و اليوم نبدأ بأول قصة
الراعي الكذاب و في رواية اخرى الراعي الخراط
كان يامكان في مره زمان .. كان به زمان قريه صغيره
( عتكبر ان شاء الله )
هذي القريه كانت حاليه قوي .. والناس فيها بسطاء وعلى قد حالهم ..
وكان اكثرهم رعيه وفلاحين وبعد حالهم ..كانوا يشتغلوا في الوديان حقهم
وكان به ولـَيد في القريه كان يبز الغنم حقه وحق القريه ويبكر الصبح يرعاهن
في الجبل.. وبالعشي يردهن البيت
ذيه الراعي كان يرعي لحاله .. ومن كثر ماهو يجس لحاله .. كان يضنك
وفي مره من المرات .. طلعت في راسه فكره لكن فكره
قال خلني اضحك على اصحاب القريه شويه واطير الضبح ذيه ^_^
وهي .. وفعلاً قام وطلع فوق صغره وما نسمعلك الا ذيكه الصووووت !
ياغارتاااااااااااااااااااااه ..
الحقونيييييييييي !
السمع عياكل الغناااااااام .. السمع عياكل الغنم !!!
وما ندري الا والناس هذولك ذي يبز الصميل .. والي يبز الالي حقه ..
والي يبز المفرس .. والي يبز مدري ايش !!
ويجروا لااااعنده !
المهم سواله حشيره خلوه على الله
ولما وصلوا لعنده للجبل قالوا له :
ايش به ؟!
وين السمع !
وايش فيهن الغنم !
ايش فيك .. اتخابر ؟!!
والولد يضحاااااااااااااااك .. يبسر لعندهم ويضحااك
الخبره قدهم مفجوعين وحالتهم حاله والخبير يضحااك
المهم عرفوا بعدى انه خراااط /
فرجعوا للقريه وكل واحد رجع لشغله بعد ماوقعت لهم شربه لكن شربه الصدق
المهم ..
الوليد عجبته القصه ^_^
وكان كل يوم يسوي نفس الحكايه ..
كل يوم يصيح ويولول على الغنم !
وكان اهل القريه حقه في كل مره ينبعوا إصليه يبسروا مدري وهو صدق !
بس كان في كل مره يطلع خرط في خرط !
وفي مره من المراات كان الوليد الخراط ( العاصي والديه )
يرعي الغنم في الجبل ..
وفجئه يطلعوا له اربعه سماع !
والسمع الواحد منه اكبر من الحمار !!
وقدهم جااوعين قوي !
ويقربوا اصليه على شويه شويه !
الوليد ابسرهم ماهو ابتلد !!
ماعاد دري ايش يقول ..
وما نسمعلك الا والصوت حقه واصل للقريه الثانية
الحقوووونييييييييييييييييي
السمع عياكلني انا والغناااااااااام ..
الحقوووني ..
ياغارتاااااااااه .. ياغارتاااااااااه .. يامنعاااااااااااااه..
الحقووونيييييييييييييي !!
والناس بعد ماعرفوا انه خرااط ماعد قرحوله
ولا عاااد حد عبره ^_^
والوليد يتنبع في الجبل ويرجم السموع بالحجار ويصيح ويبكي
ويقوول :
الحقووونييييييي.. اهئ اهئ ..
والله ما اكذب عليكم ..
وااااااااااااع ..
ياباااااااااااااااااه ..
المهم قده حالته حاله . والسموع قدهم يقرطوا الغنم من شق !
والناس في القريه كل واحد يقول للثاني .. محد يصدقه ..
هذاااك واحد عاصي والديه .. خرااط ابن خراط !
جالس يضحك علينا كل يوم ويمكنا السمع اكل الغنم السمع اكل الغنم !
والله ماحدى عياكل الغنم الا هو !
خلوه يصيح لما يوجعه حلقه
ولا حد يعبره ..
خلوه كذيه لما يضنك ..
المهم ..
جزع الوقت ..
واذن المغرب والوليد ماعاد تروح !!
خرجت امه تدور عليه في القريه .. وتسأل عنه !
بس ماحد يعرف عنه شي !
قامت تصيح وتولول على ولدها ..
مابعدى قاموا بعض الناس ذي معاهم غنم عند الوليد يرعاهم قاموا يدوروا عليه
بعد العشااء .. والدنيا غدره !
بزوا معاهم التريكات حقهم وطلعوا الجبل يدوروا عليه !
جلسوا يدورا عليه .. يدورا عليه بالغدره ولا حصلوه ..
ما واحد ابسر حاجه بين الشجر !
وقام يصيح لهم ..
( جوا ابسروا ايش لقيت ! )
ماهم ساروا يبسروا الا وهو الشميز حق الوليد !
بزوا الشميز من الارض وطلع كله مشعط وحالته حاله !!
الخبره افتجعوا !
قاموا يدورا اكثر واكثر ماهم لقيوا حاجه فجعتهم كلهم !!
لقيوا عضاام وصوف بين الشجر ..
والدم مطعفر في كل بقعه !!
مابعد عرفوا ان الوليد يوم ماكان يصيح بالعصر كان صدق
وان السماع هجمت عليه وعلى الغنم واكلوهم !!
ماهم رجعوا للقريه وهم زعلانين على حقهم الغنم
اما الوليد محد زعل عليه !
تعرفوا ليّه ؟!
( لانه خراااااااط وكذاااب )
والكذاب محد يزعل عليه .. لانه يستااهل
وربنا قد عاقبه على الكذبه حقه
علشاان كذه ياحبايب ..
محد يكون يكذب على اي حد
لان الله سبحانه وتعالى حيزعل منه .. ويدخله النااار
وعيخلي الناس كلهم يزعلوا منه وماعاد يخابروووه
وبعدى يوقع فيه زي ماوقع للراعي الكذاب
وتوته توته تووووووووته خلصت الحتووووووته
حالية ولا شوووعه ؟!
