عشق في بلاد حروبها لا تنتهى 2 (طرابلس ياغارقة في الدم)

البارت 12

_
_
#عشق_في_بلاد_حروبها_لا_تنتهي
#طرابلس_ياغارقة_في_الدم
الحلقة 12
.
.
في الحلقة االسابقة
تحشمت رنيم وبتسمت:اني خلاص بنمشي
رعد:مزال
رنيم:هوا هدا شبحتني وشبحتك شن مزال تاني
رعد:اروح بيك عندي
رنيم:هههه احلف
رعد:انم نبي نتزوجك
رنيم ضحكت:هههه واني مانبيش
رعد:ومن طلب رايك انتي
ضيقت رنيم عيونها:باي اني ماشيه
ضحك رعد:هههه باهي خلاص بري هي
بتسمت رنيم وهيا تشبح لرعد لنزل التليفون وهوا يشبحلها ويبتسملها ، زادت ابتسامتها وتلفتت وهيا تشبح لنور لمضيقه عيونها:نتفاهم معاك في الحوش يا فانص
ضيقتلها رنيم عيونها ومشت سبقتها وخلتها تتلفت لرعد وهيا تبعتله في نظرات تهديد لين رعد عوج فمه وقال:خيرها هدي ...

قراءة ممتعة
#البارت_التاني_عشر

يغنولك يابلادي بالفرحة وكأنهم مايعرفوها ضايعة منك ، يباركولك بنتصار علي طاغي مايحسابو طلعو طغيان اكتر منه ، يهنو فيك وانتي ماتبيلهم هني غير يهنوك علي روحهم 🥀
.
.
.
مبروك عليكي يابلادي ، ومبروك علينا ، مبروك علينا فرحة الانتصار الليلة .
والله تهنينة وفرحنة ، وليكي غنينة ، ويامحلي فرحة ستنينا نعيشوها من يوم وغادي .
في كل مكان نشوفوها ، الفرحة من القلب نحسوها ، وان شاءالله ديما مقيومه بولاد بلادي .
.
.
درس محمد سيارته علي الرئيسي بعيد بمسافة بعيده من ميدان الشهداء (الساحة الخضرة سابقا) من زحمة الناس وزحمة السيارات ونزل وهوا يشبح في كمية الناس وكأنه الليبيين كلهم طالعين من حياشهم ، قص الطريق وهوا يشبح في احتفالات طرابلس لأول مرة بعد التحرير ولكمية الناس لشاده العلم في يدها وكل مايقرب وكل ماصوت الاغنية يعلا وصوت الناس يغنو معاها بفرح وبأمل .
.
.
الله وأكبر علي ولادك ، كانو في الميعاد رجالك ، هضوم هما ابطالك جابو انتصارك .
تعيشي وتفتخري بمجادك ، باللي علو اليوم راياتك ، علوها وخلو أفراحك لسماء مرفوعة.
مبروك عليكي يابلادي ، ومبروك علينا ، مبروك علينا فرحة الإنتصار الليلة .
.
.
وقفت رنا من جنب حناها لمعليا التلفزيون علي قوته وتتفرج علي الإحتفالات وخشت للمطبخ وهيا تفتح في تليفونها وطلع في رقم محمد وهيا تبتسم ، خدت نفس كبير وهيا ترجع في شعرها الطويل التالي وتصلت وقعد ينادي ينادي ينادي لين تسكر ، نفخت بغل وتمتمت:زعما ميردش علي الارقام الغريبة واااك يارنا وااك من حظك لمزفت
حطت تليفونها في جيبها وطلعت جنب حناها لتلفتتلها وقالت:ماشاءالله علي لحتفالات كان عمك عبد الفتاح هني ره طلعنا
رنا:اي اشبح امتي بروحو عمي جمال زي قلته هوا وولده النتاية
سعيدة خبطتها بيدها علي ضهرها لين رنا قعدت تكح وعيطت:اااه ياحناي خيرك
سعيدة:عيب عليك تدوي علي عمك هكي من شايلنا اني وياك وخوك غير عمامك
رنا:اني ماقلت شي لكن الحق ينقال كله علي عمي عبدالفتاح يرفع ويجيب ويحسب فينا حتي مرت عمي تحبنا في كل شي تحسب فيا اني وجلال مش عمي جمال واه مافالح غير يتكلم ويقول نبي رنا لمنذر والله لو كان اخر واحد ما واخداته
سعيدة:اااه من السان النتايات تو نشوفوك غدوة من بيرفعك للجامعة اهو وسيارتك قعده في الورشه ولا ماطايحه غير في ولد عميمك
مدت رنا شفايفها:مانبيش ماشيه لين تتصلح سيارتي بري هي
شدت سعيده راسها:اسكتي اسكتي رقيتيلي ضغطي نحس في راسي ينمل يابنت
رنا سحبت صونية السمينسه من يد حناها وقالت:لا وراسك ياحناي مامني الضغط رقي من السمينسه والسبول لمبكري وانتي تزرطي فيهم
ونفخت وهيا تقيم في السمينسه والسبول ومشت للمظبخ...
