رسالة من مجهول 📝💖

الحلقة العاشرة

الحلقة العاشرة
#رسالة_من_مجهول
#بوسى_مصطفى
_______________

في الكافيه
هيثم : خلاص ياسيف اهدي بقى هيجرالك حاجه ياابني
مفيش حاجه تستاهل كل ده
سيف : فعلاً مفيش حاجه مستاهله
علشان كده هريحكم مني خالص
هيثم : انت مجنون! ..
اعقل ياابن عمي... كفايه اللي باباك فيه
متزودش الحمل عليه اكتر من كده
سيف : حمل ايه!
انا اللي شايل ذنب مش ذنبي
انا اللي طول الوقت بتحاسب على حاجه انا معملتهاش
عارف ياهيثم لما اترفض تعييني في الجامعة واتعين مكاني ابن الدكتور اللي كان بيدرسلي في الكلية
وقتها احتسبنت عليهم وحسيت بالظلم
وإن مليش مكان علشان معييش واسطه ولا ابن دكتور
بس  الاحساس اللي حسيته وقتها ميجيش واحد في المية من اللي انا حاسه دلوقت
علشان المرادي قلبي هو اللي اتكسر
عارف لما تبقى ظالم ومظلوم في نفس الوقت
مش قادر تدافع عن نفسه من تهمه انت نفسك بتستحقرها لكن مش قادر تشيل الظلم عن نفسك
وعاذر اللي ظلمك واخدك بذنب انت ملكش يد فيه
انا مش عايز اكمل
انا لازم اسيب الدنيا بقى... علشان تعبت
تعبت من كل حاجه حواليه مصره إنها توقعني وتذلني
انا مفيش قدامي غير حلين ملهمش تالت
ل إما اسافر وابعد عن البلد دي علشان اقدر اتنفس
ل اما اموت نفسي واستريح بقى
هيثم : عبيط!... وانت فاكر لما تموت نفسك هتستريح
وحتى لو سافرت بره مصر مش هتلاقي راحه كمان
اعقل ياسيف
سيف : مش هستريح انا عارف بس هيبقى اهون من اللي انا فيه دلوقت
هيثم : يعني الموضوع إياه دا خلاص انتهى كده؟؟
سيف : مين عاقل هيجوز بنته لواحد في ظروفي
انا بس اللي شطحت بدماغي
إن اللي زيي ممكن يدخل بيت محترم ويقبل بيه عريس لبنته
هيثم :"لا ياسيف في كتير اوي
وانا أولهم
سيف : روح شوف حالك يا هيثم وسيبني في حالي
هيثم : لا هتيجي معايا... عمي قلقان عليك اوي
سيف : طمنه وقوله اني لسه عايش
ميقلقش عليه
هيثم :" ارجع البيت ياسيف علشان خاطر باباك.. وبعدين انت مش عندك شغل
سيف بسخريه : شغل ايه ياابن عمي
انا اتحولت للتحقيق
واكيد هترفد يعني
هيثم : اتفائل خير
سيف : روح بقى علشان تطمن بابا
هيثم : انت اللي هتطمنه بنفسك
يلا بقى
اطلع قدامي بالعربيه وانا وراك
سيف : ياابني قولتلك مش هرجع البيت ع الاقل دلوقت
علشان خاطري متتعبنيش بقى
هيثم : طب قولي انت قاعد فين دلوقت
سيف :"قاعد في الدنيا ارتحت
هيثم : في الدنيا اللي هي فين يعني
سيف : خلاص لو مش هتمشي
همشي انا... سلام
وركب سيف عربيته وساق بسرعه
سيف من شباك العربيه : متحاولش تيجي ورايا علشان مش هتلحقني
هيثم بصوت عالي : ابقى كلمني طمني عليك
كان سيف اختفى من قدامه
هيثم : يعني اروح اقول لعمي ايه انا مش فاهم؟!
تاني يوم الصبح في منزل ابراهبم
ابراهيم : هههههههههههههههه
عاليه : للدرجادي فرحان ياابراهيم
ابراهيم : هههههههه عارفه اني مصدق اللي حصل هههههههه
كنت قاعد عمال افكر واسأل نفسي
هتعمل ايه ياابراهيم
وبنت اختك موافقه على الجدع دا
واختك كمان مرحبه بالموضوع وعايمه على عوم بنتها
اروح الاقي المصايب نازله فوق دماغه
لأ وايه مش مصيبه واحده
الواد دخل السجن وهيتحقق معاه ويمكن يتفصل من شغله
والمصيبه الأكبر بقى هي امه
عاليه : دا اللي مش قادرة اصدقه ياابراهيم
معقوله دكتور زي دا وأمه بتشتغل الشغلانه دي
ايه هو ابوه معهوش فلوس يصرف عليها ولا ايه
ابراهيم : ابوه مين
الست دي متطلقه من الراجل من زمان والولد كان صغير
ولاقيت نفسها خلاص بقى مفيش راجل ولا كلام من دا
ف اشتغلت الشغلانه دي
دا بيقولوا بتكسب منها دهب
عاليه : هههههههه بتفكر في ايه ياراجل
ابراهيم : لا م خلاص بقى راحت عليكي
عاليه : نعم،!
يعني ايه... هو انا كبرت ياراجل اوي كده
ابراهيم : هههههههه يعني مسكتي في دي
وم اخدتيش بالك من حاجه تانيه
عاليه : هههههههه اهلي كانوا يقطعوني يااخويه
ابراهيم : لا اهلك مكنوش هيقطعوكي ياعاليه ولا هيلمسوكي حتى
علشان انا هكون سبقتهم وخلصت عليكي
عاليه :"هههههههههههه ايه ياراجل انت صدقت ولا ايه
ابراهيم : امال انتي فاكره ايه ياحبيبتي؟!
احنا رجاله اوي...
عاليه : وسيد الرجاله كمان
لسه بتحبني ياابراهيم
ابراهيم : لو لينتي دماغ ابنك هحبك اكتر
عاليه : هو انت مش كلمته قبل كده وقالك إنه موافق
ابراهيم : ابنك كان بيهاودني
دا انا لما قولتله في واحد متقدم ل أميرة بنت عمتك
كانت الدنيا مش سيعاه من الفرحه
طمنيه بقى وقوليلي أميرة بنت عمتك ليك ومحدش هيتجوزها غيرك
عاليه : تصدق ان الواد صعبان عليه
ابراهيم : يصعب عليكي ليه؟!
دا انا ب أمنله مستقبله
ولا عايزاه يتجوز من عيله كحيانه تجيبله الفقر
عاليه : وانت روحت فين بس ياابراهيم
م دا يااخويه في الاخر بتاعهم
هو احنا يعني هناخد حاجه لينا
ابراهيم : ملوش حاجه عندي غير لما يتجوز بنت عمته
فهميه كده
عاليه : بالعافيه يعني
ابراهيم : لا مش بالعافيه ياعاليه بالعقل والعقل بيقول
إنه أولى ببنت عمته وفلوسها
ولا يجي واحد غريب يقش كل حاجه
عاليه : اهو زمانه جاي من المدرسة ابقى كلمه
انا داخله اشوف الاكل
إلا بالحق انت منزلتش الشغل النهاردة ليه
ابراهيم : شويه ونازل اعمليلي كوباية شاي
عقبال م اجمع الحسابات دي
عاليه : حاضر
____________