حظ وبخت

هاي قصه داخل قصه.
😁

مقطع منها..
شتكولون اكملها.. احب هاي القصص..

#حظ وبخت
اذكر امي كانت دائما تررد قصه سواد الليل بعد ما تفرش لنا بسطح وتسطرنا  وتحجي
وجانت من تححيها اضل ساعه اتصفن بيها.. واتخايل كل شي
ولتمنى يجيني الامير..

كان يا مكان في قديم الزمان
اكو مرة عدها بنات اثنين
وحدة بيضة مثل الثلج والثانيه سودة
مثل الفحم
وحدة اسمها بياض الثلج ووحدة اسمها سواد الليل

جانت يوميه تبجي ع حظ المكرودة السودة اتكول ربي
الي نطيتها حسن لا تنطيها بخت والي انطيتها بخت لا تنطيها حسن
كون حضج ياسودة بسما لايح
وكون حظج يا ملحه بالكاع طاح
حظ الملايج بالارض طايح وحظ القبايح بسما لايح
وبقت امهم تردد هالكلام وتدعي يوميه

فديوم
مر رجال دك بابهم..
طلعت بياض الثلج اله..
كالها
اتسقيني قليلا من الماء وان اكرمتني سوف اكرمك..
راحت جابت اله قربه المي ودارت اله شويه
وباديها خبز ولبن بس تخاف تطلع اله لان غريب

من بعيد جانت سواد الليل جايه..
وجايبه وياها ٣ تمرات لكتها واكعه. بالكاع..
ومسحتها بهدومها..ولفتها بخركه
تقربت شافت رجال بالباب فارس وع حصان ابيض
تقربت اله اكثر شافتة جميل جدا..
سواد الليل فوك بشرتها داكنه شعرها كان اشعث
تقربت منه..
اندار عليها..
اختها مدت اديها تقدم اله الطعام..
لكن هو ملتفت لسواد لليل..
كلها اسقيني قليل مم الماء وان كرمتني اكرمك
من دهشة جماله تعثرت..
وطارت من اديها التمرات استقرت بايد الفارس..
فتحها لكه تمرة..

#حظ وبخت

وطارت من اديها التمرات استقرت بايد الفارس..
فتحها لكه تمرة..
صحت ولج سواد الليل تعالي
سواد جانت واكفه وفاكه حلكها عليه..
الامير نزل من خصانه الابيض..
وبين طوله الفارع وطلته البهية
من ورة الباب شهكت ع حسنه وجماله..

تقرب من سواد الليل وثنى رجله وكعد كال
يا جميله..
بسمارك هذا لقد اسرتي قلبي
وبكرمك هذا اقسمت سوف تكونين
ملكه..
سواد عدلت شعرها ومسحت خشتها ونفضت هدومها
واندارت ع بياض
كالت كل الناس تتغزل بليل وهو اظلم
وتصير بي كل المحرمات والكبائر
ومحد يذكر النهار وهو اجمل وأنقى
هذا حظج يا بياض اسود مثل وجهي
وانا حظي ابيض مثل وجهج ..
لان قلبج مو صافي

وتكول امي..
جان تزوج سواد الامير.. وتخلف منه دسته جهال وكلهم حلوين وشكر.. وصارت ملكه ع العالم
يمه يمه اريد اصير ملكه
اندارت عليه كفختني..
اختي كالت كملي يمه وبياض صار منها

شوفن يمه بعد مدة هيج ماعرف شكثر بياض امها ماتت وهاي اختها السويدة ماتريدها لان مامصافيات بيناتهم
ناس تكول بياض خبيثه
وناس تكول سواد سحارة يمه
محد يرضى بقسمته دادة
وتالي
ضلت بروحها بلبيت
وتبجي لان حظها اغبر واختها الملكه  وتتكرضم الليل كله وتنوح ع حطها المصخم 
وجانت شسوي بنهار تصخم وجهها بفحم وتطلع بالجن الحظ يعدل وياها وتشتغل بساكيه تحمل مي للبيوت..
فديوم..
كعدت كبال النهر.. ويمها زرع وخضار
غسلت وجهها..
وتبجي وتدعي يارب حست حظي
واجعله عالي ويلاي.

اتجعله نجم يضوي بسما..
وكعدت طلعت بقجتها وطلعت وذرة خبزة وتمرة
بعد ما التعب اخذ منها حيل..
وتذكر ايام امها وسواد الليل
شلون جانت تكرهها وتحاربها
وترجع ويا كل كسرة لكمه دمعه

حست اكو شخص يباع عليها من ورة الشجرة
غطت روحها وكامت
صاحت منو هنا منو
طلع الها من بعيد.. رجال جبير ضخم واصلع
تقرب منها. كال بس شويه مي ابل ريكي. راح اموت
عاطت اذا توصل اكتلك
روووح
يتقرب اكثر كلها جوعان وعطشان صار ايام مماكل  جان يحجي وينزل من حلكه مي
شكله بشع
اترجاج
كالت انت قبيح متستحق حتى تعيش
وشمرت الاكل وذبته بنص النهر..
صارت دوامه بالبحر جبيرة هالكبر
وغيمت الدنيا
وطلع من البحر مارد... لونه ازرك مثل المي صافي وعيونه تلمع

بياض جفلت..
كلها..
اني مارد امنيات البحر..
ودزيت الج هذا الفارس حتى اشوفج تستحقين
اندارت..
واتحول الوحش الى امير جميل جدا
بقت ترجف وتبجي..
اني ما اقصد..
كلها لا تقصدين.. اختج من ازوجت الامير نيتها ابيض منج رغم هي سودة
وانتي نيتج جانت اسود من وجهها

راح تبقين ماعندج بخت وراح تحكمين ع كل نفس لون بشرتج
لسنين طويلة
واختفى المارد والفارس
ورجعت بياض تبجي..
اي يمه كملي..
ولجن شكمل بعد وبعد..
يعني بياض صدك خبيثة..
لا يمه هو كلنا هيج نحكم ع الظاهر ونعوف الجوهر
دكملي..
باجر اكمل الكم..
نامن يا مسعدات عساجن بخت سواد الليل
😊
سالوفه لليل
♥️