__
سكر خشمه من جيها وطبس لحاشية الطاولة وشم بجيها التانيه بودرة الكوكاين وهوا يحس في روحه بكح من أثر البودرة او الغبرة متعها ، رفع راسه وهوا يمسح في خشمه ويكح مع بتسامت نشوه ورياحه ، اتكه علي كرسي مكتبه ورجع راسه التالي وهوا يغمط في عيونه و يبتسم ويستنشق في الهواء باالقوة.
انفتح الباب وخش الصقر وهوا يتكلم:آسامة اسمع ظروري نبعتو واحد يتبع الشرق.....
وسكت وهوا يضيق في عيونه ويشبح لآسامة اللي قعد مافتحش عيونه ولا دار اي ردت فعل لين خلا الصقر يقرب من طاولة المكتب وطقطق بيده عليها وقال:هي آسامة شن راقد
فتح آسامة عيونه وشبح لصقر:هااا نسمع فيك نعم ياصقورة
قعمز الصقر وهوا يتنهد:نبي واحد يراقب محمد نبو نعرفو وين يسكن
آسامة:علاش بتاخد شقه جنبه
الصقر:اي مستاحش زوله تي خيرك ركز معاي قال يسكن في شقه عطهاله السيفاو وهوا يسكن معاه في نفس العمارة ، لازم نعرفو وين يسكن باش نمشو نقبضو علي السيفاو وخوته
آسامة ساوة تقعميزته:علاش جو التتبيع والمراقبه قوله وين تسكن مش يخدم معانا علاش خايف منه انت
الصقر رفع حواجبه:اني نخاف من واحد شلتت زي هدا تي مايعرف راسه من رجليه خاشلي في جونا من يومين ومداير فيها عبقري زمانه قالي مازال مانهدوش عليه لين يجتمع مع خوته
آسامة:وكلامه مزبوط
الصقر:تي اما مزبوط كان لقيناه وين يسكن نقدرو نجيبوه هوا وخوته وبوه لو كان ناخدو امه ولا كان عنده خوات بنات رهاين عندنا
قام آسامة كتافه وتنهد:مانعرفش اني نحس في كلامه صح لكن ماتقدرش تتحرك الا بموافقة الافندي حامد
مسح الصقر علي وجهه بأعصاب وقال:تي مانعرفش امتي بيموت هالحامد النم
آسامة رجع أتكه علي كرسيه وقال:فيه دفعة مدربه اليوم جتنا شوف واحد منهم يراقبه
الصقر:تي لالا نبي واحد تقه وخبرة اني
سكت آسامة شوي وبعدها شبح لصقر:اي نعرف هداكا اللي جابنا مكان السيفاو مرة ، لكن ماليشي هلبا بادي يخدم معانا ومانعرفش عليه شي
الصقر:تمام نبيه مدام عرف مكان السيفاو يقدر يلقا مكان الشرقاوي بسهولة
آسامة:اسمه زياد غدوة نتفقو معاه
الصقر:تمام
.
__
طفت نادين علي الشاهي وهيا تصب في الطاوسي الشاهي:ارفعي انتي واني نضم الكوجينه
فرح:باهي لكن الشمع دابو خلاص
نادين:وين فاطمه تمشي تجيب شمع من حوشنا
فرح:تو نقولها
مشت فرح ونادين قعدت اضم في المظبخ
حست بخطوات من جيهة باب المظبخ لمخلياته مردود ، مسحت يداها من لمية وقربت وهيا تفتح في الباب بشويه وتكبه ، شافت فارس لمقعمز بروحه وهوا مرجع راسه التالي وباين عليه يفكر ، تنهدت نادين وتكت براسها علي الباب وهيا تفكر ، ياناري قداش بيتحمل لا بيتحمل قعدته بروحه ولا مصيبة خوه ولا امه لمريضه ربي يكون في عونك يانبض قلبي كل يوم ندعيلك والله .
