دفع عشرة جنيه، وأخد الباقي ورجع شقته..
***** #سيد_داود_المطعني*********