سكرت الباب بشوية لكن فارس حس بيه وتلفت طول وهوا يساوي في تقعميزته ظن انه نهي جت بس لما ماشبح حد تنهد وهوا يطلع في تليفونه ويتصل بيها بس للاسف ممكن هدي المكالمة المية اللي من غير رد منها ، ماعنداش اي فكرة علاش ماعاش ردت عليه ممكن لاهيه او لانه توا هيا امتحانات لكن امس شافها جت وقعد يستني فاها تطلعله بس ماطلعتش ولا ردت علي مكالماته ، تنهد بالقوة وهوا يرجع يتكه علي الكرسي وقال في داخله ، واللهي محتاجلك يانهي محتاجك جنبي تخففي عليا الكارته لأني فيها وينك وينك ياقلبي مش المفروض جنبي توا مش قلتيلي اني مستحيل نسيبك واني معاك علي المرة والحلوة ، لقيتك في الحلوة لكن وينك في المرة وينك 💔
.
.
__
كانو رعد ورائد مقعمزين فوق سطح العمارة وكل واحد سارح في حاجه ، بعد فترة صمت طويل تلفت رائد وهوا يرفع في حاجبه وشبح لرعد السارح:وطورت يامافيا وصار منك وين كلامك وين الطروح لكنت ادير فيهم هههههه والبنات دوتهم فاضيه وطريقهم طويلة وماعنديش خلوك وتوا ماشاءالله بديت تحب الدوة وعندك خلوك هههه
شبحله رعد علي الجنب:خاطرك في دعكه
انفخ رائد وهوا يبتسم:اما اختها تي جلطه ياراجل
عيط رعد وهوا يرفع في راسه ويشبح لرائد لضحك :نفختلي راسي انم بيها نوض من جنبي ال....
رائد:تي خير فيتك غر كلمها قولها خوي يبي أختك
رعد:تي نوض ياولد الكلب نوض البنت من الخوف منك لين بدت تهستر امبكري
رائد:وانت الصادق خافت منا الزوز تي غر اتصل وراسي
رعد:نوض خير مانحولهولك راسك انعي نوض من جنبي
رائد:مانبيش
فنص رعد ووقف وهوا يبي يهجم علي رائد اللي وقف وقال:خش عناد هي
رعد زاد قرب:تمام وربي تهزمني لما نتصل بيها تو وقدامك
رائد قرب وحط جبهته علي جبهت رعد وقال:وتخليها تكلمني اليوم قبل غدوة
رعد:كلمه هي
واول ماسكت رعد شد يد رائد وكان يبي يلويها ورا ضهره بس رائد سبقه وخبطه براسه لين رعد وخر وهوا يسب وبدو فيها عراك وتعنتير علي بعضهم والمشكله لما يحسو بوجع يضحكو هما الزوز ويزيدو .
قعدو يتعاركو ويمرمدو في بعض علي ارضية السطح وماوقفوش الا لما رعد بعد وهوا يوقف بمساعدت الكرسي وقال بنفس مقطوع:ال..... وقسم بالله ولد كلب خلاص فزت انت
اتكه رائد بيده علي الارض وضحك وهوا داهش...
__
.
.
شبح جلال لرنا لفتحت ميزان الضغط وقال:نتصل بمنذر
رنا هزت راسها بخوف وهيا تشبح لسعيده لشاده قلبها وباين عليها التعب ووجها اصفر
وقف جلال ومشي لداره يجري جاب تليفونه وجرب يتصل بولد عمه منذر بس يعطي فيه مقفل ، قرب من رنا لقريب تبكي وهيا ترعش مع بعضها وقال:رقمه مقفل
رنا:اتصل بعمي جماال باه بسرعة ياجلال بسرعة
حاول جلال يتصل بعمه بس القاه خارج الضغطيه وقعد يحاول يحاول بس شي شي وزادت حالة سعيدة ادهورت لين رنا قعدت تبكي وهيا تحول في ميزان الضغط من يد سعيده:ضغطها راقي هلباا
خاف جلال لقرب وقال:باه اتصلي بأمي بالك تجي هيا وعمي سمير
رنا وقفت:اي حق
وقفت وهيا اطلع في تليفونها وكيف بتتصل بأمها شرين تليفونها، واول ماشافاته محمد ردت وهيا تبكي:الو
ضيق محمد عيونه وقال:من معايا
زاد صوت بكي رنا:باللهي عليك تعالا حناي بتموت باللهي عليك ساعدنا احني لوصلتنا هداكا اليوم
خفف محمد سرعة سيارته:ماعندكن حد في الحوش قصدي عمك خالك حد موجود جنبكن
رنا:ماعندنا حد وعمي تليفونه ماباش يشد بكل وحناي بتموت وجها اصفر وضغطها راقي
محمد:تمام تمام نا قريب منكن شوي ونوصل
سكر محمد منها ولف بالسيارة وهوا يزيد من السرعة...
__
ساوا رائد تقعميزته وهوا يشبح لرعد ليتصل.
رائد:دير مكبر الصوت
رعد:ندير امك
وكيف جاي رائد بيتكلم انفتح الخط رد رعد طول وهوا يرفع في يده ويسكر في فم رائد بيده:الو
رنيم:ايوه
نزل رعد يده وهوا بيوقف بس رائد قال بتوشويش:تي وين ماشي
نفخ رعد ورد قعمز وهوا يسمع فيها تقول:الوو وينك
رعد:معاك معاك شني جوك
بتسمت رنيم:تمام الحمدالله
رعد:اي حتي اني الحمدالله
ضحكت رنيم:مسألتكش اني
بتسم رعد بس اول ماشبح لرائد لرافع حاجبه ويشبحله عبس وهوا ينفخ.
رئد:تي هيا من غير تمسيح شوخ افتح الموضوع
رعد:ااا رنين
ضحك رائد:اسمها رنين ههههه
شبحله رعد وفنص فيه لين رائد انسمط .
رنيم:من جنبك
رعد:لا حد
رنيم:اممم نعم شن تبي نديتني
رعد:هوا يعني انم مش عارف شن بنقول
رائد صيح:تي قولها خوي يبي اختك وانت تقول تحضر لدرة
تلفتله رعد وخبط رجل الكرسي برجله لين تكسرت ونقلب الكرسي برائد ههههه لعيط وهوا يشد في راسه لنخبط في الارض
رنيم:من جنبك يدوي
رعد:هدا انمي خوي ولد الكلب يبي اختك من الاخير نفخ امهم اعطيها التليفون غر يكلمها والا وربي اليوم نضل قاتله
رنيم ضيقت عيونها:كيف يكلم أختي ووين شافها هوا
رعد:تي من غير استعباط حتي انتي تي لمبكري انخلعتو منه تحسبوه جني اعطيها التليفون
رنيم:لا مانقدوش لازم نقولها قبل وبعدين من قالك موافقه اني اختي قعده صغيرة
رعد:حسستيني جايين بنخطبوها اختي قعده صغيرة تي بيتكلم معاها شوي وبتليفونك
سكتت رنيم شوي وبعدها قالت بجدية:لالا حول الفكوة من واسك وواسه
رعد:ماتسكريش امها انم كان جنبك اعطيها تكلمه شوي بس وربي ماهو طالقني ماتخلينيش نسب ونجدمر توا
غمطت رنيم عيونها بالقوة وفتحتهم طول اول ماانفتح باب الدار وهيا تشبح في نور لخشت وتصيح:تي تعالي حناي تسأل عليك
رعد:هيا لتعيط
رنيم:شوي بس
رعد:باهي
شبح رعد لرائد لواقف جنبه وقايم حواجبه بمعني شن صار وهوا شاد ضهرة لوجعه من الطيحه ، نفخ رعد وماردش عليه.
دارت رنيم كتم للمكالمه ووقفت قربت من نور لقالت وهيا مضيقه عيونها:هوا نفسه وله متع التليفون تفوه وماقلتيليش ياكلبه
رنيم:غر اسكتي تو اسمعي نقولك حاجه لكن اني مش واضيه عليها بكل
نور:شن هيا ان شاءالله بتهربي معاه امالا والله نتوقعها منك اديري مكبر
رنيم:مصح وجهك ياتافها ، لا خوه يبي يكلمك
فتحت نور عيونها:خو من
رنيم:تي لمبكوي شبحتيه وقعدتي تقولي قوينه هههه قصدي من غيو ضحك تبيش انتي وله
نور:اكيد لا
رنيم:ايوه هكي نبيك اني فكك من سويب لولاد
سكتت نور شوي وشبحت لرنيم لبتسمت براحه وهيا كيف بتتلفت وبتحول الكتم بس وقفتها نور:اي اي حلال عليك وحرام عليا ياقرده يامسخه فكيني من سريب لولاد لكن انتي مافكيكش تعالي جاي نبي نكلمه هي زيني زيك
رنيم:حماوة ماتعوفيشي كيف بتكلميه
نور:علي اساس انتي تعرفي كويس سبع البرمبه مه وبعدين اني مش زيك بنكلمه كلمتين وقص مش انتي طول اليوم كركر معاه
شدت رنيم علي قبضت يدها بعصبيه ونتبهت علي صوت رعد لينادي ، نفخت وحولت الكتم:ايوه
رعد:ساعتين انم تقول جاي بيتزوجها
نفخت رنيم:متزيدهاش حتي انت وعطيه التليفون وقوله ووبي ووبي هي كان يحتومش نفسه ويتكلم زين مع اختي لما نطوبقله وقبته بين عشوين
بتسم رعد علي كلامها:حاضو حاضو ههههه
قلبت رنيم عيونها ببتسامه فيسع ماحولتها وهيا تمد في التليفون لنور لقعمزت علي المندار وتربعت وهيا تاخد في التليفون من رنيم لقالت:حطي في الودن هدي باش نسمع
نور:بري روحي مافيش
فنصت رنيم:والله ناخده
نور:والله نفضحك
ضربتها رنيم علي راسها ووقفت بغل وخلت نور تحط في تليفون علي ودنها وتسمع في صوت رائد:الو
نور حست روحها فجأة تحشمت وتلبكت:ايوه
بتسم رائد طول:اهلين بنور العين
نور:تحشم
ضحك رائد:بسم الله قعدين في البداية هههه اسف ياودي شن الجو ها
نور بتسمت مع ضحكته وقالت وهيا تتحمحم ودير في روحها رزينه:الحمدالله ها شن تبيني قالولي تفضل شن تبي
رائد توتر وقعد يقول:ااااا هوا شن ااااا يعني
وبعدها تنهد:وترتيني ازح ههههه شن شن نبي نبي نكلمك نبيك حبيبتي عادي
رفعت نور حواجبها:شني
رائد:واللهي انتي خشيتي تسطربي خليتيها بشويه بشويه خيرلك
نور:انت ماتتحشمش وماعندكش لا اسلوب ولا منطق شن نولي حبيبتك هدي وانت ماليكش خمس ساعات تعرفني
رائد:خيرك بشوية ماقلت شي اني ره قصدي انك عجبتيني هلبا ونبي نبدا معاك علاقة
نور:كانك تحسبني من النوع الخفيف واللي تمشي علي العمياني راك غالط وخيي وجو علاقة ورتباط مش جوي
رائد:حشاك والله ماكان قصدي هكي ورب العزه كل لقلتيه ماخطر في بالي يابنت الناس خيرك انتي تفهمي بالمقلوي ، اني نبي نتعرف عليك
نور:واني مانبيش ومنبيش نجرب لا علاقة لا سو
رائد:ومن قالك اني نبي نجرب اني نبي بجديات ومن الاول نبيها علاقة دايما
نور:ايااه علينا دوة متكررة لكم بنت قلتها قبلي
رائد:لحنان وفتحيه وسلمي وسلوي واحلام ورنده وريحان
ومقصش عليه الا لما نور شهقت لين خلاته يضحك ويتكلم بسرعة:ههههه وربي نبصر عليك ههههه
نور:بجديات هدو كلهم كلمتهم
رائد:تحسبيني ماعندي شغلا لا عملة امالا هههه
نور بتسمت:عادي يطلع منكم اكبر من هكي ياودي
رائد:ههه حرام عليك شن اسم الكريم
نور بتسمت وقالت:نور
بتسم رائد وقعدو يحكو ويهدرزو ونور رتاحت ورتخت معاه في لكلام...
.
.
ياليت نستطيع التأقلم علي الفراق المحتوم ، مثل ماتأقلمنا العيش في بلاد حروبها لا تنتهي 💔
.
#يتبع_للبارت_لبعده
____________________________________
بداء كتــابة الرواية في تاريخ 2019 / أكتــ10ــوبر / 3
تم انهاء كتــابة الروايه في تاريخ 2020 / فبـــ2ـــراير / 3
اسم الاغنية/ مبروك عليك يابلادي لـ صلاح غالي